1 “Emun edezeetan en te Nengazen he Megbevayè niw is menge etew ziyà te menge nasyun he ibeǥey zin keniyu is tanè dan, wey egkesegseg niw en sikandan ne ziyè kew en ebpemen-ubpà te menge inged dan wey menge valey zan, 2 ne pilì kew te tetelu he inged he eputà duen te tanà he ibeǥey keniyu te Nengazen he Megbevayè niw wey niw maangken. 3 Behina niw te tetelu he distritu sikan is tanà he ibeǥey keniyu te Nengazen he Megbevayè niw. Is kada distritu, kinahanglan he zuen duen inged he eputà. Ne purungi niw is menge zalan pehendutun te menge inged, para is minsan hentei he ebpekepatey te etew ne ebpekepelaǥuy ziyà te sevaha kayi he menge inged. 4 Emun ebpekepatey is sevaha he etew te zuma zin he etew he wazè din tivevaa wey wazà igkepeuki zin duen, ne ebpekepelaǥuy sikandin diyà te sevaha kayi he menge inged ne wazà edhilavet kandin.
5 “Penenglitan, mibpezumahà is dezuwa he telesiringan diyà te ketelunan su ebpengayu zan. Ne te kebpiley te kayu te sevaha kandan ne nepesuk is wasey zin, ne ziyà haazà meketimbag te zuma zin, ne impatey zin haazà. Ne egkehimu ke ebpelaǥuy sikandin diyà te sevaha kayi te menge inged he eputà ne wazà edhilavet kandin. 6 Emun sebsevaha zà is inged he eputà, kela ke meziyù diyà te etew he nekepatey, ne egkeseutan sikandin te edal-as kandin he ebpenimales, ne egkepatey sikandin. Kenà sikandin ereg he edhimetayan su wazè din tivevaa is kebpekepatey zin wey wazà igkepeuki zin dutun te nepatey zin. 7 Iyan heini hinungdan ke maan is idsuǥù ku keniyu is kebpilì te tetelu he inged he eputà.
8 “Ebpekeluaǥen te Nengazen he Megbevayè niw is tanè niw sumalà te impenaad din diyà te menge kepuun niw, ne ǥaked niw en haazà is tivuuk he tanà he impenaad din kandan. 9 Ebeelan heini te Nengazen he Megbevayè niw emun ebpurungan niw edsunuza heini is langun he suǥù he idsuǥù ku keniyu guntaan, he mahala niw sikandin wey pengungubpaan kew te edsungkad layun te menge paaǥi zin. Emun ebmeluag en is tanà niw ne umani niw en maan te tetelu is menge inged he eputà. 10 Umani niw is menge inged he eputà su para wazà etew he egkepatey he wazà mekesalà diyà te tanè niw he ibeǥey keniyu te Nengazen he Megbevayè niw para mepengevilin niw, wey para kenè kew mesukuti tenged te kegkepetaya te etew he wazà mekesalà.
11 “Piru emun edumut is sevaha he etew te iring din ne ebenteyanan din haazà ne edhimetayan din, ne ebpelaǥuy sikandin diyà te sevaha zuen te menge inged he eputà, 12 kinahanglan he ibpekuwa sikandin te menge edumala ziyà te inged din ne ibeǥey ziyà te egkesuat he ebales kandin su wey mehimetayi sikandin. 13 Kenè niw sikandin kehizuwi. Kinahanglan he id-awè niw puun te Israel is kebpenhimatey te wazà mekesalà he menge etew su para mebmeupiya is kebpekesavuk niw.