1 Cronica 12

Is menge Etew he Miduma ki David wey te menge Sundaru Zin

1 Iyan heini menge etew he midhendiyà te ki David diyà te Ziklag he miduma kandin hein kemulu pa sikandin ed-eles-eles ki Saul he anak ni Kish. Duma heini sikandan te mid-uǥup te kebpekidtebek ni David. 2 Memetau heini sikandan te panà, wey iyan heini vaal zan is kebpemanà wey kebpenlimpawes, metau is kewanan wey givang he velad dan. Menge kezuzumahi heini sikandan ni Saul he ebpuun te tribu ni Benjamin. 3 Iyan heini menge ngazan dan: si Ahiezer is pengulu zan wey si Joash. Menge anak sikandan ni Shemaa he tig-Gibeah. Iyan heini menge ngazan dan:

si Jeziel wey si Pelet he menge anak ni Azmavet,

si Beraca wey si Jehu he tig-Anatot,

4 si Ishmaya he tig-Gibeon, he sevaha he mevurut he pengulu zuen te 30 he mevurut he menge sundaru.

Si Jeremias, Jahaziel, Johanan, Jozabad he tig-Gedera,

5 si Eluzai, Jerimot, Bealia, Shemaria, wey si Shefatia he tig-Haruf,

6 si Elkana, Ishia, Azarel, Joezer, wey si Jashobeam he menge kevuwazan ni Kora,

7 si Joela wey si Zebadia he menge anak ni Jehoram he tig-Gedor.

8 Duen daan menge etew he ebpuun te tribu ni Gad he miduma ki David diyà te melig-en he elesà diyà te sibsivayan. Mevurut sikandan he menge sundaru ne iyan layun egemiten dan is kelasag wey vangkew. Iring sikandan kevurut te menge erimaung wey iring sikandan keǥaan te selazeng diyà te menge vuvungan:

9 si Ezer ne iyan pengulu zan,

si Obadias is ikezuwa;

si Eliab is iketelu;

10 si Mishmana is ikeepat;

si Jeremias is ikelima,

11 si Atai is ikeenem,

si Eliel is ikepitu,

12 si Johanan is ikewalu,

si Elzabad is ikesiyam;

13 si Jeremias is ikesepulù,

ne iyan ike-11 si Macbanai.

14 Iyan heini sikandan menge kevuwazan ni Gad he menge peremandar te menge sundaru. Is pinekemeǥuyà kandan ne ebpekezumala te 100 he sundaru ne is pinekemezesen kandan ne ebpekezumala te 1,000 he sundaru. 15 Midlayun dan dengan is Wahig he Jordan hein timpu te tingdalem kayi, dutun te nehuna he vulan te tuig, ne midsegseg dan is langun he meǥinged diyà te suǥud he zapit te edsilaan wey edsenlepan te wahig.

16 Duen daan menge etew he ebpuun te tribu ni Benjamin wey ki Juda he midhendiyà te ki David diyà te melig-en he elesà. 17 Migawas si David ne midsinuǥung din sikandan ne migkaǥi, “Emun iyan inhendini niw is edtevangan a keniyu su menge emiǥu ku sikiyu ne edewaten ku sikiyu he eduma kenami. Piru emun iyan inhengkayi niw is ibpalad a keniyu te menge kuntada ku minsan wazè ku mibeelan he mezaat keniyu, ne iyan ebpekaahà kayi is Megbevayà te menge kepuun tew ne iyan edsilut keniyu.”

18 Ne zutun mid-uwit te Mulin-ulin si Amasai he nehimu he pengulu zuen te 30 he menge mevurut he menge sundaru ne migkaǥi sikandin te,

“Edlavan key kenikew, David he anak ni Jesse! Deyzey pezem ke mebmezeeǥen ka wey is mid-uǥup kenikew, su iyan is Megbevayè nu mid-uǥup kenikew.” Ne midawat sikandan ni David ne midhimu zin sikandan he menge upisyal te menge sundaru zin.

19 Duen daan menge etew he ebpuun te tribu ni Manase he nekezuma ki David hein midhendiyà te menge Filistihanen su ebpekidtebek ki Saul. Piru wazà mebpemineg is menge Filistihanen he eduma si David wey is menge sakup din, su neisip dan he kela ke ziyè ded si David medlavan med-uman te egalen din he si Saul. Umbe hein nepasad is kebpelelelaǥè dan ne impelikù dan ensi David diyà te Ziklag.

20 Iyan heini menge etew he ebpuun te tribu ni Manase he miduma ki David diyà te Ziklag: si Adnah, Jozabad, Jediel, Micael, Jozabad, Elihu, wey si Ziletai. Kada sevaha kandan ne pengulu te tignengkelibu he menge sundaru te tribu ni Manase. 21 Mid-uǥupan dan si David te kebpekidtebek te ebpemenurung, su menge mahagtì heini langun he menge sundaru. Umbe nehimu sikandan he peremandar te menge sundaru ni David. 22 Kada andew ne zuen ebpemenhendiyà he menge etew te ki David su ed-uǥup dan kandin, taman te mibmezakel wey mibmelig-en is menge sundaru zin.

23 Iyan heini kezakel te neǥumeenan he menge sundaru he midhendiyà te ki David diyà te Hebron he ed-uǥup kandin he maaǥew zin is ginhedian ni Saul, sumalà te insaad te Nengazen.

24 Is ebpuun te tribu ni Juda: 6,800 he menge sundaru he neǥumeenan he zuen dan menge vangkew wey menge panà.

25 Is ebpuun te tribu ni Simeon: 7,100 he memetau he menge sundaru.

26 Is ebpuun te tribu ni Levi: 4,600 he menge sundaru, 27 apil en si Jehoyada is pengulu te pemilya ni Aaron wey is menge sakup din he 3,700, 28 wey si Zadok is sevaha zaan he metau he vetan-en he sundaru wey is 22 he menge upisyal he ebpuun te pemilya zin.

29 Is ebpuun te tribu ni Benjamin he menge kezuzumahi ni Saul: 3,000 he menge sundaru. Iyan, mezakel is menge kevuwazan ni Benjamin he mibpedayun med-unung ki Saul.

30 Is ebpuun te tribu ni Efraim: 20,800 he memetau he menge sundaru he nevantug diyà te pemilya zan.

31 Is ebpuun te ketengà he tribu ni Manase: 18,000 he menge sundaru he midsuǥù he para mekeuǥup he mehimu he hadì si David.

32 Is ebpuun te tribu ni Isacar: 200 he menge pengulu zuma is menge kezuzumahi zan he ebpenguluwan dan. Netau heini sikandan ke hengkey is ereg he ebeelan te Israel wey ke keenu zan heini ebeeli.

33 Is ebpuun te tribu ni Zebulun: 50,000 he memetau he menge sundaru he andam he ebpekidtebek. Neǥumeenan sikandan te nekedseselekawà he menge ǥumaan. Andam sikandan he ed-uǥup wey ed-unung ki David.

34 Is ebpuun te tribu ni Naftali: 1,000 he menge upisyal wey 37,000 he menge sundaru he ebpemen-uwit te menge kelasag wey menge vangkew.

35 Is ebpuun te tribu ni Dan: 28,600 he memetau he menge sundaru he andam he ebpekidtebek.

36 Is ebpuun te tribu ni Asher: 40,000 he menge memetau he menge sundaru he andam he ebpekidtebek.

37 Ne is ebpuun te tribu he ziyà te zapit te edsilaan te Wahig he Jordan: he tribu ni Reuben, Gad wey ketengà he tribu ni Manase: 120,000 he menge sundaru he neǥumeenan te mibarangbarang he menge ǥumaan.

38 Iyan heini langun he menge sundaru he mibuluntaryu he ebpekidtebek. Midhendiyè dan te Hebron he zekelà is tinguhè dan te kedhimuwa ki David he hadì te tivuuk he Israel. Hapit is langun he menge Israilihanen ne utew egkesuat he si David is egkehimu he hadì dan. 39 Menge tetelu he andew zan dutun he mibpekiduma ki David te kegkaan wey ked-inum su mibpeuwitan sikandan te menge siringan dan te menge egkekaan. 40 Mid-uwit daan te menge keenen is menge kezumahan dan he ebpuun pa te meziyù he lugar te Isacar, Zebulun, wey Naftali. Ingkarga zan heini te menge asnu, menge kemilyu, menge mula, wey menge vaka. Dekelà is herina zan, menge higus, pasas, binu, lana, baka, wey kerehidu. Utew zutun melipayen is tivuuk he Israel.

<- 1 Cronica 11 1 Cronica 13 ->