1 Hein ikesepulù he andew te ikesepulù he vulan, dutun te ikesiyam he tuig te kegkevihaǥa kenami, migkaǥi is Nengazen kayi te kedì te, 2 “Sikew is etew, isurat nu is pitsa kayi he andew, su kayi he andew ebpuun en edsurung diyà te Jerusalem is hadì te Babilonia. 3 Ne tudtula nu heini he sempità diyà te menge etew te Israel he menge mesinupaken, ne ipetueni nu kandan he iyan a, is Nengazen he MEGBEVAYÀ, migkaǥi kayi:

“Diken ka te kitang ne teǥui nu te wahig. 4 Ilunud nu zutun is meupiya he vahin te usa, menge pemenayen wey menge vuvun. Iragkes nu zaan is menge tulan. 5 Iyan nu zà gemita is usa he ebpuun diyà te kineupiyahan he kerehidu. Tevuni nu is kitang ne leuyaha nu haazà is usa wey is menge tulan. 6 Su iyan a is Nengazen he MEGBEVAYÀ migkaǥi te: Mekehizuhizu is inged he Jerusalem he teremunù is menge meǥinged duen. Iring heini te tengisen he kitang he wazà melumpiyuwi. Ne tigseselimbahaa nu te egkuwa is taǥù kayi ne kenè nu erama. 7 Su is kebpenhimatey zin nekeleduwan te langun. Is lengesa te mibpenhimetayan din mibey-anan din dà diyà te menge vatu he egkaahà te langun. Wazè din ganì heini vunbuni te tanà. 8 Neehè ku heini he lengesa ne mibey-anan ku heini zutun te menge vatu he maahà te langun, ne henduen be te ebpengulahì heini is edhangyù he iyan a mebales.”

9 “Umbe iyan a, is Nengazen he MEGBEVAYÀ migkaǥi te: ‘Mekehizuhizu is inged he Jerusalem he teremunù is menge meǥinged duen! Iyan a mismu edtambù te mezakel he idtavun te kebinsuli zuen. 10 Sigi, umani niw pa is idtavun, ne retemi niw te hapuy. Peneketi niw wey leuyaha is usa taman egketutungan is menge tulan. 11 Ne iziken nu is kitang he wazè din en taǥù diyà te vaǥa taman te egkevaǥa zaan heini. Paaǥi heini te kedlumpiyuwi zuen te kitang ne egketutung is tangis din. 12 Piru minsan ebmenmenuwen nu pa haazà is tangis, ne kenà heini egkaawà pinaaǥi te hapuy.

13 “ ‘He Jerusalem, is mahawag he vaal nu iyan nekeremerik kenikew. Neninguhà a te kedlumpiyu kenikew, piru wazè ka mebpelumpiyu. Umbe kenà egkaawà is keremerik nu taman te kanà egkaawà is kegkepeuki ku kenikew. 14 Iyan a is Nengazen migkaǥi he neume en is timpu he iyan ad edwaleng te kedsilut, ne wazà ebpekeeǥen kediey. Kenè ku sikiyu egkehizuwan, ne kenè en egkahalin is isip ku. Edhukuman kew tenged te vetasan niw wey menge vaal niw. Iyan a, is Nengazen he MEGBEVAYÀ, is migkaǥi kayi.’ ”

15 Migkaǥi is Nengazen kayi te kedì te, 16 “Sikew is etew, sengekebperè dà ne edtik-awan ku egkuwaa is bahi he utew nu mibmahal. Piru kenè nu sikandin sineǥawi ne kenè ka seengseeng para kandin. 17 Diyè nu zà te ǥehinawa nu izag-es is kesakit kayi. Kenè ka lalew. Kenè nu puwasa is tengkulu nu wey kenè nu pul-uta is sandalyas nu, wey kenè nu tembuni is buked nu te kebpaahà he neseeng ka. Kenè ka zaan kaan te menge keenen he para te edlalew he mibpetayan.”

18 Ne hein meselem en migkaǥi ku haazà diyà te menge etew, ne kegkezukilem dutun minatey is esawa ku. Ne hein meselem en maan midtuman ku is insuǥù kedì. 19 Ne mid-insà is menge etew kayi te kedì te, “Hengkey is ibpesavut nu keniyan te mibeelan nu?” 20-21 Midtavak ku sikandan te, “Migkaǥi is Nengazen he MEGBEVAYÀ kayi te kedì he keǥiya ku heini ziyà te menge etew te Israel: Andam ad he ebpendezeisey zuen te valey ku he dengepè niw, ebentuǥen niw, mahal niw, wey kelipey niw. Ebpematey te tebek is menge anak niw he nesamà diyà te Jerusalem. 22 Ne ebeelan niw is mibeelan ni Ezekiel. Kenè niw tembuni is buked niw, ne kenè kew egkaan te keenen he para te edlalew he mibpetayan. 23 Kenè niw zaan ebpuwasen is tengkulu niw wey kenè niw ebpul-uten is sandalyas niw. Kenè kew edsineǥew wey edseengseeng. Edluyahan kew tenged te menge salè niw, ne pesizag-es kew zà. 24 Is nehitavù ki Ezekiel egkehimu he petug-iringan niw. Is mibeelan din iyan daan ebeelan niw. Ne emun egkehitavù en heeyan ne egketuenan niw he iyan a Nengazen he MEGBEVAYÀ.”

25 Mibpedayun megkaǥi is Nengazen te, “Sikew is etew, emun timpu en te kedrundusa ku zuen te valey ku, he eputè dan, he ebentuǥen dan, utew zan mahal, wey kelipey zan, ne emun ebpenhimetayan ku he is menge anak dan, 26 duen sevaha he etew he ebpekepelaǥuy puun te Jerusalem ne edtudtulen din heini kenikew. 27 Dutun he timpu ebpekekaǥi ke en maan ne ebpekesineǥew kew is dezuwa. Egkehimu ka he petizaan diyà te menge etew, ne egketuenan dan he iyan a Nengazen.”

<- Ezekiel 23Ezekiel 25 ->