Lucas 18

Jun techil tuꞌn Jesús tuꞌn kukx tuꞌn qnaꞌn Dios

1 Kubꞌ tyolin Jesús jun techil lo kywutz t-xnaqꞌtzbꞌin, tuꞌntzintla tel kynikyꞌ teꞌ, qa il tiꞌj tuꞌn kukx tuꞌn kynaꞌn Diosjo junjun qꞌij, ex nya tuꞌn kykubꞌ numj. 2 Chiꞌ kyjaluꞌn: Toj jun tnam attaq jun kawil, a mina ntzajx tchewil Dios tiꞌj, ex ntiꞌxtaq chꞌin kyiwle jniꞌ xjal te. 3 Ex tojxjo tnam anetziꞌn, attaql jun tal mebꞌe qya, a otaq kyim tchmil, a attaq tqꞌoj tukꞌa juntl xjal. Tuꞌntziꞌn, xiꞌ tukꞌa aj kawil, tuꞌntla tkubꞌ qꞌoꞌn jun tumil kyxol, a toj tumilxix. 4 Ilaꞌxitaq qꞌij otaq tzikyꞌ, ex mix jaꞌxitaq n-oke bꞌiꞌnnaj tal mebꞌe qya. Me chebꞌe kubꞌ mutxe tej kawil bꞌisilte kyjaluꞌn: Exla qa mina ntzaj weꞌ tchewil Dios wiꞌj, exla qa ntiꞌx chꞌin kyiwle jniꞌ xjal weꞌy, 5 me kꞌwel nbꞌiꞌnjiꞌy maꞌ mebꞌe qya lo, quꞌn tuꞌn noqx ma tzꞌok ten labꞌtil wiꞌja tuꞌn tkubꞌ nnikꞌuꞌnjiꞌy kyten. Ok kchin kolila tiꞌj, tuꞌntzintla mina tzul juntl majltz tzaluꞌn bꞌajsilte nkꞌuꞌja.

6 Atzin te qAjaw ikyl teꞌ tqꞌma kyjaluꞌn: Ikytzin tqꞌmaꞌ aj kawil nya wen. 7 A qa ikyjo ntqꞌmaꞌn, ¿Ma nyapetzila aku kolin te Diostz kyiꞌjjo jniꞌ, a o chi jaw tskꞌoꞌn, a qa ma chi kubꞌsin kywutz qꞌijl ex qnikyꞌin? ¿Okpetzila kxel qꞌmaꞌn kye, tuꞌn kykubꞌ ten ayolte nim tqan, tzeꞌnkuꞌ tenaj tal mebꞌe qya? 8 Mina, quꞌn ok kxel nqꞌmaꞌn kyeꞌy, chi Jesúsjo, a qa liweyxix kchi elil kloꞌn kyej xjal, a skꞌoꞌnqe. Me aj wul juntl majla, a ayiꞌn Tkꞌwal Ichin, ¿Akupela chi jyet-xjal wuꞌn tzaluꞌn twutz txꞌotxꞌ, a at kynimbꞌil tzeꞌnku tnimbꞌiljo tal mebꞌe qya?

Jun techil tuꞌn Jesús tuꞌn mi jaw qnimsin qibꞌ

9 Ex kubꞌ tyolinl Jesúsjo juntl techil lo kyiꞌj junjuntl xjal, a tzuntaq n-ok kyqꞌoꞌn kyibꞌ te tbꞌanilx, me tzuntaq nchi el kyikyꞌiꞌn jniꞌ txqantl. Chiꞌ kyjaluꞌn: 10 Kabꞌe ichin i xiꞌ naꞌl Dios tojjo tnejil ja te nabꞌl Dios: Pariseytaq teꞌ jun; ante juntl peyil pwaqtaq teꞌ te tnam Rom. 11 Atzin te Parisey waꞌltaq teꞌ, tej tok ten naꞌl Dios noq te nimsbꞌil tibꞌ, ex chiꞌ kyjaluꞌn: Ay Taa, ok kxel nqꞌoꞌn chjonte tey, quꞌn tuꞌn mikyxiqin wejiꞌy tzeꞌnqeku txqantl xjal, a maꞌ ileqꞌqe, nya ma wen xjalqe, maꞌ aj kyꞌaꞌjilqe. Ex nya ikyqin wejiꞌy tzeꞌnkuꞌ maꞌ peyil pwaq lo tok ntxlaja. 12 Kabꞌe maj nkubꞌ npaꞌn weꞌ wayꞌaj toj junjun seman, tuꞌn naꞌn Diosa, ex nxi nqꞌoꞌn tey ajo tlajajin tiꞌj tkyaqiljo jniꞌ nkanebꞌa. 13 Me atzin tej peyil pwaq najchaq chꞌintl tzaje weꞌye teꞌ, ex mixpe jaw kaꞌyin chꞌin twutz kyaꞌj, qalaꞌ noq ok ten qꞌajtzil ttzi tkꞌuꞌj te bꞌisbꞌajil, exsin iky tqꞌmaꞌ kyjaluꞌn: Ay Taa, qꞌaqꞌintzin teꞌ tkꞌuꞌj wiꞌja, a ayiꞌn aj ilqiꞌn, chiꞌ. 14 Kxel nqꞌmaꞌn kyeꞌy, chi Jesúsjo, qa tej taj meltzꞌajjo peyil pwaq tja, otaq kubꞌ najsit til tuꞌn Dios. Me metzil tej Parisey mix kubꞌ najsin teꞌ til; quꞌn qa at jun xjal njaw tnimsin tibꞌ, ok kꞌwel mutxsin teꞌ. Me atzil teꞌ, a kꞌwel tmutxsin tibꞌ, ok kjawil nimsin teꞌ.[a]

Tej kykubꞌ tkyꞌiwlin Jesúsjo tal kꞌwal

(Mt. 19:13-15; Mr. 10:13-16)

15 Ex bꞌaj xi kyiꞌn xjaljo junjun tal kꞌwal tkꞌatz Jesús, tuꞌn tkubꞌ tqꞌoꞌn tqꞌobꞌ kyibꞌaj, tuꞌn kykubꞌ tkyꞌiwlin. Me ayetzin t-xnaqꞌtzbꞌin bꞌeꞌx i ok ten yisol kyeꞌ nchi bꞌaj kanintaq. 16 I tzajtzin ttxkoꞌn Jesús t-xnaqtzbꞌin, exsin xi tqꞌmaꞌn kye kyjaluꞌn: Kytzaqpinqetzjiꞌy tal kꞌwal, tuꞌn kybꞌaj tzaj laqꞌe nkꞌatza. Mi chi kubꞌ kymeqoꞌn, quꞌn kykyaqiljo kꞌwel kymutxsin kyibꞌ tzeꞌnqe tal kꞌwal lo, ayepen kye kchi okixjo toj Tkawbꞌil Dios. 17 Twutzxix kxel nqꞌmaꞌn kyeꞌy; qa ntiꞌ tqꞌuqbꞌil kykꞌuꞌja wiꞌja tzeꞌnku jun kꞌwal, nlay bꞌant tkawin Dios toj kychwinqila.

Tej tyolin Jesús tukꞌa jun kawil qꞌinin wen

(Mt. 19:16-30; Mr. 10:17-31)

18 Jun maj, jun kawil xi tqanin te Jesús kyjaluꞌn: Ay, xnaqꞌtzil wenxix, ¿Tiꞌn kꞌwel nbꞌinchiꞌn, tuꞌn nkanbꞌintejiꞌy chwinqil te jun majx?

19 Xi ttzaqꞌwin Jesús: ¿Tiquꞌn ntzaj tqꞌmaꞌn weꞌy qa wenqiꞌn? Ntiꞌx jun te xjal wen tzaluꞌn twutz txꞌotxꞌ, qalaꞌ oꞌkx te Dios. 20 Me qa taja tuꞌn tten jun tchwinqila te jun majx, niminqekutzinjiy ojtxe kawbꞌil: Mina kyꞌaꞌjiꞌn,[b] mi bꞌiyiꞌn,[c] mi tzꞌelqꞌiꞌn,[d] mi nikyꞌin yola kyiꞌj txqantl,[e] niminkutzin ttatiy ex tnaniy.[f]

21 Iky xi ttzaqꞌwin ichin kyjaluꞌn: Tkyaqiljo lo bꞌeꞌx japin bꞌaj teꞌ wuꞌn, atxixj tej ẍin ntzaja toj nqꞌayila.

22 Tej tbꞌinte Jesúsjo yol lo, xitzin ttzaqꞌwin kyjaluꞌn: Me atx juntl tiꞌ, a naꞌmx tbꞌant tuꞌn: Kꞌayinxjiy jotxjo jniꞌ at tey, exsin oyinxjiy tpwaqtza kye jniꞌ yaj. Qa ma bꞌantjo luꞌn tuꞌn, okpetzin ktenbꞌil tqꞌinimiltza toj kyaꞌj. Exsin ku tzajtza lipeka wiꞌja.

23 Bꞌeꞌx bꞌisinx tej ichin, tej kyok tbꞌiꞌn yol lo, quꞌn tuꞌn manyor qꞌininxtaq. 24 Me bꞌeꞌx el tnikyꞌ Jesús te, qa otaq jaw bꞌisin. Tuꞌnpetziꞌn iky xi qꞌmaꞌn kyjaluꞌn: Kujx tetz, tuꞌn tokx jun qꞌinin toj Tkawbꞌil Dios. 25 Kxel nqꞌmaꞌn juntl majl kyeꞌy: Akula jun paqx tuꞌn tex jun chej toj toyajil jun bꞌaq te slepbꞌil bꞌuꞌẍ, tzeꞌnku jun qꞌinin tuꞌn tokx toj Tkawbꞌil Dios.

26 Me atzaj teꞌ kybꞌinte xjaljo yol lo, bꞌeꞌx xi kyqanin te Jesús kyjaluꞌn: Qa nlay chi okx qꞌinin toj kyaꞌj, ¿Yajtzila qetza? ¿Altzila kye k-okixtz?

27 Xi ttzaqꞌwin Jesús kyjaluꞌn: Nlay bꞌant tuꞌn kyklet-xjal kyuꞌnx kyibꞌx. Me mete Dios kbꞌantil teꞌ tuꞌn tkyaqil.

28 Chi Pegr kyjaluꞌn: Ay Taa, ma kyij qtzaqpinqejiꞌy tkyaqiljo jniꞌ attaq qeꞌy, ex loqoꞌy lipcheqok tiꞌja.

29 Xitzin ttzaqꞌwin Jesús kyjaluꞌn: Twutzxix kxel nqꞌmaꞌn kyeꞌy, a qa at jun xjal ma kyij ttzaqpiꞌn tja, exqe ttata, ex t-xuꞌjil, exqe titzꞌin, exqe ttziky, exqe tkꞌwal, noq tuꞌn tpaj Tkawbꞌil qMan Dios, 30 ajo xjal anetziꞌn, nimx teꞌ ktzajil qꞌoꞌn te te t-xel tzaluꞌn twutz txꞌotxꞌ, exsin ktzajil qꞌoꞌn tchwinqil te jun majx toj kyaꞌj.

Tej tyolin Jesús te tox majin tiꞌj tkyimlin

(Mt. 20:17-19; Mr. 10:32-34)

31 I tzaj ttxkoꞌn Jesús oꞌkqexjo kabꞌlajaj t-xnaqꞌtzbꞌin, exsin xi tqꞌmaꞌn kye kyjaluꞌn: Kyjaꞌ qxiꞌ jaꞌlin tzmax Jerusalén. Antza japine bꞌajjo jotxjo jniꞌ xbꞌaj kytzꞌibꞌin yolil Tyol Dios wiꞌja, a ayiꞌn Tkꞌwal Ichin. 32 Antza ok kchin xela qꞌoniꞌy toj kyqꞌobꞌ nya Judiy; ok kchi jawil xmayin wiꞌja, ok kchin okil yisoꞌn kyuꞌn, exsin ok k-okix tzubꞌin toj nwutza kyuꞌn. 33 Ok kchin bꞌajil laqtzꞌiꞌn kyuꞌn, exsin kchin kꞌwel bꞌyoꞌntza. Me ok kchin jawitz anqꞌiꞌn juntl majla toj toxin qꞌij.

34 Ayetziꞌn t-xnaqꞌtzbꞌin ntiꞌx chꞌin el kynikyꞌ tiꞌjjo otaq bꞌaj qꞌmaꞌn kye, quꞌn tuꞌn ntiꞌxtaq chꞌin ojtzqiꞌn kyuꞌn tiꞌtaqjo nyolajtz. Tuꞌnpetziꞌn, minataq n-el kynikyꞌ te.

Tej tkubꞌ tqꞌanin Jesús jun moẍ toj tnam Jericó

(Mt. 20:29-34; Mr. 10:46-52)

35 Atzaj teꞌ chꞌixtaq tkanin Jesús toj tnam Jericó, attaq jun moẍ qꞌuqle ttxlaj bꞌe, ex tzuntaq nqanin tmobꞌitz. 36 Atzaj teꞌ tok tbꞌiꞌn, qa attaq nimxku xjal n-ikyꞌik antza, xitzin tqanintz tiꞌtaqjo nbꞌaj. 37 Xitzin qꞌmaꞌn te, qa ataq Jesús, a te aj Nazaret, tuꞌn tikyꞌ antza.

38 Jawtzin ẍchꞌiꞌntz kyjaluꞌn: ¡Ay Jesús, tkꞌwal qtzan nmaq kawil David; qꞌaqꞌintzin tkꞌuꞌja wiꞌja!

39 Ayetzin kyej xjal, a nejninqetaq twutz Jesús, bꞌeꞌx i ok ten miyolte, tuꞌntzintla mina tzꞌok tenil ẍchꞌil. Me noqx kyja jawe ẍchꞌin tej moẍ kujxix wen: Ay Jesús, tkꞌwal qtzan nmaq kawil David, qꞌaqꞌintz tkꞌuꞌja wiꞌja.

40 Bꞌeꞌx kubꞌ weꞌ Jesús, exsin xi tqꞌmaꞌn, tuꞌn ttzaj qꞌinj moẍ jaꞌ taꞌyetaq. Tejtzin tpon qꞌiꞌn moẍ nqayin tkꞌatz, xitzin tqanin te kyjaluꞌn: 41 ¿Titzin taja tuꞌn tok nbꞌinchiꞌn tiꞌja? chi Jesús.

Xi ttzaqꞌwin moẍ kyjaluꞌn: Ay Tata, waj weꞌ tuꞌn kykaꞌyiꞌn nwutzach.

42 Xi ttzaqꞌwin Jesús kyjaluꞌn: ¡Ma chi jqet te twutz jaꞌlin! Axjo tnimbꞌila ma kubꞌ qꞌanintiy.

43 Texjo paq anetziꞌn, bꞌeꞌx i jqet tej moẍ twutz, ex bꞌeꞌxsin ok lipe tiꞌj Jesús, ex jaw tnimsin tbꞌi qMan Dios. Ex jotqexjo xjal, a i lon teꞌ lo; majqex kyeꞌ i jaw nimsinte tbꞌi qMan Dios.

<- Lucas 17 Lucas 19 ->