1 Hya xi camá cavatju vihi ne, cahndë sacuaha xta rë xutacjín ngajan ngahnga xi chja cuitjin:
¡Catama jyë, catama hnga Nina! Nina ne, vaxëtje me xuta, tjin rë me hasen ndajyihi xi seti, hacuaha ma sahmi me yëjë ni.
2 Jemu quixi cjua xi vitexa me ta, casahmi me xujun jyë́ rë na xi caviteña yojo rë, na xi hñu cjua na.
Na vëhë ne, catsinguetsun na cjuatacun rë ngayëjë ni cojo cjuatsehen rë na.
Hane Nina ne, casahmingojo me cojo rë na jni rë xuta xi sahmi xa rë me. Jni rë me xi casahmi na xi cavanga.
3 Sehe cavuya cachja me cuitjin:
―¡Catama jyë, catama hnga Nina! ta, nihndi ran ne, miji nchunchujun ni, nu nu ni.
4 Ngajan xi can ñuju xuta changá cojo catsiñuju xcusun xi quicun ne, caviticja xcun Nina xi cjuaharcun rë me xi tacun me cahndë́ rcun. Cuitjin cachja me:
Nihñu jyë nihñu hnga Nina, ngayun xi nihñu xa rë me.
Nihñu jyë hnga me sa quihndi sa changá yun.
6 Hya xi camá ne, cahndë sacuaha xi tisë xutacjín. Nuhya rë sacuaha fane nandan xi jemu hñu vanga o sacuaha faneya xi tsinga chuhun. Hane cjua rë ne cuitjin chja:
¡Catamajyë catamahnga Nina naja ta, ha cavetsihin sahmi me gubiernu hane ma sahmi me yëjë ni!
7 Catamasua naja. Tahan cjuasua xahasen naja. Nihña jyë hnga me tsëhë xi cavechu cjuavixan rë Tsánga.
Chjuun rë ne, ha catsindaja na yojo ran.
8 Casacu rë na cahndë́. Hane cuaja na tsjian ndaja xi seti, xi tyjahi.
Tsjian jan ne, hacui xcusun ndaja xi sahmi xuta xi tyjahi cjuatacun rë me xcun Nina.
Cuatjin cachja xutacjín jan.
Sinësuhi me tsëhë cjuavixan rë Tsánga
9 Hya xi camá ne, cachja ángel cojo ná cuitjin:
―Nihndi cjua vi: “Jercu ndaja tsëhë me xi camachaya rë xi nduva me sinësuhi me tsëhë cjuavixan rë Tsánga.”
Hane cachja sa ángel cuitjin:
―Cjua xi cachjá ne, cjuaquixi jain rë Nina.
10 Hane ngahan ne, caticjátaha ntsacu ángel xi cjuahárcun rë. Peru cachja cojo ná cuitjin:
―¡Xicanihñii! ta, tangun ni chjí naja, ta xa naha ne, tangun cojo xa xi nihñu cojo xingun xi sua cumachaya rë cjuaquixi rë Jesús ne, hacui xa xi vitexa Nina. Nina ne, me vëhë chjuhunrcun me.
11 Sehe cahvë xi tixaha ngahnga, hane ngajan ne, cahvë ngu chu naxi tyava. Hane me xi quisun rë chu ne, chja tsëhë me ta, sahmi chihin me cjua rë me hacuaha quixi me. Jemu quixi cjua me hya xi tsichuva me xuta cojo sa xi hya xi sahmi me si. 12 Tuxcun me ne, sacuaha ndihi xi ña vitjen. Rcu me ne, jercu hinchasun corona. Hane camahindu ngu ñihi rë me xi tsajin yo vëë rë, peru suva me vëë me. 13 Yaja me ngu tsjian xi tjintë ni ne, xi caseyaquinda cojo jni. Hane sacuaha ñihi rë me ne, Cjua rë Nina hmí rë me. 14 Hane tjengui rë me sindadu cjín tsëhë ngahnga. Sindadu jan ne, cuaja me tsjian ndaja xi tyava, xi tyjahi. Hane hacuanitjin hinchasun me naxin tyava. 15 Hane suva me ne, tsëhë hntsua me ne, vetju ngu quicha yuju xi cuanguihmu rë xutacjín. Hane hacuiin yuma cumá rë me xuta ta, cuitexa rë me cojo yaxti rë quicha. Hane sune me cahndë́ hisca nune rë uva cojo sa xi cuaxë me xan rë cjuacjan rë Nina, me xi ma sahmi yëjë ni. 16 Hacuaha xcun tsjian rë me cojo tyjuhmi rë me ne, camahindu ñihi vi: “Me xi matitjun tsëhë ngayëjë ni xi matitjun. Me xi matitjun tsëhë ngayëjë ni xi vitexa.”
17 Hane cahvë xi ngu ángel ne, secun xcun tsuhi. Hane jindayahñu tsëhë nisë xi jemu hnga vitjen chu. Cuitjin cachja cojo chu:
―Nduvun. Catamatangun yun tsëhë suhi jyë rë Nina. 18 Ngajan xinu yojo rë xuta xi camatitjun, cojo yojo rë capitán rë sindadu cojo yojo rë xuta xi hñu cjua, cojo yojo rë chu naxin cojo yojo rë xuta xi caxinchasun rë chu. Xinu yojo rë xuta, sa ndaya tjin me o sa xi caxteña me, sa langa me, sa changá me, xinu yojo rë me. ―Cuatjin cachja me cojo chu nisë jan.
19 Hane cahvë chu chojyihi jan cojo xuta xi vitexa me cojo sindadu cjín rë, hane camatangun cojo sa xi sahmi si cojo me xi hinchasun chu naxin tyava jan. 20 Hane ngajñi si vëhë ne, cachjaha rë chu chojyihi jan camá presu chu. Hacuanitjin ne camá presu chu xi casahmi cjuarcun ngatsë rë chu chojyihi cojo sa xi cavindacha chu xuta sehe setaha sellu rë chu xten me hacuaha faharcun me xcusun ru. Sehe cacandiya quicu me catsijo chu ngajñi ndachacun xi ti cojo azufre. 21 Hane xicjin chu xi cavangui ne, catsiquehen me cojo quicha xi vetju tsëhë hntsua me xi miji rë naxin. Sehe yëjë ni nisë ne, cajinësua chu hisca xi cavechu rë xahasen ru cojo yojo rë xi cuicun vi.
