Cjuandajyihi xi catsihindu San Juan Tsëhë Jesucristu
1 Ntsacu cavetsihin ngasunhndë ne, ha tacun ngu me xi hmí rë Cjua. Me vëhë ne, tacun me cojo Nina, hacuaha Nina me. 2 Me vëhë ne, hisca ntsacu cavetsihin ne, ha cuatjin tacun me cojo Nina. 3 Yëjë ni xi tjin ne, cojo me vëhë catsindaja Nina. Tsajin mé xi camandaja xi cuajin me vëhë camandaja. 4 Me vëhë xi hatuxa tjin rë me cjuahñu, hane cjuahñu vëhë ne, vëhë sua cjuahasen xi cuma rë xuta. 5 Hane cjuahasen vëhë ne, vitsojo ngajñi rë cjuatsehen sacuatjin sahmi hasen ngu ndihi ngajñi jñú, peru cjuatsehen ne, cacaain rë catsicjë rë cjuahasen jan.
6 Cavéjña ngu me xi hmí rë Juan, xi Nina catsingatju rë. 7 Me vëhë ne, cavetjujñi me xi cuichja me cojo xuta hane tsinguixi me tsëhë cjuahasen jan, cojo sa xi ngatsë rë cjua xi cuichja me ne, cumacjain rë yëjë ni xuta. 8 Hacuiin me vëhë xi cjuahasen jan me ta me vëhë ne, cavetjujñi me cojo sa xi cuichja me tsëhë cjuahasen jan. 9 Cjuahasen xi cjuaquixi jan ne, xi visehen ngajñi rë cjuatacun rë yëjë xuta ne, sehe canduva nguehe ngasunhndë.
10 Me xi hmí rë Cjua jan ne, cavéjña me ngasunhndë. Hacuaha handasa cojo me xi catsindaja Nina ngasunhndë ne, peru xuta ne, hvíin me yo. 11 Canduva me ngasunhndë rë suvá me, peru xuta nangui rë suvá me ne, cafahatsjaain rë me. 12 Peru ngu jo xuta nangui rë me xi cafahatsja rë me hacuaha camangu cacun cojo rë me ne, me xi Cjua jan ne, casua me chuva rë xi cuma xuta xi cuacun jan quihndi rë Nina. 13 Xuta xi cuacun jan ne, hacuiin camá me quihndi rë Nina chuva rë xi meje rë ngu xihin ngu quihndi ta suvá Nina casahmi me xi camá xuta xi cuacun jan quihndi rë me.
14 Me xi Cjua jan ne, camá me ngu xuta, hacuaha cavéjñacahndë me ngajñi niji. Hatuxa quitsë rë xahasen rë me cjuandaja, quitsë rë xahasen rë me cjuaquixi. Ngayin ne, cahyin hacutjin xi jemu jyë hnga me cojo hasen rë me. Jyë hnga me sacuatjin casahmi rë me Nahmi rë me. 15 Juan Vitenda rë Xuta ne, cachja me cojo xuta tsëhë me xi Cjua jan, cuitjin cachja me:
―Me vihi xi cachjá tsëhë, xi me xi sehe cuinduva ne, handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan.
16 Tsëhë xi hatuxa jemu quitsë rë xahasen rë me cjuandaja ne, vëhë xi ngayejen ni ne, hacuaha jemu cachjahanntsan cjuandaja. 17 Ley rë Nina ne, nima Moisés casua naja me, peru cjuandaja cojo cjuaquixi ne, Jesucristu casua naja me. 18 Tsajin camahani yo xi cavëë rë Nina. Suvá ni Quihndi ngu rë Nina xi hacuaha nina me hacuaha tacun tangun me cojo Nina Nahmi naja ne, me vëhë casua me camachaya naja yo xi Nina.
Cjua xi cachja Juan Vitenda rë Xuta
19 Cuitjin cachja Juan hya xi catsingatju xutaxa rë tsëhë nandya Jerusalén ngu jo nahmi cojo sacristán xi cjue cjuinenguise rë me Juan cuitjin:
―Ngayun ne, ¿yo ngayun? ―Cuatjin cjuinenguise me. 20 Hane hora xi cuatjin cavinenguise me ne, Juan ne, catsinguixi me, hacuiin cavetsangui me, cuitjin catsinguixi me:
―Hacuiin ngahan Xihin xi Tsingatju Nina. ―Cuatjin cachja me.
21 Ngajan xi cavinenguise nga nahmi xi cuacun jan cuitjin:
Ngajan xi cavinenguise nga nahmi xi cuacun jan cuitjin:
―¿Há ngayun profeta xi jemu nechanyan rë? ―Cuatjin cavinenguise me.
Hane Juan ne, cuitjin cafayangui nga me:
―Jéya. ―Cuatjin cafayangui nga me.
22 Ngajan xi nahmi xi cuacun jan ne, cavinenguise nga me cuitjin:
―¿Yo ngayun ni? Tinújun cojo niji ne, cojo sa xi cuma nicuyin ngu cjua tsëhë me xi catsingatju niji. ¿Mé nújun tsujun suvun? ―Cuatjin cachja me.
23 Ngajan xi Juan ne, cuitjin cafayangui me:
―Ngahan ne, xuta xi jercu hñu chjá nguehe hiscan jemu xín tsëhë nandya, xi catitsinguixi xuta ndiya tsëhë Nai naja, sacuatjin cachja profeta Isaías hatsëë nixtin. ―Cuatjin cafayangui me.
24 Quihndë ne, xuta xi cuacun catsingatju cha partidu fariseo xi cuichja me cojo Juan ne, 25 cuitjin cavinenguise me:
―¿Mé má cuatjin vitendun xuta sa xi hacuiin ngayun xi Tsingatju Nina ngayun, hacuiin ngayun xi profeta Elías ngayun, hacuiin ngayun xi profeta xi jemu nechanyan rë ngayun ni? ―Cuatjin cavinenguise me.
26 Ngajan xi Juan ne, cuitjin cafayangui me:
―Ngahan ne, cojo nandá tiviténda nuju, peru ngajñi nuju secun ngu me xi hyúun yo. 27 Ngahan ne, canduvá titjun, sehe canduva me vëhë, peru hisca tsajin mé cumachjirëhë ngahan xi cuma rë me. ―Cuatjin cafayangui Juan.
29 Xi camá nchujun jan ne, cavëë Juan xi nduva Jesús hiscan secun me. Hane cuitjin cachja Juan cojo xuta:
―¡Chutsujun ni! Cuajyihi me xi sacuaha chu tsánga xi sua Nina xi tsicjë jyë́ rë xuta. 30 Me vëhë xi cachjá cojo nuju xi me xi sehe cuinduva. Handasa ngahan canduvá titjun ne, peru me vëhë xi hitsë sa venguichji rë me xi cuma ná ngahan, tsëhë xi ha tacun me hya xi catsin ngahan. 31 Ngahan suva ne, hveen yo me. Peru cojo sa xi ngayaan xuta tjë rë Israel cumachaya naja yo me ne, vëhë xi cuitjin tiviténda xuta. ―Cuatjin cachja Juan.
32 Hacuaha cachja Juan cuitjin tsëhë Jesús:
―Ngahan ne, cahvë Hasen rë Nina xi canduvajne tsëhë ngahnga sacuaha ngu paloma, quiji casesun rcu me. 33 Ngahan suva ne, hveen yo me, peru me xi cavitexa ná xi cuiténda xuta cojo nandá ne, cuitjin cachja me cojo ná: “Me xi che xi cuinduvajne Hasen naha cjue sesun rcu ne, me vëhë xi cuitenda me xuta cojo Hasen naha.” Cuatjin cachja Nina cojo ná. 34 Ngahan ne cahvë hacuaha cachjá cojo xuta xi me vëhë xi Quihndi rë Nina me. ―Cuatjin cachja Juan.
Me xi tjun tjun camá xuta ladu rë Jesucristu
35 Xi camá nchujun nga jan ne, secun Juan cojo jo xuta ladu rë me. 36 Hane xi cavëë Juan Jesús xi tivatju me jan ne, cachja me cuitjin:
―¡Chutsujun ni! Cuajyihi me xi sacuaha chu tsánga xi sua Nina. ―Cuatjin cachja me.
37 Xi cahndë jo xuta ladu rë Juan cjua jan ne, quijitjengui me Jesús. 38 Xi cavuya Jesús cavutsejen me xi cjuitjengui xuta jan me ne, sehe cavinenguise Jesús me cuitjin:
―¿Mé meje nuju ngayun? ―Cuatjin cavinenguise me.
39 Ngajan xi Jesús ne, cuitjin cachja me cojo jo xuta jan:
―Nduvun chutsujun. ―Cuatjin cachja me.
Hane xi quiji vutsejen xuta jan ne, sehe cavëë me hiscan véjña Jesús. Sacuaha chuva rë fane ñuju hora vëhë. Hane caviyuju me ngajan cojo Jesús nixtin hya.
40 Ngu xuta ladu rë Juan xi cahndë sacuatjin cachja me hacuaha quijitjengui rë Jesús ne, hacui Andrés, me xi hntsë Simón Pedru. 41 Me vëhë titjun quiji jaha me hntsë me Simón, hane xi casacu rë me ne, cuitjin cachja me cojo:
―¡Cahyin Mesías! ―Cuatjin cachja me. (Mesías ne, hacui cjua xi meje cuichja: Me xi Tsingatju Nina.)
42 Hya xi camá ne, Andrés ne, quijicojo me Simón xicjin me ngajan hiscan tacun Jesús. Hane xi cafehe me jan ne, cavutsejenya Jesús xcun Simón ne, sehe cachja me cuitjin cojo rë me:
―Ngayun ne, Simón hmí nuju, peru chjuhunñuhu Cefas. ―Cuatjin cachja Jesús. (Ñihi xi Cefas ne, tangun vijne cojo ñihi xi Pedru ta catsijo ni ne, ndyojo, meje cuichja.)
Cavaxijin Jesucristu Felipe cojo Natanael
43 Hane xi camá nchujun jan ne, cavejña cacun Jesús xi cjue me ngu nandya tsëhë distritu Galilea. Chaja sa xi cjue me ne, cavechútáha me Felipe, hane cachja me cojo cuitjin:
―Nduvun, cuanguen cojo ná. ―Cuatjin cachja me.
44 Felipe ne, Betsaida nangui rë me, hiscan nangui rë Andrés cojo Pedru. 45 Hya xi camá ne, Felipe ne, quiji jaha me Natanael, hane xi casacu rë me ne, cachja me cuitjin:
―Cahyin ngu xuta Nasaret xi hmí rë Jesús, quihndi rë José. Me vëhë xi catsihindu Moisés cojo jingu sa profeta tsëhë, ngajan xcun xujun rë Nina. ―Cuatjin cachja Felipe cojo Natanael.
46 Ngajan xi Natanael ne, cavinenguise me cojo Felipe cuitjin:
47 Hane xi cavëë Jesús xi camatiña Natanael ne, sehe cachja me cuitjin tsëhë:
―Chutsujun ni, cuajyihi ngu me xi xuta tjë rë Israel xi cjuaquixi jain, ngu me xi tsajin cjuandacha cahntsua xahasen rë. ―Cuatjin cachja Jesús tsëhë Natanael.
48 Ngajan xi Natanael ne, cuitjin cavinenguise me Jesús:
―¿Hacutjin má xi cuatjin hyun yo ngahan ni? ―Cuatjin cavinenguise Natanael.
Ngajan xi Jesús ne, cuitjin cafayangui me:
―Chaja sa xi cuichja Felipe cojo nuju ne, ngahan ne, ha cahvë nuju hya xi sechun ngahma yaxujun jan. ―Cuatjin cafayangui Jesús.
49 Hane Natanael ne, cuitjin cachja me:
―Maestro, Ngayun xi Quihndi rë Nina ngayun, ngayun xi matitjun ngayun tsajan ngayaan xuta tjë rë Israel. ―Cuatjin cachja Natanael.
50 Ngajan xi Jesús ne, cachja me cuitjin:
―Ngayun ne, camangu tacún cojo ná, tsëhë xi cachjá xi cahvë nuju hya xi nechun ngahma ya higo jan. Peru sehe chutsujun sa xcusun xi cuetjucaa xi hitsë sa venguichji rë.
51 Hacuaha cachja sa Jesús cjua vihi:
―Cuichjá cojo nuju cjuaquixi ta ngayujun ni ne, cuechú nixtin xi chutsujun xi ngahnga ne, sacuaha xi tixaha, hacuaha ángel rë Nina ne, sacuaha xi cjuijne cjuiniji hiscan tejña ngahan xi Quihndi rë Xuta Jain ngahan. ―Cuatjin cachja Jesús.
San Juan 2 ->
