1 യഹോവയെ സ്തുതിക്കുവിൻ;

യഹോവയുടെ ദാസന്മാരെ സ്തുതിക്കുവിൻ;

യഹോവയുടെ നാമത്തെ സ്തുതിക്കുവിൻ.

2 യഹോവയുടെ നാമം വാഴ്ത്തപ്പെടുമാറാകട്ടെ;

ഇന്നുമുതൽ എന്നെന്നേക്കും തന്നെ.

3 സൂര്യന്റെ ഉദയംമുതൽ അസ്തമയംവരെ

യഹോവയുടെ നാമം സ്തുതിക്കപ്പെടുമാറാകട്ടെ.

4 യഹോവ സകലജനതകൾക്കും മീതെയും

അവിടുത്തെ മഹത്വം ആകാശത്തിന് മീതെയും ഉയർന്നിരിക്കുന്നു.

5 ഉന്നതത്തിൽ അധിവസിക്കുന്നവനായ

നമ്മുടെ ദൈവമായ യഹോവയ്ക്കു സദൃശൻ ആരുണ്ട്?

6 ആകാശത്തിലും ഭൂമിയിലും ഉള്ളവ അവിടുന്ന് കുനിഞ്ഞുനോക്കുന്നു.

7 ദൈവം എളിയവനെ പൊടിയിൽനിന്ന് എഴുന്നേല്പിക്കുകയും

ദരിദ്രനെ കുപ്പയിൽനിന്ന് ഉയർത്തുകയും ചെയ്തു;

8 പ്രഭുക്കന്മാരോടുകൂടി,

തന്റെ ജനത്തിന്റെ പ്രഭുക്കന്മാരോടുകൂടിത്തന്നെ അവരെ ഇരുത്തുന്നു.

9 ദൈവം മച്ചിയായവളെ,

മക്കളുടെ അമ്മയായി, സന്തോഷത്തോടെ വീട്ടിൽ വസിക്കുമാറാക്കുന്നു.

<- സങ്കീർത്തനങ്ങൾ 112സങ്കീർത്തനങ്ങൾ 114 ->