1 Migkaǥi is Nengazen kayi te kedì te, 2 “Sikew is etew, sinaru ka ziyà te Ammon ne keǥiya nu is menge lalag he ebpekesuǥat kayi he lugar. 3 Keǥiyi nu is menge meǥinged keniyan he mebpemineg dan kedì, su iyan a, is Nengazen he MEGBEVAYÀ migkaǥi te, ‘Tenged te ingkelipey niw is kegkerundus duen te simbahan he valey ku wey is kegkezeeti te Israel, wey kegkevihag te menge etew ziyà te Juda, 4 ibpesakup ku sikiyu te menge etew ziyà te edsilaan, ne ed-engkenen kew zan. Egkampu sikandan diyà te keniyu, ne egkeenen dan is menge prutas niw wey ed-inumen dan is gatas niw. 5 Edhimuwen ku he penebtavà te menge kemilyu is inged he Raba, ne is tivuuk he Ammon edhimuwen ku he himelayà te menge kerehidu. Ne zutun egketuenan niw he iyan a Nengazen.’

6 “Iyan a, is Nengazen he MEGBEVAYÀ migkaǥi te, ‘Geina te mibpelakpak kew wey midlinglingketew kew tenged te kegkelipey niw zutun te kedsudia niw te Israel, 7 edsilutan ku iyan sikiyu. Ibeǥey ku sikiyu ziyà te zuma he menge nasyun he ed-aǥew te menge azen niw. Ebpurungan ku sikiyu edèdeeti taman te wazè en egkesamà keniyu he egkehimu he nasyun. Ne egketuenan niw he iyan a Nengazen.’ ”

8 Migkaǥi is Nengazen he MEGBEVAYÀ te, “Is Moab he migngezanan daan te Seir, egkaǥi is menge meǥinged duen te iring dà daan is Juda te zuma he menge nasyun. 9 Umbe, iyan a metau he surunga is menge inged diyà te dulunà te Moab, ragkes en is lavew he menge inged dan iring te Bet Jeshimot, Baal Meon, wey Kiriataim–kes menge inged he ebentuǥen dan. 10 Ibpesakup ku sikandan te menge etew ziyà te edsilaan, ne ed-angken heini kandan iring te ked-engkena zan te menge tig-Ammon. Ne is kenà kegkilelaa te menge tig-Ammon he sevaha te menge nasyun, ne iyan daan egkehitavù diyà te Moab. 11 Edsilutan ku is Moab, ne egketuenan dan dutun he iyan a Nengazen.”

12 Migkaǥi is Nengazen he MEGBEVAYÀ te, “Nenimales is menge tig-Edom te menge tig-Juda, ne tenged kayi nekesalà is menge tig-Edom. 13 Umbe iyan a, is Nengazen he Megbevayà, migkaǥi te edsilut a ziyà te Edom ne ebpenhimetayan ku is menge etew kayi wey menge uyaǥen. Edhimuwen ku is Edom he mekevulungbulung he lugar puun te Teman taman te Dedan, ne ebpematey te tebek is menge meǥinged kayi. 14 Ebelesan ku is Edom pinaaǥi te menge etew ku he Israilihanen. Edsilutan dan is menge tig-Edom te sungkad te utew ku kegkepauk, ne egketuenan te menge tig-Edom is paaǥi te kebales ku. Iyan a, is Nengazen he MEGBEVAYÀ, is migkaǥi kayi.”

15 Migkaǥi is Nengazen he MEGBEVAYÀ te, “Mibpelanu is menge tig-Filistia te kebpekigkuntada te menge tig-Juda su egkesuat dan he ebales wey neuǥet en is kedumuti zan kayi he menge etew. 16 Umbe iyan a, is Nengazen he MEGBEVAYÀ, migkaǥi he edsilutan ku is menge Filistihanen. Ebpenhimetayan ku is menge tig-Keret wey is duma pa he menge ebpemen-ubpà diyà te veyvey te zaǥat. 17 Tenged te pauk ku ebelesan ku sikandan wey edsilutan. Ne emun egkevelesan ku en sikandan, egketuenan dan he iyan a Nengazen.”

<- Ezekiel 24Ezekiel 26 ->