1 Atzin jaꞌlin werman, waja tuꞌn tkubꞌ kynaꞌnjiꞌy Tbꞌanil Tqanil kolbꞌil, a xi nqꞌmaꞌn kyeꞌy. Axsin yoljo lo a o kubꞌ kynimiꞌn, ex jaꞌ waꞌlqexixa toj kynimbꞌila; 2 ex tuꞌn yol lo ma chi kleta, qa ma kubꞌ kykꞌuꞌnjiꞌy, a xi nqꞌmaꞌn. Qatzin mina, ntiꞌxla tajbꞌin kynimbꞌila ikyjo.

3 Kxel nqꞌmaꞌn qa a Tbꞌanil Tqanil kolbꞌil, a tzaj nkꞌmoꞌn, a xi nqꞌmaꞌnjiꞌy kyeꞌy: Ajo t-xilin yol lo: Bꞌeꞌx kyim Crist te chojbꞌilte qil, tzeꞌnku ntqꞌmaꞌn toj Tyol Dios;[a] 4 ex kux muqet, ex toj toxin qꞌij, bꞌeꞌx jaw anqꞌintl juntl majl, tzeꞌnku ntqꞌmaꞌn toj Tyol Dios.[b] 5 Tbꞌajlinxiꞌ ikyjo, ok tyekꞌin tibꞌ te Pegr,[c] ex kywutzjo kabꞌlajaj, aye skꞌoꞌn tuꞌn Jesús te t-xnaqꞌtzbꞌin.[d] 6 Atximaytaq chꞌintl, ok tyekꞌin tibꞌ kye jweꞌ syent nimil junx, a nimku itzꞌx, ex iteꞌ junjun o chi kyim. 7 Tbꞌajlinxiꞌ ikyjo, ok tyekꞌin tibꞌ te Santyaw, ex atximaytaq chꞌintl kye kykyaqil tsanjil. 8 Tbꞌajlinxi jniꞌ ikyjo, ok tyekꞌin tibꞌ weꞌy, a otaqxi tzꞌaj toj kyaꞌj.[e] 9 Quꞌn ayin weꞌ ntiꞌtaq wajbꞌiꞌn kywutzjo txqantl tsanjil Jesús, ex ntiꞌtaq chꞌin wokliꞌn tuꞌn woka te tsanjil, quꞌn ma chin jyoꞌn qꞌoj tiꞌj Ttanim Dios.[f] 10 Me noq tuꞌn t-xtalbꞌil, ma chin oka te tsanjil Jesús. Ex nya noq kukxjo txokbꞌil lo, quꞌn ma chin aqꞌniꞌn kujxixtl tzeꞌnku txqantl; me ex nya ayiꞌn, qalaꞌ noq tuꞌn t-xtalbꞌil qMan Dios wukꞌiy. 11 Quꞌn nya tuꞌn te, aj qa weꞌy s-ela kybꞌiꞌn, moj qa kye txqantl tsanjil Jesús, quꞌn junxchꞌin te Tbꞌanil Tqanil, a xi qqꞌmaꞌn, ex o chi nimiꞌn tiꞌj.

12 Atzin jaꞌlin, qa jun elnin qyola tiꞌjjo tanqꞌbꞌil Crist juntl majl kyxol kyimnin, ¿Tiquꞌntzin at junjun kyxola nqꞌmaꞌnte qa nlay chi jatz anqꞌintl juntl majl kyimnin? 13 A noqit ikytzjo, mitla xjatz anqꞌintl juntl majl te Cristtz. 14 Ex noqit mi xjatz anqꞌin te Crist, ntiꞌxitla tajbꞌiꞌn qyola, ex ntiꞌxitla tajbꞌin kynimbꞌila. 15 Ex awotzin qeꞌ, matla qo oka nikyꞌil yol tiꞌj Dios, quꞌn ma qqꞌmaꞌy, qa ma jaw anqꞌin juntl majl Crist tuꞌn. Quꞌn noqit ntiꞌ a tuꞌn tjatz anqꞌin kyimnin, ex mitla xjatz anqꞌin te Crist. 16 Quꞌn noqit twutzxtz qa mi nchi jaw anqꞌin kyimnin, exitla ikyxjo te Crist, bꞌeꞌxitla kyim teꞌ te jun majx. 17 Quꞌn noqit mi xjatz anqꞌin Crist, ntiꞌxitla tajbꞌin kynimbꞌila; kukxitla kytenjiꞌy tjaqꞌ tkawbꞌil il, ex ntiꞌxitla kolbꞌil kyeꞌy. 18 A noqpetzin iky tetzjo, ayetzintlaꞌ nimil o chi kyim, najnintla iteꞌ kyetzjo te jun majx. 19 Ay werman, a noqpetzin oꞌkx tajbꞌin qnimbꞌil tiꞌj Crist tzaluꞌn twutz txꞌotxꞌ, noqxitla ma kubꞌ qsbꞌuꞌn te qibꞌtz tzeꞌnku kye txqantl xjal.

20 Me twutzxix tetz, qa ate Crist xjatz anqꞌin kyxol kyimnin, tzeꞌnku tnejil twutz awal, te jun yekꞌbꞌil te qe, qa il tiꞌj tuꞌn qjatz anqꞌinqe. 21 Quꞌn ikyxjo tzeꞌnku s-ul kanin kyimin kye jniꞌ xjal noq tuꞌn jun ichin,[g] ex ikyxjo noq tuꞌn jun ichin, kchi jawitz anqꞌin kyimnin, aye kchi nimil tiꞌj, tuꞌn tten kychwinqil te jun majx. 22 Quꞌn noq tuꞌn tbꞌinchbꞌin Adán, jaꞌ saje kyimin kyibꞌaj kykyaqilxjal. Exsin ikyxjo, noq tuꞌn Crist kykyaqiljo kchi nimil tiꞌj kchi jawil anqꞌintl juntl majl. 23 Me teyilex te junjun toj ttxolil. Quꞌn ate Crist xjatz anqꞌin tnejil. Atzin qetz, awo o qo nimin tiꞌj, tzmaxi aj tul Crist juntl majl toj tqꞌijil, 24 aj tjapin bꞌaj tkyaqil. Tojjo qꞌij anetziꞌn, kykyaqilx otaq kubꞌ tiꞌj, tuꞌn Crist: Jniꞌ nmaq kyoklin, junx tukꞌa tkyaqil kawbꞌil, ex jniꞌ atnaj tipin qibꞌaj. Ex k-okil tchmoꞌn Crist twutz Dios tkyaqiljo jniꞌ tchꞌiysbꞌin, tuꞌn tkawin qMan tibꞌaj te jun majx. 25 Quꞌn ate Crist il tiꞌj tuꞌn tkawin, me tzmaxiꞌ aj ttzaj tqꞌoꞌn qMan tuꞌn tkanbꞌin Crist kyibꞌaj jniꞌ tajqꞌoj.[h] 26 Ex atziꞌn tchꞌibꞌil tajqꞌoj, a kꞌwel yuchꞌit te jun majx, atziꞌn kyimin. 27 Quꞌn ikytziꞌn ntqꞌmaꞌn Tuꞌjil Tyol Dios kyjaluꞌn: Quꞌn ate Dios xi qꞌoꞌnte tuꞌn tkanbꞌin kyibꞌaj tkyaqil.[i]

Me a yol, tkyaqil, mi ntqꞌmaꞌn qa ajin qMan Dios, quꞌn apente Dios xi qꞌonte tuꞌn tkanbꞌin Crist tibꞌaj tkyaqil. 28 Me ajtzin tjapin bꞌajjo luꞌn, k-okil tqꞌoꞌn Crist tkyaqiljo otaq bꞌant tuꞌn, tjaqꞌ tkawbꞌil qMan Dios te jun majx, tuꞌntzin tyekꞌin qa a Dios twutzxix, qa a tAjaw Tkyaqil ex Tibꞌaj Tkyaqil.

29 Tuꞌnpetziꞌn, il tiꞌj tuꞌn kyjaw anqꞌin kye nimil, ayeꞌ otaq chi kyim. Ex qa mina, ¿Tiquꞌntzin nchi kuꞌxa toj aꞌ, te jawsbꞌil aꞌ te jun naꞌbꞌl kyiꞌjjo nimil, ayeꞌ o chi kyim? Quꞌn qa mi ẍi jaw anqꞌin qtzan nimil, bꞌeꞌx i kyimtz te jun majx. Ex qa ikyjo, ¿Tiquꞌntz nchi tzaj kynaꞌn, aj kykuꞌxa toj aꞌ? 30 Quꞌn noqpetzin mi chi jaw anqꞌin kye kyimnin, ¿Tiquꞌn n-elje qiꞌja junjun qꞌijtz tuꞌn tpajjo Tbꞌanil Tqanil kolbꞌil? 31 Twutzxix nyola qa tkyaqil qꞌij n-elje wiꞌja tuꞌn nkubꞌ bꞌyoꞌn noq tuꞌn tpaj nnimbꞌila tiꞌj qAjaw Jesucrist, ex twutzxix aye kyeꞌ ma chi ok te twutz waqꞌnbꞌiꞌn. 32 Qa ma tzꞌok tilil wuꞌn tuꞌn nyoliꞌn Tbꞌanil Tqanil kyukꞌaxjal toj Éfeso, ayeꞌ mi n-okx toj kywiꞌ, tzeꞌnqeku toj kꞌul txuk, mix aꞌl n-oksin kyiꞌj, me ¿Tiꞌtzin nkanebꞌa tiꞌj, qa oꞌkx nchin bꞌisinjiꞌy tiꞌj jun chojbꞌil tzaluꞌn twutz txꞌotxꞌ, ex noqit mi nchi jaw anqꞌin kyimnin? Noqit ikytzjo, bꞌaꞌntla tuꞌn tkubꞌ qqꞌmaꞌn tzeꞌnku ntqꞌmaꞌn jun yol kyxolxjal: Qo waꞌn ex qo txꞌujte, quꞌn yajtzilaꞌ qa xqo kyimku nchiꞌj.[j] 33 Mi chi txalpaja toj kynimbꞌila, ikyjo tzeꞌnku ntqꞌmaꞌn juntl yol kyxolxjal: Mi chex kybꞌinjiꞌy yol nya tumilqe, tuꞌn mi cheꞌxa qꞌiꞌn kyuꞌn. 34 Bꞌaꞌnqexa kykaꞌyink kyibꞌa noq chi bꞌinchiꞌn il. Nxi nqꞌmanjiꞌy luꞌn kyeꞌy, noq tuꞌn kytzaj txꞌixwekuy, quꞌn at junjun kyxola, a naꞌmx tel tnikyꞌ te Dios.

35 Nlayla txi kynimiꞌn tiꞌjjo anqꞌbꞌil kye kyimnin, quꞌn at junjun kyxola aku txi tqꞌmaꞌn: ¿Tzeꞌntzilaꞌ qxmilil aj qjatz anqꞌin kyxol kyimnin? 36 Qa ikyjo, me ntiꞌ tumiljo nabꞌl ikyjo. Quꞌn ¿Ma mitzin ojtzqiꞌn kyuꞌn, tzeꞌn aj tkuꞌx awet jun twutz ijaj, il tiꞌj tuꞌn tjatz twiꞌ, exsin tuꞌn tqꞌayjtz? 37 Quꞌn ajtzin tkux awet jun wiq ijaj, qa triy mo qa alkye jun ijaj, nya otaq tzꞌel twiꞌ aj tkux awet; qalaꞌ a tejo tal twutz kꞌwelix awet. 38 Me ate Dios ntzaj qꞌonte tqan awal, tzeꞌnkuxjo taj, ex teyile junjun wiq ijaj noqx alkye kaꞌyin. 39 Ex nya jun elnin tkyaqil wiq xmilil. Quꞌn awo xjalqo at jun wiq qxmilil, ex aye txuk juntl wiq; exqetziꞌn pichꞌ junxitl, exqetziꞌn kyiẍ toj aꞌ, ex junxitl. 40 Quꞌn atziꞌn qxmilil, tbꞌanilx tuꞌn qtzalaj tzaluꞌn twutz txꞌotxꞌ. Ex ikyxjo, aj qjapin toj kyaꞌj, ex ktzajil qꞌoꞌn juntl wiq qxmilil tbꞌanilx, tuꞌn qtzalaj toj kyaꞌj. 41 Quꞌn ikytziꞌn tzeꞌnku te qꞌij, mikyxi tqoptzꞌajiyiljo tzeꞌnku te xjaw mo tzeꞌnkuꞌ kye cheꞌw. Me ex ikyqex kye cheꞌwjo nya junx kyqoptzꞌajiyil kykyaqilx.

42 Tuꞌnpetziꞌn, bꞌin quꞌn qa tkyaqiljo tbꞌanil tzaluꞌn twutz txꞌotxꞌ ex tkyaqiljo nqoptzꞌaje toj kyaꞌj nchi ajbꞌin te jun yekꞌbꞌil tiꞌjjo kyjawlintz anqꞌin kyimnin. Ikytziꞌn qxmilil kꞌwelix muqet tzeꞌnku jun ijaj, tuꞌn tqꞌayj. Me ex kjawitz anqꞌin, tuꞌn mi kyime te jun majx. 43 Kꞌwelix muqetjo jun qxmilil, a ntiꞌ tipin, tuꞌn tel qꞌayj, me kjawitz anqꞌin juntl qxmilil tbꞌanilx wen, ex nimxix tipin. 44 Ajo qxmilil te twutz txꞌotxꞌ kꞌwelix muqet, me a qxmilil te Xewbꞌaj Xjan, at tchwinqil te jun majx. Quꞌn ikytziꞌn qa at qxmilil te twutz txꞌotxꞌ, ex ikyxjo, il tiꞌj jun qxmilil te Xewbꞌaj Xjan.

45 Quꞌn ikytziꞌn ntqꞌmaꞌn toj Tuꞌjil Tyol Dios: Atzin tnejil ichin Adán, ma tzaj tqꞌoꞌn qchwinqil tzaluꞌn twutz txꞌotxꞌ.[k]

Ex ikyxjo tkabꞌ Adán, a Jesús, ex ma tzul te qꞌol chwinqil te qe te jun majx.[l]

46 Quꞌn ikytzin n-el qnikyꞌ te, qa a qxmilil tzaluꞌn twutz txꞌotxꞌ, nej xten; ex atziꞌn tzul yajxi atziꞌn te qxmililjo te Xewbꞌaj Xjan. 47 Quꞌn atzin tnejil ichin xkubꞌ bꞌinchin tukꞌa txꞌotxꞌ, ex te twutz txꞌotxꞌ teꞌ. Me anteꞌ tkabꞌ te toj kyaꞌj teꞌ. 48 Ma qo ok tzeꞌnku te Adán, a te twutz txꞌotxꞌ, ex qo okil tzeꞌnku te Crist, a te toj kyaꞌj. 49 Quꞌn teyile junjun qe at jun t-xmilil tzeꞌnku te Adán, a te twutz txꞌotxꞌ. Ex qqꞌonktzin tilil, tuꞌn qok tzeꞌnku te Crist, a te toj kyaꞌj.

50 Waja tuꞌn t-xi nqꞌmaꞌn kyeꞌy werman; qa a qxmilil te twutz txꞌotxꞌ ntiꞌ toklin tuꞌn tten toj Tkawbꞌil Dios te jun majx toj kyaꞌj; quꞌn a nlay tpa, ntiꞌ toklin tiꞌjjo a nlay bꞌaj. 51 Waja tuꞌn t-xi nqꞌmaꞌnjiꞌy a ewintaq: Quꞌn nya qkyaqilx qo kyimil. Me qkyaqilx qo txꞌixpitil 52 te jun paqx, tzeꞌnku jun qmutzꞌbꞌin qwutz, aj t-xi qbꞌiꞌn tqꞌajqꞌojil chun, te yekꞌbꞌil, aj tjapin bꞌaj tkyaqil twutz txꞌotxꞌ. Ex ayetzin kyimnin kchi jawitz anqꞌin, tuꞌntzin mi chi kyime juntl majl, ex awotzin qe, awo itzꞌqo, qo txꞌixpitil.[m] 53-54 Quꞌn a qxmilil, a nlay tpa, il tiꞌj tuꞌn ttxꞌixpit, tuꞌn tten te jun majx. Ex atziꞌn tuꞌn tbꞌaj, il tiꞌj tuꞌn ttxꞌixpit, tuꞌntzin mi bꞌaje. Aj tjapin bꞌajjo lo, ok japin bꞌajiljo yol lo: Ma kubꞌ tiꞌjjo kyimin tuꞌn chwinqil te jun majx.[n] 55 Tuꞌnpetziꞌn, qo xmayiltz tiꞌjjo kyimin, tzeꞌnku kyij tzꞌibꞌit toj Tuꞌjil Tyol Dios: