1 Nta³ tsa² an³ nchja²³ en¹ xi³ tsˀe⁴ cho⁴ta⁴, cˀoa⁴ xi³ tsˀe⁴ a²ncje⁴, cˀoa⁴ tsa² tsin²-na³ cjoa⁴tjao²cha³-jin², cˀoa⁴-sˀin² nca³ an³ jo³-ni³ qui⁴cha⁴ xi³ nˀion¹ fa³ne³ya³, a³xo⁴ platillo xi³ nˀion¹ fa³ne³ nca³ vi³chon³cjao³-le⁴ xi¹ncjin¹. 2 Cˀoa⁴ nta³ tsa² an³ tjin¹-na³ cjoa⁴tjao² nca³ ma³-na³ nchja²ya³, cˀoa⁴ nta³ tsa² ma³cho⁴ya³-na³ nca³yi³je³ cjoa⁴ xi³ tji¹ˀma³, cˀoa⁴ nca³yi³je³ cjoa⁴chji⁴ne⁴, cˀoa⁴ nta³ tsa² tse³ ma³cjain¹-na³ nca³yi³je³, sa³ˀnta³ nca³ coan⁴-na³ cjoa⁴ˀa²xian²³ ni³nto³, tsa² tsin²-na³ cjoa⁴tjao²cha³, ni⁴jme³-jian²ˀni³ an³. 3 Cˀoa⁴ nta³ tsa² si³cˀa³via¹³ nca³yi³je³ xi³ tjin¹-na³, jme¹-ni³ nca³ si³cjen²-si¹nia³ je² xi³ yo⁴ma⁴, cˀoa⁴ nta³ tsa² tsjoa³tˀa³ yao³-na⁴ nca³ cˀoa⁴-sˀin² coi⁴ti⁴, tsa² tsin²-na³ cjoa⁴tjao²cha³, li²jme³ chji¹-na³. 4 Je² cjoa⁴tjao²cha³ tse³jta³-ni¹, cˀoa⁴ tjin¹-le⁴ cjoa⁴nta³. Je² cjoa⁴tjao²cha³ tsin²-le⁴ cjoa⁴xin²ta³con²-jin². Je² cjoa⁴tjao²cha³ li²coi³ vˀa³sje³je³ya³ yao³-le⁴, li²coi³ ma³ncˀa³con³. 5 Li²coi³ si¹soa³-le⁴ xi¹ncjin¹, li²coi³ va¹sjai³ xi³ ti⁴tsˀe⁴-ni³, li²coi³ ma³ti³jta³, li²coi³ vˀe¹jin³con³ xi³ chˀao³ tjin¹. 6 Li²coi³ si¹tsjoa³-ni³le⁴ yao³-le⁴ xi³ tˀa³tsˀe⁴ xi³ tsin² cjoa⁴qui²xi⁴, to⁴nca³ to⁴jnco³ si¹tsjoa³-ni³le⁴ yao³-le⁴ cao⁴ xi³ cjoa⁴qui²xi⁴. 7 Si¹cjain¹-le⁴ nca³yi³je³, ma³cjain¹-le⁴ nca³yi³je³, co³ya³-le⁴ nca³yi³je³, nca³yi³je³ jcho¹cjoa⁴cao⁴-le⁴. 8 Je² cjoa⁴tjao²cha³ ni⁴cˀia³-jin² fe³tˀa³, to⁴nca³ je² cjoa⁴ xi³ no²cjoa⁴ya³-ni³ li²coi³ ti⁴coan⁴chjen¹-ni³, cˀoa⁴-ti⁴ sˀe⁴chjoa²-le⁴ je² en¹-le⁴ cho⁴ta⁴, cˀoa⁴ je² cjoa⁴chji⁴ne⁴ li²coi³ ti⁴coan⁴chjen¹-ni³. 9 To⁴choa³ xi³ ˀya³xcoan³², cˀoa⁴ to⁴choa³ xi³ no²cjoa⁴ya³². 10 To⁴nca³ cˀia⁴ nca³ cjoa⁴ˀai¹ je² xi³ ña³qui³ tjin¹jnco³, cˀia⁴ je² xi³ to⁴choa³ tjin¹, li²coi³ ti⁴coan⁴chjen¹-ni³. 11 Cˀia⁴ nca³ ˀntia¹³, qui³nchja²³ jo³-ni³ ˀnti¹, qui³si³cja³ˀai³tsjen³ jo³-ni³ ˀnti¹, qui³sco³son²-le⁴ jo³-ni³ ˀnti¹, to⁴nca³ cˀia⁴ nca³ je³coan³jchi¹nca³, qui³si³cˀe¹jna²³ cjoa⁴ˀnti¹-na⁴. 12 Ntˀai⁴-vi⁴ jo³-ni³ cho⁴tsin¹ ti³cho²tsen³ya³², to⁴xa⁴ ti³ˀya³², to⁴nca³ cˀia⁴² cho¹tsen³-le⁴² nca³ ncha³cjao³ˀa³². Ntˀai⁴-vi⁴ to⁴choa³ xi³ ˀve³, to⁴nca³ cˀia⁴² scoe³yi³je³ an³, jo³-sˀin² ˀya³-na³ nca³yi³je. 13 Ntˀai⁴-vi⁴ cˀoa⁴-sˀin² tjio¹ntsjai² xi³ ma³cjain¹-na¹, xi³ cjoa⁴cho³ya²cao⁴cjoa⁴, cˀoa⁴ xi³ cjoa⁴tjao²cha³, cˀoa⁴ je² xi³ jan² cjoa⁴-vi⁴, to⁴nca³ je² xi³ nqui²sa⁴ ti¹tjon², je² xi³ cjoa⁴tjao²cha³.

<- 1 Corintios 121 Corintios 14 ->