6 Dutun te kemulu pa is tebek te midapig ki David wey midapig ki Saul, si Abner is melig-en he pengulu te midapig ki Saul. 7 Ne sevaha he andew, migkeǥiyan ni Ishboshet si Abner te, “Maan is midhulizan nu is sevaha he esawa te amey ku he si Saul?” Is bahi he ibpesavut ni Ishboshet iyan si Rizpa he anak ni Aya. 8 Utew nepauk si Abner zutun te migkaǥi kandin ni Ishboshet, ne midtavak sikandin te, “Kunaan nu vuwa ke edluivan ku en is amey nu, ne ziyà a edapig te Juda? Puun pa zengan mid-unungan ku is amey nu wey is pemilya zin wey menge emiǥu zin, ne wazè ku iveǥey ki David. Guntaan edhelezan a kenikew he nekesalà a keniyan te vahi! 9 Emun iyan heeyan, ne deyzey pa ke ed-uǥupan ku si David he metuman is saad kandin te Nengazen, ne verakat he siluti a te Megbevayà emun ke kenè ku sikandin edtevangan. 10 Midsaad is Nengazen he kenè din en ibpahadì is minsan hentei he kevuwazan ni Saul, kekenà, si David en is edhimuwen din he hadì te Israel wey Juda, puun te Dan taman te Beersheba.” 11 Wazè en medtavak si Ishboshet su nahandek sikandin ki Abner.

12 Ne midsuǥù si Abner te menge etew he ebpekeǥiyan si David te, “Sikew is engayan he edhadì te tivuuk he tanà te Israel. Baal ka te kesebutan ta, ne edtevangan ku sikew he mesakup nu is tivuuk he nasyun te Israel.” 13 Midtavak si David te, “Uya, ebaal a te kesebutan ta, asal duen ku zaan hangyù kenikew: emun edlikù ka kayi te kedì ne uwita nu is esawa ku he si Mical he anak ni Saul.”

14 Midsuǥù si David te etew he ibpepenudtul ziyà te ki Ishboshet te, “Ilikù nu kayi te kedì is esawa ku he si Mical. Su 100 he Filistihanen is midhimetayan ku ne migkuwa ku is lundis te purù te sineruwan dan he iyan sunggud ku te ked-esewaa ku ki Mical.” 15 Umbe, midsuǥù si Ishboshet he ibpekuwa si Mical ziyà te nekeesawa kandin he si Paltiel he anak ni Laish. 16 Ne si Paltiel, midtinundug sikandin ki Mical he edsineǥew taman te Bahurim. Migkeǥiyan ni Abner si Paltiel he med-ulì en. Ne mid-ulì en daan sikandin.

17 Mibpekidsebutà si Abner wey menge sineriǥan te Israel. Migkaǥi sikandin te, “Neuǥet en he egkesuat kew he iyan egkehimu he hadì si David. 18 Guntaan, egkehimu tew en su midsaad is Nengazen he pinaaǥi te suluǥuen din he si David, edlibriyen din is keet-etawan din he menge Israilihanen su wey kenè en sikandan egkeveyveyaan te menge kuntada zan wey te menge Filistihanen.” 19 Mibpekidlalag daan si Abner te tribu ni Benjamin. Ne midhendiyà sikandin te Hebron te kebpenudtul ki David he ed-uyun is menge etew te Israel wey te Benjamin he iyan en hadì dan sikandin.

20 Hein nekeuma si Abner ziyà te Hebron duma is 20 he menge sakup din, migastu si David para kandan. 21 Migkeǥiyan ni Abner si David te, “Mahal he Hadì, pemineǥa a kenikew su edhipanew a ǥuntaan su egkeǥiyan ku is langun he etew te Israel he med-uyun dan he iyan ka hadì dan. Ibpevaal ku sikandan te kesebutan he edewaten ke zan he hadì dan. Ne pudu nu en egkehedii is egkesuatan nu he edhedian.” Umbe impeǥenat ni David si Abner he wazè din menuwa.

22 Nekeuma si Joab wey is duma he menge sakup ni David diyà te Hebron he ebpuun te kebpengayew, ne utew zekelà is neuwit dan he naaǥew zan. Piru wazè en diyà si Abner su impeǥenat en ni David he wazè din menuwa. 23 Hein netuenan ni Joab he midhendiyà si Abner te hadì he wazà menuwa, 24 midhendiyà si Joab te hadì he egkaǥi te, “Hengkey ves is baal nu? Midhengkayi en si Abner, maan is impeǥenat nu pa? Ne, guntaan wazè en sikandin! 25 Nekilala nu en si Abner. Midhendini sikandin su edlimbungan ke zin, wey ebpeniizan din is langun he ebeelan nu.” 26 Mid-awà si Joab dutun te ki David ne midsuǥù he ibpezal-as si Abner. Neseutan dan si Abner ziyà te teheb he Sira ne miduma zan wey mekelikù diyà te Hebron. Piru wazà heini metueni ni David. 27 Hein diyè en si Abner te Hebron, miduma sikandin ni Joab diyà te pultahan te inged he iyan dan dà is dezuwa. Mid-ekalan din te zuen dan kun edlelaǥen. Hein nekeuma zan dutun midunggab ni Joab si Abner ziyà te getek su impenimales din is kedhimetayi ni Abner ki Asahel te suled din. Ne minatey si Abner.

28 Hein netuenan haazà ni David, ke sikandin te, “Nesayud is Nengazen he siak wey is menge sakup ku ne wazà keseyuzan te kemetayen ni Abner he anak ni Ner. 29 Si Joab wey is pemilya zin iyan duen din televaken. Deyzey pezem ke is pemilya zin ne letuni te zaru he ebpenggewasan te meremerik is sudiyè dan, duen daru te lundis, mengehimu he inutil wey mebpematey te tebek wey layun bitila.” 30 (Iyan hinungdan te kedhimetayi ni Joab wey ni Abishai he suled din ki Abner su midhimetayan daan ni Abner is suled dan he si Asahel hein kedtebek diyà te Gibeon.)

31 Dutun migkeǥiyan ni David si Joab wey kes langun he menge zuma zin te, “Bindasa niw is menge kumbalè niw, wey iyan niw ikukumbalà is saku. Ne ilalew niw si Abner zutun te edhipanew kew ziyà te egkehunaan te minatey he lawa ni Abner zutun te kedlevenga kandin.” Miduma si Hadì David te kedleveng. 32 Diyà ileveng si Abner te Hebron; midsineǥew si Hadì David dutun te kedleveng. Midsineǥew is langun dutun he miduma te kedleveng. 33 Migkanta si Hadì David kayi he penhulùhulù para ki Abner:

Midsineǥew en maan is langun he menge etew tenged ki Abner. 35 Wazà megkaan si David dutun he andew, ne midteǥel sikandin te menge etew he ibpekaan. Piru midsesapà si David he egkaǥi te, “Berakat he purungi a siluti te Megbevayà ke egkaan a te minsan hengkey te kenè pa edsanlep is andew.” 36 Utew nengelipey is menge etew zutun te migkaǥi ni David, wey kenà iyan dà ingkelipey zan haazà, kekenà, elin daan is langun he mibeelan ni David. 37 Umbe, netuenan human te menge etew te Israel he si Hadì David wazè din kelevetan te kemetayen ni Abner.

38 Ne migkeǥiyan ni David is menge sakup din te, “Wazè niw ve mesavut he is minatey ǥuntaan he andew sevaha he ventuǥan he egalen te Israel? 39 Ne minsan iyan a mibpilì he hadì guntaan, kenè ku egkeveyveyaan si Joab wey si Abishai, he menge anak ni Zeruya. Nereǥenan a utew kandan. Umbe, iyan en is Nengazen ebales te lalung he menge etew te kelelalung he menge vaal zan.”

<- 2 Samuel 22 Samuel 4 ->