1 Migkaǥi is Nengazen kayi te kedì te, 2 “Sikew is etew, keǥiyi nu is pengulu te Tyre he iyan a, is Nengazen he MEGBEVAYÀ migkaǥi te: Tenged te kebpelavew nu migkaǥi ka he sevaha ka he megbevayà he mibpinuu ziyà te pinuuwà te hadì he ziyà te teliwazà te zaǥat. Piru iyan benar is, minsan mid-isip nu he metau ka iring te megbevayà, ne kenè ka Megbevayà, kekenà, etew ke zà. 3 Egkeisip nu he edhuna ke pa he metau ki Daniel, ne wazà id-eles he kenè nu egketuenan. 4 Pinaaǥi te ketau nu wey keuluwanen midsepian ka wey neketiǥum ka te mahabet he menge vulawan wey pelata ziyà te teleǥuey nu te ketiǥeyunan nu. 5 Ne pinaaǥi zaan te ebilidad nu te kednigusyu, neumanan pa is ketiǥeyunan nu, ne tenged te ketiǥeyunan nu nehimu ka he mepelevawen. 6 Umbe, iyan a, is Nengazen he MEGBEVAYÀ migkaǥi te: Geina te mid-isip nu he metau ka iring te Megbevayà, 7 ibpesurung ku sikew te menge ebpuun diyà te zuma he lugar, he utew mesipala kenà te ebpemuun diyà te langun he menge nasyun. Edèdeetan dan is kekempet he naangken nu tenged te ketau nu, ne egkaawà is dengeg nu. 8 Mesakit he kemetayen is ibpatey nu, ne edlenezen ke zan diyà te kinezeleman te zaǥat. 9 Ne ed-ahaan ta ke ebpekekaǥi ke pa ǥihapun diyà te etuvangan te menge edhimatey kenikew te Megbevayè ka. Etew zà is ked-isipa zan kenikew ne kenà Megbevayà. 10 Iyan edhimatey kenikew is ebpuun diyà te sengelulugar en. Iring is kemetayen nu te kemetayen te etew he wazà medtuu kediey. Egkeula-ula iyan heini, su iyan a, is Nengazen he MEGBEVAYÀ, is migkaǥi kayi.”

11 Mid-uman megkaǥi is Nengazen kayi te kedì te, 12 “Sikew is etew, kanta ka te kentahan te kedlelawi te hadì te Tyre. Keǥiyi nu sikandin he iyan a, is Nengazen he MEGBEVAYÀ migkaǥi te: Dengan petug-iringan ka te wazè din kurang. Metau ka wey utew mekempet. 13 Diyè ke zengan te Eden, he pemuleey te Megbevayà. Mideyzeyanan ka te nekedseselekawà he kelasi te mahalen he menge vatu: rubi, tupasyu, ismiralda, krisulitu, uniks, haspi, sapiru, turkisu, wey biril. Mideyzeyanan ka zaan te vulawan he in-andam en dutun te andew te kedlimbaǥa kenikew. 14 Pinilì ku sikew he kirubin he mid-urdinahan ku he perevantey te segradu he vuntud ku. Midhipanew ka ziyà te pid-elangan te ed-ilak-ilak he menge vatu. 15 Wazà igkesawey kenikew puun te andew te kedlimbaǥa kenikew taman te mibaal ka te mezaat. 16 Is mahabet he petiǥayun nu nehimu he hinungdan te kegkemesipala nu, ne mibaal ka te salà. Umbe midsegseg ku sikew puun te segradu he vuntud ku; impaawè ku sikew is kirubin he perevantey puun te ed-ilak-ilak he menge vatu. 17 Nehimu ka he mepelevawen tenged te kekempet nu, ne migamit nu is ketau te tinulebung para mevantug ka. Umbe intimbag ku sikew ziyà te tanà, ne nehimu ka he edtengtengan te zuma he menge hadì. 18 Tenged te mahabet he menge salè nu wey kebpenlimbung nu ziyà te petiǥayun nu, mibpendezeisey nu is menge lugar he zutun ka ed-azap. Umbe ziyà te etuvangan te langun he edtengteng kenikew imperiyubriyub ku is hapuy ziyà te lugar nu ne nevinsulan ka. Nehimu ke zà he avu ziyà te tanà. 19 Is langun he menge etew ziyà te menge nasyun he nekekilala kenikew ingkahandek dan is nepengkusan nu. Mekahandekhandek is ketepusan nu, ne egkahanew ke en taman te taman.”

20 Migkaǥi is Nengazen kayi te kedì te, 21 “Sikew is etew, sinaru ka ziyà te Sidon ne keǥiya nu is menge lalag he ebpekesuǥat kayi. 22 Keǥiyi nu is Sidon he iyan a is Nengazen he MEGBEVAYÀ migkaǥi te: Migkuntada ku sikew is Sidon. Edeliǥen a te menge etew emun edsilutan ku en sikew, ne egketuenan dan he iyan a Nengazen, wey egkeehè dan is kegkewaǥas ku. 23 Ebpeeǥiyan ku sikew te limas he tenged dutun edalem is lengesa ziyà te menge zalan nu, utew mahabet is ebpematey he menge meǥinged diyà te kenikew. Ne zutun egketuenan dan he iyan a Nengazen.

24 “Dutun he timpu wazè en menge etew ziyà te menge nasyun he siringan te Israel he edsudì te menge Israilihanen he ebpekepesakit kandan he iring te medidis menge zuǥi. Ne egketuenan dan dutun he iyan a Nengazen he MEGBEVAYÀ.”

25 Migkaǥi zaan is Nengazen he MEGBEVAYÀ te, “Ed-umanan ku te edtiǥum is menge etew te Israel puun te menge nasyun he zutun sikandan mekepeyapat. Pinaaǥi kandan igkepetuusan ku ziyà te menge nasyun is kegkewaǥas ku. Dutun he timpu ebpekeubpè en is menge Israilihanen diyà te keugelingen dan he tanà, he iyan kes tanà he imbeǥey ku ziyà te suluǥuen ku he si Jacob. 26 Ebpekeubpè dan dutun he melinawen. Ebangun sikandan te menge valey wey ebpemula te menge paras. Wazè en edsamuk kandan emun edsilutan ku en is menge etew ziyà te langun he menge avey zan he nasyun he mid-undaunda kandan. Ne egketuenan dan he iyan a Nengazen he Megbevayè dan.”

<- Ezekiel 27Ezekiel 29 ->