1 Si Nahash he iyan hadì te menge Amunihanen, midhendiyà te inged he Jabesh Gilead duma is menge sundaru zin ne midlingutan dan su edsurungen dan. Migkaǥi ziyà te kandin is menge meǥinged dutun te, “Baal ka te kesebutan tew, ne ebpesakup key kenikew.” 2 Midtavak si Nahash te, “Egkehimu he ebaal a te kesebutan tew asal iyan egkesuatan ku is edluǥiten ku is kewanan he mata te kada sevaha keniyu wey mepeel-elezi is tivuuk he Israel.” 3 Midtavak is menge pengulu te Jabesh kandin te, “Edhangyù key he veǥayi key te timpu puun guntaan taman te pitu he andew su ibpesavut dey pa is tivuuk he Israel. Emun wazè en ebpekeuma he edluwas kenami ne ebpevayèbayè key en kenikew.”

4 Duen nemekeuma he menge menunudtulà diyà te Gibea, he zutun ed-ubpà si Saul. Ne hein midtudtul zan is menge lalag ni Nahash, nemenineǥew is langun he menge etew zutun. 5 Neserengà dutun he mid-ulì si Saul puun te pemuleey zin, midtundan din is menge vaka zin. Hein nezineg din is ebpemenineǥew mid-insà sikandin, “Hengkey ves is nehitavù? Maan is ebpemenineǥew is menge etew?” Ne zutun midtudtul te menge etew ziyà te kandin is migkaǥi te menge tig-Jabesh.

6 Kegkezineǥa ni Saul zutun ne segugunà sikandin mid-ulinan te Mulin-ulin te Megbevayà, wey utew sikandin nepauk. 7 Migkuwa sikandin te dezuwa he vaka ne mibpenggetad din. Ne impeuwit din dutun te menge menunudtulà, ne midsuǥù din sikandan he ibpehendiyà te tivuuk he tanà te Israel he ebpenudtul te menge etew, “Iyan heini egkeulaula te vaka te etew he kenà eduma ki Saul wey ki Samuel te kebpekidtebek.”

Ne zutun intaǥù te Nengazen diyà te gehinawa te menge Israilihanen is kegkehendeki zan ki Saul, umbe nesevaha zan is eduma ki Samuel wey ki Saul. 8 Ne midtiǥum ni Saul diyà te Bezek is menge etew: 300,000 is ebpuun te Israel, ne 30,000 is ebpuun te Juda. 9 Migkeǥiyan dan kes menge menunudtulà diyà te Jabesh Gilead te, “Keǥiyi niw is menge etew ziyan he keeselem te meudtu ne egkeluwas sikandan.” Hein nezineg te menge zuma zan haazà is tudtul te menge menunudtulà ne utew zan nengelipey. 10 Migkeǥiyan dan is menge Amunihanen te, “Keeselem ne ebpevayèbayè key en keniyu, minsan hengkey is ebeelan niw kenami ne veeli niw en.”

11 Meǥaan en egkepawà dutun te sunud he andew, ne mibahinbahin ni Saul is menge sakup din te tetelu he grupu. Ne hein utew pa meselem dutun, midsurung dan is kampu te menge Amunihanen ne mibpenhimetayan dan taman te meudtu. Is wazà mepatey kandan nemelaǥuy he tigselimbaha.

12 Hein nepasad is tebek, migkeǥiyan te menge Israilihanen si Samuel te, “Hentei menge etawa kes egkaǥi te kenà engayan he egkehimu he hadì tew si Saul? Uwita niw kayi su edhimetayan dey sikandan.” 13 Piru migkaǥi si Saul te, “Wazà etew he edhimetayan guntaan, su guntaan midluwas te Nengazen is Israel.” 14 Ne zutun migkeǥiyan ni Samuel is menge etew te, “Kuwa kew en, edhendiyè kiw te Gilgal su id-uman tew ibpesavut he si Saul iyan nehimu he hadì tew.” 15 Umbe midhendiyè dan langun te Gilgal ne impekilala zan diyà te etuvangan te Nengazen he si Saul nehimu en he hadì. Ne nemuhat sikandan dutun te pemuhat he para te meupiya he kedepità, wey midlipeylipey zan langun.

<- 1 Samuel 101 Samuel 12 ->