Nakilologianega 5

Tus nap̃a apulonaria, amio narin sipsip, nap̃a lalua asike ma e peni

1 Ana yokorena nepisu si yerkawa nene nap̃a totano teke e lelena wa, naga mlarar ke sur tai e limana marua, sur nena naga tus tai, nap̃a asiri ga e lepas luwoka, p̃isi na apulonaria, ana atelan kana lok olua suwoia.

2 Ana nemloge pupia navisi tai pion manene pa metava, piunia pisape “Ane torokin kilaroro lok la nene? Yar tai sike ne kilia vae tus nene woga pona peraga?”

3 Mom̃a ga sanene pano-o, peraga, pe yar re tai nap̃a ma e peni pona yomarava, pona vatanon yomarava, nap̃a kilia vae tus nene poli, pe yar re nena tai nap̃a torokin kira va loyum̃a e poli. 4 Nepisu sanene narui, nemloge piowa, netagi na netagi, nap̃a tap̃atete yar tai kila.

5 Ana nasumonena la tai nene pis pan inu, pisape “E, ve otag re sina! Opisu ke ne, nanene naga laion nap̃a molue kome yeririna la nae Suta, nap̃a apio asape lus kiena ne Tepet, naga taulu make sur la p̃isi rui. Naga ke narui naga kilia kilaro lok la olua nene, naga ke nap̃a yoko vae tus nene narui.”

6 Ana nekira pano, pe laion re poli, ana nepisu narin sipsip tai sum̃al sike likan yar mal la vari a nasumonena lala vamon yo wa nene. Naga pe narin sipsip ga, ana kana lam̃aliu olua amio kilamarana olua asike e p̃arina. Naga sum̃al sike na, naga apisu sa nap̃a akila kup̃ap̃aena e rui, ana mal ruru ga sum̃a ga. 7 Naga mial pimi, kuslua tus nap̃a petan limana yerkawa na p̃amarua, metava e pupia lele wa na totanoena. 8 Mla pae, ana yar mal la vari nene amio nasumonena la lualima yam lua pa vari [24] nene amloru e lana. La peve taaga ap̃ar kiela yukalele lala a kiela piala la nap̃a amiyum̃aen e kol, pulen ga ponotaninu la nap̃a asikapia, ana kala ponos taninu po pap̃isi nap̃a pa ke metava, nane leniena lala kiena nalelagaena wa lala. 9-10 [a]A la amiyaun ke yau viu tai nap̃a sanini,

“Akup̃ap̃ain ko,

ana e kom̃a kuruta

opul plan yeririna lala ape kiena ne Ntewa,

nap̃a amolue e p̃egas nen yeririna make ga,

e visena kar make ga,

e purvanua kerkeviu make ga,

a e narin purvanua make m̃ena ga.

Ko osikol la apim ape p̃egas taaga navatanonen p̃arin sup̃e ve taaga ga,

aim ave yar wa lala na yum̃aena kiena ne Ntewa,

nap̃a yoko ave sup̃en yomarava nini.

Ana komin nap̃a okila sanene,

torokin sane ko ga taaga ola tus nene narui,

owar plan kana lok lala, ovae.”

11 Nesum̃a nepisusu ke sanene, ana nemloge navisi la amiyau, la mok na moki, am̃a la tenario via na sanene. Amiervivi lele na totanoena wa amio yar mal lala a nasumonena la nene, 12 amiyau m̃arera pap̃isi, apisa sanini, asape,

“Narin sipsip, nap̃a akup̃ap̃ainia,

naga taaga po na po.

Nam̃areraena make ga, nawoena make ga,

manmaruaena make ga, puriu kawaena make ga,

navatanonena make ga, naurarena make ga, nayeluarena make ga,

torokin akila ga van naga taaga.”

13 Siraun nanene, nemloge si surmal make ga la m̃ena amiyau, surmal la nap̃a asike ma e peni, amio la nap̃a asike e yomarava, pona e porotano pona e sive, kiela yauena pisa sanini, pisape,

“Nayeluarena, navatanonena, naurarena, a nam̃areraena va va yerkawa nap̃a totano teke e lele wa, amio m̃ena narin sipsip, vano vano ve uro re.”

14 Ana yar mal la vari nap̃ani apisawalia asape “Sanene” komin visena la nene, ana nasumonena lala amloru, akinai, amlotun lalua.

<- Nakilologianega 4 Nakilologianega 6 ->