2 Samuel 23

Is Kebpeneltelaan ni David

1 Si David he anak ni Jesse, midhimu he mevantug te Utew Lavew he Megbevayà. Mibpilì sikandin te Megbevayà ni Jacob he mehimu he hadì. Wey ebaal sikandin te menge kentahan te Israel. Iyan heini impeneltelaan din:

2 “Ebpekidlalag is Mulin-ulin te Nengazen pinaaǥi kedì;

is menge lalag din, ne kayi te vèbè ku.

3 Is Megbevayà he iyan is endilungà he vatu te Israel, migkaǥi sikandin kedì, ke sikandin te,

‘Is etew he metazeng is kedumala wey zuen din kegkehandek te Megbevayà,

4 iring sikandin te anlag te andew he edsilà ke meselem he wazà gapun,

he ebpekepesinew te neuzanan he menge sagbet!’

5 Iyan heeyan ked-ahà te Megbevayà te pemilya ku,

su midhimu sikandin kayi te kedì te kebpekid-uyun he wazà pidtemanan.

Heini he kebpekid-uyun, ne kenè en egkevelvelewanan ne kenè en daan egkeilisan.

Umbe egkeperateng ku he lelayun a edluwasa te Megbevayà,

wey ibeǥey zin kedì is langun he egkesuatan ku.

6-7 Piru is menge lalung he menge etew ne iring sikandan te zuǥiyen he menge rasang he idtimbag.

Kenà belad is ibpunpun duen su zuen egemiten he igkerit,

ne edtutungen heini ziyà te lugar he zutun heini burvuruna.”

Is menge Mevurut he menge Sakup ni David

(1 Cronica 11:10-41)

8 Iyan heini menge sakup ni David he menge mevurut:

Si Josheb Bashebet he tig-Takemon, he iyan kes edhuna zuen te tetelu he menge mevurut he sakup ni David. Te senge sangkè dà ne nekepatey sikandin te 800 he etew pinaaǥi te vangkew zin.

9 Ne iyan sunud kandin si Eleazar he anak ni Dodai he kevuwazan ni Ahoa, he sevaha zuen te tetelu he utew menge mevurut he sakup ni David. Sevaha sikandin te zuma ni David he nemenhinggat te tebek te menge Filistihanen he ziyà medtiǥum te Pas Damin para te kebpekidtebek. Nemelaǥuy is menge Israilihanen, 10 piru sikandin, ne wazà mulà su kemulu zin en ebpenhimetayi is menge Filistihanen, taman te neluǥat en is belad din ne kenè en ebpekekayew te ispada. Impezaag sikandan te Nengazen te haazè dà he andew. Kes mibpemelaǥuy he menge Israilihanen nemenlikù dan diyà te ki Eleazar su ebpenguwaan dan kes menge ǥumaan te menge mibpematey.

11 Ne sunud si Shama he anak ni Agee he tig-Harar. Sevaha he andew zutun, midtiǥum diyà te Lehi is menge Filistihanen, ne midsurung dan is menge Israilihanen diyà te vevesukà he neeneb te velatung. Nemelaǥuy is menge Israilihanen, 12 iyan dà wazà mebpelaǥuy si Shama dutun te teliwazà te vevesukà su mibentayan din heini. Mibpenhimetayan din is menge Filistihanen ne imbpezaag sikandan te Nengazen te haazà he andew.

13 Sevaha zutun he timpu te ting-eǥani, midhendiyà te ki David haazà is tetelu he sakup din duen te surung te Adulam. Heini is tetelu he etew, ne zuma heini sikandan te 30 he mevurut he menge sakup ni David. Dutun he timpu ne ziyà megkampu haazà is menge Filistihanen te Suǥud he Refaim 14 ne naaǥew zan is Betlehem. Hein diyè pa si David te melig-en he elesà, 15 utew sikandin ebpekeinum. Migkaǥi sikandin te, “Deyzey pezem ke zuen egkuwa te wahig he egkeinum ku ziyà te kalut he uvey te ǥemawan te Betlehem.” 16 Umbe, mid-eles-eles midseled haazà is tetelu he mevurut he menge etew zuen te kampu te menge Filistihanen, ne migkuwa zan te wahig dutun te kalut he uvey te ǥemawan te Betlehem, ne mid-uwit dan diyà te ki David. Piru wazà inuma haazà ni David; kekenà, in-itis din haazà su pemuhat din para te Nengazen. 17 Migkaǥi sikandin te, “Nengazen, kenè ku heini ed-inumen tenged te iring heini kemahal te lengesa te menge etew he impedserakan dan is untung dan te kegkuwa kayi.” Umbe wazà iyan med-inum si David.

Iyan haazà mibeelan dutun te tetelu he mevurut he menge sakup ni David.

18 Si Abishai he suled ni Joab, he anak ni Zeruya iyan pengulu zutun te 30 he mevurut he menge sakup ni David. Nekepatey sikandin te 300 he menge Filistihanen pinaaǥi te vangkew zin. Umbe, nehimu he nevantug sikandin he iring duen te tetelu he mevurut he menge etew. 19 Ne tenged te iyan sikandin nevantug he zuma zutun te 30, iyan sikandin nehimu he peremandar zan, piru kenà sikandin ragkes duen te tetelu he menge mevurut.

20 Duen pa sevaha he mevurut he etew he egngezanan ki Benaya. Tig-Kabzeel sikandin, ne iyan amey zin si Jehoyada. Mibaal sikandin te wazè din iring he menge vaal, ragkes en is kedhimetayi zin te zezuwa he ventuǥan he sundaru te Moab. Duen timpu he zutun mibpendal-as din is erimaung minsan ebpenggiyew wey melandeg, ne mibpeneuǥan din duen te budsi ne midhimetayan din haazà is erimaung. 21 Sevaha pa maan dutun he timpu, midhimetayan din is utew zekelà he etew he Ehiptohanen. Ne is gumaan dutun te Ehiptohanen ne vangkew, piru is kandin mulà he ǥumaan ne kayu zà he idlagkut. Ne mid-aǥew zin haazà is bangkew zutun te Ehiptohanen ne iyan ded heini inhimatey zin kandin. 22 Iyan haazà menge vaal he mibeelan ni Benaya he anak ni Jehoyada. Nehimu sikandin he ventuǥan iring duen te tetelu he mevurut he menge etew, 23 piru kenè din duma sikandan. Ne tenged te iyan sikandin pinekeventuǥan duen te menge zuma zin he 30, midhimu sikandin ni David he pengulu te menge vantey.

24 Iyan heini menge sakup te 30 he menge mevurut he menge etew:

Si Asahel he suled ni Joab;

si Elhanan he anak ni Dodo he tig-Betlehem;

25 si Shama wey si Elika he menge tig-Harod;

26 si Helez he tig-Palti;

si Ira he anak ni Ikesh he tig-Tekoa;

27 si Abiezer he tig-Anatot;

si Mebunai he tig-Husha;

28 si Zalmon he tig-Ahoa;

si Maharai he tig-Netofa;

29 si Heleb he anak ni Baanah he tig-Netofa;

si Itai he anak ni Ribai he tig-Gibea, he sakup te Benjamin;

30 si Benaya he tig-Piraton;

si Hidai he ziyà ed-ubpà te uvey te menge zal-ug te Gaas;

31 si Abi Albon he tig-Araba;

si Azmavet he tig-Bahurim;

32 Si Eliaba he tig-Shaalbon;

is menge anak ni Jashen;

33 si Jonatan he anak ni Shama he tig-Harar;

si Ahiam he anak ni Sharar he tig-Harar;

34 si Elifilet he anak ni Ahasbai he tig-Maaca;

si Eliam he anak ni Ahitofel he tig-Gilo;

35 si Hezro he tig-Carmel;

si Paarai he tig-Arba;

36 si Igal he anak ni Natan he tig-Zoba;

he anak ni Hagadi;

37 Si Zelek he tig-Ammon;

si Naharai he tig-Beerot, he iyan tig-uwit te ǥumaan ni Joab he anak ni Zeruya;

38 si Ira wey si Gareb he menge tig-Jatir;

39 wey si Uria he Hitihanen. 37 is langun.

<- 2 Samuel 22 2 Samuel 24 ->