Exodus 33

1 Ne migkeǥiyan en maan te Nengazen si Moises te, “Awè ke en kayi he lugar, ne zumaha nu sikan is menge etew he impeǥawas nu puun te Ehipto, ne hendiyè kew en te tanà he insaad ku he ibeǥey ku ziyà te ki Abraham, ki Isaac wey ki Jacob wey ziyà te menge kevuwazan dan. 2 Ne edsuǥuen ku is belinsuǥuen ku te keǥiya keniyu, ne edsegseǥen ku puun dutun te tanà is menge Canaanhen, menge Amorihanen, menge Hitihanen, menge Pirisihanen, menge Hivihanen, wey menge Jebusihanen. 3 Haazà he tanà, ne meupiya wey selebpeten egkeerubasa he ebpuunan te edtudà he ǥatas wey teneb. Piru kenà a mulà eduma keniyu su geina te utew kew mesinupaken ne kela ke kenà a meketigker ne egkezeetan kew kediey te kenè kew pa ebpekeuma.”

4 Ne hein nezineg haazà duen te menge etew is mesakit he lalag, midlalew sikandan ne wazè dan en medsun-ud te menge elahas. 5 Su geina te mibpekeǥiyan sikandan te Nengazen ki Moises te, “Utew kew mesinupaken he menge etew ne emun eduma a keniyu te minsan meǥaan dà ne egkezezeetan ku en sikiyu tenged te kenè ku kebpekaantus. Ne pemul-uta niw is menge elahas niw ne iyan e en metau ke hengkey is ebeelan ku ziyà te keniyu.” 6 Umbe, mibpemul-ut te menge Israilihanen is menge elahas dan dutun te ziyè dan te Buntud he Horeb.

Is Tulda he Edtelevukaayan

7 Minsan ebpekahalin is kampu te menge Israilihanen ne idhalin en daan ni Moises sikan is Tulda ziyà te kenà utew uvey te kampu. Ne iyan ngazan dutun is “Tulda he Edtelevukaayan.” Is minsan hentei kandan he egkesuat he metueni zin is egkesuatan te Nengazen ne edhendutun te Tulda. 8 Ne emun edhendutun si Moises te Tulda ne ebpemenlawang sikan is menge etew ziyà te menge tulda zan su ebentayan dan si Moises taman te kebpekeseled din dutun te Tulda he ed-ezapan. 9 Ne emun diyè en si Moises te seled ne ebpekevavà sikan is mekepal he ǥapun he iring te tukud, ne ziyà ebpundu te ǥemawan duen te Tulda ne ebpekidlalag is Nengazen ki Moises. 10 Emun egkeehè en duen te menge etew ziyà te ǥemawan duen te Tulda he ed-ezapan sikan is mekepal he ǥapun he iring te tukud, ne ebpemenhitindeg sikandan is ed-azap te Nengazen diyà te gemawan te kandan he menge tulda. 11 Ed-etuvangen en te Nengazen si Moises emun edlelaǥan din; iring sikandin te etew he ebpekidlalag te emiǥu zin. Ne ed-ulì si Moises diyà te kampu. Ne sikan mulà is menguhed he maama he timbang din he iyan si Josue he anak ni Nun, ne kenà mulà ed-awà duen te Tulda.

Nenaad is Nengazen he Edumahan Din is menge Etew Zin

12 Migkaǥi si Moises diyà te Nengazen te, “Layun a kenikew egkeǥiyi he ebpenguluwan ku heini is menge etew te kedhendiyà te tanà he ibeǥey nu kandan, iyan, wazà a kenikew keǥiyi ke hentei is ibpezuma nu kedì. Migkaǥi nu zaan he nepurung a kenikew mekilala wey igkesuat a kenikew. 13 Emun tutuu he nekepenunuat a kenikew, penurua a te menge paaǥi nu su para mekilala ku sikew su wey med-iseg pa is kebpekepenunuat ku kenikew. Tentenuzi nu he menge etew nu heini is menge kevuwazan ni Israel.” 14 Ne migkaǥi is Nengazen te, “Edumahan ku sikew, wey ibpehimeley ku sikew.” 15 Migkaǥi si Moises te, “Emun kenè ka eduma kenami, deyzey ke kayi key zà kenikew ibpeubpà. 16 Is kedumahi nu kenami iyan igketueni te zuma he menge etew he nekepenunuat kenikew is menge etew wey siaken. Is kebpekiduma nu kenami iyan ibpekeviza zey te zuma he menge etew kayi te tanà.”

17 Ne migkaǥi is Nengazen diyà te ki Moises te, “Ebeelan ku is hangyù nu kediey, su nepurung ku sikew mekilala, wey nekepenunuat ka kediey.” 18 Ne ke si Moises te, “Edhangyù a ziyà te kenikew he, ipeehè nu kedì is mekeǥeǥehem he kebpekiduma nu kenami.”

19 Ne midtavak is Nengazen te, “Ibpeehè ku kenikew is langun he keupiya ku ne egkeǥiyen ku ziyà te kenikew is mahal he ngazan ku he Nengazen. Siak is Nengazen egkehizuwan ku wey igkeǥaǥew ku is menge pinilì ku. 20 Kenè ku ibpaahà kenikew is kebuvuked ku su ebpatey is ebpekaahà kedì, 21 iyan, duen lugar he uvey ku he zuen duen batu ne egkehimu ke zutun ka te vatu edhitindeg. 22 Ne emun edsaǥad dutun is anlag he iyan tuus he zutun a, ne id-ahuk ku sikew ziyà te veka zutun te vatu ne id-eles ku sikew su edempaan ku haazà is beka taman te ebpekelavey ad. 23 Ne id-awè ku zutun is belad ku, ne egkeehè nu is peka ku piru kenè nu mulà egkaahà is kebuvuked ku.”

<- Exodus 32 Exodus 34 ->