1 Midhadì si Solomon diyà te tivuuk he Israel. 2 Ne iyan heini lavew he menge upisyal zin:

Is lavew he memumuhat iyan si Azaria he kevuwazan ni Zadok.

3 Is menge sikritaryu zuen te hadì iyan si Elihoref wey si Ahia he menge anak ni Shisha.

Is midseriǥan te menge libru te ginhedian din iyan si Jehoshafat he anak ni Ahilud.

4 Is peremandar te menge sundaru iyan si Benaya he anak ni Jehoyada.

Is menge lavew he memumuhat iyan si Zadok wey si Abiatar.

5 Is pengulu te menge gubirnedur ziyà te menge distritu te Israel iyan si Azaria he anak ni Natan.

Is sumesambag duen te hadì iyan si Zabud he memumuhat, he anak daan ni Natan.

6 Is perezumala te turuǥan iyan si Ahishar.

Ne is perezumala te menge uripen he edteǥelen te kebpeterebahu iyan si Adoniram he anak ni Abda.

7 Duen 12 he menge gubirnedur ni Solomon diyà te menge distritu te tivuuk he Israel. Iyan sikandan metau wey ikehated is keuyaǥan te hadì wey te pemilya zin. Is kada sevaha kandan edhated te keenen seled te senge vulan kada tuig. 8 Iyan heini menge ngazan dan:

Si Ben Hur, is gubirnedur ziyà te vuvungan te Efraim.

9 Si Ben Deker, is gubirnedur te Makaz, Shaalbim, Bet Shemesh, wey te Elon Bet Hanan.

10 Si Ben Hesed, is gubirnedur te Arubot, ragkes en kayi is Soco wey is tivuuk he tanà te Hefer.

11 Si Ben Abinadab, is gubirnedur te Nafat Dor. (Esawa sikandin ni Tafat te vahi he anak ni Solomon.)

12 Si Banaa he anak ni Ahilud, is gubirnedur te Taanac, Megido, te tivuuk he Bet Shean he uvey te Zaretan he alug te Jezreel, wey te menge lugar puun te Bet Shean pehendiyà te Abel Mehola wey te leyunà te Jokmeam.

13 Si Ben Geber, is gubirnedur te Ramot Gilead, ragkes en kayi is menge inged ni Jair te anak ni Manase, wey is distritu te Argob diyà te Bashan, ragkes en is 60 he dezekelà he menge inged kayi he mibpeliǥuyan te verengbeng, he brunsi is menge trangka te menge pultahan din.

14 Si Ahinadab he anak ni Iddo, is gubirnedur te Mahanaim.

15 Si Ahimaaz, is gubirnedur te Naftali. (Esawa sikandin ni Basemat te anak he vahi ni Solomon.)

16 Si Baana he anak ni Hushai, is gubirnedur te Asher wey te Alot.

17 Si Jehoshafat he anak ni Parua, is gubirnedur te Isacar.

18 Si Shimei he anak ni Ela, is gubirnedur te Benjamin.

19 Si Geber he anak ni Uri, he gubirnedur te Gilead, he nesakup dengan ni Sihon te hadì te menge Amorihanen wey si Og he hadì diyà te Bashan. Si Geber zà is gubirnedur kayi te tivuuk he distritu.

20 Is kezakel te menge etew ziyà te Juda wey Israel henduen be te pantad diyà te veyvey te zaǥat he kenà egkevilang. Dekelà is egkekaan dan wey egkeinum dan, ne melipayen sikandan. 21 Si Solomon is midumala te langun he ginhedian puun te Wahig he Eufrates pehendiyà te tanà te menge Filistihanen taman te dulunà te Ehipto. Heini he menge ginhedian ebayad te vuhis dan diyà te ki Solomon ne mibpesakup kandin dutun te uuyag pa sikandin.

22 Is keenen he egkinehenglanen ni Solomon diyà te turuǥan din kada andew ne iyan heini: 100 he saku he utew meupiya he klasi te herina, 300 he saku he kenà utew meupiya he klasi te herina, 23 sepulù he vaka he impelambù diyà te tudil, 20 he vaka he impelayud dà diyà te penebtavà, 100 he kerehidu etawa kambing, kenà ragkes is nekedseselekawà he klasi te menge selazeng, wey meupiya he klasi te menge tagbis wey menge manuk.

24 Nesakup te ginhedian ni Solomon is tivuuk he tanà diyà dapit te edsenlepan te Wahig he Eufrates, puun te Tifsa taman te Gaza. Ne meupiya is kedepitè din diyà te langun he menge nasyun he nekeelingkus kandin. 25 Umbe, zutun te uuyag pa si Solomon, duen kelinew ziyà te Juda wey Israel puun te Dan taman te Beersheba. Is kada etew, edsihung diyà te pinemula zin he paras wey kayu he higus he zuen din kelinew.

26 Duen 40,000 he kuwadra ni Solomon he para te menge kudè din he para te kerwahi, ne zuen din 12,000 he pereuntud te kudà. 27 Is menge gubirnedur ziyà te menge distritu, iyan ebeǥey ki Hadì Solomon te keenen wey te langun he menge etew ziyà te turuǥan din. Is kada sevaha kandan midtendek he vulan is kebeǥey zin. Ebpeniguru sikandan he ikeveǥey zan is menge kinahanglan ni Solomon. 28 Ebeǥey zaan sikandan te barli wey kumpey he para te menge kudà he para te kerwahi wey te zuma pa he menge kudà. Ed-uwiten dan heini ziyà te lugar he ereg he ed-uwitan kayi zutun te midtendek he timpu te kebeǥey zan.

29 Mibeǥayan te Megbevayà si Solomon te nekeviza he ketau, kedsavut, wey keuluwanen he kenà egketegkad. 30 Is ketau zin lavew pa te ketau te langun he uluwanen diyà te edsilaan wey ziyà te Ehipto. 31 Iyan sikandin kinemeteuwan te langun. Edhuna pa sikandin he metau ki Etan he Ezranhon, wey te menge anak ni Mahol he ensi Heman, Calcol, wey si Darda. Ne nevantug sikandin diyà te nekeelingkus he menge nasyun. 32 Mibaal sikandin te 3,000 he menge erubasa wey 1,005 he menge kanta. 33 Igkeseysey zin is mehitenged te ebpemenuvù, puun te zezekelà he menge kayu pehendiyà te utew zezeisey he ebpemenuvù. Ebpekepenudtul zaan sikandin bahin te minsan hengkey he klasi te: ebpemenhipanew, ebpemenanap, ebpemenlayang, wey is ebpenlayewlayew. 34 Nezineg te langun he menge hadì kayi te kelibutan is ketau ni Solomon, umbe zuen menge etew he midsuǥù dan te kebpemineg te ketau ni Solomon.

<- 1 Menge Hadì 31 Menge Hadì 5 ->