1 Hane xi camatiña me Jerusalén xi ha cjuaha me nandya Betfajé cojo Betania, quiji me ndetjun xi hmí rë Ndetjun Olivu, ngu ndetjún xi tiña tacun cojo nandya xi cuacun vëhë ne, catsingatju me jo cha ladu rë me quiji cha tixa. 2 Cuatjin cachja me cojo cha:
―Tangun nandya xi tsejen vë. Hane xi tu cjuhun tjehen nandya ne, sacú nuju ngu burru xatsë xi hisca ngu cjëë cuijin rë chu, quitahahñu chu ngajan. Hane chundecjun chu, sehe nduvuncujun chu. 3 Sá xi yo xi cuichja cojo nuju ta: “¿Mé má cuatjin chundecjun chu ne?”, cuitjin tinújun: “Me xi matitjun tsijin meje rë me chu. Peru sehe tsicuya nga me chu.” ―Cuatjin cachja Jesús cojo cha.
4 Hya xi camá ne, quiji cha tixa xi cachja Jesús cojo cha. Xi tu cafehe cha ngajan ne, casacu rë cha ngu chu burru xatsë quitahahñu chu ngajan ndiya tiña tingotjo ndihya. Hane cavundecja cha chu.
5 Hane ngujo cha xi hinchacun jan ne, cachja cha cojo cha ladu rë Jesús cuitjin:
―¿Mé má cuatjin cachundecjun chu burru vë?
6 Ngajan xi cachja cha ladu rë Jesús hacutjin cachja me cojo cha. Sehe cha xi cuacun jan ne, casua cha cahndë́ quijicojo cha cha ladu rë Jesús chu burru jan. 7 Hane sehe quijicojo cha chu hiscan tacun Jesús. Hacuaha casua cha tsjian rë cha casesun ngaxtun chu sehe camiji me chu. 8 Hya xi camá ne, jemu cjín xuta xi cacandi me tsjian xcun rë me ndiya hacutjin cjui Jesús. Hane ngujo nga me ne quiji cavotohosun me xca xcuen ngajan nguijña, hane hacuaha cacandi me ndiya hacutjin cjui Jesús cojo sa xi tifaharcun me me.
9 Hane yëjë me xi cjui titjun cojo yëjë me xi tjengui jan ne, cavetsihin jercu cajindaya me cachja me:
―Nacuechji rë Nina ta cafehe me xi catsingatju Nina. 10 Catsinchacun me me xi cuitexa naja sacuaha cavitexa David xutachanga naja. Jemu catsinchacun Nina me xi nduva tsëhë xi Nina catsingatju rë me. ―Cuatjin cajindaya xuta.
11 Xi tu cavisehen me nandya Jerusalén ne, quiji me yungun xi matitjun. Xi tu cavutsejen nguehe cavutsejen ngajan me ne, mé ta quiji hora ne, cavetju nga me cojo cha ladu rë me xi tejó jan ne, cavuya cafehe nga me nandya Betania.
12 Xi camá nchujun jan ne, cavuya cavetju nga Jesús tsëhë nandya Betania. Hane ha jemu vojo rë me hora xi cavetju me. 13 Hya xi camá ne, tsëhë cjin ni cavëë me ngu yaxujun xi chine tú rë xi jemu ndaja tsejen yaha xca rë. Hane quiji me hiscan secun, sá sacu sinë me. Peru xi cafehe me ngajan ne, tsajin camahani mé xi casacu rë me, tsëhë xi hacuiin nixtin rë tuhaxi jan. 14 Ngajan xi cachja me cojo ya jan cuitjin:
―Quihndë tsajin nixtin xi cuaqui tú riji xi sinë xuta.
Hane cha ladu rë me ne, cahndë cha cjua rë me.
Cavaxë Jesús xuta xi sahmi ndatsin ngajan yungun xi matitjun
15 Hya xi camá ne, cafehe me nandya Jerusalén. Xi cafehe me ngajan ne, quiji me ndatsen yungun xi matitjun jan. Hane cavetsihin cavaxë me xuta xi sahmi ndetsin ngajan. Catsindefa me maxë rë xuta xi tsindeya tujún. Hacuaha cacandi me siya rë xuta xi viteña nisë tyava. 16 Hane casuaain me cahndë́ xi tjin mé xi cjuaha xuta xi cuatjuvasen me ndatsen yungun jan.
17 Sehe cavetsihin cavicuya me xuta jan cuitjin:
―Ngayujun ni ne, ha hyun xi cuitjin cachja Nina xcun xujun rë me: “Ndya naha ne, ngu ndihya xi vinduva xuta tsëhë yëjë ni nandya cuisiajmi me cojo ná.” Peru ngayun ne, tinihñu ndava Nina vi sacuaha ndava chëjë. ―Cuatjin cachja Jesús.
18 Hya xi camá ne, xi cahndë nahmi xi matitjun cojo maestru tsëhë ley cjua jan ne, cavetsihin cavangui me chuva rë xi cuma tsiquehen me Jesús. Cuatjin meje rë me tsëhë cjuaxin xi tjin rë me, tsëhë xi yëjë xuta ne, jemu quijircun rë hacutjin cavicuya Jesús. 19 Xi quiji hora ne, cavetju nga Jesús tsëhë nandya jan cojo cha ladu rë me.
Caxi ya xujun xi cama cjan rë Jesús cojo
20 Hane xi camá nchujun jan ne, cavuya cafe nga me nandya Jerusalén. Hane xi cavatju nga me hiscan secun ya xujun jan ne, cavëë me xi ya xujun jan ne, cafë caxi hisca rcu hisca ntsacu. 21 Ngajan xi cha Pedru ne, catsinguitsjen cha cjua xi cachja Jesús cojo ya jan ngujña ne, sehe ngajan xi cachja cha cojo Jesús cuitjin:
―Maestro. Chutsujun ta ya xujun xi canújuncjun cojo jan ne, cafë caxi.
22 Ngajan xi cafayangui Jesús tsëhë cha cuitjin:
―Catamacjain nuju tsëhë Nina. 23 Cuichjá cojo nuju ngu cjuaquixi ta tu yo ni xi cuichja cojo naxi vëhë cuitjin: “Tihinxin tsëhë nguehe, tihin tisihin ngajñi ndachacun”, sá xi hacuiin majo cacun, sá xi macjain jain rë hacutjin xi cachja ne, cuatjin jain cuma. 24 Vëhë xi chjá cojo nuju ta yëjë ni xi chjahyun cojo Nina ne, ningatuhuntacun sacuaha xi ha casacu nuju ta xi cuatjin ne, sacu jain nuju. 25 Hora xi chjahyun rë Nina ne, sá xi tjin yo xi choho cachja tsujun, o sá xi choho casahmi tsujun ne, ninchatuhun rë, cojo sa xi Nahmi naja xi tacun ngahnga ne, hacuaha tsinchataha nuju me tsëhë jyë́ nuju ta, 26 sá xi ninchatuun rë me ne, Nahmi naja xi tacun ngahnga ne, hacuaha tsinchataain nuju me. ―Cuatjin cachja me.
Finenguisen xuta ¿yo casuaxa rë Jesús?
27 Cjui cjui me ne, cafehe me nandya Jerusalén. Hane xi cafehe me jan ne, quiji me yungun xi matitjun. Hora xi tsujyihiya me ndatsen yungun jan ne, nahmi xi matitjun cojo maestru tsëhë ley cojo sa xuta changá xi yahnga jan ne, cafehe tjengui me Jesús. 28 Hane cuitjin cavinenguise me:
―¿Yo cavitexa ri xi cuatjin nihñi xcusun vë? ¿Yo casuaxa ri?
29 Ngajan xi Jesús ne, cachja me cojo xuta jan cuitjin:
―Cjuinenguësë nuju ngu cjua. Hane sá xi nicuyun tsahan ne, sehe cuichjá cojo nuju yo cavitexa ná xi sahme xcusun vëhë. 30 Ngayun mé nújun, ¿Yo xi cavitexa rë cha Juan xi cavitenda cha xuta? ¿Há Nina cavitexa me cha ne, há xuta cavitexa me cha? Tinújun cojo ná.
31 Ngajan xi vetsihin visiajmi xuta jan ngajñi rë me cojo xicjin me cuitjin:
―Sá xi cuinújan xi Nina cavitexa me ne, cuichja me vihi cojo naja cuitjin: “Sá xi cuatjin ne, ¿mé má camacjaain nuju xi cachja cha ni?” 32 Peru ¿há cuma cuinújan xi xuta cavitexa me cha?
Cuatjin casacuinyiin rë xuta xi cuacun vë mé cjua xi tsicuya me tsëhë Jesús ta, tsëhë xi tsacjun me xutacjín, tsëhë xi yëjë ni xuta jan ne, macjain rë me xi cha Juan ne, Nina cavitexa jain me cha xi suacuenda cha cjua rë Nina. 33 Vëhë xi hya xi cafayangui me tsëhë Jesús ne, cachja me cuitjin:
―Hyiin.
Ngajan xi hacuaha Jesús ne, cachja me ta:
―Sá xi cuatjin ne, ta mijí nicuyun cjua tsahan ne, hacuaha cuichjaain cojo nuju yo cavitexa ná xi sahme xcusun vihi.
<- San Marcos 10San Marcos 12 ->
