1 Ne zuen maama he kevuwazan ni Levi he nekeesawa te vahi he kevuwazan ded daan ni Levi. 2 Ne mibmeǥingey haazà is esawa zin ne mid-anak te maama. Ne hein naahà dutun te vahi he meupiya he vatà haazà is in-anak din, in-eles din seled te tetelu he vulan. 3 Iyan, hein kenè din en egkehimu te ed-eles haazà is batà, migkuwa sikandin te pepirus he teleǥuey ne mibpinsi zin te alkitran su wey kena rehevi te wahig. Ne zutun din itaǥù haazà is batà ne insavuk din diyà te vereesen he veyvey te Wahig he Nilo. 4 Ne is bahi he kakey zutun te vatà, edhithitindeg diyà te malù meziyù su ed-ahaan din ke egkemenumenu haazà is hazi zin.

5 Ne midhendutun te Wahig he Nilo haazà is bahi he anak te hadì te Ehipto su ebpemeziǥù. Ne hein ebpemenhiphipanew zuen te veyvey is menge suluǥuen din, neehè din sikan is teleǥuey he insavuk duen te vereesen dutun te ebpemeziǥù en sikandin, ne impekuwa zin haazà te vahi he uripen din. 6 Mibpuwasan din haazà ne neehè din sikan is batà. Mid-eerang haazà ne nehizuwan din. Ke sikandin te, “Sevaha heini te menge anak te Hebriyuhanen.” 7 Ne mid-insaan duen te kakey te vatà haazà is anak te hadì te Ehipto, ke sikandin te, “Egkehimu ve ke egkuwaan ku sikew te vahi he Hebriyuhanen su wey zin meelimahi kenikew heeyan is batà?” 8 “Uya,” ke sikandin. Ne zutun mibeyaan dutun te vahi is iney zan. 9 Ne migkaǥi ziyà te kandin haazà is anak te hadì te Ehipto te, “Uwita nu heini is batà ne ipesusu nu para kediey, ne ebeyazan ku sikew.” Umbe migkuwa zutun te vahi haazà is batà ne mid-uyamu zin.

10 Ne hein nelutas en haazà is batà, ne inhated din en diyà te anak te hadì te Ehipto ne haazà mid-isip he anak duen te anak te hadì. Migngezanan din te Moises su geina te ziyè din mekuwa te wahig.

11 Ne sevaha he andew, hein dekelè en si Moises, midhendiyà sikandin te lugar he zutun is menge zuma zin he menge Hebriyuhanen, ne neehè din is kemereǥenan dan. Neehè din is sevaha he Ehiptohanen he mibuǥel zin is sevaha he Hebriyuhanen he kezuzumahi ni Moises. 12 Nenlangulangu sikandin ke zuen be ebpekaahà; ne hein wazà duma he etew he neehè din, midhimetayan din sikan is tig-Ehipto ne mibumbunan din te pantad.

13 Ne hein sunud he andew, mid-uman medhipanew sikandin ne neehè din is dezuwa he Hebriyuhanen he ebpetebekà. Ne migkeǥiyan din sikan is mibaal te mezaat te, “Maan is ebpesekitan nu heeyan is duma nu he Hebriyuhanen?” 14 Ne migkaǥi haazà is etew te, “Hentei is mibeǥey kenikew te ketenged te kedatùdatù kayi te kenami? Edhimetayan e ve kenikew iring te kedhimetayi nu zuen te tig-Ehipto?” Ne nahandek si Moises te kegkezineǥa zin dutun su netuenan din he zuen bes netau zuen te mibeelan din.

15 Hein nezineg te hadì te Ehipto haazà is mibeelan ni Moises, ebpen-ahaan din te paaǥi he mepatey zin si Moises, piru mibpelaǥuy si Moises diyà te Midian ne zutun med-ubpà. Ne zutun te kebpekeuma zin, mibpinuu sikandin diyà te uvey te kalut. 16 Ne zutun, is pitu he anak he vahi te memumuhat diyà te Midian, midhendiyè dan te kalut su edsekezu te ibpeinum te menge uyaǥen te amey zan. 17 Ne nemekeuma is duma he ebpemen-elima te kerehidu ne edsegseǥen dan haazà is menge vahi wey is menge uyaǥen dan, iyan, midtevangan sikandan ni Moises, ne impeinum din sikan is menge kerehidu he ed-elimahan dan.

18 Ne hein nekeulì dan en diyà te amey zan he si Reuel, mid-insà si Reuel, ke sikandin te, “Maan is meǥaan kew zà nekeulì?” 19 Ne midtavak sikandan te, “Duen tig-Ehipto he mid-uǥup kenami para kenè key melupiglupig duen te zuma he menge ed-lima te uyaǥen. Mibpenekezuwan key zin pa wey impemeinum din is menge uyaǥen tew.” 20 Ne migkeǥiyan din haazà is menge anak din te, “Hendei sikandin? Maan is wazè niw zumaha? Ipehendini niw su wey mekekaan.”

21 Ne mibpezumazuma si Moises ne zutun en med-ubpà te kandan, ne impeesawa kandin ni Reuel is anak din he si Zipora. 22 Ne mid-anak si Zipora te maama, ne haazà migngezanan ni Moises te Gershom, su ke sikandin te, “Lumelengyawà a kayi he inged.”

23 Ne hein neuǥet en, mibpatey en sikan is hadì te Ehipto. Ne is menge kevuwazan ni Israel kemulu ǥihapun is kegkengereǥeni zan tenged te ked-uripena kandan. Ne nengemuyù sikandan wey zan metevangi, ne nekeuma haazà diyà te Megbevayà. 24 Nezineg te Megbevayà is dag-es dan, ne netenuzan din is paaǥi te kebpekid-uyun din diyà te ki Abraham, ki Isaac, wey ki Jacob. 25 Naahà sikandan te Megbevayà ne nehizuwan din sikandan.

<- Exodus 1Exodus 3 ->