1 Twutzxix ntqꞌmaꞌn Xewbꞌaj Xjan, qa aj chꞌixtaq tjapin bꞌaj tqꞌijil tzaluꞌn twutz txꞌotxꞌ, at junjun kyjel ttzaqpiꞌn tnimbꞌil, tuꞌn t-xi lipe kyiꞌj taqꞌnil tajaw il, tukꞌa kyxnaqꞌtzbꞌil, a noq te sbꞌuꞌbꞌl. 2 Kxel kybꞌiꞌn kyyol xmiletzꞌ, a nya twutzx chi yolin, ex mi naꞌn kyuꞌn a wen exjo nya wen, quꞌn ajo kynabꞌl ntiꞌ tajbꞌin, nyakuj ma tzꞌeꞌy tuꞌn jun kyaq kxbꞌil. 3 Ex n-el kyikyꞌin mejebꞌlin, ex n-el kyikyꞌin junjun tiꞌ, a tchꞌiysbꞌin Dios, a wen tuꞌn t-xi qnikyꞌbꞌin te jun tzaljbꞌil te qe, ex tuꞌn t-xi qqꞌoꞌn chjonte te Dios, a awo ma qo nimin tiꞌjjo yol twutzxix. 4 Quꞌn tkyaqiljo tchꞌiysbꞌin Dios wen teꞌ.[a] Ex ntiꞌ tumil tuꞌn tel qikyꞌin; quꞌn qa ma txi qqꞌoꞌn chjonte te Dios tiꞌj, kꞌwel tkyꞌiwlin Dios tkyaqil. 5 Quꞌn kyjel saqixjo jniꞌ luꞌn tuꞌn Tyol qMan, tej tkyij tzꞌibꞌit ojtxe qa wen tkyaqil, ex tuꞌn qnaꞌbꞌl Dios te aqꞌbꞌil chjonte te.

6 Qatzin qa ma txi t-xnaqꞌtzinjiy anetziꞌn kye nimil, tbꞌanil aqꞌnilpetzintza te qAjaw Jesucrist, ex nojnin tuꞌn yol nimin quꞌn, a tbꞌanil xnaqꞌtzbꞌil, ma tzꞌok lipey tiꞌj.

7 Ikyꞌimiljiy tkyaqil kyyolxjal nya tumil, ex jniꞌ kylaꞌjxjal, a nya bꞌaꞌn. Qalaꞌ qꞌonka tilil, tuꞌn tajbꞌin te Dios. 8 Quꞌn qa ma tzꞌok qqꞌoꞌn ipbꞌil tiꞌjjo qxmilil, at chꞌin tajbꞌin. Exsin ikyx teꞌ qa ma tzꞌok qqꞌoꞌn ipbꞌil tuꞌn qajbꞌin te Dios, nimxix tajbꞌin te chwinqil tzaluꞌn twutz txꞌotxꞌ, ex te chwinqil te jun majx toj kyaꞌj.

9 Twutzxixjo yol kxel nqꞌmaꞌn, ex bꞌaꞌn tuꞌn tnimajtz kyuꞌn tkyaqilxjal. 10 Nqo aqꞌnin ex n-ikyꞌx yasbꞌil quꞌn, noq tuꞌn tpajjo yol luꞌn: Qꞌuqlek qkꞌuꞌj tiꞌjjo Dios itzꞌ, a Klol tkyaqil xjal, ayeꞌ kchi nimil tiꞌj.

11 Atziꞌn luꞌn atzin qꞌmanxjiy, ex xnaqꞌtzinxa kye kykyaqil. 12 Ex mi kubꞌ tbꞌinchiꞌn tzeꞌn kye txqantl kuꞌxin, tuꞌntzin mi tzꞌele ikyꞌiniꞌy kyuꞌnxjal. Qalaꞌ tzꞌokxa jun yekꞌbꞌil kywutz tkyaqil: Tuꞌn tbꞌeta toj tumil tukꞌa tyola, tukꞌa tqꞌaqꞌbꞌil tkꞌuꞌja, tukꞌa tnimbꞌila, ex tukꞌa tchwinqila saqxix. 13 A naꞌmxtaq nkaniꞌn, jaꞌkx n-uꞌjin Tyol Dios kywutzxjal, tuꞌn t-xi tqꞌoꞌn tumil kye, ex tuꞌn kyxi t-xnaqꞌtziꞌn. 14 Mi kubꞌ tyajinjiy tokliꞌn ma txi tqꞌoꞌn qMan Dios, tej xkubꞌ kyqꞌoꞌn nejinel toj Ttanim Dios kyqꞌobꞌ tibꞌaja, tuꞌn toka te kyikꞌlel, quꞌn ikykuxtaq taj Diosjo. 15 Qꞌonkxixa tililjo lo, tuꞌntzin tok kykaꞌyinxjal, qa te Dios tkyaqiljo a nkubꞌ tbꞌinchiꞌn. 16 Ex kaꞌyinkxix tibꞌa tuꞌn tbꞌeta, ex tuꞌn t-xnaqꞌtziꞌn tukꞌa tumil. Weꞌkuxixa toj tkyaqil. Quꞌn qa ma bꞌant ikyjo tuꞌn, ok kletila exqetziꞌn nchi bꞌiꞌn tiꞌja.

<- 1 Timotey 31 Timotey 5 ->