1 Tuꞌntzintzjo, ayeqiꞌy werman, a nimxix nqꞌaqꞌin nkꞌuꞌja kyiꞌja, nim waja tuꞌn nlon kyeꞌy. Ikytziꞌn ayeqiꞌy ntzaljbꞌila ex yekꞌbꞌil teꞌ twutz waqꞌnbꞌiꞌn. Mitzin tzꞌel kytxalpin kyibꞌa toj kynimbꞌila tiꞌj tAjaw Tkyaqil, qalaꞌ kyinxsinjiꞌy kyteꞌn ikyjo a jikyin wen.

2 Atzin jaꞌlin, chin kubꞌsil nwutza kyeꞌ erman qya, a Evodia tukꞌa Síntique, noq tuꞌn tkubꞌ kyxmoxin kyibꞌ wen kyxolx, ex tuꞌn tok kymujbꞌin kyibꞌ toj kynimbꞌil ex toj taqꞌin qAjaw, a Klolqe te jun majx. 3 Ex ikyx te tey, chin kubꞌsil nwutza, a ay wukꞌaxixa toj aqꞌuntl, tuꞌn tmojin kyukꞌaxjo qya luꞌn; ikytziꞌn, ma chi aqꞌnin kyeꞌ qya lo kuj wen junx wukꞌiy, tuꞌn tqꞌmet Tbꞌanil Tqanil kolbꞌil, junx tukꞌa erman Clement, ex kyukꞌa txqantl erman. Quꞌn ikytzin o kyij tzꞌibꞌin kybꞌi teyile junjun toj tuꞌjil chwinqil te jun majx.

4 Tuꞌntzintzjo, chi tzalajxa wen tiꞌj tbꞌi qAjaw toj tkyaqil. Kxel nqꞌmaꞌn juntl majla kyeꞌy. Kukx chi tzalajxa wen toj tkyaqilx,[a] 5 tuꞌntzin kylonte kykyaqilxjal, qa nimilqiꞌy, noq tuꞌn kychwinqila tbꞌanilx wen. Quꞌn ikytzin nqatzx tuꞌn tul qAjaw Jesús.

6 Ex mina chi ja labꞌtiꞌy tiꞌj jun tiꞌ, qalaꞌ kyqꞌmaꞌnxa nej twutz qMan Dios toj kynaꞌj Diosa. Ex kyqꞌoꞌma chjonte, ex kyqaninxa tukꞌa kynimbꞌila.[b] 7 Tuꞌn ikyjo, tzul jun tnukꞌbꞌil Dios kyeꞌy, a nimxixtl tzeꞌnku n-el kynikyꞌxjal te. Ex atzin nukꞌbꞌil kꞌuꞌlte kyanmiꞌn ex kynabꞌla te nya wen, quꞌn mujleqiꞌy tukꞌa Crist, a Jesús.

8 Tuꞌnpetziꞌn werman, chi ximinqiꞌy tiꞌj tkyaqiljo a twutzx, ex tiꞌj tkyaqiljo a at tajbꞌin, ex tiꞌj tkyaqiljo jikyin taꞌye, ex tiꞌj tkyaqiljo a tzꞌaqlexix, ex tiꞌj tkyaqiljo wen, ex tiꞌj tkyaqiljo at tokin twutz qMan Dios. Atzin kyejiꞌy kyximbꞌitz, quꞌn tuꞌntzin wen kyyol xjaltz kyiꞌja, ex okpela kꞌwel kynimsin tbꞌi Dios tuꞌn ikyjo.

9 Kybꞌinchinkutzinjiꞌy a o bꞌaj nyekꞌiꞌn, ex o txi nxnaqꞌtziꞌn kyeꞌy, ex n-ok kybꞌiꞌn, tzeꞌn nxi nqꞌmaꞌn, ex o tzꞌok kykaꞌyiꞌn toj nbꞌinchbꞌiꞌn. Atzin kybꞌinchinkujiꞌy, ex atzin qMan Diosjo, a tAjaw tkyaqil nukꞌbꞌil, ktenbꞌil kyukꞌiy toj tkyaqil.

10 Nim nchin tzalaja wen, noq tiꞌj tbꞌi qAjaw, tuꞌnjo ma chin tzaj kynaꞌn juntl majla, tuꞌn ttzaj kysmaꞌn jun onbꞌil jaꞌlin. Ex nya noq otaq chin el naje toj kykꞌuꞌja, qalaꞌ naꞌmtaq tbꞌanttaq tuꞌn kyyekꞌintejiꞌy kyxima luꞌn. 11 Ex nya tuꞌnjo atit ma tzꞌel bꞌaj weꞌy, qalaꞌ naqꞌleqin weꞌ, aj qa at, ex tzeꞌnku ntiꞌ. Ikyx nchin tzalaj wejiꞌy, qa at ex tzeꞌnku ntiꞌ. 12 Naqꞌleqin weꞌ, tuꞌn wanqꞌin toj yajil ex qa toj qꞌinimil. O chin naqꞌet weꞌ toj tkyaqiljo ntzaj wiꞌja: Qa nojninqiꞌn, mo qa at waꞌyaj wiꞌja; ex qa at maj mina nbꞌaj wuꞌn, ex atku maj qa ntiꞌpeltz. 13 Tkyaqilx weꞌ aku tzikyꞌx wuꞌn, quꞌn ate Crist nmojin weꞌy. 14 Me ikytziꞌn, ex wen teꞌ xbꞌant kyuꞌn, tej ẍin tzaj kyoniꞌn toj tkyaqiljo n-ikyꞌx wuꞌn.

15 Ex ojtzqiꞌn kyuꞌn ayeqiꞌy aj Filipos, teꞌ tzaj xkye nqꞌmantiꞌy Tbꞌanil Tqanil kolbꞌil toj Macedonia, ex tzmax tzaluꞌn, ex oꞌkqex kyeꞌ ma chi onin weꞌy. Me mix aꞌl juntl Ttanim Dios ma tzꞌonin wiꞌja tiꞌjjo onbꞌil, a xi nqꞌoꞌn kyeꞌy, a Tbꞌanil Tqanil kolbꞌil. 16 Ex ikyxjo, tej nteꞌn toj tnam Tesalónica,[c] ma tzaj kysmaꞌn ilaꞌ maj kyonbꞌila, tzeꞌnku atxtaq taj wey.[d] 17 Ex jaꞌlin, nya noq tuꞌn njyoꞌn tiꞌj jniꞌ onbꞌil te weꞌy, qalaꞌ wajatlaꞌy tuꞌn kyel wena twutz qMan Dios toj qꞌij te paꞌbꞌin. 18 Ex ma tzul toj nqꞌobꞌa tkyaqil onbꞌil kyuꞌn. Ex ma nintz weꞌ at we jaꞌlin, tuꞌnjo sul kaninjo kyonbꞌila tzaj kysmaꞌn tiꞌj Epafrodito. Atziꞌn onbꞌil, a saj kysmaꞌn, ma tzꞌok tzeꞌnku jun oyaj twutz qMan Dios, a manyor tbꞌanilx, tzeꞌnku tkꞌokꞌjil storak, aj tkubꞌ patit.[e] 19 Tuꞌnpetziꞌn, ate qMan Dios, a jaꞌ nchin ajbꞌiniꞌy, ktzajil qꞌoꞌnte tkyaqiljo atx taj kyeꞌy, a tzeꞌnkuxjo tbꞌanilxix tqꞌinimil toj kyaꞌj, noq tuꞌn Crist, a Jesús. 20 Tuꞌn tkyaqiljo luꞌn, njaw nimsit tbꞌi qMan Dios te jun majx. Ikyxit bꞌantjo.

21-22 Kyqꞌolbꞌinqexa toj nbꞌiꞌy kykyaqil nimil tiꞌj Crist, a Jesús. Ex ikyqex ermanjo, a iteꞌ wukꞌiy tzaluꞌn toj Rom, junx kyukꞌa tkyaqil erman nchi aqꞌnin toj ja te tkawbꞌil César, a nmaq kawil, nxi kyqꞌoꞌn jun qꞌolbꞌil kyeꞌy.

23 Noqit ax qAjaw Jesucrist tzaj qꞌoꞌnte t-xtalbꞌil kyibꞌaja kykyaqila.

<- Aj Filipos 3