1 Cˀia⁴ ji³cho²con³-le⁴ cho⁴ta⁴ fariseos cao⁴ cho⁴ta⁴ saduceos, nca³ chˀao³ si⁴²cao⁴, qui³si³je¹-le⁴ nca³ coa⁴co²jnco³-le⁴ choa⁴ ya⁴ ncˀa³jmi³. 2 To⁴nca³ Jesús qui³nchja⁴-nca¹ni³: Cˀia⁴ nca³ je³ma³xon² nca³ ni⁴čhjin³, jon²-vi⁴ vi³xon¹³: Nta³ chon³ nchaon³, nca⁴ ni² chon³ ncˀa². 3 Cˀoa⁴ nca³ ta⁴njion²: Ntˀai⁴ cˀoa⁴ jtsi¹, nca⁴ yo³jvi³jma² cjoan³ xi³ ncha³ ncˀa², cˀoa⁴ ni² chon³ ncˀa². Xi³ cho⁴ta⁴jao²ncjain¹ ˀmi²-no³, ma³-no³ cho¹tˀa³ jo³ ma³ chon³ ncˀa², to⁴nca³ choa⁴-le⁴ ni⁴čhjin³ li²coi³ ma³-no³. 4 Je² cho⁴ta⁴ xi³ ntˀai⁴ tjio¹, xi³ tsˀen⁴-ni¹, xi³ to⁴si¹cha³jnqui³, si¹je¹ choa⁴, to⁴nca³ choa⁴ li²coi³ cˀoai⁴-le⁴, to⁴je² choa⁴-le⁴ Jonás xi³ qui³nchja⁴ya³ tˀa³tsˀe⁴ Ni³na¹. Cˀoa⁴ Jesús qui³si³ca³tio¹ cho⁴ta⁴, qui³-ni³.

5 Cˀoa⁴ ja³ˀai³ cho⁴ta⁴-le⁴ xi³ncoa³tˀa³ nta¹chi³con³, qui³cha³jin³-le⁴ nio⁴xti²la⁴. 6 Jesús qui³tso²-le⁴: Cho¹tsaon³, ti⁴coi²nta⁴-lao⁴³ yao³-no³ je² na⁴ˀyo⁴san³ xi³ tsˀe⁴ cho⁴ta⁴ fariseos cao⁴ cho⁴ta⁴ saduceos. 7 To⁴nca³ je² tsa³cjao¹ya³-ni³, cˀoa⁴ qui³tso²-le⁴ xi¹ncjin¹: Coi³ nca³ cˀoa⁴ ca²tso²-na¹ nca³ tsi² qui³chˀa¹ nio⁴xti²la⁴. 8 Cˀoa⁴ coan³jin³-le⁴ Jesús, qui³tso²-le⁴: Cho⁴ta⁴ xi³ choa³ ma³cjain¹-no³, a¹-ni³ nca³ cˀoa⁴-sˀin² ti³cho³va²ya³-si¹nio³ jin³-no³ nca³ jon² nca³ tsin²-no³ nio⁴xti²la⁴-jin². 9 A³ cje³ ma³cho⁴ya³-jin²no³, a³ tsi² tjin¹jin³-no³ je² xi³ aon² nio⁴xti²la⁴-ve⁴ xi³ tsˀe⁴ cho⁴ta⁴ xi³ aon² jmi³ ma³-ni³, cˀoa⁴ jo³ tjin¹ ni⁴sin⁴ tsa³cˀe²xco¹³. 10 Ni⁴je²-jin² xi³ ña³to³ nio⁴xti²la⁴, xi³ tsˀe⁴ xi³ ño³ jmi³ ma³-ni³, cˀoa⁴ jo³ tjin¹ ni⁴sin⁴ya¹ tsa³cˀe²xco¹³. 11 Jo¹-sˀin²ni³ nca³ tsi² ma³cho⁴ya³-no³ nca³ tsi² to⁴tˀa³tsˀe⁴ nio⁴xti²la⁴ cˀoa⁴ca²xin³-no³ nca³ ti⁴coi²nta⁴-lao⁴³ yao³-no³ je² na⁴ˀyo⁴san³ xi³ tsˀe⁴ cho⁴ta⁴ fariseos cao⁴ cho⁴ta⁴ saduceos. 12 Cˀia⁴ coan³cho⁴ya³-le⁴ nca³ tsi² tsa² cˀoa⁴qui³tso²-le⁴ nca³ si⁴²coi²nta⁴-le⁴ yao³-le⁴ na⁴ˀyo⁴san³ xi³ tsˀe⁴ nio⁴xti²la⁴, to⁴nca³ xi³ to⁴tˀa³tsˀe⁴ cjoa⁴fa³ˀai³tsjen³-le⁴ cho⁴ta⁴ fariseos cao⁴ cho⁴ta⁴ saduceos.

13 Cˀia⁴ nca³ ji³nčhoa³ Jesús ya⁴ ˀnte³ jña³ Cesarea xi³ nchja⁴-ni³ Filipo, qui³sco²na³nqui³-le⁴ cho⁴ta⁴-le⁴: Jo¹ tso² cho⁴ta⁴, ˀya¹-la⁴ xi³ ˀnti¹-le⁴ cho⁴ta⁴. 14 Cˀoa⁴ je² qui³tso²: Tjin¹ cˀa³ xi³ tso² nca³ je² Juan Bautista, cˀoa⁴ tjin¹ cˀa³ xi³ tso² je² Elías, cˀoa⁴ tjin¹ xi³ tso² je² Jeremías, a³xo⁴ je² jnco³ xi³ tsˀe⁴ xi³ nchja⁴ya³ tˀa³tsˀe⁴ Ni³na¹. 15 Cˀoa⁴ Jesús qui³tso²-le⁴: Cˀoa⁴ nca³ jon², jo¹ vi³xon¹³, ˀya¹-nia³ an³. 16 Qui³nchja⁴ Simón Pedro: Ji³ ni¹³ Cristo, xi³ ˀnti¹-le⁴ Ni³na¹ xi³ ti¹jna³con³. 17 Cˀia⁴ qui³nchja⁴ Jesús: Jo¹ to⁴nta³-li² nca³ ji³, Simón, ˀnti¹-le⁴ Jonás, nca³ tsi² tsa² cho⁴ta⁴son³ˀnte³ xi³ tsa³ca³co¹son²tsen³-li², to⁴je² Nˀai³-na⁴ xi³ ti¹jna³ ncˀa³jmi³. 18 To⁴nca³ cˀoa⁴-ti⁴ xin³-le²³, nca³ ji³ ni¹³ Pedro. Cˀoa⁴ son² coi³ la⁴jao⁴-vi⁴ cˀoe³nta³soan²³ je² na⁴xi⁴na³nta¹-na⁴. Cˀoa⁴ je² nca³nˀion¹-le⁴ ˀnte³cjoa⁴ñˀain³, li²coi³ si⁴²qui³njen³-le⁴ na⁴xi⁴na³nta¹-na⁴. 19 Cˀoa⁴ ji³ si³ntsja³-le²³ yo²vi⁴ xi³ tsˀe⁴ xo⁴ntjoa⁴-le⁴ cjoa⁴te¹xo³ma³-le⁴ ncˀa³jmi³, cˀoa⁴ nca³yi³je³ cjoa⁴ xi³ tsi² tsa² coi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ li²coi³ cˀoai⁴ˀnte³-le⁴ ya⁴ ncˀa³jmi³. Nca³yi³je³ cjoa⁴ xi³ cˀoai⁴ˀnte³-lao⁴³ i⁴ son³ˀnte³-vi⁴, cˀoa⁴-ti⁴ cˀoai⁴ˀnte³-le⁴ ya⁴ ncˀa³jmi³. 20 Cˀia⁴ Jesús tsa³cˀe¹ne²-le⁴ cho⁴ta⁴-le⁴ nca³ ni⁴ˀya³-jin² xi³ jo³ coi⁴tso⁴-le⁴ nca³ je² ni¹ xi³ Cristo.

21 Sa³ˀnta³ nca³ ti⁴coi³-ni³ ni⁴čhjin³-ve⁴. Jesús tsa³cˀe¹ tsˀia⁴cao⁴ nca³ qui³si³qui²xi⁴ya³-le⁴ cho⁴ta⁴-le⁴ nca³ coan⁴chjen¹-le⁴ nca³ coai⁴ Jerusalén, nca³ tse³ cjoa⁴ñˀain³ cjoa⁴ˀa² xi³ tˀa³tsˀe⁴ cho⁴ta⁴jchi¹nca³, cao⁴ cho⁴ta⁴ti¹tjon²-le⁴ na⁴ˀmi³, cao⁴ cho⁴ta⁴ scribano, cˀoa⁴ nca³ si⁴cˀen³-ni³ nca³ je², to⁴nca³ si⁴cja³ˀa¹ya³-ni³le⁴ xi³ coan⁴jan²-ni³ ni⁴čhjin³. 22 Cˀoa⁴ Pedro qui³cao⁴ tˀa³xin², tsa³cˀe¹tsˀia⁴ nca³ qui³nchja⁴ti³cao⁴ qui³tso²: Señor, Ni³na¹ ca²ta³vˀe¹chjoa²-le⁴ cjoa⁴-vi⁴ tˀa³tsi⁴. Ni⁴cˀia³-jin² nca³ cˀoa⁴coan⁴tˀain³. 23 Cˀia⁴ qui³si³cˀo¹fa³ya³ Jesús, qui³nchja⁴ti³cao⁴ Pedro: Ti⁴tja¹jton³-nai¹³, ji³ Satanás. Cjai¹ to⁴chˀao³ ni²cao⁴-nai¹³, nca³ tsi² ˀmi³tˀa³-lai⁴ cjoa⁴-le⁴ Ni³na¹, to⁴nca³ ˀmi³tˀa³-lai⁴ cjoa⁴-le⁴ cho⁴ta⁴. 24 Cˀia⁴ Jesús qui³tso²-le⁴ cho⁴ta⁴-le⁴: To⁴ˀya³-ni³ve⁴ xi³ me³-le⁴ nca³ cho⁴ta⁴-na⁴ coan⁴, ca²ta³tsjion¹con³ yao³-le⁴, ca²ta³vˀa³mi³ cro²-le⁴, cˀoa⁴ nta³ ca²ta³fi²tˀa³-na³. 25 To⁴ˀya³-ni³ve⁴ xi³ me³-le⁴ cˀoa⁴sje³ntjai² ni⁴ma⁴-le⁴, to⁴si⁴²cha³ ni⁴ma⁴-le⁴, cˀoa⁴ to⁴ˀya³-ni³ve⁴ xi³ si⁴²cha³ ni⁴ma⁴-le⁴ xi³ to⁴tˀa³tsˀan⁴, coan⁴sjai³-ni³le⁴. 26 Jme¹ xi³ sca⁴son²-le⁴ cho⁴ta⁴, nta³ tsa² coi⁴njen⁴-le⁴ nca³yi³je³ son³ˀnte³, tsa² si⁴²cha³ ni⁴ma⁴-le⁴. A³xo⁴ jme¹ chji¹ xi³ tsjoa¹ cho⁴ta⁴ xi³ tˀa³tsˀe⁴ ni⁴ma⁴-le⁴. 27 Nca⁴ je² ˀnti¹-le⁴ cho⁴ta⁴ sˀa⁴ cjoa⁴ˀai¹cao⁴ cjoa⁴je³ya³-le⁴ Nˀai³-le⁴ cao⁴ a²ncje⁴-le⁴, cˀoa⁴ cˀia⁴ cˀoe⁴²chji¹ nca³ jnco¹jnco¹ jo³-sˀin² si¹xa¹. 28 Xi³ cjoa⁴qui²xi⁴ xi³ xin³-no³: tjin¹ cˀa³ xi³ i⁴ tjio¹-vi⁴ xi³ tsi²coi³ coi⁴ya² sa³ˀnta³ nca³ scoe⁴ ˀnti¹-le⁴ cho⁴ta⁴ xi³ cjoa⁴ˀai¹cao⁴ cjoa⁴te¹xo³ma³-le⁴.