1 Ne migkeǥiyan te Nengazen si Moises te, “Tekezeg ka kayi te kediey ne zumaha nu si Aaron, si Nadab, si Abihu, is 70 he ebpemendumala te Israel. Ne ezapa e zan kayi, iyan, diyè dan dà te meziyù. 2 Iyan ke zà egkehimu he ed-uvey kediey, ne is menge zuma nu kinahanglan he kenè dan mulà med-uvey. Ne is kezekelan keniyu kinahanglan he wazà edtekezeg kayi te vuntud duma kenikew.”

3 Ne hein nekelikù sikandin diyà te menge etew migkaǥi zin kandan is langun he menge lalag wey menge velaud te Nengazen, ne mibperedredseey sikandan is edtavak te, “Ebeelan dey is minsan hengkey he nekaǥi te Nengazen.” 4 Ne insurat ni Moises is langun he nekaǥi te Nengazen.

Ne hein nepawà midselemselem sikandin med-enew ne mibaal sikandin te pemuhatà diyà te nevunsuzan duen te vuntud ne impelastar zin is 12 he tedeman he vatu he iyan ibpesavut dutun is 12 he tribu te Israel. 5 Ne midsuǥù din te kebpemuhat is duma zan he vetan-en he menge maama, ne nemuhat sikandan te pemuhat he edtutungen, wey nemuhat daan sikandan te menge tudu he vaka he pemuhat he para te meupiya he kedepità. 6 Ne midliwazà ni Moises is lengesa, is liwazà in-ahuk din diyà te menge yahung ne is sevaha he liwazà impirik din duen te pemuhatà. 7 Ne migkuwa zin sikan is Libru te Kebpekid-uyun te Megbevayà ne mibasa zin diyà te etuvangan te menge etew. Ne midtavak sikandan te, “Ebeelan dey is minsan hengkey he nekaǥi te Nengazen; ebpezumdumahan dey sikandin.”

8 Ne migkuwa si Moises te lengesa ne haazà impirik din diyà te menge etew he ke sikandin te, “Heini is lengesa iyan lig-en wey tuus te paaǥi te kebpekid-uyun te Nengazen diyà te keniyu kayi te kebeǥayi zin keniyu te langun he menge suǥù.”

9 Ne midtekezeg diyà te vuntud si Moises, si Aaron, si Nadab, wey si Abihu, wey sikan is 70 he ebpemendumala te Israel. 10 Ne neehè dan is Megbevayà te Israel, he ziyà mekehitindeg te iring te saag he sapiru he henduen te mehiǥawan he langit. 11 Iyan, minsan pa te neehè dan is Megbevayà ne wazè din sikandan himetayi. Migkaan pa ganì sikandan wey mid-inum diyà te etuvangan te Megbevayà.

12 Ne migkeǥiyan en maan si Moises te Nengazen te, “Laus ke pa tekezeg kayi te kediey ne taǥad ka kayi, su ibeǥey ku ziyà te kenikew is melumpipì he menge vatu he midsuratan te menge suǥù ku wey menge penurù he egkesunud keniyan te menge etew.” 13 Ne zutun midlaus medtekezeg si Moises diyà te vuntud te Megbevayà duma si Josue he suluǥuen din. 14 Hein wazè pa sikandan megenat ne migkaǥi si Moises diyà te menge edumala te, “Taǥad kew taman te ebpekelikù key kayi te keniyu. Ne emun duen menge kesevaan niw ne iyan niw ipehusey si Aaron wey si Hur su kayi mulà sikandan te keniyu.”

15 Ne zutun te kebpekeuma eni Moises diyà te puntur zutun te vuntud, ne haazà is buntud netembunan te ǥapun, 16 ne mibulus is Nengazen dutun te Buntud he Sinai. Ne seled te heenem he andew netembunan te ǥapun haazà is buntud, ne hein ikepitu en he andew mid-umew si Moises te Nengazen puun duen te ǥapun. 17-18 Ne zutun te kedlaus kedtekezeg ni Moises duen te vuntud, nekeseled sikandin duen te ǥapun. Ne zutun sikandin te vuntud seled te 40 he andew wey 40 he kezukileman. Ne is kezekelan mulà te menge Israilihanen, ne iyan kandan he ked-ahaa te mekeǥeǥehem he kebpekiduma te Nengazen duen te puntur te vuntud is iring te edriyubriyub he hapuy.

<- Exodus 23Exodus 25 ->