Xi³ ma³jao²-ni³ xon⁴xi³ pa²stro⁴Pablo qui³squi³-le⁴cho⁴ta⁴ tesalonicenses

1 Pablo cao⁴ Silvano cao⁴ Timoteo ti³chji³-lai²⁴jin⁴ xi³ na⁴xi⁴na³nta¹-le⁴ Cristo xi³ cho⁴ta⁴ tesalonicenses ˀmi²-no³, xi³ ti³yo³cao⁴³ Ni³na¹ Nˀai³-na¹ cao⁴ Nai³-na¹ Jesucristo.

2 Ca²ta³tsjoa¹-no³ cjoa⁴nta³, ca²ta³si¹qui³njen³nchˀan¹jin³ ni⁴ma⁴-no³ Ni³na¹ Nˀai³-na¹ cao⁴ Nai³-na¹ Jesucristo.

3 Ma³chjen¹ nca³ cˀoai⁴-lai⁴jin⁴ cjoa⁴nta³ nca³ntsjai² Ni³na¹ xi³ tˀa³tsaon⁴³, ntsˀe³², nca³ je³cji³ma³cjain¹-sa³no³, cˀoa⁴ nca³ jnco¹jnco¹ nca³tsˀio³ cjai¹nca³ nta³ tsjoa³chao³ xi²nquio⁴³.

4 Ti⁴jin⁴-ni³jin⁴ cjai¹nca³ ma³tsjoa³-na³jin⁴ xi³ tˀa³tsaon⁴³ ya⁴jin³-le⁴ na⁴xi⁴na³nta¹-le⁴ Ni³na¹, nca³ tjin¹-no³ cjoa⁴tse³jta³, cˀoa⁴ ma³cjain¹-no³ nta³ tsa² vi³yo³tjen⁴nqui³ co²ntran⁴-no³, nta³ tsa² cjoa⁴nˀain³ chja³ˀao²³.

5 Cˀoa⁴sˀin² cji³ma³tsen³ nca³ Ni³na¹ vˀe¹nta³jin³ xi³ ña³qui³ cˀoa⁴tjin¹, jme¹-ni³ nca³ coa⁴quin²-ni³no³ cjoa⁴te¹xo³ma³-le⁴ Ni³na¹, nca³ tˀa³tsˀe⁴ ti³chja³ˀao²³ cjoa⁴ñˀain³.

6 Tjin¹-le⁴ cjoa⁴qui²xi⁴ Ni³na¹ nca³ cˀoe⁴²chji¹-le⁴ cao⁴ cjoa⁴ñˀain³ je² xi³ tjio¹tsjoa¹-no³ cjoa⁴ñˀain³.

7 Cˀoa⁴-ti⁴ cˀoe⁴²chji¹-no³ nca³ jon² xi³ cjoa⁴ñˀain³ ti³chja³ˀao²³, nca³ si⁴²cˀe¹yo³cja¹ya³-no³ cao⁴ jin⁴-jin⁴ cˀia⁴ nca³ coan⁴tsen³ Nai³-na¹ Jesús, nca³ cjoi⁴nčhoa¹-ni³ ncˀa³jmi³ cao⁴ a²ncje⁴ xi³ va³co¹ nca³nˀion¹-le⁴.

8 Coan⁴tsen³jin³ ni⁴jen⁴lˀi¹. Tsjoa¹-le⁴ cjoa⁴ñˀain³ je² xi³ tsi² tsa³ve³ Ni³na¹, cˀoa⁴ xi³ tsi² si¹tjo³son²-le⁴ je² en¹nta³ xi³ tˀa³tsˀe⁴ Nai³-na¹ Jesucristo.

9 Je² xi³ tjoe¹-le⁴ cjoa⁴ñˀain³ nca³ ña³qui³ ntia³ coai⁴cha³jin³, nca³ tsi² tsa² ti⁴scoe⁴-ni³ Nai³-na¹, ni⁴cjoa⁴je³ya³-le⁴jin² xi³ tsˀe⁴ nca³nˀion¹-le⁴,

10 cˀia⁴ nca³ cjoa⁴ˀai¹ cˀia⁴ ni⁴čhjin³ je²-vi⁴ nca³ tjo¹sje³je³ya³ to⁴tˀa³tsˀe⁴ cho⁴ta⁴-le⁴, cˀoa⁴ nca³ to⁴xcon¹ scoe⁴ nca³tsˀi³ xi³ coan³cjain¹-le⁴. (Nca⁴ je² en¹-na⁴jin⁴ xi³ cˀoa⁴sˀin² coan³cjain¹-no³ nca³ jon².)

11 Coi³ cjoa⁴ nca³ cˀoa⁴sˀin² ti³vˀe²tsˀoai³⁴-jin⁴ nca³ntsjai² xi³ tˀa³tsaon⁴³, jme¹-ni³ nca³ cˀoa⁴sˀin² Ni³na¹ tsjoa¹-si¹ni³no³ cjoa⁴nta³ nca³ coa⁴quin²-no³ je² xa¹ xi³ qui³nchja⁴-no³. Cjai¹nca³ to⁴tse³-sa³ cjoa⁴nta³ ca²ta³tsjoa¹-le⁴ nca³yi³je³ cjoa⁴fa³ˀai³tsjen³-no³ xi³ nta³ tjin¹. Ca²ta³tsjoa¹-sa³le⁴ nca³nˀion¹ nca³yi³je³ xa¹-no³ nca³ ma³cjain¹-no³,

12 jme¹-ni³ nca³ coi⁴tjo³je³ya³jin³-si¹ni³no³ je² jan³ˀain¹-le⁴ Nai³-na¹ Jesucristo, cˀoa⁴ jon² coi²tjo⁴je³ya³-si¹nio³ cao⁴ Cristo, jo³-sˀin² tsjoa¹-no³ cjoa⁴nta³ Ni³na¹-na¹ cao⁴ Nai³-na¹ Jesucristo.

2 Tesalonicenses 2 ->