1 “Emun duen ebpeneuven etawa pereseysey te kehuluǥan te teǥeinep he ebpenaad diyà te keniyu he ebpaahà sikandin te menge singyal wey menge egkein-inuwan he menge vaal, 2 ne egketuman is egkeǥiyen din, ne egkaǥi te, ‘Hendini kew su ed-azap kiw te selakew en he ebpen-ezapen’ (ebpen-ezapen he wazè niw mekilala), 3 kenè kew pemineg kandin. Egezaman kew zà te Nengazen he Megbevayè niw ke mahal niw ve sikandin diyà te tivuuk he gehinawa niw wey kedsavut niw. 4 Iyan dà is Nengazen he Megbevayè niw ereg he edsunuzen niw wey edtehuzen. Tumana niw is menge suǥù din wey sunuza niw sikandin; silbiyi niw sikandin wey kenè niw sikandin iniyuǥi. 5 Kinahanglan he edhimetayan haazà is ebpeneuven etawa pereseysey te kehuluǥan te teǥeinep, su ebpenuruen kew zin te kedribildi ziyà te Nengazen he Megbevayè niw he mibpeǥawas keniyu ziyà te Ehipto wey midlibri keniyu te kegkeuripen. Heeyan he etew, iyan tuyù din is para mekepekeziyù kew ziyà te menge paaǥi he inmandù keniyu te Nengazen he Megbevayè niw he sunuza niw. Mezaat heeyan ne ereg he id-awà.

6 “Penenglitan duen nu suled etawa anak, pinelanggè nu he esawa etawa utew nu emiǥu, he meeles he ed-iniyat kenikew ne egkaǥi te, ‘Ed-azap ki te selakew en he menge ed-ezapen’ (menge ed-ezapen he wazè nu mekilala wey te menge kepuun nu). 7 Emun ed-iniyaten ke zin te ked-azap te menge ed-ezapen te menge etew he nekeelingkus keniyu etawa menge etew ziyà te meziyù he lugar, 8 kenè ka mebpeuwit wey mebpemineg kandin. Kenè nu sikandin kehizuwi wey kenè nu levani. 9 Kinahanglan he edhimetayan sikandin. Iyan ka huna tuleng kandin te vatu te kedhimatey kandin, ne edsunud is kezekelan. 10 Ebpenulengen sikandin te vatu taman te kebpatey zin su geina te edtinguhà sikandin ebpekeziyù kenikew puun te Nengazen he Megbevayè nu, he mibpeǥawas kenikew ziyà te Ehipto he zutun kew pen-uripena. 11 Ne egkezineg heini te langun he menge Israilihanen ne egkengehandek sikandan, ne wazè en ebaal ziyà te keniyu te iring dutun te utew mezaat he vaal.

12 “Penenglitan ebpekezineg kew te tudtul he sevaha zuen te menge inged he ibeǥey te Nengazen he Megbevayà para egkeubpaan niw, 13 is duen duen lalung he menge etew he midtazin dan is menge meǥinged dutun he inged su migkaǥi sikandin te, ‘Ed-azap kiw te selakew en he menge ed-ezapen’ (menge ed-ezapen he wazè niw mekilala). 14 Kinahanglan he ebpurungan niw heini edsusiya ke tutuu ve. Ne emun tutuu he neulaula heini is utew mezaat he vaal, 15 kinahanglan he egeraan niw is langun he meǥinged dutun he inged ragkes en is menge uyaǥen dan. Kinahanglan he wazà edresik kandan. 16 Tiǥuma niw is langun he egkekuwa niw zutun he inged ne itambù niw ziyà te teliwazà te pelasa, ne vinsuli niw heini wey is tivuuk he inged he pemuhat he edtutungen para te Nengazen he Megbevayè niw. Ne ebey-anan en haazà is nezeetan he inged ne kenè en ed-umanan ebenguna taman te taman. 17 Kenè kew medtipig te minsan hengkey he vutang he zutun te inged su neteǥane en heeyan he edezeetan. Emun edtumanen niw heini is langun, id-awà te Nengazen is dekelà he pauk din, ne egkehizuwan kew zin. Ne tenged te hizu zin ibpemezakel kew zin sumalà is penangdù din diyà te menge kepuun niw. 18 Ebeelan heini te Nengazen he Megbevayè niw emun edtumanen niw is langun he menge suǥù din he ibeǥey ku keniyu ǥuntaan, wey ke ebaal kew te metazeng diyà te etuvangan din.

<- Deuteronomio 12Deuteronomio 14 ->