1 Ayeqiꞌy werman, nimxix nkꞌuꞌja kyiꞌja, a nyakuj tal nkꞌwalqiꞌy; nxi ntzꞌibꞌiꞌn tkyaqiljo luꞌn kyeꞌy, tuꞌn mi chi bꞌinchiniꞌy il. Me qa at jun nbꞌinchin il kyxola, at najsbꞌil, quꞌn at jun Yolil qiꞌj twutz qMan Dios, a Jesucrist, a tzꞌaqlexix.[a] 2 Xi tqꞌoꞌn Jesús tibꞌ te chojbꞌil qil, tej tkyim twutz cruz, nya noq oꞌkx tuꞌn tnajsitku qil, qalaꞌ tuꞌn tnajsit kyil tkyaqil xjal twutz txꞌotxꞌ.[b]

3 Qa ma kubꞌ qnimin tnukꞌbꞌil qMan Dios, aku txi qqꞌmaꞌn qa o tzꞌel qnikyꞌ te.[c] 4 Me qa at jun xjal ntqꞌmaꞌn qa ojtzqiꞌn Dios tuꞌn, me mi nkubꞌ tnimin tnukꞌbꞌil Dios, nikyꞌil yol teꞌ, ex ntiꞌ yol twutzxix toj tanmin. 5 Me atzin xjal, a nkubꞌ tnimin Tyol Dios, mapen tzꞌok tkꞌuꞌjlintz qMan Dios tukꞌa tumil, ex antza k-elile qnikyꞌ te, qa at qmujbꞌil qibꞌ tukꞌa. 6 Ex qa at jun xjal ntqꞌmaꞌn qa mujle tukꞌa Dios, bꞌaꞌn tuꞌn tbꞌet toj tchwinqil, tzeꞌnku xbꞌete Jesucrist.

7 Ayiꞌy werman, atzin kawbꞌil, a nxi ntzꞌibꞌiꞌn kyeꞌy, nya jun akꞌaj kawbꞌil, qalaꞌ axjo kawbꞌil, a at kyukꞌiy, ex bꞌiꞌn kyuꞌn atxix ojtxe.[d] 8 Me atzin nxi ntzꞌibꞌinjiꞌy kyeꞌy jaꞌlin ma tzꞌok tzeꞌnku jun akꞌaj kawbꞌil, tuꞌn tkubꞌ kynimiꞌn tzeꞌnkuxjo kubꞌ tnimin Jesús. Quꞌn atzin qxopin kyjaꞌ tikyꞌ, ex ma tzaj spikyꞌeꞌxixjo, a spikyꞌin twutzxix, a t-xim qMan Dios.

9 Me qa at jun nimil, a ntqꞌmaꞌn qa at spikyꞌin toj tchwinqil, exsin n-ikyꞌin yol tiꞌj juntl, nya twutzx tyol, quꞌn toj qxopin taꞌye. 10 Me atziꞌn xjal, a nkꞌuꞌjlin kyiꞌj txqantl, apente atjo toj spikyꞌin, ex nlay kubꞌ tzꞌaq toj il noq tuꞌn tpaj jun tiꞌ.[e] 11 Me atziꞌn xjal, a n-ikyꞌin tiꞌj juntl, axsa toj qxopin taꞌye, ex ntiꞌ tumil toj twutz tzeꞌn t-xiꞌ, quꞌn ma tzꞌok jpet tnabꞌl, nyakuj ikyjo tzeꞌnku jun aꞌla nbꞌet toj qxopin.

12 Ayiꞌy werman, nxi ntzꞌibꞌiꞌn kyeꞌy nyakuj tal nkꞌwalqiꞌy, quꞌn tuꞌn o kubꞌ najsin kyila noq tiꞌj tbꞌi qMan Dios. 13 Ex nxi ntzꞌibꞌiꞌn kyeꞌy nyakuj tij xjalqiꞌy, quꞌn tuꞌn o tzꞌel kynikyꞌa tiꞌj qAjaw, a atxtaq te tnejil. Ex nxi ntzꞌibꞌiꞌn kyeꞌy nyakuj kuꞌxinqiꞌy, quꞌn tuꞌn ma kubꞌ tiꞌj tajaw il kyuꞌn. 14 Werman, noq tuꞌn kybꞌintiꞌy wen, kxel nqꞌmaꞌn juntl majla: O txi ntzꞌibꞌiꞌn kyeꞌy nyakutlaj tal nkꞌwalqiꞌy, quꞌn tuꞌn o tzꞌel kynikyꞌa te qMan Dios. Ex o txi ntzꞌibꞌiꞌn kyeꞌy nyakuj tij xjalqiꞌy, quꞌn tuꞌn o tzꞌel kynikyꞌa te qAjaw, a atxtaq te tnejil. Ex o txi ntzꞌibꞌiꞌn kyeꞌy nyakuj kuꞌxinqiꞌy, quꞌn tuꞌn o chi kujixa, ex o ten Tyol Dios toj kyanmiꞌn, ex tuꞌn ma kubꞌ tiꞌj tajaw il kyuꞌn.

15 Werman, kxel nqꞌmaꞌnjiꞌy luꞌn kyeꞌy: Mi tzꞌok kykꞌuꞌjlinjiꞌy tkyaqiljo nya bꞌaꞌn twutz txꞌotxꞌ, ex tkyaqiljo nya bꞌaꞌn ntzaj tqꞌoꞌn.[f] Qa at jun xjal nkꞌuꞌjlin tiꞌj tkyaqiljo luꞌn, nlay bꞌant tkꞌuꞌjlin tiꞌj qMan Dios. 16 Tkyaqiljo nya bꞌaꞌn twutz txꞌotxꞌ ikyqetziꞌn tzeꞌnku tkyaqil achbꞌil, a ntqanin qxmilil; tkabꞌ, tkyaqil tiꞌ, a qajxix tuꞌn tten qe; ex toxin, tkyaqiljo qnimsbꞌil qibꞌ kyiꞌj tkyaqil at qe. 17 Tkyaqiljo luꞌn nya tzajnin tiꞌj qMan Dios, quꞌn tkyaqiljo luꞌn kja kyikyꞌ, ex tkyaqil txꞌotxꞌ kbꞌajil te jun majx. Me atzin xjal, a nbꞌinchin tzeꞌnkuꞌ taj Dios, ok ktenbꞌil te jun majx.

18 Ayiꞌy werman, a nyakuj nkꞌwalqiꞌy; chꞌix tjapin bꞌaj tqꞌijil twutz txꞌotxꞌ. Tuꞌn ikyjo, o tzꞌok kybꞌiꞌn tiꞌj jun jyol qꞌoj tzul kanin, kjawil tnimsin tibꞌ twutz Klolqe Jesús. Me atzin jaꞌlin, ma chi bꞌaj yekꞌin ilaꞌ jyol qꞌoj tiꞌj Klolqe. Ex tuꞌn ikyjo, bꞌiꞌn quꞌn qa chꞌix tjapin bꞌaj tqꞌijil twutz txꞌotxꞌ. 19 ¿Me jaꞌtzin ẍi tzaje jyol qꞌoj lo qa nya axsa ẍi exa qxol? Me nyala te nimilqextaq. Quꞌn noqit qukꞌaqextaq, mitla ẍi extz qxol. Me ma bꞌajjo ikyjo tuꞌntzin tyekꞌit-xix wen, qa aye nyakuj nimil, mi tzꞌok te twutzxix Ttanim Dios.

20 Me metzin kyeꞌ, a ayiꞌy nimil twutzxix, ma tzaj qꞌoꞌn Xewbꞌaj Xjan toj kyanmiꞌn tuꞌn Klolqe Jesús, ex kykyaqil kyeꞌ ma tzꞌel kynikyꞌa tiꞌj tkyaqiljo luꞌn.[g] 21 Me nxi ntzꞌibꞌinjiꞌy luꞌn kyeꞌy, nya noq mi n-el kynikyꞌa te twutzxix, quꞌn n-el kyeꞌ kynikyꞌ te. Ex bꞌiꞌn kyuꞌn qa ntiꞌ jun nya twutzx aku tzul kanin tiꞌjjo a twutzxix. 22 ¿Ankye noq nja bꞌant tuꞌn? Atzin xjal, a ntqꞌmaꞌn qa nya te Jesús, a Crist, a skꞌoꞌnxix tuꞌn qMan Dios. Atziꞌn xjal luꞌn, ajqꞌoj tiꞌj Klolqe Jesús, ex n-el tiꞌjlin Dios tukꞌax Tkꞌwal. 23 Ex alkye n-el tiꞌjlin Tkꞌwal Dios, ntiꞌ qMan Dios tukꞌa. Me ankyeꞌ, a n-el tnikyꞌ te qa ate Jesús Klolqe, at qMan Dios tukꞌa.

24 Tuꞌnpetziꞌn, kykꞌuꞌnkutziꞌn toj kyanmiꞌn a Tbꞌanil Tqanil, a o kybꞌiꞌy atxix ojtxe. Quꞌn tuꞌn ikyjo, kchi tenbꞌilxixa kujxix toj kynimbꞌila tiꞌj qMan Dios ex tiꞌj Tkꞌwal. 25 Quꞌn ex o tzaj tqꞌoꞌn Dios jun qchwinqil te jun majx, tzeꞌnkuxjo tqꞌmaꞌn.

26 Nxi ntzꞌibꞌiꞌn tkyaqiljo lo kyeꞌy kyiꞌjjo a kyaj tuꞌn kysbꞌun kyiꞌja. 27 Me at Xewbꞌaj Xjan toj kyanmiꞌn, a tzajnin tiꞌj Klolqe Jesús. Tuꞌnpetziꞌn, nya il tiꞌj tuꞌn kytzaj xnaqꞌtziꞌn tuꞌn junl aꞌla tiꞌjjo luꞌn, quꞌn axte Xewbꞌaj Xjan ktzajil xnaqꞌtzin kyeꞌy tiꞌj tkyaqil. Quꞌn a xnaqꞌtzbꞌil anetziꞌn twutzxix, ex nya nikyꞌj yol. Ex atzin xnaqꞌtzbꞌil luꞌn, tuꞌn kytenxixa kuj toj kynimbꞌila.

28 Atzin jaꞌlin werman, nyakuj nkꞌwalqiꞌy; chi tenkuxixa kuj toj kynimbꞌila tiꞌj Klolqe Jesús, tuꞌntzin tqe qkꞌuꞌj tiꞌj, aj tul juntl majl, ex tuꞌn mi qo tzaj txꞌixwe twutz. 29 Bꞌiꞌn kyuꞌn, qa a Klolqe Jesús tzꞌaqlexix toj tkyaqil. Tuꞌn ikyjo, il tiꞌj tuꞌn tel kynikyꞌa te, qa kykyaqiljo nchi bꞌet tzꞌaqlexix toj kychwinqil, o chi ok te Tkꞌwal Dios.

<- 1 Juan 11 Juan 3 ->