1 Cˀoa⁴ coan³ cˀia⁴ nca³ je³qui³nchja⁴ Jesús je² en¹-vi⁴, ji³tjo³-ni³ Galilea, ja³ˀai³ na³nqui³ Judea xi³ ti¹jna³ xi³ncoa³nta¹-ni³ nta¹je⁴ Jordán.

2 Nˀion¹ ncjin² cho⁴ta⁴ qui³tjen⁴nqui³-le⁴, cˀoa⁴ Jesús qui³si³nta³ cho⁴ta⁴ ya⁴-ve⁴. 3 Cˀia⁴ ji³cho²con³-le⁴ Jesús cho⁴ta⁴ fariseos, chˀao³-sˀin² qui³si³cao⁴, qui³tso²-le⁴: A³ tjo³ˀnte³-le⁴ xi³ xˀin⁴ nca³ tsjion¹ chjon⁴²-le⁴ xi³ tˀa³tsˀe⁴ to⁴jme³ cjoa⁴-ni³. 4 Cˀoa⁴ Jesús qui³tso²-le⁴: A³ cje³ vˀe²xquia⁴jion²³ nca³ je² xi³ qui³si³nta³-le⁴ sa³ˀnta³ nca³ ti¹tjon², xi³ xˀin⁴ cao⁴ xi³ chjon⁴² qui³si³nta³-le⁴. 5 Cˀoa⁴ Ni³na¹ qui³tso²: To⁴coi³ cjoa⁴ je² xˀin⁴ si⁴²ca³tio¹ nˀai³-le⁴ cao⁴ na⁴-le⁴, cˀoa⁴ to⁴jnco³ cˀoe¹jna³cao⁴ chjon⁴²-le⁴, cˀoa⁴ to⁴coan⁴jnco³-ni³ yao³-le⁴. 6 Cˀoa⁴-sˀin² nca³ tsi² ti⁴jao² ma³nqui²-sa³ni³, to⁴jnco³ yao³ ma³-ni³. To⁴coi³ je² xi³ Ni³na¹ tsa³cˀe¹cjao², a³li² vˀa³sje³xin²-jin² cho⁴ta⁴. 7 Cho⁴ta⁴ fariseo qui³tso²-le⁴ Jesús: A¹-ni³ tso²cˀoa⁴ nca³ Moisés tsa³cˀe¹ne² nca³ tsjoa¹ xon⁴ xi³ tsjion¹-ni³ xi¹ncjin¹ cho⁴ta⁴, cˀoa⁴ cˀia⁴ ntia³ tsjion¹. 8 Jesús qui³tso²-le⁴: To⁴coi³ nca³ xi¹jin³ ni⁴ma⁴-no³, Moisés qui³tsjoa³ˀnte² nca³ coi⁴njion¹³ ya¹nchjin¹-no³, to⁴nca³ nca³sˀa⁴ sa³ˀnta³ nca³ ti¹tjon² li²coi³ cˀoa⁴coan³. 9 To⁴nca³ an³ xin³-no³, to⁴ˀya³-ni³ xi³ tsjion¹ chjon⁴²-le⁴, tsa² tsi² tsa² xi³ to⁴tˀa³tsˀe⁴ nca³ chjon⁴²-le⁴ qui³si³cha³jnqui³tˀa³-le⁴, cˀoa⁴ tsa² cja⁴ˀai¹ chjon⁴² coi⁴xan³cao⁴, je² xˀin⁴-ve⁴ si¹cha³jnqui³tˀa³-le⁴ chjon⁴²-le⁴. Cˀoa⁴ je² xˀin⁴ xi³ coi⁴xan³cao⁴ chjon⁴² xi³ je³qui³njion³, si¹cha³jnqui³tˀa³-le⁴. 10 Cho⁴ta⁴-le⁴ qui³tso²-le⁴: Tsa² cˀoa⁴-sˀin² tjin¹ cjoa⁴-le⁴ xˀin⁴ cao⁴ chjon⁴²-le⁴, li²coi³ nta³-ni³ nca³ coi⁴xan³². 11 Cˀia⁴ Jesús qui³tso²-le⁴: Li²coi³ nca³tsˀi³ xi³ coan⁴-le⁴ scoe¹ cjoa⁴fa³ˀai³tsjen³ je²-vi⁴, to⁴je²-ni¹ xi³ cˀoa⁴-sˀin² qui³tsˀai²-le⁴. 12 Tjin¹ cˀa³ xi³ ˀnti⁴ xi³ xa¹ cˀoa⁴-sˀin² qui³tsin³-ni³. Cˀoa⁴ tjin¹ xi³ ˀnti⁴ xi³ cˀoa⁴-sˀin² coan³ ˀnti⁴ xi³ to⁴tˀa³tsˀe⁴ cho⁴ta⁴. Cˀoa⁴ tjin¹ xi³ ˀnti⁴ xi³ ti⁴je² cˀoa⁴sˀin¹-ni³, jme¹-ni³ nca³ si⁴²xa¹-si¹ni³le⁴ cjoa⁴te¹xo³ma³-le⁴ ncˀa³jmi³. Je² xi³ cˀoa⁴-sˀin² jcho¹cjoa⁴-le⁴ xi³ tˀa³tsˀe⁴ je²-vi⁴, cˀoa⁴ ca²ta³sˀin¹.

13 Cˀia⁴ qui³cha³ni²tˀa³-le⁴ ˀnti¹xti³, jme¹-ni³ nca³ coa⁴son²-si¹ni³le⁴ ntsja³, cˀoa⁴ cˀoe⁴²tsˀoa³. Je² cho⁴ta⁴-le⁴ Jesús qui³nchja⁴ti³cao⁴ xi³ ja³ˀai³cao⁴. 14 To⁴nca³ Jesús qui³tso²: Tˀai²ˀnte³-lao⁴³, ca²tji³nčhoa¹con³-na³ ˀnti¹xti³-ve⁴, a³li² vˀe²chjoa¹-jin²lao⁴³, nca⁴ cˀoa⁴-sˀin² cjoan³ je² xi³ tsˀe⁴ cjoa⁴te¹xo³ma³-le⁴ ncˀa³jmi³. 15 Jesús tsa³ca¹son²-le⁴ ntsja³, cˀia⁴ qui³-ni³ ya⁴-ve⁴.

16 Coe⁴-ni³ jnco³ cho⁴ta⁴ ji³cho²con³-le⁴, qui³tso²: Maestro, jme¹ cjoa⁴nta³ xi³ sˀian³ nca³ sˀe⁴-si¹ni³na³ cjoa⁴vi³jna³chon³ nca³ntsjai². 17 Cˀoa⁴ Jesús qui³tso²-le⁴: A¹-ni³ nca³ cho¹na³nqui³-si¹ni³nai¹³ tˀa³tsˀe⁴ xi³ nta³. Ni⁴ˀya³-jin² xi³ nta³, to⁴jnco³ xi³ je² Ni³na¹. Tsa² me³-li² nca³ sˀe⁴-li² cjoa⁴vi³jna³chon³, ti⁴qui³tjo³soin²³ cjoa⁴te¹xo³ma³. 18 Cho⁴ta⁴-ve⁴ qui³tso²-le⁴: Jna¹-le⁴, Jesús qui³tso²: A³li² ni²cˀen³-jin². A³li² ni²cha³jnqui³-jin². A³li² ni²che¹-jin². A³li² va³sen² nti³so³-jin²lai⁴ xi³cˀa³. 19 Jcha⁴xcoin¹³ nˀai³-li⁴ na⁴-li⁴. Ca²ta³ma³tsjoa³chai³ xi³cˀa³ jo³-ni³ tsa² ti⁴ji³-ni³. 20 Je² ti³xˀin⁴ qui³tso²-le⁴ Jesús: Nca³yi³je³ je²-vi⁴ cˀoa⁴-sˀin² qui³si³tjo³soan²³ jo³ sa³ˀnta³ nca³ xtia³. Jme¹-sa³ xi³ cha³-na³. 21 Jesús qui³tso²-le⁴: Tsa² me³-li² nca³ ña³qui³ coan⁴jncoi³, tˀin³ ta⁴te²nai³ nca³yi³je³ xi³ tjin¹-li², cˀoa⁴ tˀai²-lai⁴ je² xi³ yo⁴ma⁴. Cˀoa⁴ sˀe⁴-li² cjoa⁴nchi⁴na¹ ya⁴ ncˀa³jmi³. Cˀoa⁴ nčhoai¹³, nčhoa¹tˀa³-nai¹³. 22 Cˀia⁴ nca³ je² ti³xˀin⁴ qui³nčhˀoe¹ je² en¹-ve⁴, fao¹ coan³-le⁴ nca³ qui³, nca⁴ ncjin² tso³jmi² xi³ tjin¹-le⁴. 23 Cˀia⁴ Jesús qui³tso²-le⁴ cho⁴ta⁴-le⁴: Xi³ cjoa⁴qui²xi⁴ xi³ xian³, nca³ nˀion¹ ñˀain³ coan⁴-le⁴ jnco³ xi³ nchi⁴na¹ nca³ cjoa⁴ˀa³sˀen³jin³ cjoa⁴te¹xo³ma³-le⁴ ncˀa³jmi³. 24 To⁴nca³ an³ xin³-no³, li²coi³ to⁴jo³ ñˀain³ cjoa⁴ˀa³sˀen³ jnco³ camello jña³ ti⁴xˀa⁴ ni³nto³, cao⁴-ni³ tsa² nca³ cjoa⁴ˀa³sˀen³jin³ cjoa⁴te¹xo³ma³-le⁴ Ni³na¹ jnco³ cho⁴ta⁴nchi⁴na¹. 25 To⁴nca³ cho⁴ta⁴-le⁴ nˀion¹ coan³xcon¹-le⁴ cˀia⁴ nca³ qui³nčhˀoe¹ je² cjoa⁴-vi⁴, qui³tso²: ˀya¹-ni³ tso²cˀoa⁴ xi³ coan⁴ coi⁴tjo³ntjai². 26 Jesús qui³sco²tsen³-le⁴ qui³tso²-le⁴: Cho⁴ta⁴ li²coi³ coan⁴-le⁴, to⁴nca³ Ni³na¹ coan⁴²-le⁴ nca³yi³je³ cjoa⁴. 27 Cˀia⁴ Pedro qui³tso²-le⁴: Coe⁴-ni³ jin⁴-jin⁴ je³qui³ni²ca³toi¹⁴-jin⁴ nca³yi³je³, cˀoa⁴ je³ji³nčhoa³tˀa³-lai²⁴jin⁴. Jme¹-ni³ tso²cˀoa⁴ xi³ sˀe⁴-na³jin⁴. 28 Jesús qui³tso²-le⁴: Xi³ cjoa⁴qui²xi⁴ xi³ xin³-no³, jon² xi³ je³ji³nčhoa³tˀa³-nao¹³, cˀia⁴ nca³ coan⁴cho⁴tse⁴ya³ nca³yi³je³ cˀia⁴ nca³ je² ˀnti¹-le⁴ cho⁴ta⁴ cˀoe¹jna³son² ya¹xi²le⁴-le⁴ cjoa⁴je³ya³-le⁴, cˀoa⁴-ti⁴ jon² coi⁴yo³son² te³jao² ya¹xi²le⁴, nca³ coa⁴te²xo³ma³-lao⁴³ je² te³jao² ntje⁴-le⁴ Israel. 29 To⁴ˀya³-ni³ve⁴ xi³ tˀa³tsˀe⁴ jan³ˀain¹-na⁴ qui³si³cˀe¹jna³ ntˀia³-le⁴, a³xo⁴ ntsˀe⁴, a³xo⁴ nti³chja³, a³xo⁴ nˀai³-le⁴, a³xo⁴ na⁴-le⁴, a³xo⁴ chjon⁴²-le⁴, a³xo⁴ ˀnti¹xti³, a³xo⁴ na³nqui³, nqui²jnco³ ciento cˀoa⁴tjin¹ cˀoai⁴-le⁴, cˀoa⁴ sˀe⁴-le⁴ cjoa⁴tjao² xi³ cjoa⁴vi³jna³chon³ nca³ntsjai². 30 To⁴nca³ ncjin² xi³ ma³ ti¹tjon², cˀia⁴ cjoe⁴tˀa³-ni³ coan⁴, cˀoa⁴ je² xi³ fe³tˀa³-ni³, ti¹tjon² coan⁴.