Kybꞌinchbꞌin 2

Tej tkuꞌx Xewbꞌaj Xjan toj kyanmin nimil

1 Tej tjapin kanin nintz qꞌij Pentecostés,[a] kykyaqil qe nimil chꞌuqleqetaq junx. 2 Noq kynaꞌbꞌinkuxi tqꞌajqꞌojil jun tiꞌ tzaj toj kyaꞌj nyakuj tzeꞌn nim kyqꞌiqꞌ, ex kubꞌ noj tuja, jaꞌ iteꞌtaq. 3 Ex kyli jun techil tzeꞌnku taqꞌ qꞌaqꞌ njulin tibꞌaj junjunkye. 4 Ex kykyaqil kux nojsin kyanmin tuꞌn Xewbꞌaj Xjan, ex i ok ten yolil, me toj junxil yol, tzeꞌnku tqꞌma Xewbꞌaj Xjan.

5 Kyojjo qꞌij anetziꞌn, otaq chi kanin Judiy toj Jerusalén, tuꞌn tkubꞌ nimitjo a tzꞌibꞌin toj Tuꞌjil Tyol Dios tiꞌjjo qꞌij te Pentecostés; ayetziꞌn Judiy, i tzaj toj tkyaqil twutz txꞌotxꞌ. 6 Bꞌeꞌx ok kychmoꞌnxjal kyibꞌ, teꞌ kybꞌinte chꞌotjin, ex kykyaqilx bꞌeꞌx jaw naj kynabꞌl, quꞌn junjun xjal ok bꞌinte tyol nyolajtz tuꞌn junjun nimil. 7 Ex bꞌeꞌx jaw kꞌant kywutz, ex jaw yolin kyxolx: ¿Me nyan te Galiley qe xjal nchi yolin? 8 ¿Tzeꞌntzin tten ikyjo, a n-el qnikyꞌ tiꞌj tyol junjun toj qyol? 9 Tzaluꞌn at xjal te tnam Partia, te Media, te Elam, te Mesopotamia, te Judey, te Capadocia, te Ponto ex te txꞌotxꞌ Asia, 10 te Frigia, te Panfilia, te Egipto, ex te txqantl txꞌotxꞌ te Libia nqayin tkꞌatz Cirene. Ex iteꞌ junjun ẍi tzaj te Rom: 11 At junjun Judiyqe, a kyitzꞌjlinx, ex junjun i ok te Judiy noq tuꞌn kynimbꞌil. Ex iteꞌ ẍi tzaj te Creta ex te Arabia. Ex qkyaqilx nqbꞌiꞌn kyyol tojxjo qyol atzin nkyqꞌmaꞌn tiꞌjjo tbꞌinchbꞌin Dios.

12 Kykyaqilx jaw kaꞌylaj, ex jaw naj kynabꞌl, ex xi kyqanin kyxolile: ¿Tzeꞌntzin tzꞌelpine luꞌn?

13 Me at junjun noq bꞌaj jaw xmayin, ex kyqꞌma: Tuꞌntziꞌn ma chi txꞌujte, chi chiꞌ.

Tej tyolin Pegr tnejil maj tiꞌjjo Tbꞌanil Tqanil Jesús

14 Jawtzin weꞌks Pegr junx kyukꞌa junlajajtl tsanjil, ex tukꞌaxix tajqꞌojil twiꞌ wen, xi tqꞌmaꞌn: Ayiꞌy nxjalil, aj Judiy, ex kykyaqila najleqiꞌy toj Jerusalén, bꞌiꞌnku kyuꞌn ex kybꞌinkuxixa wen a kxel nqꞌmaꞌn kyeꞌy. 15 Nya nchi txꞌujte kyeꞌ xjal lo, tzeꞌnku ma kyqꞌmaꞌy. Tzmape bꞌeljaj or te qlixje ma tzꞌok jaꞌlin. 16 Mikyxi teꞌ ante nbꞌaj jaꞌlin, aj tyole Joel, a yolil Tyol qMan Dios ojtxe, tej tqꞌmante:

17 Chi Diosjo kyjaluꞌn:

Aj kyxi xkye qꞌij te chꞌixtaq tuꞌn nkaniꞌn,

kxel nqꞌoꞌn Xewbꞌaj Xjan tibꞌaj tkyaqil xjal.

Ok chi yolil kykꞌwala txin ex qꞌa wiꞌja.

Ok k-elil kyeꞌ kuꞌxin qꞌa kynikyꞌ tiꞌjjo kbꞌantil tuꞌn Dios.

Ex ok k-okil kywutzikyꞌjo ichin, a ma chi tijin, tuꞌn Dios, tiꞌjjo kbꞌajil.

18 Ex kxel nqꞌoꞌn Xewbꞌaj Xjan kyojjo qꞌij anetziꞌn toj kyanmin waqꞌnila qya ex ichin,

ex kchi yolil wiꞌja.

19 Ktzajil nyekꞌin nim techil toj kyaꞌj;

ex twutz txꞌotxꞌ k-iwlil chikyꞌ, qꞌaqꞌ, ex sibꞌ, noq tuꞌn qꞌoj.

20 Atzin twutz kyaꞌj, ok k-okil naj tqan qꞌij,

ex k-elil kyaqix twutz yaye, ikyx tzeꞌnku chikyꞌ;

chꞌixtaqtzin tul kanin qꞌij te tulil juntl majl qAjaw.

Nimx tokliꞌn qꞌij anetziꞌn te bꞌisbꞌajil,

ex ok kqoptzꞌajil tipin Dios.

21 Me ayetzin kyeꞌ kꞌwel kynimiꞌn Tyol qAjaw,

ok chi kletil kyeꞌ.[b]

22 Ayiꞌy nxjalil, aj Judiy, chi Pegrjo, kybꞌintzinjiꞌy a kxel nqꞌmaꞌn kyeꞌy, quꞌn bꞌiꞌnxix kyuꞌn qa a Jesús aj Nazaret, jun ichin, a ma tzaj tyekꞌin kyeꞌy, qa bꞌaꞌn ele twutz Dios, tuꞌn nimxix tbꞌinchbꞌin, ex tuꞌn ilaꞌ techil bꞌant tuꞌn. 23-24 Me atzaj teꞌ t-xi qꞌoꞌn kyeꞌy, bꞌeꞌx ok kytzyuꞌn, ex xi kyqꞌoꞌn kye ichin aj il te Rom, tuꞌn tkubꞌ kybꞌyoꞌn twutz cruz.[c] Tkyaqiljo lo bꞌant tzeꞌnkuxjo t-xim Dios otaq bꞌaj, ex ikyxjo, ilxix tiꞌj tuꞌntaq tbꞌant. A ayiꞌy kubꞌ bꞌyoꞌnte Jesús, me jaw anqꞌin juntl majl tuꞌn Dios.[d] Tuꞌn ikyjo, bꞌeꞌx tzaqpaj tjaqꞌ kyimin ex ntiꞌl toklin kyimin tiꞌj.

25 Bꞌiꞌn quꞌn, chi Pegr, quꞌn atzin David, a nmaq kawil te Israel ojtxe, kyij ttzꞌibꞌin tiꞌj Jesús toj Tuꞌjil Tyol Dios, ex tqꞌma kyjaluꞌn:

Kukx n-ok nkaꞌyinjiꞌy Ay qAjaw, ata nwutza.

Tuꞌnpetziꞌn, nlay chin jaw tzꞌaqa,

quꞌn luꞌy at toj nman qꞌobꞌa tuꞌn tkoliꞌn wiꞌja.

26 Tuꞌn ikyjo, tzunx nchin tzalaja,

ex nchin bꞌitziꞌn tukꞌa tzeꞌjbꞌil.

Ex qꞌuqle nkꞌuꞌja tiꞌja tukꞌa tkyaqil nchwinqila,

27 quꞌn nlay chin kyij tqꞌon te jun majx toj tjulil kyimnin;

ex nlay ttziyiy tuꞌn tel puqꞌj nchibꞌjila, ayiꞌn taqꞌnila.

28 O tzaj tyekꞌiꞌn weꞌy tzeꞌn tuꞌn nbꞌetiꞌy toj tumil,

ex chin tenbꞌila toj tzaljbꞌil,

quꞌn tuꞌn ktenbꞌila nwutza, chi David tiꞌj Jesús.[e]

29 Ayiꞌy nxjalil, chi Pegr, kyqꞌontza ambꞌil weꞌy, tuꞌn t-xi nqꞌmaꞌn kyeꞌy; twutzxix qa a qxeꞌchil David kyim, ex kux muqet, ex lu muqbꞌilte; atx qxol jaꞌlin.

30 Me atzin David jun yolil Tyol Dios, chi Pegr. Bꞌiꞌntaq tuꞌn qa otaq tzaj tqꞌmaꞌn Dios, qa jun t-xkachmanbꞌaj tuꞌn tok te nmaq kawil te jun majx.[f] 31 Tuꞌn ikyjo, mix yoline David tiꞌjx, qalaꞌ tiꞌj Crist, a Kolil, a tuꞌntaq tjaw anqꞌin juntl majl. Ex tqꞌma qa atziꞌn Kolil minataq tuꞌn tkyij toj tjulil kyimnin, ex qa minataq tuꞌn tel puqꞌj t-xmilil, 32 quꞌn ate qMan Dios jaw anqꞌsinte juntl majl Jesús, a Kolil; ex awotziꞌn o lonte, ex nqo yolin tiꞌj jaꞌlin qa itzꞌ te jun majx, chi Pegr.

33 Jaw qꞌiꞌnte Jesús, tuꞌn tjapin tukꞌa qMan Dios tuꞌn tkawin junx tukꞌa. Tzaj tkꞌmoꞌn Xewbꞌaj Xjan, a otaq tzaj tqꞌmaꞌn Dios. Axsiꞌn a o tzaj tsipin qeꞌy, ex loqiꞌy nchi kaꞌyin ex nchi bꞌiꞌn tiꞌj. 34 Nya te David jaw twutz kyaꞌj, quꞌn ikytzin tqꞌma kyjaluꞌn:

Xi tqꞌmaꞌn qMan Dios te wAjawa:

Qekuy toj nman qꞌobꞌa kawil wukꞌiy,

35 tzmaxiꞌ aj tkubꞌ kyiꞌjjo tajqꞌoja wuꞌn, chi Dios.[g]

36 Ayiꞌy Judiy, ayiꞌy nxjalil, chi Pegr, bꞌinkuxix kyuꞌn. Ax Jesúsjo, aj kubꞌ kybꞌyoꞌn twutz cruz, jaw anqꞌin juntl majl tuꞌn qMan Dios, tuꞌn tok qꞌoꞌn te qAjaw ex te Crist, a Kolil qiꞌj.

37 Tej kybꞌintej xjal chꞌuqleqetaq antza tiꞌjjo a yolajtz, nimxix i jaw bꞌisin, ex xi kyqanin te Pegr, a tsanjil Jesús, junx kyukꞌa txqantl: Ayiꞌy nxjalil, ¿Tzeꞌn k-okila luꞌn quꞌn?

38 Xi ttzaqꞌwin Pegr: Kux chi meltzꞌaja, ex kytxꞌixpinks kynabꞌla, tuꞌn kybꞌeta toj tumil twutz Dios, ex kux chi kuꞌxa toj aꞌ, te jawsbꞌil aꞌ teyile junjun tiꞌj tbꞌi Jesucrist, tuꞌntzin tkubꞌ najsin kyila tuꞌn qMan, ex tuꞌn ttzaj qꞌoꞌn Xewbꞌaj Xjan kyeꞌy. 39 Tzaj ttziyin Dios Xewbꞌaj Xjan ex jun najsbꞌil kyila te kyeꞌy, ex te kykꞌwala ex te kykyaqiljo iteꞌ najchaq; a yol luꞌn te kykyaqilxjo ayeꞌ taj qMan Dios tuꞌn kytxket, ex tuꞌn kynimin Tyol.

40 Yolintzin Pegr kyukꞌa yol luꞌn ex txqantl, ex xi tqꞌmaꞌn jun tumil kyjaluꞌn: Kypaꞌmil kyibꞌa kyiꞌjjo xjal aj il, tuꞌntzintla kykleta.

41 Ikytzin bꞌajjo, ayetziꞌn kubꞌ kynimin tyol Pegr, bꞌeꞌx i kuꞌx toj aꞌ te jawsbꞌil aꞌ. Tojjo qꞌij anetziꞌn, bꞌalaqa oxe mil xjal ok kychmoꞌn kyibꞌ kyukꞌa txqantl nimil. 42 Kykyaqilxix qꞌiꞌntaq kyibꞌ tuꞌn tkubꞌ bꞌinchitjo kyyol tsanjil. Ex nkymojin kyibꞌ kyxolilex, i naꞌn Dios, ex ok kychmoꞌn kyibꞌ tuꞌn tkubꞌ ikyꞌsitjo Xjan Wabꞌj.

Tzeꞌn tteꞌn kychwinqil tnejil nimil ojtxe

43 Jaw kaꞌylaj kykyaqilx, tuꞌn nim techil ex nim kybꞌinchbꞌin tsanjil otaq bꞌant, tuꞌn tyekꞌit tipin Dios. 44 Ayeꞌ otaq chi nimin chmoꞌnxixtaq kyibꞌ junx, ex kubꞌ kypaꞌn jniꞌ at kye kyxolilex.[h] 45 Xi kykꞌayin kytxꞌotxꞌ ex tkyaqiljo attaq kye, ex kubꞌ kypaꞌn kypwaq kyxolilex, tzeꞌnkuxjo, a attaq tajbꞌin kye. 46 Tkyaqil qꞌij n-ok kychmoꞌntaq kyibꞌ toj tnejil ja te naꞌbꞌl Dios. Ex tojile kyja, jaꞌ nkubꞌe ikyꞌsittaqjo Xjan Wabꞌj, ex tuꞌn kywaꞌn junx tukꞌa tzaljbꞌil ex tmutxbꞌil kyanmin. 47 Nchi nimsintaq tbꞌi qMan Dios, ex noq tuꞌn nbꞌanttaq kyuꞌn, bꞌaꞌn ele twutz tkyaqilx xjal. Tkyaqil qꞌij nchi nimintaq txqantl xjal tuꞌn qMan Dios. Tuꞌntziꞌn ikyjo, nchmetiktaq kybꞌaj.

<- Kybꞌinchbꞌin 1 Kybꞌinchbꞌin 3 ->