1 Tej kykanin toj Iconio, junx i okx Pabl tukꞌa Bernabé toj ja te kynaꞌbꞌl Dios aj Judiy, ex i ok ten yolil toj tumilxix. Tuꞌntziꞌn, nimku xjal i nimin, aye Judiy ex qe nya Judiy. 2 Me ayetzin kye Judiy, ayeꞌ kykyꞌeꞌtaq tuꞌn kynimin, bꞌeꞌx i ok ten kyeꞌ tzpetsilte kynabꞌljo nya Judiyqe, tuꞌntzintla tkubꞌ kyximin nya bꞌaꞌn kyiꞌj nimil. 3 Tuꞌnpetziꞌn, nim qꞌij i kyij Pabl ex Bernabé, aye tsanjil, antza. I yolin jikyin wen tiꞌjjo tkꞌuꞌjbꞌil Dios, quꞌn tuꞌn qꞌuqletaq kykꞌuꞌj tiꞌj tAjaw Tkyaqil. Tuꞌnpetziꞌn, i tzaj mojin tiꞌjjo nkyqꞌmaꞌntaq tuꞌn tAjaw Tkyaqil, ex tzaj qꞌoꞌn kyoklin, tuꞌn tbꞌant techil tipin Dios kyuꞌn.

4 Me ayetzin kyexjal te toj tnam, paꞌntaq iteꞌye. Jteꞌbꞌin teꞌ nchi mojintaq kyukꞌa Judiy, ex txqantl kyukꞌa tsanjil. 5 Tuꞌnpetziꞌn, i kyij toj wen a xjal Judiy exqetziꞌn nya Judiy, junx kyukꞌa kawil toj tnam, tuꞌn kyok yiset Pabl ex Bernabé, ex tuꞌn kyok xoyit tukꞌa abꞌj. 6 Me atzaj teꞌ kybꞌiꞌnte Pabl ex Bernabé, bꞌeꞌx i okx tzma Listra ex Derbe, tnamqe toj txꞌotxꞌ te Licaonia, ex kyojjo najbꞌil iteꞌtaq kyiꞌjile. 7 Antza, i yoline tiꞌjjo Tbꞌanil Tqanil.

8 Toj Listra, attaq jun ichin mibꞌintaq bꞌet. Mix jaꞌ otaq bꞌete, quꞌn tuꞌn koxtaq te titzꞌjlin. Qꞌuqletaqjo ichin, 9 ex nbꞌiꞌntaq tiꞌjjo ntqꞌmaꞌntaq Pabl. Ok kyim Pabl tiꞌj, ex el tnikyꞌtzajil qa nimtaq tnimbꞌil tuꞌn tqꞌanit. 10 Xitzin tqꞌmaꞌn Pabl qꞌajqꞌoj wen kyjaluꞌn: ¡Weꞌksa, ex weꞌkuxixa jikyin wen!

Jaw tꞌikypajjo ichin, ex ok ten bꞌetil.

11 Atzaj teꞌ tok kykaꞌyiꞌn a otaq bꞌant tuꞌn Pabl, bꞌeꞌx i ok ten kye xjal ẍchꞌil tojjo yol kye xjal te Licaonia, ex kyqꞌma: Diosqe kyeꞌ, a iky qeꞌ tzeꞌnku ichin, a loqe ma chi kꞌuꞌl qxol.

12 Ok qꞌoꞌn Bernabé kyuꞌn tzeꞌnku kydios, Zeus tbꞌi, ex ante Pabl, ok qꞌoꞌn tzeꞌnku kydios, Hermes tbꞌi, quꞌn tuꞌn ataqxixsin nyoliꞌn.

13 Atzin ja te naꞌbꞌl Zeus attaq ttxaꞌn tnam, ex atzin tpale i tzaj tiꞌn tman wakx ex jun pkꞌoj t-xmakil kꞌul. Ex atzin pale, junx kyukꞌa kykyaqil xjal, kyajtaq tuꞌn tkubꞌ kybꞌyoꞌn tman wakx, ex kyajtaq tuꞌn kykꞌulin kywutz Pabl ex Bernabé, aye tsanjil. 14 Me tej tel kynikyꞌ Bernabé ex Pabl ikyjo, bꞌeꞌx i kubꞌ kylaqin kyxbꞌalin te yekꞌbꞌilte, qa nya wentaqjo nbꞌant. Ex bꞌeꞌx i okx kyxol xjal, ex i jaw yolin kujxix wen ex kyqꞌma: 15 Ayiꞌy xjal, ¿Tiquꞌnil nkubꞌ kybꞌinchinjiꞌy lo? Ichinqo qeꞌ tzeꞌnku kyeꞌ. Ex ma qo ula qꞌmalte kyeꞌy, tuꞌn tkyij kytzaqpinjiꞌy a nbꞌant kyuꞌn, quꞌn ntiꞌx tajbꞌin twutzjo Dios, a nimxix toklin. Tuꞌntzintzjo, kytxꞌixpinks kynabꞌla tukꞌa Dios itzꞌ, a kubꞌ bꞌinchinte kyaꞌj, txꞌotxꞌ, ex ttxuyil aꞌ, ex tkyaqiljo at kyoj. 16 Exla qa kyoj junxil qꞌij te ojtxe, ma tzaj ttziyin te Dios, tuꞌn t-xi tiꞌn teyile junjun tumil tbꞌe nya wen. 17 Me mina xkyij ttzaqpiꞌn te Dios tuꞌn tyekꞌin te tibꞌ, noq tuꞌn tbꞌanil nbꞌanttaq tuꞌn. Quꞌn atzin nxi qꞌonte jbꞌal kyibꞌaja, exsin tbꞌanil awal, ex a ntzaj qꞌonte tkyaqil tuꞌntzintla kywaꞌn, ex tuꞌn kytzalaja.

18 Me mixla tuꞌn qꞌumle tkyaqiljo lo, oxpe chi miyetkuxjal, tuꞌn kybꞌiyin kyiꞌjjo tman wakx, tuꞌn kyok te oyaj, ajtaq kykꞌulin kywutz tsanjil.

19 Tojxjo ambꞌil anetziꞌn, i kanin jun jteꞌbꞌin Judiy te Antyokiy ex te Iconio. Aye txꞌixpin teꞌ kynabꞌl xjal tiꞌjjo nkubꞌ kybꞌinchin. Ex noq tuꞌn kypaj, i ok xoꞌn Pabl tukꞌa abꞌj, ex kubꞌtzin kybꞌisin qa otaq kyim kyuꞌn. Xi jukikin tzma ttxaꞌn tnam.

20 Me atzaj teꞌ tok kychmoꞌn nimil kyibꞌ tiꞌjile Pabl, bꞌeꞌx jaw weꞌ, ex okx juntl majl toj tnam. Ex toj junxil qꞌij, xiꞌ tukꞌa Bernabé tzma Derbe. 21 Tbꞌajlinxitziꞌn ikyjo, i yolin tiꞌjjo Tbꞌanil Tqanil toj Derbe. Antza, kubꞌe kykꞌuꞌj txqan xjal, ex bꞌeꞌx i nimin.

I meltzꞌajtzin Pabl ex Bernabé toj txꞌotxꞌ Listra, toj Iconio ex toj Antyokiy. 22 Ex kyojjo najbꞌil anetziꞌn, i nimsin kykꞌuꞌj nimil, ex xi kyqꞌmaꞌn kye, tuꞌn kyok lipe jikyin wen tojjo kynimbꞌil. Ex kubꞌ qꞌmaꞌn kyxol, qa il tiꞌj tuꞌn tikyꞌx nya bꞌaꞌn kyuꞌn, qa kyajtaq tuꞌn tkawin qMan Dios toj kyanmin ex toj kychwinqil, ex qa kyajtaq tuꞌn kykanin tukꞌa Dios toj kyaꞌj.

23 Ex jaw skꞌoꞌn tojjo Ttanim Dios, ilaꞌ ichin tuꞌn kyok te tnejil kyxol nimil, ex tej kybꞌaj paꞌn waꞌyaj te naꞌj Dios, bꞌeꞌx xi oqxenin toj tqꞌobꞌ tAjaw Tkyaqil, ayeꞌ otaq chi nimin.

24 Tej kyikyꞌ toj txꞌotxꞌ te Pisidia, i kanin toj txꞌotxꞌ te Panfilia. 25 I yolin antza tiꞌjjo Tbꞌanil Tqanil Jesús toj tnam Perge. Tbꞌajlinxiꞌ ikyjo, i xtaꞌj tzmax Atalia. 26 Antza, i xiꞌ toj bark tuꞌn kykanin tzma Antyokiy, jaꞌ otaq chex oqxenine toj tqꞌobꞌ Dios, a nkꞌuꞌjlintaq kyiꞌj, ex tojjo aqꞌuntl, a otaq japin bꞌaj kyuꞌn.

27 Tej kykanin tzma Antyokiy, ok kychmoꞌn Ttanim Dios, ex xi kyyolin tkyaqiljo otaq bꞌant tuꞌn Dios kyukꞌa, ex quꞌn tuꞌn otaq txi qꞌoꞌn kyoklin, a nya Judiyqetaq, tuꞌn kynimin. 28 Atzin te Pabl ex Bernabé, ilaꞌ qꞌij i kyij ten kyeꞌ kyukꞌaꞌ nimil antza.

<- Kybꞌinchbꞌin 13Kybꞌinchbꞌin 15 ->