1 Ne migkeǥiyan te Nengazen si Moises te, “Hendiyè ka te hadì te Ehipto ne keǥiyi sikandin te, ‘Iyan heini migkaǥi te Nengazen, is Megbevayà te menge Hebriyuhanen: Tuǥuti nu is menge etew ku te kegenat su wey zan mekaazap kedì. 2 Ne emun kenè nu pa sikandan edtuǥutan he mekeǥenat, 3 ne zuen meveǥat he ibpigada ku he iyan is kebpematey te menge uyaǥen nu ziyà te vevesukà–ebpematey is menge kudè niw, menge asnu niw, menge kemilyu niw, menge vaka niw, menge kerehidu niw, wey menge kambing niw. 4 Iyan, ibpebiza ku is menge uyaǥen te menge Israilihanen wey is menge uyaǥen te menge Ehiptohanen, su wazà mulà ebpatey he uyaǥen te Israilihanen.’ ” 5 Midtelaan te Nengazen is timpu, ke sikandin te, “Keeselem ku heini ed-ul-ulaha kayi he tanà.” 6 Ne hein sunud en he andew mibeelan en te Nengazen haazà: mid-amin mebpematey is langun he uyaǥen te menge Ehiptohanen. Piru wazà mulà mepetayi te minsan sevaha is uyaǥen te menge Israilihanen. 7 Ne zuen impesusi te hadì te Ehipto he menge etew ke zuen be nemematey te uyaǥen te menge Israilihanen. Piru minsan ke netuenan din en he tutuu heini, iyan, wazà mahalin is gehinawa zin, ne wazè din gihapun tuǥuti te kegenat is menge Israilihanen.

8 Ne migkaǥi is Nengazen diyà te ki Moises wey ki Aaron te, “Kuwa kew te tigsengekemkem he avu ziyà te repuǥà ne haazà ibpesimburà ki Moises diyà te hewhewanan dutun te egkeventayan sikandin te hadì. 9 Ne egkehimu haazà he eliyavuk ne haazà ebpekeeneb te tivuuk he Ehipto, ne pinaaǥi zutun ebpenlevaǥan te menge levag he ednanà is menge etew wey menge ayam kayi he tanà.” 10 Umbe, migkuwa sikandan te avu ziyà te repuǥà ne midhitindeg sikandan diyà te etuvangan te hadì. Insimburà haazà ni Moises diyà te hewhewanan, ne zutun mibpenlevaǥan te menge levag he ednanà is menge etew wey menge ayam. 11 Ne wazè en mekepeǥiewǥiew ziyà te ki Moises sikan is menge selemengkiru su mibpenlevaǥan en daan sikandan iring te langun he menge Ehiptohanen. 12 Ne haazà he singyal, midhimu te Nengazen he kenà gihapun med-uteng diyà te ǥehinawa zutun te hadì. Umbe wazè din gihapun pemineǥa si Moises wey si Aaron, su iyan haazà migkaǥi he zaan te Nengazen diyà te ki Moises.

13 Migkaǥi is Nengazen diyà te ki Moises te, “Selemselem ka enew keeselem ne etuvanga nu is hadì, ne ke sikew ziyà te kandin te, ‘Iyan heini migkaǥi te Nengazen he iyan Megbevayà te menge Hebriyuhanen diyà te kenikew: Tuǥuti nu te kegenat is menge etew ku su wey zan mekaazap kedì. 14 Ne emun kenè nu sikandan edtuǥutan, ne ibpeiseg ku en is keveǥat te menge pigada ku kenikew, ragkes is menge upisyal nu wey is tivuuk he gin-etawan nu su wey nu metueni he wazà ebpekerepeng kedì kayi te tivuuk he kelibutan. 15 Ne minsan dengan ke mid-amin ku sikiyu limasa is menge Ehiptohanen pinaaǥi te zaru, ne egkehimu ku ne wazè ke en pezem guntaan. 16 Iyan, intuǥut ku he meuyag-uyag ka para kayi he ketuyu-an: su wey nu maahà is gehem ku ne wey a mevantug kayi te tivuuk he kelibutan. 17 Piru kemulu nu egkuntedaha is menge etew ku, wey kenè nu sikandan edtuǥutan te kegenat. 18 Umbe keeselem, te iyan ded heini he uras, ibpeuzan ku te ǥiyew he utew gerabi, he wazè pa keenu meseǥazi puun te kegketukud te Ehipto. 19 Umbe, kinahanglan he segugunè ka suǥù he ipemeseled is langun he menge uyaǥen nu wey is langun he menge uripen nu he ziyà te vevesukà, su is langun he ziyà te ǥawas, etew man etawa uyaǥen, ne ebpematey emun egkeuluǥan te ǥiyew.’ ” 20 Ne tenged te nekaǥi te Nengazen, nengahandek is duma he menge upisyal te hadì te Ehipto, umbe inggaanggaan dan ipemeseled is menge uripen dan wey is menge uyaǥen dan. 21 Piru sikan is duma he wazà medseǥipà dutun te migkaǥi te Nengazen; ne ziyè dà mulà te gawas is kandan he menge uripen wey menge uyaǥen.

22 (Ne hein iyan en timpu te kedtumana te Nengazen duen te lalag din) migkeǥiyan din si Moises te, “Ivayew nu en is tuked nu pehendiyà te zivavew su wey mengeulug is giyew kayi te tivuuk he Ehipto su wey meuluǥi is menge etew, menge uyaǥen, wey is langun he menge pinemula.” 23 Umbe, hein imbayew ni Moises sikan is tuked din diyà te zivavew, impepemeransì te Nengazen, impeuzan te giyew, wey impepengilat. Is menge uzan he ǥiyew he impeuzan te Nengazen diyà te tanà he Ehipto, 24 iyan utew gerabi puun te kegkehimuwa te Ehipto he nasyun. Ne zutun te ebpenggiyew, edtulung en daan ebpengilat. 25 Nekeeneb diyà te Ehipto is giyew ne nekezezaat te menge etew wey menge uyaǥen he ziyà te ǥawas, ragkes is langun he menge pinemula wey menge kayu. 26 Iyan dà wazà duen giyew is tanà he Goshen he zutun ed-ubpà is menge Israilihanen.

27 Ne mibpesuǥuan te hadì si Moises wey si Aaron. Ne ke sikandin diyà te kandan te, “Guntaan netuenan ku en he nekesalà a; netuenan ku he ebpekevenar is Nengazen ne iyan a nesayep wey is menge etew ku. 28 Iampù niw ziyà te Nengazen he ipeengked din en heini is gerabi he veransì wey giyew. Ne human ku en sikiyu edtuǥuti te kedhipanew; kenè kew en ereg he ed-ubpè pa kayi.”

29 Ne midtavak si Moises te, “Kengkuwan te kebpekeǥawas ku kayi te inged, ibayew ku is belad ku su ed-ampù e en diyà te Nengazen. Ne ed-engked is menge veransì ne egkaawà is giyew, su wey nu metueni he gaked te Nengazen heini is kelibutan. 30 Iyan, netuenan ku en he sikew wey is menge upisyal nu, ne kenè kew pa ǥihapun egkahandek te Nengazen he Megbevayà.”

31 (Nezeetan is menge pinemula zan he flax wey barli su zutun he timpu, nelutuan en is menge barli ne nengevukad en is menge flax. 32 Ne is menge trigu wey is sintinu wazà mulà mezeeti su nehuziyan.)

33 Ne mid-ewaan ni Moises haazà is hadì, ne migawas sikandin dutun te inged. Imbayew zin is menge velad din te ked-ampù diyà te Nengazen; ne mid-engked is beransì, is kebpenggiyew, wey is uzan. 34 Ne hein naahà dutun te hadì he mid-engked en is uzan, is giyew, wey veransì, ne mid-uman en maan sikandin mebpekesalà. Impemezesen din wey te menge upisyal zin is gehinawa zan. 35 Ne tenged te kezesen te gehinawa zin ne wazè din ipeǥenat is menge Israilihanen, sumalà te nekaǥi te Nengazen pinaaǥi ki Moises.

<- Exodus 8Exodus 10 ->