2 Cronica 4

Is menge Gelemiten te Baley Nengazen

(1 Menge Hadì 7:23-51)

1 Mibpevaal zaan si Solomon te pemuhatà he brunsi he 30 he ǥiek he kuwedradu wey 15 he ǥiek is ketikang. 2 Mibpevaal zaan sikandin te zekelà he teleǥuey te wahig he henduen te kawà, he egngezanan te Daǥat. Is kezalem kayi pitu wey tengà he ǥiek, is keluaǥan kayi 15 he ǥiek, ne is sukud te peliǥuy kayi 45 he ǥiek. 3 Diyà te malù egkezizalem te vèbà kayi mibpeliǥuyan te zezuwa he linya te menge zayandayan. Heini he menge zayandayan, henduen be te tudu he vaka, ne heenem dutun is diyà te teleǥuey. Ne haazà, inredsà is kebpurma zuen te kebeeli zutun te teleǥuey. 4 Haazà is teleǥuey in-untud diyà te peka te 12 he tudu he menge vaka he brunsi he ebpein-iniyuǥà. Is tetelu ziyà medsinaru te zizaya, is tetelu ziyà te edsenlepan, is tetelu ziyà te zivavà, is tetelu ziyà te edsilaan. 5 Is kekepal zutun te teleǥuey tetelu he vaney, is bèbà kayi iring te vèbà te tasa he netik-ew mevekar iring te mibekar en he vulak te liryu. Ne egketeǥuan heini te 17,500 he gelun he wahig. 6 Mibpevaal zaan sikandin te sepulù he visin para ebpenhugasan te menge ibpemuhat he edtutungen. Diyà isavuk is lelima te zapit te zivavà ne is lelima ne zapit te zizaya. Ne haazà is wahig dutun te teleǥuey he egngezanan te Daǥat ne iyan egemiten te menge memumuhat te kebpenhugas dan te keugelingen dan. 7 Mibpevaal zaan sikandin te sepulù he selevukà te sulù he vulawan sumalà te pelanu, ne ziyà haazà isavuk te valey te Nengazen, lelima is diyà te zapit te zizaya ne is lelima ziyà te zapit te zivavà. 8 Mibpevaal zaan sikandin te sepulù he lemisahan ne ziyà heini isavuk te valey te Nengazen, lelima is diyà te divavà ne lelima is diyà te zizaya. Mibpevaal zaan sikandin te 100 he yehung he vulawan he egemiten te kebpirik.

9 Mibpevaal zaan sikandin te lama para zà te menge memumuhat wey te meluag he lama ziyà te gawas. Mibpeveelan din heini te menge pultahan he ebeyaan te edseled dutun te lama ne mibpeepizan din haazà te brunsi. 10 Ne zutun din isavuk is teleǥuey te wahig he egngezanan te Daǥat te zapit te zivavà he edsilaan he iskina zutun te valey te Nengazen. 11 Mibpevaal zaan sikandin te menge diniyun, menge pala, wey menge yehung he egemiten te kebpemirikpirik.

Nengepasad haazà is langun he mibpeveelan ni Solomon ki Huram he para zutun te valey te Megbevayà. Ne iyan heini mibeelan din:

12 is dezuwa he tukud;

is dezuwa he henduen be te menge yehung he in-ulu zuen te menge tukud;

is dezuwa he impedlambid he mid-iring te kedina he zayandayan duen te menge in-ulu te menge tukud;

13 is 400 he mid-iring te prutas he pumigranata (nekepikit is dezuwa he linya kayi zuen te zezuwa he mid-iring te kedina he nekevedbed duen te in-ulu te menge tukud);

14 is menge kerumata wey menge visin kayi;

15 is teleǥuey te wahig he egngezanan te Daǥat wey sikan is untuzà kayi te teleǥuey he ledawan te sepulù wey zezuwa he tudu he menge vaka;

16 is menge diniyun, menge pala, menge zezekelà he menge tinidur he para te usa, wey zuma pa he menge ǥelemiten.

Is langun kayi he menge vutang para zuen te valey te Nengazen, he mibeelan ni Huram para ki Hadì Solomon, ne pudu heini brunsi he impesinew. 17 Mibpeveelan heini ni Hadì Solomon pinaaǥi te selsalan diyà te Suǥud te Jordan, he ziyà te pid-elangan te Sucot wey Zaretan. 18 Utew mezakel he brunsi is neǥamit ni Solomon, ne wazà metueni ke pira heini langun he kilu.

19 Mibpevaal zaan si Solomon kayi he menge gelemiten he para zuen te valey te Megbevayà:

bulawan he pemuhatà;

bulawan he menge lemisahan he selevukà te supas he ibpemuhat diyà te etuvangan te Megbevayà;

20 is menge selevukà te menge sulù he lunsey he vulawan wey is menge sulù kayi he ibpesiǥa etuvangan duen te Utew Segradu he Lugar sumalà is sulunuzen bahin kayi;

21 is dayandayan he menge vulak, is menge sulù wey is menge lipit, he pudu lunsey he vulawan;

22 is menge ibpenamped te pebilu, menge yehung he egemiten te kebpemirik, menge teleǥuey te menge veyewà, wey menge selevukà te vaǥa he pudu lunsey he vulawan;

is menge ǥemawan dutun te valey te Nengazen wey menge ǥemawan pehendiyà te seled te Utew Segradu he Lugar, ne pudu heini mid-epizan te vulawan.

<- 2 Cronica 3 2 Cronica 5 ->