22
Is Kanta ni David te Kebpekezaag Din
(Menge Salmo 18)
1 Migkentahan ni David is Nengazen dutun te kedluwasa kandin te Nengazen diyà te ǥehem te menge kuntada zin wey ziyà te ki Saul. 2-3 Iyan heini kanta zin:
“Iyan ka, Nengazen, batu he endilungè ku;
melig-en he elesè ku wey menluluwas.
Iring ka te elesà he vatu, ne ed-eles a ziyà te kenikew.
Iyan ka kelasag ku wey mekeǥeǥehem he menluluwas.
Iyan ka eputè ku wey elesè ku.
Iyan ka midluwas kedì dutun te utew mesipala he menge etew.
4 Edeliǥen ka, Nengazen, su emun ebuyù a te tavang diyà te kenikew, ne edluwasen a kenikew zutun te menge kuntada ku.
5 Is kemetayen iring te vaǥel he edlingut kedì.
Is kezeetan iring te vendes te zalem he ed-anud kedì.
6 Is kemetayen, ne iring te pisì he ebpekevagkes kedì wey iring te litag dutun te ibayè ku.
7 Hein kedlised ku nengumew a kenikew, Nengazen.
Mibuyù a te tavang diyà te kenikew te Megbevayè ku,
ne zutun te valey nu mibpemineg nu is ked-ampù ku.
8 Ne zutun ne midlinug, ne minsan is menge pundasyun te menge vuvungan ne neyunggat,
tenged te kegkepauk nu, Nengazen.
9 Migawas is evel puun te izung nu,
ne ziyà te vèbè nu migawas is mekahandekhandek he hapuy wey egkeregreg he menge vaǥa.
10 Mibpuwasan nu is langit iring te kebpuwas te kurtina,
ne mibpenaug ka he ziyà med-untud te mekepal he ǥapun.
11 Mid-untud ka te kirubin, ne utew heini meǥaan he edlayang he eduma te keramag.
12 Midhimu nu is merusirem he tambun te peliǥuy nu. Mid-eles ka ziyà te mekepal he ǥapun.
13 Midpengilat diyà te etuvangan nu, wey midlepew is egkeregreg he menge vaǥa.
14 Is laǥeng nu Nengazen, te Utew Lavew he Megbevayà,
iring te ruǥung diyà te langit.
15 Mibpanè nu te kilat is menge kuntada nu,
ne nemekepelaǥuy zan he egkengeteranta.
16 Emun edawey ka wey utew ka egkepauk ne egkengemezahan is daǥat ne egkaahà is tanà diyà te kinezizeleman kayi,
wey egkaahà is pundasyun te kelibutan.
17 Puun te langit midawat a kenikew, ne inggaun a kenikew puun te mezalem he wahig.
18 Midluwas a kenikew zutun te mekeǥeǥehem he menge kuntada ku he kenè ku egkesukulan.
19 Midsurung e zan hein egkereǥenan a,
piru mid-uǥupan a kenikew, Nengazen.
20 Midlibri a kenikew te ebpekekaid pezem kedì su ingkesuat a kenikew.
21 Edtuvazan a kenikew su ǥeina te metazeng a,
wey wazè ku neveelan he salà.
22 Su edsunuzen ku is menge paaǥi nu,
ne wazà a med-awà diyà te kenikew.
23 Edtumanen ku is langun he menge suǥù nu,
ne wazè ku supaka is menge sulunuzen he ibpesunud nu.
24 Netuenan nu he wazà igkesawey te keugelingen ku,
ne edlikayan ku is kebaal te salà.
25 Edtuvazan a kenikew su neehè nu he metazeng a, ne wazè ku eveelan he ibpekesalà ku.
26 Metinumanen ka ziyà te menge etew he metinumanen daan.
Meupiya ka ziyà te menge etew he meupiya zaan.
27 Tinutuuwà is kebpekidepitè nu te menge etew he tinutuuwà daan is kebpekidepitè dan kenikew,
ne metau ka zaan he bales te menge lalung.
28 Uya, edlibriyen nu is kenà menge mepelevawen,
piru ibpekevavè nu mulà is menge etew he mepelevawen.
29 Nengazen, iyan ka kerayag ku.
Emun merusirem, ne iyan ka sulù ku.
30 Tenged te kedtavang nu, ebpekehimu a he edsurung te menge sundaru,
ne egpekehimu a zaan he ebpemenahik te verengbeng he nekeliǥuy te inged.
31 Is kenikew he paaǥi, Megbevayà, ne wazè din sayep.
Is lalag nu egkeseriǥan.
Iring ka te kelasag te langun he ebuyù kenikew te pengalang.
32 Iyan ke zà, Nengazen, kes Megbevayà;
kes endilungè dey he vatu.
33 Iyan ka ebeǥey kedì te zesen
wey ebantey kedì diyà te ibayè ku.
34 Edlig-enan nu is menge paa ku iring te paa te selazeng,
para mezesen a he ebpenekezeg diyà te metikang he menge lugar.
35 Ebpenuruen a kenikew te kebpekidtebek, iring te kedhingat te mevisekeg he panà.
36 Mibpengelangan a kenikew iring te kelasag,
umbe neluwas a.
Ne nevantug a pinaaǥi te kedtevangi nu kedì.
37 Ebeǥayan a kenikew te meupiya he ibayà,
umbe wazà mekezugkilas is menge paa ku.
38 Midal-as ku is menge kuntada ku ne nezaag ku sikandan.
Ne human a medlikù hein nengezaag ku en sikandan.
39 Midezeetan ku sikandan ne nengepiley zan diyà te uvey te nehitindeǥan ku,
ne kenè en sikandan ebpekeenew.
40 Mibeǥayan a kenikew, Nengazen, te zesen te kebpekidtebek
ne nengezaag ku is menge kuntada ku.
41 Mibpepeleǥuyan a kenikew te menge kuntada ku
ne midezeetan ku sikandan.
42 Mibuyù dan te tavang,
piru wazà midlibri kandan.
Nengumew-umew zan kenikew,
piru wazè nu sikandan tevaka.
43 Midruntek ku sikandan taman te neiring en sikandan te eliyavuk.
Midtekutakan ku sikandan he iring te tunaan diyà te menge zalan.
44 Midluwas a kenikew, Nengazen, te ebpekidsukulà kedì he menge etew.
Midhimu a kenikew he pengulu te menge nasyun.
Is menge lumelengyawà, ne ebpenilbi kedì.
45 Midluhud sikandan kedì tenged te kegkahandek dan, ne midtuman dan is suǥù ku.
46 Neewaan sikandan te kevurut,
umbe migawas dan puun te mid-elesan dan he ebpengerkeren te kegkahandek.
47 Uuyag ka, Nengazen!
Edeliǥen ka is endilungè ku he vatu.
Ibayew ku sikew tenged te iyan ka Megbevayà he menluluwas ku.
48 Ebelesan nu is menge kuntada ku,
ne ibpesakup nu kedì is menge nasyun.
49 Midluwas a kenikew zutun te utew menge mesipala he menge kuntada ku,
ne ibpezaag nu kedì sikandan.
50 Umbe, ibpezalig ku sikew ziyà te menge nasyun.
Egkentahan ku sikew te menge kedalig.
51 Is pinilì nu he hadì ebeǥayan nu te zekelà he menge kezeeǥan.