6
अडचणीच्या प्रसंगी दयेची याचना
मुख्य वाजंत्र्यासाठी; तंतुवाद्यावरचे शेमीनीथ नावाच्या सुरावर बसवलेले दाविदाचे स्तोत्र.
1 हे परमेश्वरा, रागाच्या भरात मला शासन करू नकोस,
किंवा तुझ्या संतापात मला शिक्षा करू नकोस.
2 हे परमेश्वरा माझ्यावर दया कर, कारण मी अशक्त आहे.
हे परमेश्वरा मला निरोगी कर, कारण माझी हाडे ठणकत आहेत.
3 माझा जीव फार घाबरला आहे.
परंतू हे परमेश्वरा, असे किती काळ चालणार आहे?
4 हे परमेश्वरा, कडक धोरण सोड, माझ्या जीवाला वाचव!
तुझ्या प्रेमदयेच्या विपुलतेने मला तार.
5 कारण मरणात तुझे कोणीही स्मरण करत नाही.
मृतलोकांत तुझी उपकारस्तुती कोण करणार?
6 मी माझ्या कण्हण्याने दमलो आहे.
रात्रभर मी माझे अंथरुण आसवांनी ओले करतो.
मी माझे अंथरुण अश्रूंनी धुवून काढतो.
7 शोकामुळे माझे डोळे अंधूक झाले आहेत.
माझ्या सर्व शत्रूंमुळे ते जीर्ण झाले आहेत.
8 अहो लोकांनो, जे तुम्ही अन्यायाचे कृत्य करता, माझ्यापासून निघून जा.
कारण परमेश्वराने माझे रडणे ऐकले आहे.
9 परमेश्वराने माझ्या दयेची याचना ऐकली आहे;
त्याने माझ्या प्रार्थनेचा स्वीकार केला आहे.
10 माझे सर्व शत्रू लाजवले जातील आणि फार घाबरतील.