1 Cˀia⁴ Jesús tsa³cja¹cao⁴ cho⁴ta⁴ncjin², cˀoa⁴ cao⁴ cho⁴ta⁴-le⁴. 2 Qui³tso²: Je² cho⁴ta⁴ scribano cao⁴ cho⁴ta⁴ fariseos va³tio²son² ya¹xi²le⁴-le⁴ nca³ si¹cˀa³to³ya³ xi³ qui³tso² Moisés. 3 Nca³yi³je³ xi³ cˀoa⁴coi⁴tso⁴-no³ cˀoa⁴sˀiaon⁴³, cˀoa⁴-sˀin² si⁴qui³tjo³son²³. To⁴nca³ li² cˀoa⁴-jin² nˀiaon²³ jo³-sˀin² sˀin¹ nca³ je², nca⁴ cˀoa⁴tso², to⁴nca³ li²coi³ cˀoa⁴sˀin¹. 4 Va³nˀion¹ chˀa¹ xi³ ai¹, xi³ nˀion¹ ñˀain³ chˀa², cˀoa⁴ va¹yo³son² ya¹tsˀin⁴ cho⁴ta⁴, to⁴nca³ ti⁴je²-ni³ ni⁴si¹cao⁴-jin² cao⁴ jnco³ na⁴jma¹ntsja³. 5 Nca³yi³je³ je² xa¹ xi³ sˀin¹, cˀoa⁴sˀin¹ jme¹-ni³ nca³ ca²ta³ve³-si¹ni³ cho⁴ta⁴. Si¹te³ya³-sa³ je² čhjoa⁴ jña³ va¹yo³ya² xon⁴cjoa⁴te¹xo³ma³, cˀoa⁴ si¹jnčho³tjon²-sa³ ntsja⁴ˀa³-le⁴ na³jño³jnčho³-le⁴. 6 Tsjoa³que³ ˀnte³ xi³ nqui²sa⁴ ti¹tjon² cˀia⁴ nca³ cjen², cˀoa⁴ je² ya¹xi²le⁴ xi³ nqui²sa⁴ ti¹tjon² ya⁴ ntˀia³ sinagoga. 7 Tsjoa³que³ cjoa⁴ni²ti²ˀnta³ ya⁴ nti⁴tsin⁴, cˀoa⁴ nca³ Rabí, Rabí tso²-le⁴ cho⁴ta⁴. 8 To⁴nca³ jon² li²coi³ ca²ta³ˀmi²-no³ Rabí, nca⁴ to⁴jnco³ je² xi³ Maestro-no³, je² Cristo, cˀoa⁴ nca³tsˀio³ nca³ jon² ntsˀe⁴ ma³-nio³. 9 Cˀoa⁴ ni⁴ˀya³-jin² xi³ cˀoa⁴ˀmi²-lao⁴³ nˀai³ i⁴ son³ˀnte³-vi⁴, nca⁴ to⁴jnco³ je² xi³ Nˀai³-no³, je² xi³ cˀoa⁴-sˀin² ti¹jna³ ncˀa³jmi³. 10 Ni⁴nca³jco⁴-jin² ca²ta³ˀmi²-no³, nca⁴ to⁴jnco³ je² xi³ nca³jco⁴-no³, je² Cristo. 11 Je² xi³ ti¹tjon² cˀoe¹yo³jin³-no³ nca³ jon², je²-vi⁴ xi³ si⁴²xa¹-no³. 12 Je² xi³ ncˀa³ vˀa³sje³ yao³-le⁴, cjai¹nca³ na³nqui³ coan⁴-ni³, cˀoa⁴ je² xi³ na³nqui³ vˀa³sje³ yao³-le⁴, ncˀa³ coi⁴tjo³-ni³. 13 To⁴nca³ ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Vˀe²chjoa²-nio¹³ xo⁴ntjoa⁴-le⁴ je² cjoa⁴te¹xo³ma³-le⁴ Ni³na¹ nqui³xcon⁴ cho⁴ta⁴ xi³ me³-le⁴ fa³ˀa³sˀen³, ti⁴jon²-nio³ li²coi³ vi³tja³sˀaon³, cˀoa⁴ je² xi³ tjio¹fa³ˀa³sˀen³ tsa³cˀe²chjoa²-lao⁴³ nca³ fa³ˀa³sˀen³. 14 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. So³yo³ntjao²³ ni³ˀya³-le⁴ ya¹nchjin¹cˀan³ xi³ cˀen³-le⁴ xˀin⁴, cˀoa⁴ to⁴nti³so³-nio¹³ nca³ cˀoa⁴-sˀin² tse³ vˀe²tsˀoao³. Xi³ to⁴coi³ cjoa⁴ nqui²sa⁴ tse³ cjoa⁴ñˀain³ sˀe⁴-no³. 15 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Cˀoa⁴-sˀin² vi³ma³jion³ nta¹chi³con³ cˀoa⁴ son² na³nqui³, jme¹-ni³ nca³ si⁴qui³njen³-si¹ni³lao⁴³ jnco³ cho⁴ta⁴ xi³ coai⁴tˀa³-no³. Cˀia⁴ nca³ je³cˀoa⁴-sˀin² coan⁴, jon² cˀoa⁴ni²cao⁴³ sa³ˀnta³ nca³ va³quin²-le⁴ ˀnte³cjoa⁴ñˀain³, jao²ya³ cˀoa⁴tjin¹ nqui²sa⁴ va³quin²-le⁴ cao⁴-ni³ tsa² jon². 16 Ma⁴-xo¹nio³ nca³ jon², cho⁴ta⁴ xi³ fa³ntiao⁴², to⁴nca³ xca⁴ nio¹³, cˀoa⁴vi³xon¹³: To⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ ˀnte³tsje-le⁴ yo⁴nco⁴, a³li²jme³-jin², to⁴nca³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ taon⁴si³ne² xi³ tsˀe⁴ ˀnte³tsje³, cˀoa⁴-sˀin² tjin¹ne²-le⁴. 17 Cho⁴ta⁴ xi³ tsi² cjoa⁴fa³ˀai³tsjen³ tjin¹-no³, cˀoa⁴ xca⁴ nio¹³. Jña¹-le⁴ xi³ nqui²sa⁴ ti¹tjon², a³ je² taon⁴si³ne², a³xo⁴ je² yo⁴nco⁴ xi³ si¹tsje³ je² taon⁴si³ne². 18 Cˀoa⁴ vi³xon¹³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ xta², a³li²jme³-jin², to⁴nca³ to⁴ˀya³-ni³ve⁴ xi³ tsjoa¹ en¹-le⁴ xi³ tˀa³tsˀe⁴ je² cjoa⁴tjao² xi³ ti¹jna³son²-le⁴ xta²-ve⁴, cˀoa⁴-sˀin² tjin¹ne²-le⁴. 19 Cho⁴ta⁴ xi³ tsi² cjoa⁴fa³ˀai³tsjen³ tjin¹-no³ cˀoa⁴ xca⁴ nio¹³. Jña¹-le⁴ xi³ nqui²sa⁴ ti¹tjon², a³ je² cjoa⁴tjao², a³xo⁴ je² xta² xi³ si¹tsje³ je² cjoa⁴tjao². 20 Je² xi³ tsjao¹ en¹-le⁴ xi³ tˀa³tsˀe⁴ xta²-ve⁴, tsjoa¹ en¹-le⁴ xi³ tˀa³tsˀe⁴, cˀoa⁴ xi³ tˀa³tsˀe⁴ nca³yi³je³ xi³ ti¹jna³son²-le⁴. 21 Cˀoa⁴ je² xi³ tsjoa¹ en¹-le⁴ xi³ tˀa³tsˀe⁴ ˀnte³tsje³, tsjoa¹ en¹-le⁴ xi³ tˀa³tsˀe⁴, cˀoa⁴ xi³ tˀa³tsˀe⁴ je² xi³ ti¹jna³ya³-le⁴. 22 Cˀoa⁴ je² xi³ tsjoa¹ en¹-le⁴ xi³ tˀa³tsˀe⁴ ncˀa³jmi³, tsjoa¹ en¹-le⁴ xi³ tˀa³tsˀe⁴ ya¹xi²le⁴-le⁴ Ni³na¹, cˀoa⁴ xi³ tˀa³tsˀe⁴ je² xi³ ti¹jna³son². 23 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Jon² vˀao²³ jnco³ ya³ xi³ te³ ya³ ma³-ni³, jo³ tjin¹ xi³ njen²-no³ xi³ tsˀe⁴ xca⁴ menta cao⁴ xca⁴ eneldo cao⁴ xca⁴ comino, cˀoa⁴ tsa³cˀe²jnao³ je² xi³ nqui²sa⁴ nˀion¹ ma³chjen¹ xi³ tsˀe⁴ cjoa⁴te¹xo³ma³, xi³ coi³ cjoa⁴qui²xi⁴ cao⁴ cjoa⁴ma⁴ta³con² cao⁴ xi³ ma³cjain¹-na¹. Je²-vi⁴ xi³ tjin¹ne²-no³ nca³ cˀoa⁴sˀiaon⁴³ tsa²cai³, cˀoa⁴ ni⁴cˀoe¹jna³-jion²³ xi³cˀa³ cjoa⁴. 24 Cho⁴ta⁴ xi³ fa³ntiao⁴² to⁴nca³ xca⁴ nio¹³, nca³ ni²cˀao³ je² ˀnti¹ na⁴tse⁴, to⁴nca³ cho⁴jaon⁴³ camello. 25 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Ni²tsjao³ son²ncˀa³-le⁴ cho⁴tsin¹ cao⁴ čhoa⁴, to⁴nca³ ja⁴ya³-le⁴ tjio¹qui³tse³-ni³ cjoa⁴che¹ cao⁴ cjoa⁴chi⁴nca⁴. 26 Xca⁴ ni¹³, ji³ xi³ cho⁴ta⁴ fariseo, ti⁴tsje³ ti¹tjoin²³ ja⁴ya³-le⁴ cho⁴tsin¹, cao⁴ čhoa⁴, jme¹-ni³ nca³ cˀoa⁴-ti⁴ son²ncˀa³-le⁴ ña³qui³ coan⁴tsje³-si¹ni³. 27 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, jao²ncjain¹ nio¹³. Cˀoa⁴ cjoaon³ jo³-ni³ tsjo¹ xi³ coan³ čhoa³jon³, xi³ son²tˀain³-le⁴ na⁴sca¹ ma³tsen³, to⁴nca³ ja⁴ya³-le⁴ tjio¹qui³tse³-ni³ ni³nta³-le⁴ cˀen³, cao⁴ nca³yi³je³ xi³ jnti¹. 28 Cˀoa⁴-sˀin² nca³ jon² xi³ son²tˀain³-no³ ma³tsen³ nca³ nˀion¹ qui²xi⁴ ti³mao³ nqui³xcon⁴ cho⁴ta⁴, to⁴nca³ ja⁴ya³-no³ tjio¹qui³tse³-nio³ cjoa⁴jao²ncjain¹ cao⁴ cjoa⁴tsˀen⁴. 29 Ma⁴-xo¹nio³ nca³ jon², cho⁴ta⁴ scribano cao⁴ cho⁴ta⁴ fariseos, cho⁴ta⁴jao²ncjain¹ nio¹³. Cˀoa⁴-sˀin² vˀe²ntao³ tsjo¹-le⁴ cˀen³ xi³ tsˀe⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹, cˀoa⁴ ni²nˀion¹jon³ lao⁴chi³con³-le⁴ cho⁴ta⁴cjoa⁴qui²xi⁴. 30 Cˀoa⁴ vi³xon¹³: Tsa² ña¹-la⁴ nia¹ xi³ tsa³qui³yo³choan³² cˀia⁴ ni⁴čhjin³-le⁴ nˀai³jcha¹cjin³-na¹ tsa²cai³, li²coi³ cˀoa⁴-sˀin² cao⁴ je² to⁴jnco³ tsa³cˀe²jten⁴² njin¹-le⁴ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. 31 Cˀoa⁴-sˀin² ti⁴jon² fa³nqui³-nio³ yao³-no³ nca³ jon² nio¹³ xti³-le⁴ je² cho⁴ta⁴ xi³ qui³si³cˀen³ cho⁴ta⁴ xi³ qui³nchja⁴ya³ tˀa³tsˀe⁴ Ni³na¹. 32 Tˀe²qui³tsao³-ˀni³ je² choa⁴-le⁴ nˀai³jcha¹cjin³-no³. 33 Jon² xi³ cho⁴ta⁴ xi³ ye⁴ cjoaon³, jo¹-sˀin² coi²tjo⁴xin³-ni³lao⁴³ je² cjoa⁴ñˀain³-le⁴ ˀnte³cjoa⁴ñˀain³. 34 To⁴coi³ cjoa⁴-vi⁴ an³ si³ca³sen¹³-no³ cho⁴ta⁴ xi³ nchja⁴ya³ tˀa³tsˀe⁴ Ni³na¹, cao⁴ cho⁴ta⁴chji⁴ne⁴, cao⁴ cho⁴ta⁴ scribano. Tjin¹ cˀa³ xi³ tsˀe⁴ xi³ si⁴cˀaon³, cˀoa⁴ cjoa¹tˀao³ cro². Cˀoa⁴ xi³cˀa³ cjoa¹-lao⁴³ ya⁴ ntˀia³ sinagoga, cˀoa⁴ coai⁴tjen⁴nqui³ co²ntran⁴-lao⁴³ xqui⁴ na⁴xi⁴na³nta¹. 35 An³ cˀoa⁴-sˀin² si³ca³sen¹³-no³ je² cho⁴ta⁴-ve⁴, jme¹-ni³ nca³ cjoa⁴ˀai¹ne²-si¹ni³no³ nca³ jon² je² njin¹-le⁴ cho⁴ta⁴cjoa⁴qui²xi⁴ xi³ qui³sˀe³jten⁴ son² son³ˀnte³-vi⁴, sa³ˀnta³ njin¹-le⁴ Abel, xi³ cho⁴ta⁴cjoa⁴qui²xi⁴, sa³ˀnta³ njin¹-le⁴ Zacarías, ˀnti¹-le⁴ Berequías, xi³ qui³ni²cˀen³ˀncho² ˀnte³tsje³-ve⁴ cao⁴ xta²-ve⁴. 36 Xi³ cjoa⁴qui²xi⁴ xi³ xin³-no³, nca³yi³je³ je² cjoa⁴ je²-vi⁴ cjoa⁴ˀai¹ne²-le⁴ je² cho⁴ta⁴ xi³ tjio¹ ntˀai⁴-vi⁴.

37 Jerusalén, Jerusalén, xi³ ni²cˀain³ cho⁴ta⁴ xi³ nchja⁴ya³ tˀa³tsˀe⁴ Ni³na¹, cˀoa⁴ la⁴jao⁴ ni²cˀen³-ni³ je² xi³ ni²ca³sen¹con³-li². Jo¹-la²na¹ tjin¹ cˀa³ nca³ coan³me³-na³ nca³ tsa³cˀe³xcoa¹³ xti³-li⁴ jo³-ni³ tsa² xa⁴ˀnta⁴ xi³ vˀe¹nqui³jnca³ ˀnti¹-le⁴, to⁴nca³ coan³cai³-li². 38 Coe⁴-ni³ ntˀia³-no³ sˀe³jna³ cji³tia³-no³. 39 Cˀoa⁴xin³-no³ nca³ va³se²tsˀia⁴-cjoan²ni³ ntˀai⁴-vi⁴, li²coi³ ti⁴jcha⁴-ni³nao¹³ sa³ˀnta³ nca³ coi⁴xon¹³: Jo¹ to⁴nta³-le⁴ je² xi³ nčhoa¹ nca³jao³-le⁴ Nai³-na¹.