1 Nepasad haazà, nenginginsà si David te Nengazen, “Edlikù e ve ziyà te sevaha he inged he sakup te Juda?” Midtavak is Nengazen te, “Uya.” Mid-insà si David te, “Hendei?” Midtavak is Nengazen te, “Diyà te Hebron.” 2 Dutun migenat si David duma is dezuwa he esawa zin he si Ahinoam he tig-Jezreel wey si Abigail he esawa zengan ni Nabal he tig-Carmel. 3 Miduma ni David is menge sakup din apil is pemilya zan, ne ziyè dan med-ubpà te Hebron wey ziyà te menge lugar he nengekelingut kayi. 4 Hein nepiraan en sikandan dutun, midhendiyà te Hebron is menge pengulu te Juda ne midlenahan dan is ulu ni David he tuus te iyan en sikandin nehimu he hadì te Juda.

Hein netuenan ni David he is menge tig-Jabesh Gilead iyan midleveng ki Saul, 5 midsuǥù sikandin diyà te ibpepenudtul ziyà te kandan he egkaǥi te, “Berakat he tuvazi kew te Nengazen te impeehè niw he zekelà is kedmahal niw ki Saul te egalen niw pinaaǥi te kedlevenga niw kandin. 6 Berakat he ipaahà te Nengazen is gaǥew zin wey kebmetinumanen din diyà te keniyu, ne ibpeehè ku zaan is kebpurungi ku keniyu tenged te mibeelan niw. 7 Ne ǥuntaan, pekelig-en kew wey pekevurut kew minsan te minatey en si Saul he egalen niw. Iyan a mibpilì te menge tig-Juda he iyan hadì dan.”

8 Dutun he timpu, is peremandar te menge sundaru ni Saul he si Abner he anak ni Ner midhendiyà te Mahanaim. Miduma zin si Ishboshet he anak ni Saul. 9 Dutun impahayag ni Abner he iyan si Ishboshet hadì te tivuuk he Israel, ragkes en kayi is menge lugar ziyà te Gilead, Ashuri, Jezreel, Efraim, wey Benjamin. 10 Ne 40 he tuig is keǥurang ni Ishboshet hein nehimu sikandin he hadì te Israel, ne midhadì sikandin seled te zezuwa he tuig. Is menge tig-Juda mulà, si David is migkilala zan he hadì dan, 11 ne midhadì dutun si David seled te pitu he tuig wey heenem he vulan. Diyà sikandin med-ubpà te Hebron.

12 Sevaha zutun he andew, midhendiyà si Abner te Gibeon is ebpuun diyà te Mahanaim he zuma zin is menge sakup ni Ishboshet. 13 Midsinuǥung sikandan ni Joab he anak ni Zeruya wey te menge sakup ni David diyà te peneng te Gibeon. Nememinuu is grupu ni Abner ziyà te zivaluy he vahin dutun te peneng ne nememinuu zaan diyà te zivaluy zaan he vahin is grupu ni Joab. 14 Ne migkeǥiyan ni Abner si Joab te, “Ibpedtebek ta is duma he menge ventuǥan he sundaru ta kayi te etuvangan ta.” Midtavak si Joab te, “Uya!” 15 Dutun midhitindeg is 12 he menge sakup ni Ishboshet he ebpuun te tribu ni Benjamin para ebpekidtebek wey is 12 zaan he sakup ni David. 16 Midhitindeg dan ne mibpeǥewǥewezè dan diyà te ulu ne mibpezungdunggavey zan taman te naamin dan mebpematey. Umbe iyan ngazan dutun he lugar te Gibeon is Helkat Hazurim. 17 Ne zutun mibpurung medtebek haazà is dezuwa he grupu. Te haazà he andew nezaag si Abner wey is menge sakup te Israel te menge sakup ni David.

18-19 Ne zutun, is tetelu he anak ni Zeruya he si Joab, Abishai, wey si Asahel nekezuma te tebek. Si Asahel utew meǥaan he ebpelelaǥuy he henduen te selazeng, ne midal-as din si Abner he wazà kedlilingey. 20 Hein kedlilingey ni Abner, neehè din sikandin ne mid-insaan din te, “Sikew ve heeyan Asahel?” Midtavak si Asahel te, “Uya.” 21 Ne migkeǥiyan ni Abner sikandin te, “Kenè e en kenikew leyasa, iyan nu en leyasa haazà is duma ku he sundaru, ne eǥawa nu is menge ǥumaan din.” Piru wazà mebpemineg si Asahel.

22 Mid-uman megkaǥi si Abner ki Asahel te, “Engkezi ad kenikew te edlayas! Kenà a kenikew peǥesa te kedhimatey kenikew. Egkeeled a he ebpekid-etuvang te suled nu he si Joab emun egkepatey ku sikew.” 23 Piru wazà iyan engkezi ni Asahel te edal-as si Abner, umbe mibpilak din te vangkew zin diyà te ǥetek, ne midlambas diyà te peka zin. Nepiley sikandin ne segugunà mibpatey. Is menge etew he ebpekevayà dutun he lugar te nepetayan ki Asahel ne edteren.

24 Hein netuenan ni Joab wey ni Abishai is neulaula, midal-as dan si Abner. Hein midsanlep en is andew, nekeuma zan diyà te vuntud te Ama uvey te Gia, he ziyà te kilid te zalan he ibpehendiyà te sibsivayan te Gibeon. 25 Impaamur-amur ni Abner ziyà te puntur te menge vuvungan is menge sundaru he ebpuun te tribu ni Benjamin para ed-andam te kebpekidtebek. 26 Migkulahì ni Abner si Joab te, “Pedayun en be is kebpehimhimetayè tew? Wazè nu ve meisip-isip he is pangkus kayi iyan is kepezumdumutà? Maan is kenè nu egkezawey is menge sakup nu he edal-as kenami te menge kezuzumahi niw?”

27 Midtavak si Joab te, “Emun wazè ka megkaǥi, ibpesarig ku kenikew, kayi te etuvangan te uuyag he Megbevayà, ne edel-asen ka pezem te menge sakup ku taman te egkepawà.” 28 Ne impezaǥing ni Joab is budyung ne midteren is langun he menge sakup din he edal-as te menge tig-Israel. Ne zutun neengked is tebek. 29 Dutun tivuuk he mezukilem is kedhipanew ni Abner wey is menge sakup din dutun te Araba. Ne midrapas dan dutun te Wahig he Jordan, ne midlaus dan he edhipanew taman te meselem taman te nekeuma zan diyà te Mahanaim.

30 Dutun te ked-engkezi ni Joab te kedal-as ki Abner, ne mid-ulì sikandin duma is menge sakup din. Hein netiǥum dan en ne netuenan din he 19 is nepatey te sakup ni David gawas ki Asahel. 31 Piru is nepatey he sakup ni Abner ne 360, diyà heini ebpuun te tribu ni Benjamin. 32 Migkuwa eni Joab is minatey he lawa ni Asahel ne inleveng diyà te midlevengan te amey zin diyà te Betlehem. Ne zutun tivuuk he mezukilem is kedhipanew zan, ne nekeuma sikandan diyà te Hebron.

<- 2 Samuel 12 Samuel 3 ->