5 Tuꞌnpetziꞌn, kytzaqpinkjiꞌy tkyaqiljo nya bꞌaꞌn tzaluꞌn twutz txꞌotxꞌ: Ex mina chi kyꞌaꞌjiꞌn, ex mina chi kubꞌ kybꞌinchinjiꞌy kykyaqiljo nya bꞌaꞌn ex jniꞌ achbꞌil, a ikyxjo tzeꞌnku ntqanin ojtxe kyteꞌn; ex mina pon kykꞌuꞌja tiꞌjjo nimku tiꞌ at tzaluꞌn twutz txꞌotxꞌ, quꞌn qa ma txi kyqꞌoꞌn kyibꞌa tojjo luꞌn, ok k-okil te kydiosa ikyx tzeꞌnku tuꞌn kykꞌulin twutzjo twutzbꞌiyil. 6 Tuꞌnpetziꞌn jniꞌ luꞌn, ktzajil tkawbꞌil Dios kujxix kyibꞌaj kykyaqiljo a nchi bꞌinchin ikyjo, ex mi nkubꞌ kynimin Dios.[d] 7 Quꞌn tkyaqiljo nya bꞌaꞌn lo, tzuntaq kubꞌ kybꞌinchiꞌn tojjo ojtxe kychwinqila, tej naꞌmtaq kynimiꞌn. 8 Me atziꞌn jaꞌlin, kytzaqpinkjiꞌy kykyaqiljo lo: Jniꞌ qꞌoj, ex tkyaqil achbꞌil ex jniꞌ nya wen, junx tukꞌa yasbꞌil exqetziꞌn kykyaqiljo yol nya bꞌaꞌn. 9 Mina chi sbꞌuꞌn tukꞌa juntl, quꞌn o chi tzaqpaja toj ojtxe kyteꞌn ex tkyaqiljo nya bꞌaꞌn, a nkubꞌ kybꞌinchintaqa ojtxe.[e] 10 Ex ma chi ok ktxuꞌntla tuꞌnjo kychwinqila saqxix, nyakuj ikyxjo tzeꞌnku jun kyxbꞌalin n-ok kyqꞌoꞌn saqxix wen,[f] quꞌn axte qMan Dios ntxꞌixpinte kychwinqila junjun qꞌij, tuꞌn kyoka tzꞌaqle ikyx tzeꞌnku Dios, a chꞌiysil kyeꞌy,[g] ex tuꞌn tel kynikyꞌa tiꞌj toj tumilxix.

11 Ex atziꞌn jaꞌlin, iꞌchaqx aj Judiyqiꞌy mo ex qa mina; ex qa ma tzꞌok kyechila, mo ex qa mina; ex qa bꞌetin xjalqiꞌy, mo ex qa mina; ex qa aj uꞌjilqiꞌy, mo ex qa mina; ex qa ma chex kꞌayin te aqꞌnil, mo ex qa mina; tkyaqiljo luꞌn ntiꞌ tkyꞌi twutz qMan Dios. Qalaꞌ noq tuꞌn kynimbꞌil jniꞌ xjal lo tiꞌj Crist, at kyoklin junx kykyaqil twutz Dios, quꞌn oꞌkx te Crist at toklin kyibꞌaj kykyaqiljo lo.

12 Nimxix tqꞌaqꞌbꞌil tkꞌuꞌj Dios kyiꞌja, ex ma chi jaw skꞌoꞌn, tuꞌn kyoka te Ttanim. Tuꞌnpetzintzjo, chi bꞌet-xixtzintza tojjo akꞌaj kychwinqila tukꞌa tqꞌaqꞌbꞌil kykꞌuꞌja kyxolxa, ex tukꞌa jun bꞌaꞌn, ex tukꞌa kymutxbꞌil kyibꞌa, ex tukꞌa kyyola bꞌunin wen, ex tuꞌn tqe kykꞌuꞌja tiꞌj tajbꞌil qMan Dios toj tkyaqil. 13 Tzikyꞌxku kyuꞌn kyxolxa, ex kynajsinkuy qa at jun kyqꞌoja kyxola.[h] Il tiꞌj tuꞌn kynajsiꞌn kyil txqantl, ikyx tzeꞌnku kubꞌ najsit kyila tuꞌn qAjaw.[i] 14 Kybꞌinchinkuy tkyaqiljo lo tukꞌa tqꞌaqꞌbꞌil kykꞌuꞌja, quꞌn ntiꞌ juntl tiꞌ tzꞌaqlexixtl tuꞌn kymujbꞌinte kyibꞌa. 15 Kyqꞌonxsin kyibꞌa tuꞌn tkawiꞌn tnukꞌbꞌil Crist toj kyanmin, tuꞌn kyoka te junchꞌin Ttanim, ikyx tzeꞌnku t-xim Dios, tej kyjaw skꞌoꞌn tuꞌn. Tuꞌn ikyjo, kyqꞌonxa chjonte te. 16 Ex kyqꞌonxsin kyibꞌa, tuꞌn tnoj kyanmiꞌn tukꞌa Tyol Crist. Kyxnaqꞌtzimtzin kyibꞌa, ex chi oksin kykꞌuꞌja kyxolxa tukꞌa tkyaqil nabꞌl, a axsa tzajnin tiꞌjjo Tyol. Ex kybꞌitzinxa Tyol Dios ex ilaꞌ bꞌitz te nimsbꞌil tbꞌi tukꞌa nimxix chjonte te qMan toj kyanmiꞌn.[j] 17 Ex kykyaqiljo a nchi kubꞌ kybꞌinchiꞌn ex nkyqꞌmaꞌn, kybꞌinchinqekuy toj tbꞌi qAjaw Jesús, quꞌn o chi oka te t-xel Jesús tzaluꞌn twutz txꞌotxꞌ. Ex kyqꞌonxa chjonte te qMan Dios, noq tiꞌj tbꞌi qAjaw Jesús.

18 Atzin jaꞌlin, ayetziꞌn xuꞌjlbꞌaj, kyniminqekutzinjiꞌy kychmila, ikyx tzeꞌnku taj Dios kyukꞌiy.[k] 19 Ex ayetziꞌn chmilbꞌaj, kykꞌuꞌjlinqektzinjiꞌy kyxuꞌjila, ex mina chi yolin kuj kye.[l] 20 Ex ayetziꞌn kꞌwalbꞌaj, kyniminqekutzinjiꞌy tyol kytatiꞌy toj tkyaqil, quꞌn atzin ntzalaj Diosjo tiꞌj.[m] 21 Ex ikyqex kyejiꞌy manbꞌaj, kybꞌinchinkujiꞌy jikyin wen kyukꞌa kykꞌwala, ex nya tukꞌa tyabꞌ kywiꞌy, tuꞌn mina jaw bꞌaj kykꞌuꞌj.[n]

22-23 Ex ayetziꞌn aqꞌnil, kyniminqekutzinjiꞌy tajaw aqꞌuntl toj tkyaqil, a at toklin kyibꞌaja tzaluꞌn twutz txꞌotxꞌ, ex nya noq oꞌkx tuꞌn kykyija wen kyukꞌa, tzeꞌnku nchi kaꞌyin kyiꞌja; qalaꞌ kybꞌinchinkuy tukꞌa tkyaqil kyanmiꞌn, ex tukꞌa tkyaqil ambꞌil kyiꞌja, nyakaxtlaj te qAjaw Jesús nchi aqꞌniniꞌy, ex nya noq oꞌkx texjal, quꞌn bꞌiꞌn kyuꞌn a qAjaw nkaꞌyin kyiꞌja.[o] 24 Ex bꞌiꞌn kyuꞌn qa a qAjaw ktzajil qꞌonte jun oyaj toj kyaꞌj kyeꞌy, qa ma chi ajbꞌin te Crist, quꞌn axixsin kyejiꞌy kyAjaw. 25 Me ayetzin kyeꞌ, a nkubꞌ kybꞌinchin nya wen, ok ktzajil kytzyuꞌn jun chojbꞌil nya wen tiꞌjjo nya wen a kꞌwel kybꞌinchin. Ktzajil tqꞌoꞌn Dios oyaj ex chojbꞌil il, tzeꞌnxjo xbꞌant quꞌn toj qchwinqil tzaluꞌn twutz txꞌotxꞌ, iꞌchaqx aqꞌniltz twutz txꞌotxꞌ mo qa nmaq xjal; quꞌn junx kyoklin twutz Dios.[p]

<- Aj Colosa 2Aj Colosa 4 ->