―Cuichjá quixë cojo nuju ta tecjan yahnga xuta nguehe xi hisca xi scuëë me xi cuitexa jain Nina ne, sehe cueya me.
Cavindeya xcusun rë Jesús
2 Xi cafë jyun nixtin jan ne, quijixin Jesús ngu rcu naxi hnga cojo cha Pedru cojo cha Jacobo cojo cha Juan. Xi cafehe me cojo cha ngajan ne, cavëë cha xi cavindeya xcusun rë me. 3 Tsjian rë me ne, ña seti tsejen, tsëhë xi jercu tu tyava camahani, hisca xi ngu xuta cumaji cuane me xi cuatjin tyava. 4 Hya xi camá ne, ha tu ñahñu camatsejen hasen rë Elías cojo hasen rë nima Moisés, tivisiajmi cojo Jesús. 5 Ngajan xi cachja cha Pedru cojo Jesús ta:
―Maestro, tu ma rë xi nguehe nechin cojo nuju ne, nihñi jyan puestu: ngu tsujun ne, cojo ngu ngu tsëhë Moisés cojo Elías.
6 Cuatjin cachja cha Pedru ta, sacuinyiin rë cha mé sa cuichja cha ta tsëhë xi jercu catsacjun camahani cha camá. 7 Hora vëhë ne, canduva ngu yufí casahmi tjahnguen rë. Hane ngajñi rë yufí jan ne, canuhya rë ngujo cjua xi cachja cuitjin:
―Cha vihi xi quihndi naha cha. Jercu hmucacun cha. Tinuhyun xi chja cha.
8 Xi tu cahndë cha ladu rë Jesús cjua vëhë ne, vutsejen nguehe vutsejen ngajan cha, hane suva sa Jesús tacun me xi cavëë cha.
9 Xi tu tivitujne me tsëhë rcu naxi jan cojo cha ladu rë me xi quijicojo me jan ne, ngajan xi chja xu me cojo cha ta tsajin yo xi cuichja cha cojo xcusun xi cavëë cha. Xi cuatju cueya Quihndi rë Xuta Jain ne, cuya nga me cjuahñu, sehe hya cuichja cha. 10 Vëhë xi cavaha cha cjua jan cahntsua xahasen rë cha. Ngajñi rë ni cha cojo xicjin cha cavisiajmicjín cha ¿mé vijne cjua xi cuya nga me cjuahñu?
11 Ngajan xi cavinenguise cha cojo Jesús cuitjin:
―¿Mé má cuatjin chja maestru tsëhë ley xi titjun Elías cuinduva me, sehe cuinduva me xi cuaxëtje naja?
12-13 Ngajan xi cafayangui Jesús cuitjin:
―Quixi xi Elías cuinduva me titjun ta, me vëhë cuiyujuchihin me yëjë ni xcusun. Peru ha canduva me, handasa hacuiin cojo ñihi rë me ta cojo ñihi rë cha Juan. Hane choho casahmi xuta cojo me sacuatjin chja xujun rë Nina. Hacuaha chja xujun xi cuacun vëhë ta handasa xi Quihndi rë Xuta Jain ngahan ne, hacuanitjin ne jemu jyë cjuañihi cuátju hacuaha tsitjungui xuta ngahan.
Jesús ne, sahmi xi mandaja ngu cha nixti xi jiya ra xitsehen
14 Xi tu cavuya cafehe Jesús cojo cha xi quijicojo me hiscan siu yahnga cha ladu rë me xi tejó jan ne, cavëë me xi tjercu siu xuta jan cojo ngujo cha maestru tsëhë ley siu me visiajmi me cojo cha. 15 Xi tu cavëë xuta jan xi cafehe Jesús ne, jemu quijircun rë me, vanga sanii me quiji cachja me nina cojo Jesús. 16 Ngajan xi Jesús ne, cavinenguise me cojo cha ladu rë me cuitjin:
―¿Mé xi visiajmu cojo xuta xi cuacun vë?
17 Hane ngajan ngajñi rë xutacjín xi siu jan ne, cavetjujñi ngu me xi cachja me cuitjin:
―Maestro, canduvá cojo quihndi naha, tsëhë xi jiya xitsehen cahntsua xahasen rë cha. Hane tsëhë vëhë xi sahmi lihmi rë cha. 18 Hora xi faha xitsehen jan cha ne, ngutjen tsiticjahñu rë cha, hacuaha vaxë natyaxu hntsua cha, hisca tsijanerii nehñu cha jiña cha. Hane ngatsë rë vëhë ne, jemu jima ndaya cha. Hacuaha cachjá cojo cha ladu nuju xi cuaxëxin cha xitsehen tsëhë quihndi naha. Peru camaji cavaxëxin cha. ―Cuatjin cachja me.
19 Ngajan xi Jesús ne, cachja me cojo xuta xi siu jan cuitjin:
―¿Mé camá nuju ngayun xi macjaain camahani nuju? ¿Há jyë sa nixtin meje rë xi cuitejña cojo nuju? Nduvun cojo cha nguehe. ―Cuatjin cachja me.
20 Hya xi camá ne, cafehe xuta cojo cha hiscan tacun Jesús. Xi tu cavëë xitsehen jan Jesús ne, marcu macjain catsiticja rë cha nixti jan. Hane xi caticja cha ne, cavuya cavindefa cha cafaña cha. Hacuaha cavetju natyaxu hntsua cha. 21 Ngajan xi Jesús ne, cavinenguise me cojo nahmi rë cha cuitjin:
―¿Há tsëë xi cuitjin má rë cha?
Ngajan xi chja nahmi rë cha ta:
―Hisca cjuaquihndi rë cha, cuatjin má rë cha. 22 Jiya hora xi faha xitsehen jan cha ne, tsingatjeya rë cha xcun ndacahi. Tjin nga ne, tsingatjenya rë cha ngajñi nandan, ta meje tsiquehen rë cha. Vëhë xi sá xi tsejen xi ha hyun mé nihñu cojo cha ne, catamayuma nuju ngahan cojo quihndi naha, hane tisecun niji.
23 Ngajan xi cachja Jesús cojo nahmi rë cha ta:
―Há xa vë xi hvë. Sá xi macjain nuju ne, yëjë ni ne, cuma.
24 Ngajan xi nahmi rë cha ne, ngutjen cachja me cuitjin:
―Tatá. Macjain ná. Peru tisecun ná cojo sa xi cumacjain sa ná.
25 Xi vutsejen Jesús xi jercu tijima tangun xuta ne, cacjan me cojo xitsehen jan. Cuitjin cachja me:
―Ngaye xitsehen loho lihmi, tetjixin tsëhë cha vi. Hacuaha ha quihndë cuyiin cuisihin cahntsua xahasen rë cha.
26 Ngajan xi xitsehen jan ne, hisca cajindaya xi catsicuya catsindefa rë cha. Sehe cavetju quiji. Hane cha vëhë ne, jiña cahme cha. 27 Peru Jesús ne, cafaha me tsja cha catsisatjenhnga me cha, hane casecun cha.
28 Hya xi camá ne, quiji Jesús cojo cha ladu rë me, hane cavisehen me cahntsua ndihya. Xi cavisehen me jan ne, sehe ngajan xi chja cha cojo rë me cuitjin:
―¿Mé má ngayin xi camaji canaxinxin xitsehen jan tsëhë cahntsua xahasen rë cha vë?
29 Ngajan xi cachja Jesús cojo cha cuitjin:
―Cuatjin camá nuju ta tsëhë xi xitsehen xi cuacun vë ne, meje rë xi titjun chjahyan rë Nina hacuaha cuinechan xun rë me, cojo sa xi cuma naxenxen.
Jesús ne, cachja me ta cueya me peru cuya me cjuahñu
30 Hya xi camá ne, sehe cavetju me quiji me taha distritu Galilea. Hacuaha mijí rë me xi cumachaya rë xuta jani taha tsujyihiya me ta, 31 tsëhë xi tivicuya me cha ladu rë me hacutjin cuatju me cumá. Cuitjin cavicuya me:
―Ha ndasa tsëhë Nina canduva Quihndi rë Xuta Jain ne, peru cjuaha xuta me ne, tsiquehen me me. Peru xi cjuë xi jyan nixtin ne, cuya nga me cjuahñu.
32 Peru cha ladu rë me ne, vijnii rcu cha tsëhë xi cueya Jesús, hacuaha cuya me cjuahñu. Hacuaha tsacjun cha cuinenguise cha me cjua jan.
¿Yo xi hitsë sa matitjun?
33 Hya xi camá ne, cafehe me nandya Capernaum. Hya xi cafehe me jan ne, cavisehen me cahntsua ndihya hisca cuiyuju me. Sehe ngajan xi cavinenguise me cojo cha ladu rë me mé xi cavisiajmi cha cojo xicjin cha ngajan ndiya. 34 Hane tu jyuu ni caviyuju cha ta xi cavisiajmi cha ndiya jan ne, cuitjin cachja cha:
―¿Jarë ngayaan xi hitsë sa venguichji naja?
35 Hya xi camá ne, quiji Jesús cavéjña me. Sehe ngajan xi cajindaya me yëjë tejó cha ladu rë me jan ne, sehe ngajan xi cachja me cojo cha cuitjin:
―Sá xi tjin ngu yun xi meje nuju xi cumatitjun ngayun ne, meje rë xi hacuiin jemu jyë nihñu yojo nuju hacuaha cuisecun xingun.
36 Hya xi camá ne, cafaha me ngu lihndi, cavejña me cavasencja, hane sehe cavataha me. Hane ngajan xi cachja me cojo cha cuitjin:
37 ―Jarë ngayun xi ndaja nihñu cojo ngu lihndi sacuaha vihi xi ngatsë naha ne, sacuaha xi ngahan ndaja nihñu cojo ná. Hacuaha jarë ngayun xi ndaja nihñu cojo ná ne, hacuiin ngahan ni ta, hacuaha cojo Nahmi naha xi catsingatju ná me, cojo me vëhë ndaja nihñu cojo rë me.
Me xi hacuiin condra naja ne, ladu naja má me
38 Ngajan xi cachja cha Juan cojo Jesús cuitjin:
―Maestro, cahyin ngu cha xi tijima tivaxëxin xitsehen tsëhë xahasen rë xuta, hane xi sahmi cha ne, cojo ñihi nuju veyanangui cha. Peru tsëhë xi hacuiin cha ladu naja cha ne, canújin cojo cha ta ha quihndë sahmii cha cuitjin.
39 Ngajan xi Jesús ne, cachja me cuitjin:
―Xi cavichecjiin tsëhë cha ta xuta xi cuma sahmi me cjuandaja vëhë, sacuaha xi ngahan jain cavitéxa rë me ne, cumaji xi ngutjen choho cuichja me tsahan. 40 Xuta xi hacuiin choho vëë naja me ne, chuya rë me tsajan. 41 Cuichjá quixë cojo nuju ta yo me xi sua ngu vasu nandá siuhun, tsëhë xi vëë me xi xuta ladu naha ngayun, hacuaha vëë me xi ngahan xi catsingatju ná Nina ne, me vëhë ne, sacu rë me ngu cjuandaja xi sua Nina.
Cjuatsavi xi ticojo rë xi cuixuya ngayaan xcun ngu jyë́
42 ’Peru yo xi nduvacojo xcusun xi sahmi xi tsismicacun ngu quihndi ndiya naha ne, hitsë sa ndaja tsëhë xuta vëhë xi xtyangui ngu ndyojo natsi nguisin me sehe ningatjeya rë me ngajñi ndachacun. 43 Hane sá xi cjuatacun nuju meje rë xi nihñu ngu jyë́ cojo ntsun ne, vengui sa chji rë xi chandunxun ntsun ta, jemu sa ndaja tsujun xi cuma yoho yun xcun Nina, xi cumá rë xi cuechun xcun xitsehen cojo ntsun ngajñi rë ndihi jyë xi tsajin nixtin hvo. 44 Ngajan cuinechun, hiscan xi cjuiin nuju cjuañihi ta ndihi ne, tsajin nixtin xi hvo. 45 Sá xi cjuatacun nuju meje rë xi nihñu ngu jyë́ jani xi cuangun ne, vengui sa chji rë xi chandunxun ntsacun ta, jemu sa ndaja cuechun xcun Nina xi yoho yun xi cuma rë xi cuechun xcun xitsehen cojo ntsacun. 46 Ngajan xcun xitsehen vëhë ne, cjuiin nuju cjuañihi ta ndihi ne, tsajin nixtin hvo. 47 Hacuaha sá xi cjuatacun nuju meje rë xi chutsujun xcusun xi ndajintjin xi chutsujun ne, chuhunxun tuxcun jan chandunxun, ta tsëhë xi hitsë sa ndaja tsujun xi sacu nuju cahndë́ ngajan hiscan sahmi Nina gubiernu handasa cojo ngu ni tuxcun xi cuma rë xi cojo catsijo tuxcun cuechun xcun ndihi xi sahmi castigu rë nima. 48 Ngajan xcun xitsehen ne, ngajan cjuiin nuju cjuañihi ta ndihi ne, tsajin nixtin hvo.
49 ’Hya xi tsichuva Nina ngayëjë ni xuta há ndaja há ndajin casahmi me ne, me xi tsajin mé casahmi ne, Nina ne, jemu chuya rë me. Hya xi Nina cjuahatsja me ngu cjuatjo xi tahan rë me ne, sá xi cojo naxa sehen ndaja ne, jemu chuya rë me.
50 ’Naxa ne, jemu ndaja. Peru sá xi cjuë xtya rë ne, machjiriin. Cjuandaja rë Nina ne, hacuaha jemu ndaja. Vëhë xi chjuhun cjuandaja rë Nina, teyun cahntsua xahasen nuju, hacuaha ndaja tinechun cojo xingun.
