1 Ne midhendiyà si Moises wey si Aaron te hadì te Ehipto, ne migkeǥiyan dan te, “Iyan heini migkaǥi te Nengazen he Megbevayà te Israel: ‘Tuǥuti nu he mekeǥenat is menge etew ku, su wey zan mekesilibra te pista para kedì diyà te sibsivayan.’ ” 2 Ne migkaǥi is hadì te, “Hentei is Nengazen he ebpepezumdumahan niw kedì is lalag din he tuǥuti ku is menge kevuwazan ni Israel te kegenat? Wazè ku mekilala is Nengazen ne kenè ku edtuǥutan is menge kevuwazan ni Israel te kegenat.” 3 Ne midtavak si Moises wey si Aaron te, “Nekidhinguma kenami is Megbevayà he ed-ezapen dey te menge Hebriyuhanen. Ne tuǥuti key kenikew te kedhipanew seled te tetelu he andew su edhendiyè key te sibsivayan su ebpemuhaten dey is Nengazen he iyan Megbevayè dey, su emun kenè dey heini ebeelan, ne ebpenhimetayan key zin pinaaǥi te zaru etawa tebek.” 4 Iyan, migkaǥi haazà is hadì te Ehipto te, “Moises wey Aaron, maan is ibpeengked niw is menge etew te terebahu zan? Likui niw is keniyu he menge terebahu.” 5 Migkaǥi med-uman sikandin te, “Kenà ereg he ibpeengked niw te kedterebahu is menge etew su utew sikandan mahabet.”

6 Ne zutun daan he andew, migkeǥiyan te hadì te Ehipto is menge Ehiptohanen he edumala te ebpemenerebahu he menge Israilihanen wey is impepengulu zin kandan he menge Israilihanen te: 7 “Kenè niw en human beǥayi is menge etew te reǥami he egkaǥamit dan te kebpemaal te menge brik, iyan en human sikandan ibpepen-ahà te reǥami he egkeǥamit dan. 8 Piru is kahabet te menge brik he ebpeveelan niw kandan hein iyan kew pa ebeǥey kandan te reǥami, ne iyan ded kahabet te menge brik he ebpeveelan niw kandan minsan pa te kenè niw en sikandan ebeǥayan te reǥami. Ebpemepepeǥul sikandan, pegelitan dan dà is kedhangyù dan he ipeǥenat sikandan su wey zan mepemuhat is Megbevayè dan. 9 Ipeiseg niw is kereǥen te terebahu zan su para mekepenigudu sikandan he edterebahu su para wazè dan en timpu te kebpemineg te tarù he ebpengeǥiyen diyà te kandan.”

10 Ne zutun sikan is menge upisyal te kebantey te ebpemenerebahu wey sikan is menge pengulu zan, midhendiyà te kandan, ne migkaǥi ziyà te kandan te, “Iyan suǥù te hadì is kenè kew en kun human ebeǥayan te reǥami. 11 Iyan kew en kun pen-ahà ke hendei kew ebpeketuredu, iyan, kenà edterinan is kezakel te ebpeveelan keniyu he menge brik.” 12 Umbe, nekeeneb sikandan diyà te tivuuk he Ehipto is ebpenguwa te tued te reǥami he iyan egemiten dan he ilis te reǥami. 13 Is menge upisyal he ebantey kandan edsigudu en kandan ebmandar he egkaǥi te, “Kinahanglan he edhimesazen niw te kada andew is iring kahabet te brik he ebpeveelan keniyu hein ebeǥayan kew pa te reǥami.” 14 Mibpenlagkut is menge Israilihanen he mibpilì te menge upisyal te hadì he ibpepengulu te menge zuma zan, su maan kun is wazè dan mehimu zutun he andew wey te midlavey he andew is iring kahabet duen te nehuna.

15 Ne midhendiyà sikandan te hadì ne ke sikandan te, “Maan is ed-iringen key kenikew kayi is menge suluǥuen nu? 16 Ebpenlegkuten key, piru kenà kenami he sayep is kenè dey kebpekehimu te ebpeveelan kenami, su edteǥelen key keniyu te kebaal te menge brik he iring kahabet duen te nehuna, iyan, wazè key veǥayi te reǥami.” 17 Ne migkaǥi is hadì te Ehipto te, “Ebpemepepeǥul kew, umbe layun kew edhangyù he tuǥuti kew te kegenat su ebpemuhaten niw is Nengazen. 18 Terebahu kew en! Kenè kew ebeǥayan te reǥami piru kinahanglan he ebeelan niw ke sengemenu kahabet is brik he ebpeveelan keniyu.”

19 Ne zutun te kegkeǥiyi kandan he kenà edterinan is kahabet te menge brik he ebpeveelan kandan te kada andew neisip dan he mereǥen en is kebpekesavuk dan. 20 Ne hein mid-awè dan en diyà te hadì, neehè dan si Moises wey si Aaron is edtaǥad kandan, 21 ne migkeǥiyan dan haazà is dezuwa te, “Berakat he siluti kew te Nengazen, su keniyu he vaal is utew ingkeepesi kenami te hadì wey te menge upisyal zin. Is mibeelan niw ne iyan egkehimu he hinungdan te kedhimetayi zan kenami.”

22 Ne mid-uman mebpekidlalag si Moises te Nengazen ke sikandin te, “He Nengazen, maan is ed-uwitan nu te samuk heini is menge etew? Iyan be insuǥua nu kediey is kebeǥey kandan te samuk? 23 Su puun dà te kedhendiyè ku te hadì te kegkaǥi ziyà te kandin te menge lalag he ibpekaǥi nu, midlisedlised din en heini is menge etew, ne wazè nu sikandan libriya.”

<- Exodus 4Exodus 6 ->