1 Ax qꞌijjo tetz Jesús tojjo ja, ex kubꞌ qe ttzi nijabꞌ. 2 Tej tok tkaꞌyin kypon txqan xjal tkꞌatz, bꞌeꞌx okx toj jun tal bark, ex kubꞌ qe toj. Ayetzin kyeꞌ jniꞌ xjal i bꞌaj kyij ten ttzi aꞌ.[a] 3 Ok ten xnaqꞌtzil nimku tumil noq kyukꞌa techil, ex tqꞌma: Jun maj, xiꞌ jun xjal awal triy. 4 Atzin teꞌ tok tchtoꞌn, at pon chitj toj bꞌe. I tzaj pichꞌ, ex bꞌeꞌx jaw kyskꞌoꞌn. 5 Ex at pon chitj kyxol abꞌj, me quꞌn tuꞌn ntiꞌxix twutz txꞌotxꞌ antza, liwey ul twiꞌ. 6 Me atzaj teꞌ tok qꞌijil, bꞌeꞌx jaw tzqij, quꞌn nya nim xaꞌye tlokꞌ. 7 Ex at pon chitj kyxol txꞌiꞌx. Me atzin txꞌiꞌx jun paqx tchꞌiy; atzin te triy noq jaw xkyꞌiꞌsix. 8 Me anteꞌ pon chitj toj tbꞌanil txꞌotxꞌ, tbꞌanilx ele toj. At junjun tqan el jweꞌ kꞌal[b] twutz, ex junjuntl el ox kꞌal,[c] ex junjuntl el lajaj toj kaꞌwnaq.[d] 9 Ankye taj tuꞌn tkubꞌ tbꞌiꞌn nyola, in tkubꞌ tbꞌiꞌntz, tuꞌntzintla tkubꞌ tbꞌinchin.
10 O ul laqꞌeꞌy awoꞌy, a t-xnaqꞌtzbꞌin, tkꞌatz, ex xi qqaniꞌn te: ¿Tiquꞌn nyoliꞌn kyukꞌaxjal noq kyukꞌa techil?
11 Tzaj ttzaqꞌwin Jesús qeꞌy: Ma tzaj tyekꞌin Diosjo tumil kyeꞌy, tuꞌn tel kynikyꞌa tiꞌjjo a ewintaq ojtxe tiꞌjjo Tkawbꞌil Dios, a at toj kyaꞌj; quꞌn metziꞌn kyexjal nlay tzꞌel kynikyꞌ te. 12 Tuꞌnpetziꞌn, ankyeꞌ xjal at tnimbꞌil wiꞌja, ktzajil qꞌoꞌn txqantl, tuꞌntzin tchꞌiyxixjo tnimbꞌil. Ex ankyeꞌ xjal noq nkaꞌmin tkꞌuꞌj tiꞌj tnimbꞌil, kyjaꞌpe k-elil qꞌiꞌne teꞌ chꞌin at.[e] 13 Tuꞌnpetziꞌn, nchin yoliꞌn kyukꞌa techil kyukꞌaxjal. Quꞌn nchi kaꞌyin kywutz, me mi n-el kynikyꞌ weꞌy. Ex ntbꞌiꞌn kyẍkyin, me mi n-okx toj kywiꞌ.
14 Quꞌn ikytzin kbꞌajiljo tzeꞌn tqꞌma Isaías, a yolil Tyol Dios ojtxe, tej tqꞌma:
16 Me kyꞌiwlinqexix kyeꞌ, tuꞌn nchi kaꞌyiꞌn kywutza, ex n-el kynikyꞌa te; ex nchi bꞌin kyẍkyiꞌn, ex n-okx toj kywiꞌy. 17 Quꞌn twutzxix kxel nqꞌmaꞌn kyeꞌy, qa nimjo yolil Tyol Dios ojtxe, ex nim xjal wen kyajtaq tuꞌn kylon teꞌ a kyeꞌ ma kyli jaꞌlin, ex tuꞌn kybꞌin teꞌ a kyeꞌ ma kybꞌi jaꞌlin, me mix bꞌaje ikyjo.[g]
18 Kybꞌintzjiꞌy tiꞌ t-xilin tiꞌjjo jun xjal xiꞌ awal. 19 Quꞌn ayetziꞌn nxi kybꞌiꞌn Tbꞌanil Tqanil tiꞌj Tkawbꞌil Dios, me mi n-el kynikyꞌ te, ikyqetziꞌn tzeꞌnku ijaj i kubꞌ tzꞌaq toj bꞌe. Jun paqx tzul tajaw il, tzeꞌnku jun pichꞌ, ex k-elil tiꞌn Tbꞌanil Tqanil, a kux awet toj kyanmin. 20 Ex atzin ijaj, a kubꞌ tzꞌaq kyxol abꞌj, ikyqetziꞌn tzeꞌnqe xjal jun paqx nxi kynimin Tyol Dios ex tukꞌa tzaljbꞌil. 21 Me quꞌn tuꞌn ntiꞌxix kykꞌuꞌj tiꞌj, mi nchi kujix toj kynimbꞌil. Qa akux saj jun tiꞌ toj kychwinqil, mo qa akux ẍi ok lipinxjal kyiꞌj noq tuꞌn tpajjo nyola, bꞌeꞌx kchi kꞌwel tzꞌaq toj kynimbꞌil. 22 Atzin ijajjo pon tzꞌaq toj txꞌiꞌx, ikytziꞌn tzeꞌn jun xjal n-ok tbꞌiꞌn nyola. Me oꞌkx nchi bꞌisin tiꞌj tkyaqiljo tkubꞌ twutz txꞌotxꞌ. Ex kyaj tuꞌn tten tkyaqil tiꞌchaqku tiꞌ kye ex jniꞌ kyqꞌinmil. Tuꞌntzintzjo anetziꞌn, n-el naje kynimbꞌil tiꞌj Dios, ikyxsin tzeꞌnku triy njaw chꞌiy toj txꞌiꞌx. Noq n-el xkyꞌiꞌsix ex ntiꞌ toj n-el. 23 Me atziꞌn ijaj, a kux awet toj tbꞌanil txꞌotxꞌ, ikytziꞌn tzeꞌnqe xjal nxi kynimin nyola, ex nkubꞌ kybꞌinchin tzeꞌnku nqꞌmaꞌn. Nchi chꞌiy toj kynimbꞌil, tzeꞌnku triy, a s-el jweꞌ kꞌal[h] twutz junjun, ex junjuntl el ox kꞌal,[i] ex junjuntl el lajaj toj kaꞌwnaq.[j]
27 Ayetziꞌn taqꞌniljo tajaw awal bꞌeꞌx i xiꞌ qꞌmalte, ex xi kyqꞌmaꞌn: Tata, ¿Mixsin ja tskꞌoꞌn toj tijaja, tej tok tawaꞌn? Quꞌn ¿Jaꞌtzin saje jun wiq kꞌul toj ikyjo tzeꞌnku triy?
28 Atzin te tajaw aqꞌuntl xi tqꞌmaꞌn: Atla jun ajqꞌoj xkubꞌ bꞌinchin teꞌ ikyjo wiꞌja.
29 Me ante tajaw aqꞌuntl xi tqꞌmaꞌn: Mina, quꞌn qa ma jatz xbꞌoqitjo nya wen kꞌul jaꞌlin, aku jatz lipe triy tiꞌj. 30 Qalaꞌ kyqꞌonkja ax tzqijkuj junx tukꞌa triy, tzmaxi kꞌaꞌ jatz skꞌetjo, aj tjaw joyit. Atzin te triy kxel kꞌuꞌyit teꞌ toj txꞌutxꞌ. Atzin teꞌ maꞌ kꞌul, kjawil kꞌlet, exsin kꞌwel patit tuꞌn qꞌaqꞌ.
31 Ex kubꞌ tqꞌoꞌn Jesús juntl techil kyjaluꞌn: A Tkawbꞌil Dios toj kyaꞌj, ikytziꞌn t-xilin tzeꞌnku jun tal twutz mistas, aj tkux tawaꞌn jun xjal toj txꞌotxꞌ. 32 Quꞌn twutzxix a tal netzꞌxix kywutzjo txqantl twutz ijaj, me ajtzin tchꞌiy, jun tijx n-oke kywutzjo txqantl. Chꞌime njapin tzeꞌnku jun tze, a jaꞌ n-okxi kybꞌinchin pichꞌ kypaqbꞌil kyxol tqꞌobꞌ.
33 Ex kubꞌ tqꞌoꞌn Jesús juntl techil kyjaluꞌn: A Tkawbꞌil Dios toj kyaꞌj, ikytziꞌn tzeꞌnkuꞌ ttxꞌamil wabꞌj, a nkux tqꞌoꞌn jun qya toj oxe malbꞌil jarin. Ex ajtzin tbꞌaj tsmoꞌn, tkyaqiljo tqꞌotjil wabꞌj ktxꞌamixil, ex nchꞌiy wen.
34 Bꞌaj tqꞌmaꞌn Jesús tkyaqiljo lo kyexjal, noq kyukꞌa techil. Quꞌn ntiꞌtaq jun tiꞌ bꞌaj tqꞌmaꞌn, qa nya tukꞌa techil. 35 Bꞌajjo ikyjo, tuꞌntzin tjapiꞌn a qꞌumj tuꞌn yolil Tyol Dios ojtxe, tej tkubꞌ ttzꞌibꞌin:
37 Ex tzaj ttzaqꞌwin Jesús qeꞌy: Atziꞌn awal triy, ayin wejiꞌy, a Tkꞌwal Ichin. 38 Ante txꞌotxꞌ ayetziꞌn xjal tkyaqil. Atzin triy, ayetziꞌn nimil tiꞌj Tyol Dios. Ex atziꞌn kꞌul, ayetziꞌn xjal nya nimil, ayeꞌ ncheꞌx lipe tiꞌj tajaw il. 39 Ex atzin te ajqꞌoj, a xi chtonte tyajil kꞌul toj triy, ax tajaw il. Atzin teꞌ joꞌj triy, atzin teꞌ aj tbꞌaj twutz txꞌotxꞌ te jun majx. Ex ayetziꞌn aqꞌnil mo joꞌl triy, ayetziꞌn t-angel Dios.
40 Ikytziꞌn tzeꞌn kꞌul aj tjaw noq tuꞌn tokx toj qꞌaqꞌ tuꞌn ttzꞌeꞌy, ikytzin kbꞌajiljo, aj tbꞌaj tkyaqil twutz txꞌotxꞌ. 41 Ex ayiꞌn, a Tkꞌwal Ichin, chi xel nchqꞌoꞌn n-angela, tuꞌn kyetz xbꞌoqitjo toj Tkawbꞌil Dios kykyaqiljo nchi bꞌinchin il, ex ayeꞌ nchi xmoxin kyiꞌj junjuntl tuꞌn tkubꞌ kybꞌinchin il. 42 Ex kchi okix toj jun patbꞌil ma tij, ja njuline qꞌaqꞌ wen, ex antza okx chi juꞌchꞌilx kyste tuꞌn kyixkꞌoj, a mix kbꞌajilx. 43 Me ayetzin kyeꞌ, a kubꞌ kybꞌinchin tzeꞌnkuxjo ntqꞌmaꞌn Dios, ok kchi qoptzꞌajiyil kye tzeꞌnku tqan qꞌij toj Tkawbꞌil Dios, a kyTata. Ankyeꞌ at tẍkyiꞌn tuꞌn tok tbꞌiꞌn, in tok tbꞌiꞌn, ex in tkubꞌ tbꞌinchin tzeꞌnkuxjo ntqꞌmaꞌn.
52 Ex tzaj tqꞌmaꞌnl Jesús qeꞌy: Tuꞌnpetziꞌn, jun xnaqꞌtzil tiꞌj ojtxe kawbꞌil, aj qa ma txi lipe tiꞌjjo Tkawbꞌil Dios, a at toj kyaꞌj, k-okil tzeꞌnku jun tajaw ja, a at kabꞌe wiq tqꞌinimil, jun ojtxe qꞌinimil ex jun akꞌaj.
53 Tej kybꞌaj tqꞌmaꞌn Jesús kykyaqiljo techil, bꞌeꞌx xiꞌ 54 tzma toj ttanim. Antza xi xkye tuꞌn t-xnaqꞌtzin kyoj muꞌẍ ja te kꞌulbꞌil. Ex tkyaqilxjal bꞌaj jaw kaꞌylaj, ex kyqꞌma: ¿Jaꞌtzila xbꞌaje t-xnaqꞌtzin xjaljo tkyaqiljo bꞌaꞌn tuꞌn? ¿Ex tzeꞌntzin tten nbꞌantjo tbꞌanil techil tipin tuꞌn ikyjo? 55 ¿Ma nyapetzila a ttata, a jsol tzꞌlan? ¿Ma nya tnana, a Mariy? ¿Ma nyaqetzin titzꞌin Santyaw, Jse, Simun, ex Judas? 56 ¿Ma nyaqetzin tanebꞌjo najleqe qxol? ¿Jaꞌtzin xbꞌante tkyaqiljo luꞌn tuꞌn? chi chiꞌ.
57 Quꞌn tuꞌn kyojtzqiꞌntaq, mix xi kynimine.
58 Nya nimku yekꞌbꞌil tipin bꞌant kyxol t-xjalil, quꞌn tuꞌn mix xi kynimine Tyol.
<- Matey 12Matey 14 ->