1 Duen 70 he kevuwazan ni Ahab diyà te Samaria. Umbe mibpeuwitan ni Jehu te surat is menge upisyal zutun te inged, menge ebpemendumala, wey menge peraatur te menge kevuwazan ni Ahab. Iyan heini taǥù te surat: 2 “Iyan kew midseriǥan te menge kevuwazan ni Hadì Ahab, menge kerwahi zin, menge kudè din, binerengbeng he inged, wey menge ǥumaan. 3 Umbe, emun egkezawat niw en heini is surat ku, pilì kew te engayan he edhimuwen he hadì he ebpuun diyà te kevuwazan ni Hadì Ahab, ne pekidtebek kew kenami te kedipinsa te pemilya ni Hadì Ahab.”

4 Piru utew sikandan nahandek, ne ke sikandan te, “Si Jehu, emun wazà sikandin mezaag te zezuwa he hadì, ne iyan kiw pe man mekezaag kandin.” 5 Umbe, is administradur te turuǥan, is gubunedur te inged, is ebpemendumala, wey is menge peraatur te menge kevuwazan te hadì, mibpesuratan dan si Jehu. Ne iyan heini taǥù te surat dan: “Menge suluǥuen key kenikew, ne ebeelan dey is langun he idsuǥù nu kenami. Kenè key ebpilì te selakew en he hadì; beeli nu is mid-isip nu he meupiya.”

6 Mibelesan sikandan pesurati ni Jehu te: “Emun dumezapig kew kedì wey andam kew he edsunud kedì, penempezi niw te lieg is menge kevuwazan ni Ahab ne uwita niw kayi te kediey kayi te Jezreel is menge ulu zan, te iring kayi he uras keeselem.”

Dutun he timpu, haazà is 70 he kevuwazan ni Hadì Ahab, ed-elimahan te dungganen he menge etew ziyà te inged he Samaria puun te menge vatè pa sikandan. 7 Ne hein nekeuma is surat ni Jehu, migkuwa zutun he menge etew sikan is 70 he kevuwazan duen te hadì ne mibpenhimetayan dan. Intaǥù is menge ulu kayi he menge etew ziyà te menge baskit ne impeuwit dan diyà te ki Jehu ziyà te Jezreel. 8 Ne hein nekeuma is mid-uwit dutun, migkeǥiyan din si Jehu te, “Impeuwit dan is menge ulu te menge kevuwazan duen te hadì.” Ne mibmandar si Jehu te, “Tepuka niw heini te zezuwa he tapuk diyà te pultahan te inged ne vey-ani niw en dutun taman te meselem.”

9 Hein meselem, migawas si Jehu ne midhitindeg dutun te etuvangan te menge etew ne migkaǥi te, “Wazè niw salà. Iyan a mibpelanu te ebpekesuǥat te egalen ku ne minatey sikandin. Piru hentei is midhimatey kandan te langun? 10 Pinaaǥi kayi egkesavut niw he is langun he migkaǥi te Nengazen he ebpekesuǥat te pemilya ni Ahab egketuman iyan. Midtuman te Nengazen is migkaǥi zin pinaaǥi ki Elias he suluǥuen din.” 11 Ne mibpenhimetayan ni Jehu is langun he kezumahan ni Ahab diyà te Jezreel, ragkes en is menge upisyal zin, menge emiǥu zin, wey is menge memumuhat din. Wazà nesamà kandan he uuyag. 12 Ne midhipanew si Jehu pehendiyà te Samaria. Ne zutun te kedhipanew zin diyà te zalan he ziyà te egngezanan te Tiǥumà te menge Bantey te Kerehidu, 13 neehè din is menge kezuzumahi ni Hadì Ahazia he hadì te Juda. Mid-insà sikandin te, “Hentei kew?” Midtavak dan te, “Menge kezumahan key ni Ahazia ne midhipanew key su ebpengemustahan dey is menge kevuwazan ni Hadì Ahab wey si Rayna Jezebel.” 14 Ne midsuǥù ni Jehu is menge etew zin te, “Dekepa niw sikandan, iyan, kenè niw pa himetayi.” Umbe miduma zan sikandan diyà te teheb ne zutun dan geraa. 42 sikandan is langun, ne wazà nesamà kandan he uuyag.

15 Ne ked-awà ni Jehu zutun, neehè din si Jehonadab he anak ni Recab is edhipanew su edsinuǥung kandin. Ne migkemusta sikandin ni Jehu ne mid-insaan din te, “Dumezapig ke ve kediey iring te kedapig ku ziyà te kenikew?” Midtavak si Jehonadab te, “Uya.” Migkaǥi si Jehu te, “Emun iyan heeyan, ne ikawè nu kayi te kediey is belad nu.” Ingkawà ni Jehonadab is belad din ne impepemenahik sikandin ni Jehu ziyà te kerwahi zin. 16 Migkaǥi si Jehu te, “Duma ka kediey su wey nu maahà is kegkemepezumdumahan ku te Nengazen.” Umbe mid-untud si Jehonadab duma kandin. 17 Kebpekeuma ni Jehu ziyà te Samaria mibpenhimetayan din is langun he nesamà te pemilya ni Ahab, he sungkad te nekaǥi te Nengazen pinaaǥi ki Elias.

18 Midtiǥum ni Jehu is langun he menge etew ne migkeǥiyan din sikandan te, “Kenà utew meheǥet is kebpenilbi ni Ahab ki Baal. Piru siak mulà, ibpeehè ku he meheǥet is kediey he kebpenilbi ki Baal. 19 Umbe, ipehengkayi niw te kediey is langun he ebpeneuven ni Baal, wey is menge memumuhat para kandin, wey is langun he ebpenilbi kandin. Kinahanglan he kayi sikandan is langun, su ebpemuhat a te zekelà he pemuhat para ki Baal. Is kenà edhengkayi ibpehimetayan ku.” Piru uvag-uvag dà haazà su para mehimetayi zin is ebpemenilbi ki Baal.

20 Migkaǥi si Jehu te, “Edhimu kiw te ispisyal he ketiǥuman su wey tew meveǥayi te zengeg si Baal.” Umbe impehibelu haazà diyà te menge etew. 21 Impetawag ni Jehu is langun he ebpenilbi ki Baal seled te tivuuk he Israel, ne midhendutun is kada sevaha kandan. Midseled dan is langun diyà te simbahan he para ki Baal, ne nepenù haazà is simbahan. 22 Migkeǥiyan ni Jehu sikan is ed-atur te idsimba he menge visti, “Ibpevivisti is langun he ebpenilbi ki Baal.” Umbe mibeǥayan din sikandan.

23 Ne midseled si Jehu wey si Jehonadab he anak ni Recab dutun te simbahan he para ki Baal. Migkeǥiyan ni Jehu sikan is ebpemenilbi ki Baal te, “Sigureduwa niw he wazà ebpekesahug keniyu he menge etew he ebpenilbi te Nengazen. Kinahanglan he iyan kew zà nekeseled kayi is ebpenilbi ki Baal.” 24 Ne zutun te seled te simbahan nemuhat sikandan te menge pemuhat he edtutungen wey zuma pa he menge pemuhat. Daan en he zuen 80 he menge etew ziyà te gawas duen te simbahan ne migkeǥiyan din sikandan te, “Insarig ku keniyu is kebpenhimatey kandan. Edhimetayan ku emun duen keniyu ebpesagdan ne ebpekepelaǥuy is minsan sevaha zà kandan.”

25 Ne hein nekepasad si Jehu he ebpemuhat te menge pemuhat he edtutungen, mibmendaran din is menge vantey wey menge upisyal te, “Seled kew ne penhimetayi niw sikandan! Kenè kew pesagdan su para wazà ebpekepelaǥuy kandan!” Umbe mibpenhimetayan dan haazà is menge etew pinaaǥi te ispada ne impenimbag dan haazà is nemematey ziyà te gawas. Ne midseled dan diyà te kineselezan he vahin duen te simbahan he para ki Baal 26 ne migkuwa zan dutun is tedeman he vatu ne mid-uwit dan diyà te gawas, ne mibinsulan dan. 27 Ne hein nepasad dan te edrupet sikan is tedeman he vatu ki Baal, mibengkag dan sikan is simbahan he para ki Baal, ne midhimu heini te menge etew he indesà taman en guntaan. 28 Pinaaǥi kayi in-awà ni Jehu is ulaula he iyan is ked-ezapa ki Baal diyà te Israel. 29 Piru mid-iringan din gihapun is menge salà ni Jeroboam he anak ni Nebat, he nehimu he hinungdan te kebpekesalà te menge tig-Israel. He iyan is ked-azap diyà te Betel wey Dan te vulawan he ledawan he menge vaka.

30 Migkeǥiyan te Nengazen si Jehu te, “Meupiya ziyà te etuvangan ku is mibeelan nu; midsunud nu is egkesuatan ku he mehitavù diyà te pemilya ni Ahab. Tenged te kebeeli nu kayi, ibpahadì ku is menge kevuwazan nu taman te ikeepat he lapis.” 31 Piru wazà medtuman si Jehu te menge kesuǥuan te Nengazen he Megbevayà te Israel, pinaaǥi te tivuuk he gehinawa zin. Kekenà, mid-iringan din is menge salà ni Jeroboam, he nehimu he hinungdan te kebpekesalà te menge tig-Israel.

32 Dutun he timpu impenaneynaney ipezeisey te Nengazen is tanà he nesakup te Israel. Naaǥew ni Hadì Hazael is menge lugar ziyà te Israel 33 he ziyà te zapit te edsilaan te Jordan: is tivuuk he Gilead, is Bashan, wey is menge lugar ziyà te zizaya te inged he Aroer he uvey te zal-ug he Arnon. Ed-ubpaan heini zengan he tanà te tribu ni Gad, ni Reuben, wey ni Manase.

34 Is duma pa he ǥuǥud mehitenged te kedhadì ni Jehu, wey te nevantug he menge vaal zin wey is menge kezeeǥan din, ne ingkesurat diyà te Libru he Midsuratan te menge Keguǥuza te menge Hadì te Israel. 35 Hein minatey en si Jehu, inleveng sikandin diyà te Samaria. Ne si Jehoahaz he anak din, iyan nekeilis kandin te kedhadì. 36 Midhedian ni Jehu is Israel ziyà te Samaria seled te 28 he tuig.

<- 2 Menge Hadì 92 Menge Hadì 11 ->