1 Xi cavutsejen vihi ne, cahvë ñuju ángel xi hinchacun quixi catsiñuju yuju rë ngasunhndë. Hane ángel jan ne, casuaain cahndë́ xi cuanga catsiñuju tjo xi vanga ngasunhndë ta, hisca xi ngu tjo ne, cuangaain xcun nangui, o xcun ndachacun, o hisca rcu ngu ya. 2 Sehe cahvë ngu ángel xi hacjahi. Hane camiji ángel jan hiscan xi vetjucaa tsuhi, hacuaha yaha ángel sellu rë Nina quicun. Hane cajindayahñu ángel jan cojo catsiñuju vë ta tacuntsja ángel vë xi choho sahmi cojo nangui cojo ndachacun. 3 Cuitjin cachja me cojo:
―Ndastu mé dañu nihñu cojo nangui, cojo ndachacun, cojo ya. Ndastu mé nihñu hisca xi cajnetaha cavetaha sellu xten xuta xi cavatsë Nina naja.
4 Ngajan xi cahndë xi cachja me xqui rë me xi casetaha rë chuva cojo sellu jan: ngu cientu cojo yachan ñuju mil má me tsëhë yëjë xuta tjë rë Israel. 5 Tsëhë xuta tjë rë Judá ne, tejó mil má me xi yaha sellu; hacuaha tejó mil má me tsëhë xuta tjë rë Rubén, tejó mil tsëhë xuta tjë rë Gad. 6 Tejó mil má me tsëhë xuta tjë rë Aser, tejó mil tsëhë xuta tjë rë Neftalí, hacuaha tejó mil tsëhë xuta tjë rë Manasés. 7 Tsëhë xuta tjë rë Simeón ne, tejó mil má me xi yaha sellu; hacuaha tejó mil má me tsëhë xuta tjë rë Leví, tejó mil tsëhë xuta tjë rë Isacar. 8 Tsëhë xuta tjë rë Zebulón ne, tejó mil má me xi yaha sellu; hacuaha tejó mil má me tsëhë xuta tjë rë José, tejó mil tsëhë xuta tjë rë Benjamín.
Xutaxín xi hacuaha camacjain rë me
9 Xi cavatju xcusun vihi ne, cavutsejen, hane cahvë xutacjín. Hisca tsajin yo cuma cuexqui rë me. Canduva me tsëhë ngajñi rë jimangu nación, jimangu tjë rë xuta, jimangu nandya cojo jimangu hne. Hane cafehe me hinchacun me xcun cahndë́ rcun cojo xcun Tsánga jan. Yaja me tsjian tyava hacuaha yahatsja me jne. 10 Hane jindaya me cojo ngu xta hñu, tichja me cuitjin:
Xi cavetjuntjen ne, camá ngatsë rë Nina naja
xi tacun me cahndë́ rcun
cojo ngatsë rë Tsánga jan.
Cuatjin cachja me. 11 Ngajan xi yëjë ni ángel ne, hinchacun quixi tahndee rë cahndë́ rcun jan hacuaha cavindee rë xuta changá jan cojo catsiñuju xcusun xi quicun jan. Hane caticjaxcun ángel xcun cahndë́ rcun hane cafaharcun rë Nina, 12 tichja cuitjin:
¡Cuitjin jain!
Nina ne, yëjë ni tsinchacuntihin me. Jyë hnga me.
Tjin rë me cjuahasen. Taan nacuechji rë me.
Xuta ne, vaxëndaja me. Vechu chuva rë xi cjuahatsja me ngahñu xi cuitexa me. Hacuaha hñu cjua rë me.
Cuanitjin cjue me yëjë nu yëjë nixtin.
¡Cuatjin jain!
13 Hya xi camá ne, ngu xuta changá jan, cafinenguise me ngahan cuitjin:
―Me xi cuicun xi yaja tsjian tyava ne, ¿yo má me? hane ¿hisca jani canduva me?
