1 Duen timpu he migkaǥi ziyà te ki Elisha is grupu te menge ebpeneuven te, “Neehè nu mismu he zeisey heini is lugar he netiǥuman tew. 2 Umbe, edhendiyè kiw te Wahig he Jordan he mahabet is menge kayu zuen. Ebaal kiw te lugar he zutun kiw edtiǥum.” Migkaǥi si Elisha te, “Sigi, hipanew kew en.” 3 Piru migkaǥi is sevaha kandan te, “Datù, emun egkehimu ne zuma ke en kenami.” Ne ke sikandin te, “Uya.” 4 Umbe, miduma sikandin kandan.

Midhendiyè dan te Wahig he Jordan ne nemiley zan te menge kayu. 5 Ne is sevaha kandan he ebpiley te kayu, nepul-ut is wasey zin ne neulug diyà te wahig, ne nekevensag sikandin te, “Datù, sinembayan ku zà sikan!” 6 Mid-insà si Elisha te, “Hendei zapit meulug?” Ne intezù duen te etew ke hendei meulug, ne mibadtì si Elisha te rasang ne intimbag din duen te neuluǥan. Ne midletew haazà is wasey. 7 Migkaǥi si Elisha te, “Kuwaa nu en.” Ne migkuwa zuen te etew.

8 Dutun he timpu, edtebeken te hadì diyà te Aram is Israel. Midlelaǥan din is menge upisyal zin ke hendei zan he menge lugar egkampu.

9 Migkeǥiyan ni Elisha is hadì te Israel te, “Kenè kew ebpekevayà keniyan he lugar su keniyan ebantey is menge Aramihanen.” 10 Umbe, midsuǥù is hadì te Israel dutun te lugar he nekaǥi ni Elisha he kinahanglan he egkeǥiyan is menge meǥinged duen he med-andam dan. Layun heini ebeeli ni Elisha.

11 Tenged kayi nepauk is hadì diyà te Aram. Umbe impetawag din is menge upisyal zin ne migkeǥiyan din te, “Hentei keniyu is edlavan te hadì te Israel?” 12 Migkaǥi is sevaha zuen te menge upisyal zin te, “Wazà minsan sevaha kenami, Mahal he Hadì. Si Elisha is tig-Israel he ebpeneuven, iyan migkaǥi ziyà te hadì te Israel te langun he egkeǥiyen nu minsan is diyè nu keǥiya te ruǥu nu.” 13 Mibmandar haazà is hadì te, “Hipanew kew ne pen-ahaa niw sikandin su para mekesuǥù a te menge etew te kedakep kandin.”

Ne hein migkeǥiyan haazà is hadì he ziyà si Elisha te Dotan, 14 impehendutun din is mahabet he menge sundaru he ebpemen-untud te menge kudà wey menge kerwahi. Mezukilem is kebpekeuma zan diyà te Dotan ne midliǥuyan dan heini. 15 Ne kegkemeselem, midselem med-enew is suluǥuen ni Elisha, ne neehè din is menge sundaru he ebpemen-untud te kudà wey menge kerwahi he midliǥuy zutun te inged. Migkaǥi sikandin diyà te ki Elisha te, “Datù, hengkey is ebeelan ta?” 16 Midtavak si Elisha te, “Kenè ka mahandek. Tuwas pa he mahabet kandan is kenita he zuma.” 17 Ne zutun mid-ampù si Elisha te, “Nengazen luwisi nu is ked-ehè din su wey mekaahà sikandin.” Ne midluwisan te Nengazen is menge mata zin, ne neehè din is menge vuvungan diyà te peliǥuy ni Elisha he gurenab is hapuy he menge kudà wey kerwahi.

18 Dutun te kebeyai ki Elisha te menge kuntada, mid-ampù sikandin te, “Nengazen, lekapa nu heini he menge etew.” Umbe midlakap sikandan te Nengazen sumalà is midhangyù ni Elisha. 19 Ne migkeǥiyan sikandan ni Elisha te, “Kenà heini iyan dalan wey kenà heini inged he Dotan. Tundug kew kedì su edumahan ku sikiyu ziyà te etew he ebpen-ahaan niw.” Ne ziyà sikandan dumaha ni Elisha te Samaria.

20 Ne hein nekeseled dan en dutun te inged, mid-ampù si Elisha te, “Nengazen, luwisi nu is ked-ehè dan su wey zan mekaahà.” Midluwisan te Nengazen is menge mata zan, ne neehè dan he ziyè dan bes te Samaria. 21 Ne hein naahà sikandan duen te hadì te Israel, mid-insaan din si Elisha te, “Datù, hengkey is kenikew? Ebpenhimetayan ku en be sikandan?” 22 Midtavak si Elisha, “Kenè nu sikandan penhimetayi. Su minsan pa is nengevihag pinaaǥi te tebek ne wazè tew penhimetayi. Beǥayi nu sikandan te keenen wey wahig su wey zan mekekaan wey mekeinum, ne kebpekepasad dan ne ipelikù nu sikandan diyà te hadì dan.” 23 Umbe, nengemuran haazà is hadì para kandan. Ne hein nepasad impeulì din sikandan diyà te hadì dan. Ne wazè en medsurung is menge Aramihanen diyà te tanà he Israel.

24 Piru te huziyan he timpu midtiǥum ni Hadì Ben Hadad he hadì te Aram, is langun he menge sundaru zin ne midliǥuyan dan is Samaria. 25 Tenged kayi utew vitil zutun te inged, ne mibmahal en is egkengepemasa. Is bali te ulu te asnu, ne 80 he vuuk he pelata, ne is bali te subra he senge salmun he tai te merepatik, ne lelima he vuuk he pelata.

26 Duen timpu, he mibayà is hadì te Israel ziyà te zivavew te verengbeng, duen sevaha he vahi he midhabet megkaǥi ziyà te kandin te, “Tevangi a, Mahal he Hadì!” 27 Midtavak haazà is hadì te, “Emun kenè ka edtevangan te Nengazen ne hengkey is kedì he egkehimu? Wazè ku en trigu etawa vinu he igkeveǥey ku kenikew.” 28 Ne zutun mid-insà haazà is hadì te, “Hengkey ves is prublima nu?” Midtavak haazà is bahi te, “Heini is bahi migkeǥiyan e zin he egkeenen dey is anak ku te egkehuna he andew, ne ed-ilis he andew ne iyan dey en maan egkeenen is kandin he anak. 29 Umbe, midhilutù dey is anak ku ne migkaan dey. Piru hein mid-ilis he andew, migkeǥiyan ku sikandin he iyan dey en maan egkeenen is kandin he anak piru in-eles din heini.”

30 Ne hein nezineg dutun te hadì haazà is migkaǥi zutun te vahi, mibindas din is bisti zin tenged te utew zin kegkeseeng. Dutun te kedhipanew zin diyà te zivavew te verengbeng, naahà sikandin te menge etew he mibpezizeleman din is bisti zin te visti he saku tenged te kedlalew zin. 31 Ke sikandin te, “Berakat he zekelà is silut kedì te Nengazen ke kenè ku igkepetamped is lieg ni Elisha he anak ni Shafat guntaan he andew!”

32 Dutun he timpu, ebpimpinuu si Elisha ziyà te valey zin is ebpekidlalag te menge ebpemendumala te Israel. Midsuǥù haazà is hadì te etew he ibpehuna zin diyà te ki Elisha. Piru zutun te wazè pa mekeuma haazà is midsuǥù te hadì, migkeǥiyan ni Elisha haazà is ebpemendumala te, “Heeyan is hadì tew he ebpemenhimatey, midsuǥù sikandin te etew he ibpetamped te lieg ku. Ne emun ebpekeume en heeyan he etew ne lekevi niw is gemawan ne kenè niw ipeseled. Is hadì he egalen din, edtinundug kandin.” 33 Ne zutun te edlelaǥan pa sikandan ni Elisha, nekeume en sikan is midsuǥù te hadì ne migkaǥi sikandin te, “Heini he kezeetan, ketau te Nengazen is kegkehitevua kayi. Umbe kenà ad edtaǥad te tavang din.”

<- 2 Menge Hadì 52 Menge Hadì 7 ->