1 Yoko, nepisu navisi tap̃ena molue ma e peni pitomi tano. Naga pe navisi m̃arera tai kiena ne Ntewa, pitomi p̃arar pupia nam̃areraena, a kana nategoliena kila yomarava pilavila. 2Nakilol 14:8Naga pio e pupia pulgo tai nap̃a pisawal sape
“Pupia pulkumali viowa nap̃a P̃apilon, mloru rui.
Nagane, yo nene pimi pe um̃a tai m̃ana yermare lala a pe yo tai nap̃a ninuna viowa la atapolou ea.
Manu make ga nap̃a akila ke p̃elaga na kororak viowa lala, la m̃ena am̃e m̃ala ponovi sike ea.
3 Naga pa p̃ere ntewa la nap̃a pe ape lelaga re poli, a p̃ere yeririna tap̃ena la apa ape wowe amio, la sa ga yar la nap̃a amun wii p̃arila telivi. Sa ga nap̃a naga pa p̃ere p̃arin sup̃e na purvanua tap̃ena lala, apa akila kolau amio, a yar la nap̃a amiyum̃aen ke kilavaru e yomarava telivi piora, la ataulu kilavaru namname pap̃isi e yum̃aena viowa lala na pulkumali nene, pano pano-o apim ape yar na sur moki manene laa.”
4 Navisi pisayu sanene p̃isi, ana nemloge visen tap̃ena kom ma e peni pitomi, pisa sanini, sape
“Kiau yeririna lala, o! Popon aurmatan yo nini vilaga,
visae peraga, naga warar amiu ava e kiena mlamulena viowa lala,
visae peraga, naga warar amiu m̃ena ava e kiena nakoaena lala.
5 Kiena mlamulena viowa lala ponpolo m̃aga pa tol ma e peni, a Ntewa tap̃atete sinen p̃esan nap̃a naga kilaroro kiena navisaluaena yam via.
6 Popon ga nap̃a alamaran si naloge viowaena vania sa nap̃a naga kila pa yar tap̃ena lala,
popon aul maran vania va yam ve lua e ya nap̃a naga kila rui.
Wii melkalka nap̃a naga kila yar tap̃ena la amunia, popon akokonia ruru m̃ana piala ulemamaga.
7 Nanua, kiena nalogewoena e kiena malena meme ga, naga keviu pap̃isi, ana yoko vilon imi ve naloge viowaena e yepe lalaea lala amio tagiena lala.
Ana nanene na pere ke na wa, komin naga pilaven ke kiena sitomena na wa, sum̃a pisa ke pania, sape ‘Ke, in na nepe p̃arin sup̃e sira sanene, neto ruru na neteke ne. Sur make ga po manene laa pan inu, ana tap̃atete nena neve sa letano tai nap̃a pe kiena sur re poli, tap̃atete nena netagin naloge viowaena pogos tai.’
8 Ana naga, e legiena ta ne pimi ke ne, yoko sur viowa la kila kare ruru naga veraga. Yoko marena, warar tagiena, amio viso, a yoko kapi kekalele kare naga.
Naga pe sitom re sur poli, ana Sup̃e Ntewa nap̃a yoko lip̃ere naga, kiena nam̃areraena naga keviu manene laa.”
9 Ana navisi pisa sanini, sape “P̃arin sup̃e make ga na yomarava nini telivi piora, la nap̃a apa amlotun ke ntewa lala na pupia kumali nene, yoko avisu kilale nap̃a naga mlor rui. La ke narui nap̃a sane apa akila ke kolau amio, apa amloge po amio naga e kiena malena wo pano-o, pe asitom re nena sur tai.
“Ana pogos nap̃a mloru, kana kap la nap̃a kekan ke ne piuyu pa metava, nanene narui yoko sinela viowagan vap̃isi, yoko ataginia. 10 Yoko avisu nakoaena la nap̃a naga sum̃a p̃aria, yoko kila la m̃ena asiar ayuyuwawa. Yoko asu la gar perina akira avisusuia, avisave
‘Ake, pupia P̃apilon, pulkumali nam̃areraena,
sinemimi miye ko pap̃isi.
Lelaga nap̃ane, osu ruru m̃a pano-o,
ana e aora taaga ga nene om̃al kiom̃a luasa,
omloru, op̃isi nenaga.’ ”
11 A p̃arar m̃ena, yar na stoa lala e yomarava wetelu yoko atagi a sinela yea, komin nap̃a pe yar na ulen re si kiela sur la poli. 12 Nanua sumo, akila kiela waa lala pulen ga tegaki nowo lala, sane sur la nap̃a amiyum̃aen e kol p̃arar selpa, amio kilavaru na kupito nap̃a pupia kilavaru, amio sur nap̃a sike e mrakiav, a kulmrae la nap̃a kala marala la powo, a lak la nap̃a ponotaninu, a sur la nap̃a amiyum̃aen e maluen elepen, pona e lak lala, pona e pototo lala, pona e kilavaru lala, ana nagane, kiela yum̃aena na tauluen kilavaru la nene apim amlolor make ga. 13 A e legien nene, yoko yar la ve aul re si sur na kilaen kinanen lala, sa nap̃a m̃aki lala, p̃arar mrasil lala, pona yago lala, puluyavi na kilaen kilaparavi amio kona lala, p̃arar m̃ena sur na munen lala sane kuruta na munena. Yoko yar ve ul re si sur la ne sane ponotaninu a sirveve na mras nen olip, a sur na tauluen kilavaru la ea sa nanua sumo, sane puluk, sipsip, wosi p̃arar kana sur nap̃a p̃erewerea. Lap̃asa nanua sumo apuliwilin yar lala apim amiyum̃ae korena ga pan yerkawa la sane, yoko ve akila re si narui, komin pogos nap̃a pupia pulkumali nene mloru, yoko yum̃aena toko narui, ana yar tap̃atete si taulu kilavaru na visuaren kiena malena.
14 E pogos nene narui, yoko avisayu yo nene, avisave
“Ko sinom̃an osape owar mrasnom̃a la nap̃a ve kerkeviu ve moki, ana naga pe marua re poli wa, kekapil make rui.
Nanua, ko na lumom̃a pule ruru nenaga, kiom̃a sur la punu ga po tanea pap̃isi wa, ana nagane kokovio make nenaga, tap̃atete nena yar tai visu si sur wo tai e ko narui.”
15 A yar na wilwilinen sur la nene, nap̃a la ataulu kilavaru la mok li e rui, yoko asum̃al ga asike perina akira vano, ailania a amaraun nakoaena nap̃a pupia pulkumali nene sum̃a p̃aria. Yoko sinela ye vano-o vap̃isi, 16 yoko atagin vap̃isi, avisave
“Ake, pupia kiamimi pulkumali, mesitom ko pap̃isi wa.
Nanua sumo ko na omyowau ruru po pap̃isi wa,
op̃ar kotal a na kolmekim̃a la nap̃a pe kol piataliga la p̃ar punu yepem̃a lala,
ana nagane na ko na peraga narui, kap mare.
17 Sanapen na kiom̃a pupia sur mok la nene kovio ga e narin aora taaga ga sanene?”
A yar lala na uararen p̃eligas nen waa la nap̃a nanua ap̃arwar ke tegaki lala, p̃arar kiela yar na yum̃aena lala, amio la nap̃a akomkom ke e waa, pona ataulu kilavaru e sive, la m̃ena asum̃al ga asike perina apisu manene ke yo nap̃ani. 18 Pogos nap̃a kana kap ne la piu, pa ke ma e sinapane, yoko avisasa yo nene avisave
“Lelaga o, pulkumali nene na yo ta nene nap̃ane,
e yomerava nini yo tai pe sa re si nene poli.”
19 La asitom sanene, a amloge piowa, akoven kare posnoyavi e p̃arila p̃isa, atagi, asape
“Ake, kiamimi pupia pulkumali, piowa pan ko pap̃isi wa.
Ko na opulen ga kilavaru, ana memiyum̃ae e kiamimi waa lala, mop̃ar kiom̃a tegaki lala, pano pano-o imimi m̃ena ga mom̃al kilavaru nap̃a miila imimi,
ana nagane piowa narui.
E pogos plas ga nene, ana opim ope yo na kovioena ga.”
20 Ana pogos nap̃a pupia yo viowa nene mloru sanene, visena tai molue kom ma e peni, sape
“Ma e peni, pupia kekarena a logewoena.
Amiu nalelagaena wa lala, a nalologena lala a navisawalena kiena ne Ntewa, amiu akilia aieluar naga vap̃isi, komin naga mlip̃ere sira viowa nene rui, kila maran si pania komin napiowaena la nap̃a kila pan amiu nanua.”
21 Ana e pogos nene, navisi tai pimi kawelua pupia kilavaru tai, kusyaun pa metavan p̃arina koven pito kopo sive, talilu pito kovio. Siraunia navisi nap̃ani pisa sanini, sape
“Pupia pulkumali viowa nap̃a P̃apilon nanene narui, yoko akoven lua va ve sanene, akila naga loru vena tap̃atete si kilia sum̃alu pog tai.
22 A ko P̃apilon, visena na van ko sanini, sape
yauena veraga amio yuka lala, yoko tap̃atete yar tai loge si e ko,
yar na kilaen yum̃aena lala, yoko tap̃atete si tai se ko pogos tai,
a yoko ve m̃aagena na vilien re si kinanena lala.
23 Yomerarava na kapi vivaga lala tap̃atete si tegoli kiom̃a yo lala,
a yoko tap̃atete si ologe visena na kekarena kiena m̃ee amio sira m̃ee nap̃a atalopa mare ga na wa.
Yar na kilaen kiom̃a kilavaru lala, e yomarava nini pe tai torokin la re poli,
a nam̃areraena kiena ne kiom̃a kimi lala a kiom̃a navisokanena ga lala kila op̃ere sitomena kiena purvanua tap̃ena lala apa ape wowe.”
24 Nane tepisu nap̃a P̃apilon nene, naga pe yo tai nap̃a pe purp̃es nen napiowaena manenea. Navisawalena ai pona nalelagaena wa pona yar tap̃ena nap̃a am̃em̃ar la komin nap̃a ape kiena ne Ntewa, ana kala kuruta la mlau e porotano na pulkumali nena, naga ke nene narui, nap̃a kila nalip̃ereena a nakoaena kiena ne Ntewa mloru ea m̃arera manene pap̃isi.
