1 “Penenglitan duen egkaahà he nepatey he etew ziyà te tanà he ibeǥey keniyu te Nengazen he Megbevayè niw su wey niw maangken, ne wazà metueni ke hentei is nekepatey kayi. 2 Kinahanglan he edsukuzen te ebpemendumala wey te menge zatù is keziyù dutun te nevunù diyà te menge inged he nekeelingkus. 3 Ne zutun haazà is ebpemendumala te inged he kineuvayan te nesevukan dutun te nepatey, megkuwa sikandan te vehiyan he vaka he wazè pa iketerebahu. 4 Ne uwita zan haazà diyà te tanà he uvey te zal-ug he wazè pa keenu meeradu wey wazè pa mepemulai is tanà he avey zin. Ne bunggua zan dutun haazà is baka. 5 Kinahanglan daan he edhendutun sikan is menge memumuhat he menge kevuwazan ni Levi, su mibpilì sikandan te Nengazen he Megbevayè niw he para ebpenilbi wey ebpenuvadtuvad pinaaǥi te ngazan te Nengazen, wey te kedhusey te langun he samuk. 6 Ne sikan is langun he ebpemendumala te inged he kineuvayan te nesevukan duen te nepatey, lùlui zan is menge velad dan diyà te zivavew zuen te vaka he mibunggù. 7 Ne megkaǥi sikandan te, ‘Kenè key iyan nekepatey wey wazè dey metueni ke hentei is nekepatey. 8 He Nengazen, peseyluwa nu is menge etew nu he Israilihanen he midlibri nu ziyà te Ehipto. Kenè nu sukuta ziyà te kenami is kemetayen kayi te etew he wazà mekesalà.’ Ne zutun wazè dan en televaken te kemetayen dutun te etew. 9 Pinaaǥi te kedtumana niw kayi kenè kew edsukutan te Nengazen te kemetayen he iring kayi, su neehè din he metazeng kew.

10 “Penenglitan mibpekidtebek kew te menge kuntada niw ne imbeǥey sikandan diyà te keniyu te Nengazen he Megbevayè niw, ne mibihag niw sikandan. 11 Ne penenglitan duen sevaha keniyu he nekaahà te mezagwey he vahi zuen te menge vihag ne nesuatan din haazà umbe egkesuatan din te ed-esawa. 12 Ne emun iyan heeyan, ne uwita zin haazà is bahi ziyà te valey zin ne venguli zin, penuluwi zin, 13 wey ilisi zin is imbivisti zutun te vahi hein nevihag sikandin. Kinahanglan he ibpeubpè din haazà is bahi ziyà te valey zin seled te senge vulan mintras idlalew zin is menge kepuun din. Ne emun egketapus en haazà, ne egkehimu en sikandin he ed-esewaan. 14 Piru emun egkepezaan sikandin dutun te vahi ke egkeuǥet, kinahanglan he ibpeǥenat din haazà is bahi diyà te minsan hendei he egkesuatan din te ebayà. Kenè din sikandin ivelegyà etawa kenè din uripena su mibpeel-elezan din en sikandin.

15 “Penenglitan duen sevaha he etew he zezuwa is esawa zin ne mahal zin is sevaha ne is sevaha wazè din mahala, ne zuen din menge anak diyà te kandan te zezuwa. Penenglitan is kinekekayan he anak din he maama ne anak duen te wazè din mahala. 16 Ne emun ebehinen din en is menge azen din diyà te menge anak din, kinahanglan he is bahin he para te kinekekayan he anak, ne kenè din iveǥey ziyà te anak duen te vahi he mahal zin. Kinahanglan he ibeǥey zin heini ziyà te kinekekayan he anak din minsan wazè din mahala is iney kayi. 17 Kinahanglan he egkilelaan din is kegkekakey zuen te kinekekayan he anak din minsan wazè din mahala is bahi he teǥianak duen. Ne ke sengemenu kezekelà is bahin te zuma, ne tekepa zin is ibahin din kandin su iyan sikandin nehuna he anak din ne zuen din ketenged te kedawat te vahin he para te kinekekayan he anak.

18 “Penenglitan duen sevaha keniyu he zuen din anak he maama he utew mesinupaken wey ebpekidsukulà, ne kenà ebpezumazuma te menge ginikanan din minsan ebmensuwen dan en sikandin. 19 Emun egkehitavù heini ne uwita zuen te menge ginikanan haazà is anak dan diyà te pultahan te inged he zutun sikan is ebpemendumala. 20 Ne egkeǥiyan dan haazà is ebpemendumala te, ‘Heini is anak dey, ne utew mesinupaken wey ebpekidsukulà kenami; ne kenà ebpezumazuma kenami. Gestedur sikandin wey lelenguten.’ 21 Ne haazà, kinahanglan he ebpenulengen te vatu te langun he menge meǥinged dutun te inged taman te ebpatey. Kinahanglan he id-awè niw ziyà te keniyu heini he mezaat he vaal. Ne emun egkezineg heini te langun he menge Israilihanen ne egkahandek dan.

22 “Emun midsilutan is etew te kemetayen tenged te meveǥat he salà he nehimu zin, ne imbitey ziyà te kayu is lawa zin, 23 kinahanglan he kenà egkepewaan is lawa zin dutun te kayu. Kinahanglan he idleveng niw heini zutun dà te andew te kedhimetayi zuen, su is minsan hentei he imbitey ziyà te kayu ne midrewakan te Megbevayà. Kenè niw remeriki is tanà he ibeǥey keniyu te Nengazen he Megbevayè niw he egkepengevilin niw.

<- Deuteronomio 20Deuteronomio 22 ->