1 Menge Hadì 7

Mibangun si Solomon te Turuǥan

1 Mibangun daan si Solomon te turuǥan din, ne 13 he tuig is kebenguna kayi. 2-3 Sevaha zuen te menge vilding ni Solomon is migngezanan te Ketelunan te Lebanon. Ne 150 he ǥiek is keleyatan kayi, ne 75 he ǥiek is keluaǥan din, ne 45 he ǥiek is ketikang din. Heepat he linya is menge tukud kayi he menge kayu te sidru; 15 is kada linya. Ne kayi ipikit is 45 he kayu he menge pepesanan he zutun ipikit is kisami he kayu he sidru. 4 Is dezuwa he kilid dutun te bilding ne tigtetelu is nekedrerenged he menge sulawè din. 5 Duen kayi tetelu he ǥemawan he nerengezan daan te tetelu he menge ǥemawan.

6 Ne is sevaha pa he bilding iyan is lugar he tiǥumanan he zuen din mahabet he tukud. 75 he ǥiek is keleyatan din, ne 45 he ǥiek is keluaǥan din. Duen kayi varkun diyà te egkesineruwan din he zuen din atep wey menge tukud.

7 Ne zuen daan bilding he impeveelan din he zutun is pinuuwè din te kedhadì. Ne iyan daan heini lugar he zutun sikandin ebpenhusey. Mibpeepizan din heini te menge tabla he sidru puun te saag pehendiyà te kisami.

8 Ne is bahin dutun te turuǥan he ed-ubpaan ni Solomon diyè dà te egkeiniyuǥan duen te bilding he zutun sikandin ebpenhusey, ne neked-iring is kegkeveeli kayi te zezuwa. Ne iring ded daan kayi is kegkeveeli te valey he impevangun din he para te esawa zin he anak te hadì te Ehipto.

9 Heini is langun he menge bilding, puun te pundasyun taman te atep, mibeelan heini puun te pinekemeupiya he menge vatu he mibpenevì wey midsepsapan pudu is menge kilid din sumalà te hustu he sukud. 10 Is menge pundasyun iyan mibeelan is dezekelà wey meupiya he klasi he menge vatu. Is keluǥayad te zuma he menge vatu 15 he ǥiek, ne is duma 12 he ǥiek. 11 Mid-epizan heini te menge kayu he sidru wey mahalen he menge vatu he sungkad te hustu he sukud is kedsepsapi zuen. 12 Is meluag he lama neliǥuy te elavat. Ne is kada tetelu he apid kayi te binesbasan he elavat he menge vatu mid-epizan te kayu he sidru. Ne iring daan kayi is kegkeveeli te menge elavat diyà te seled he lama zuen te valey te Nengazen wey is diyà te varkun din.

Is menge Gelemiten duen te Baley te Nengazen

(2 Cronica 3:15-17; 4:1-22)

13 Duen pandey he tig-Tyre he egngezanan ki Huram. Impesinuǥung si kandin ni Hadì Solomon 14 su utew sikandin metau he pandey te menge putew. Anak sikandin te valu he vahi he ebpuun diyà te tribu ni Naftali, ne tig-Tyre is amey zin, he menenalsal zaan te menge putew. Midhendiyà si Huram te ki Hadì Solomon ne mibeelan din is langun he impeveelan kandin.

15 Mibaal si Huram te zezuwa he tukud he menge brunsi, ne is kada sevaha zutun 27 he ǥiek is kelayat din ne 18 he ǥiek peliǥuy is kezekelè din. 16 Mibaal zaan sikandin te zezuwa he brunsi he id-ulu zutun te menge tukud, he is kada sevaha pitu wey tengà he ǥiek is kelayat din. 17 Is kada sevaha zutun te id-ulu mideyzeyanan te pitu he midrara he kedina, 18 ne zuen midruwing duen he zezuwa he linya te prutas he pumigranata. 19 Is kegkeveeli zuen te menge in-ulu te menge tukud diyà te varkun henduen be te menge vulak he liryu, ne heenem he ǥiek is ketikang dan. 20 Is kada id-ulu zuen te zezuwa he tukud mibpeliǥuyan te zezuwa he linya te midruwing he prutas he pumigranata. Heini he zayandayan diyà te divavew he vahin duen te id-ulu, avey zuen te mid-iring te kedina. 21 Impehitindeg ni Huram is menge tukud te varkun duen te valey te Nengazen. Is tukud he zapit te divavà ne migngezanan din te Jakin, ne is tukud dapit te zizaya ne migngezanan din te Boaz. 22 Is kegkeveeli te menge in-ulu te menge tukud ne henduen be te menge vulak he liryu. Ne nepasad is kebeeli zuen te menge tukud.

23 Ne mibaal zaan si Huram te zekelà he teleǥuey te wahig he henduen te kawà, he migngezanan te Daǥat. Is kezalem kayi, pitu wey tengà he ǥiek, is keluaǥan din, 15 he ǥiek, ne is sukud te peliǥuy kayi, 45 he ǥiek. 24 Diyà te malù egkezizalem te vèbà kayi mibpeliǥuyan te zezuwa he linya te menge zayandayan. Heini he menge zayandayan, henduen be te edlangkat he menge pinemula, ne heenem dutun is diyà te teleǥuey. Ne haazà, inredsà is kebpurma zuen te kebeeli zutun te teleǥuey. 25 Haazà is teleǥuey in-untud diyà te peka te 12 he tudu he menge vaka he brunsi he ebpein-iniyuǥà. Is tetelu ziyà medsinaru te zizaya, is tetelu ziyà te edsenlepan, is tetelu ziyà te zivavà, is tetelu ziyà te edsilaan. 26 Is kekepal zutun te teleǥuey tetelu he vaney, is bèbà kayi iring te vèbà te tasa he netik-ew mevekar iring te mibekar en he vulak te liryu. Ne egketeǥuan heini te 11,000 he gelun he wahig.

27 Mibaal zaan si Huram te sepulù he untuzà he menge brunsi he egemiten te kedhakut te wahig. Is keleyatan din wey keluaǥan din tig-heenem he ǥiek, ne is ketikang din ne heepat wey tengà he ǥiek. 28 Iyan heini kegkeveeli zutun te menge untuzà: is menge elavat kayi zuen duen menge kuwadru-kuwadru 29 ne mideyzeyanan te zagwey te menge erimaung, menge tudu he vaka wey menge kirubin. Is egkezizalem wey egkezivavew zuen te menge erimaung wey menge tudu he vaka ne pudu mideyzeyani te henduen be te menge vulak. 30-31 Kada untuzà duen din heepat he ligid he menge brunsi wey zuen din daan menge ihi he brunsi. Is kada suyuk dutun te menge untuzà midtukuzan su para melig-en is kebpekesavuk te brunsi he bisin diyà te mid-untuzan duen. Ne haazà is menge intukud mideyzeyanan te henduen be te menge vulak he nekedlelambid. Is idlapew te untuzà te bisin dutun te untuzà, ne sevaha wey tengà he ǥiek, ne is keluag te vèbà dutun te untuzà, ne dezuwa he ǥiek wey tetelu he vaney. Ne kuwedradu is elevat kayi ne kenà lingin. 32 Ne ziyà te zizalem duen te kuwedradu he menge elavat ne zuen heepat he menge ligid he neketaud diyà te menge ihi he inredsà is kebpurmaha zuen te kebeeli zuen te untuzà. Is ketikang te kada ligid ne dezuwa he ǥiek wey tetelu he vaney, 33 ne iring heini te ligid te kerwahi. Is menge ihi, menge tuvu, menge rayus, wey menge yantas ne pudu brunsi. 34 Is kada untuzà duen dutun heepat he gewezà–sevaha ziyà te kada kilid, ne inredsè dà is kebeeli kayi te kebeeli zuen te untuzà. 35 Is lingin he lig-en te zivavew te kada untuzà, siyam he vaney is keluag din peliǥuy. Is menge lig-en wey menge elavat nekedredsà is kebpurma zuen hein mibeelan haazà is untuzà. 36 Mideyzeyanan is menge elavat wey is menge lig-en dutun te elavat te menge zagwey te kirubin, menge erimaung wey menge palma. Indayandayan heini ziyà te minsan hendei zutun te untuzà he egkehimu he edeyzeyanan kayi. Ne zuen daan kayi menge zayandayan diyà te peliǥuy he henduen be te menge vulak. 37 Iyan heeyan kebeeli ni Huram duen te sepulù he untuzà. Neked-iiring is kezekelà wey kegkeveeli zuen, su sevaha zà he hulmahan is neǥamit te kebpurmaha kandan.

38 Mibaal zaan si Huram te sepulù he bisin he menge brunsi, kada untuzà ne sevaha he bisin is para zuen. Ne heenem he ǥiek is ketikang te kada sevaha, ne egketeǥuan haazà te 220 he gelun he wahig. 39 Is lelima he untuzà diyà isavuk te egkezivavà he vahin duen te valey te Nengazen, ne is lelima pa ziyè din isavuk te egkezizaya he vahin. Ne insavuk din sikan is teleǥuey te wahig he egngezanan te Daǥat diyà te zapit te edsilaan he edramig diyà te zivavà ke zutun ki te valey te Nengazen. 40 Mibpevaal zaan sikandin te menge diniyun, menge pala, wey menge yehung he egemiten te kebpemirikpirik.

Nengepasad haazà ni Huram is langun he mibpeveelan kandin ni Hadì Solomon he para zutun te valey te Nengazen. Ne iyan heini mibeelan din:

41 is dezuwa he tukud;

is dezuwa he henduen be te menge yehung he in-ulu zuen te menge tukud;

is dezuwa he impedlambid he mid-iring te kedina he zayandayan duen te menge in-ulu te menge tukud;

42 is 400 he mid-iring te prutas he pumigranata (nekepikit is dezuwa he linya kayi zuen te zezuwa he mid-iring te kedina he nekevedbed duen te in-ulu te menge tukud);

43 Is sepulù he untuzà wey sikan is sepulù he bisin;

44 is teleǥuey te wahig he egngezanan te Daǥat wey sikan is untuzà kayi te teleǥuey he ledawan te sepulù wey zezuwa he tudu he menge vaka;

45 is menge diniyun, menge pala, menge yehung, wey zuma pa he menge gelemiten.

Is langun kayi he menge vutang he para zuen te valey te Nengazen, he mibeelan ni Huram para ki Hadì Solomon, ne pudu heini brunsi he impesinew. 46 Mibpeveelan heini ni Hadì Solomon pinaaǥi te selsalan diyà te Suǥud te Jordan, he ziyà te pid-elangan te Sucot wey Zaretan. 47 Dekelà heini he menge vutang umbe wazè en ipetimbang ni Solomon; wazè en metueni ke pira he kilu he menge brunsi.

48 Mibpevaal zaan si Solomon kayi he menge gelemiten he para zuen te valey te Nengazen:

bulawan he pemuhatà;

bulawan he lemisahan he selevukà te supas he ibpemuhat diyà te etuvangan te Megbevayà;

49 is menge selevukà te menge sulù he lunsey he vulawan he ibpehitindeg diyà te etuvangan duen te Utew Segradu he Lugar (lelima kayi is diyà te egkekewanan wey lelima zaan is diyà te egkeǥivang);

is bulawan he menge vulak, menge sulù wey menge lipit;

50 is lunsey he vulawan he menge vasu, menge ibpenamped te menge pebilu, menge yehung, menge keluzà, wey menge teleǥuey te veyewà;

is bulawan he menge bisagra he para te menge gemawan te Segradu he Lugar wey para mismu zuen te valey te Nengazen.

51 Hein nepasad is langun he mibpeveelan ni Hadì Solomon he para zuen te valey te Nengazen, mid-uwit din diyà te menge budiga zutun te valey te Nengazen is menge azen he impehinungud te amey zin he si David diyà te NENGAZEN–is menge pelata, menge vulawan, wey menge gelemiten.

<- 1 Menge Hadì 6 1 Menge Hadì 8 ->