Mateos 2

Hataholi malela mana mete nduuk, ala mai tilo Yesus

1 Lelek bonggi Yesus nai nggolo Betlehem nai propinsi Yudea, mane Herodes toꞌu palenda. Faik ndia, hataholi luma leme dook dulu ele mai, leni kota Yerusalem leu. Sila ndia, hataholi malelak mana mete nduuk. 2 Ledoeik ala losa Yerusalem, ala latane neu-mai, lae, “Hataholi Yahudi la manen fo bei fo bonggin ndia, nai bee, bae? Ai mita nduuk esa nai dulu ele so, natudu tanda nae, Ndia nanabonggik so. Huu ndia de, ai mai fo sangga makaluku-makatele neun.” 3 Ledoeik mane Herodes namanene sila kokolan leondiak, boe ma dalen nameda taa malole. Huu ndia de, basa hataholi malai Yerusalem lameda leondiak boe.

4 Basa boe ma, mane Herodes nakabubua nala malangga anggama Yahudi la malanggan nala, ma basa mese anggama la, de natane sala, nae, “Hena ei mafada au dei! Karistus, fo Manetualain helu mema kana ndia, sangga bonggin nai bee bae?”

5 Boe ma lataa lae, “Papa manek, nai nggolo Betlehem, nai propinsi Yudea. Huu Lamatuak mana kokolan Mika sulak mema kana so, neme makahulun mai, leoiak:

6 ‘Wei, ei hataholi Betlehem asa, manai propinsi Yudea ele.

Ei boso maehetuk, ei nggolom ndia,

kada nggolo kadiꞌi anak, fo sosoa-ndandaan taa.

Tehuu dei fo hataholi ina-huuk esa neme ndia mai.

Dei fo Ana dadik mana hoo neu Au hataholi Israel asa.’ ”[a]

7 Namanene basa leondiak, boe ma mane Herodes noke no neneek, hataholi malelak mana mete nduu kala. Boe ma natane sala faik bee ndia, ala lita nduuk ndia sadu nai lalai. Boe ma ala lafadan. 8 Basa de, ana haitua sala leni Betlehem leu ma nafada sala nae, “Ei miu, fo sangga mafeok Kakanak ndia nai ele. Mete ma ei matonggo mian so, na, fali mai mafada au. Huu au boe oo, sangga uu akaluku-akatele neun.”

9 Lamanene basa manek kokolan, boe ma leu. De, lita seluk nduuk fo makahulun litak kana nai dulu ele. Nduuk ndia sadu neu sila matan, boe ma ana laꞌok, de hahae ndandaak neu Kakanak ndia mamana leleon lain.

10 Lita leondiak, boe ma ala lamahoko lalan seli. 11 Ala dudi leni uma ndia dalek leu, de lita Kakanak ndia ma inan Maria. Boe ma ala sendek lunggulanggan nala, fo lakaluku-lakatele leu Ndia. Basa de ala lofa sila mbomboti hadia bua mabeli la, de ala feen neu Kakanak ndia. Ala fee lilo mbilas, ma kamanyan, ma aidaa boo menik.

12 Taa dook, boe ma ala hambu meꞌis neme Manetualain mai, nae, “Ei boso fali mini mane Herodes miu bali.” Huu ndia de ala fali leni nusa nala leu, tungga dala feꞌek.

Yusuf asa lalai leni Masir leu

13 Ledoeik hataholi malela mete nduuk kala fali, boe ma Lamatuak atan esa neme nusa-sodak mai, nafada Yusuf nai meꞌis dale nae, “Wei, Usu aa! Foꞌa lai-lai leo! Koꞌo mala Kakanak ndia ma mua inan, fo malai mini Masir ele miu. Leo mahele mima ndia, losa Au afada fai hida ei bole fali, huu mane Herodes sanggan, fo sangga tao nisa Kakanak ndia!”

14 Boe ma Yusuf foꞌa, de no sao-anan leꞌodaen ndia boe, lalai leni Masir leu. 15 Ala leo lai ele losa Herodes maten. No leondiak na, Manetualain kokolan dadi, sama leo Ndia mana kokolan Hosea nafada memak neme makahulun mai so, nae,

“Au oke falik Au Anang, fo kalua neme Masir mai.”[b]

Mane Herodes tao nisa kakana ana kala lai Betlehem

16 Ledoeik mane Herodes bubuluk nae, hataholi malela mana mete nduuk kala, laꞌeo kana, boe ma ana luli nalan seli. Ana palenda ndia soldadun nala, nae, “Mini nggolo Betlehem ma nggolo-nggolo mana dekak lai ndia. Tao misa basa kakana touana kadiꞌiana kala, fo teu nala teuk dua dae neu.” Herodes palenda leondiak, huu nasaneda hataholi malela kala sila tutui nala. Ana hinggan mulai neme sososan fo lita nduuk sadu nai lalai.

17 Basa dedeꞌa kala ia dadi, tungga hata fo Manetualain mana kokolan Yeremia sulak mema kana neme makahulun mai so, nae,

18 “Hambu hataholi namatani nasakekedu nai kota Rama.[c]

Rahel nakaleleu,

huu mate basa anan nala.

Taa nau hataholi mai kokoen,

huu ndia anan nala taa kasa so.”[d]

Yusuf asa fali leme Masir mai

19 Doo-doo, boe ma mane Herodes maten. Faik ndia Yusuf asa bei lai Masir. Boe ma Manetualain atan esa neme nusa-sodak mai, ana mai natudu mata-aon neu ndia nai meꞌis dale. 20 Ata ndia nae, “Wei, Usu aa! Foꞌa leo! Mua falik Kakanak ndia no inan, mini Israel miu leo. Huu hataholi mana sangga tao nisa Kakanak ndia, maten so.” 21 Namanene leondiak, boe ma Yusuf foꞌa, de noo fali kasa leni Israel leu.

22 Tehuu ledoeik namanene nae, hatematak ia Herodes anan Arkalaus toꞌu palenda nai propinsi Yudea, boe ma ana bii fali neni ndia neu. De Manetualain palendan tungga meꞌis esa bali, nae, “Yusuf, o boso leo nai Yudea.” Huu ndia, de, neu leo nai propinsi Galelea, 23 nai nggolok esa nade Nasaret. No leondiak, Manetualain kokolan ndia dadi matetuk so, tungga hata fo Ndia mana kokolan sulak mema kana so, nae, “Dei fo ala loken na lae, Hataholi Nasaret.”[e]

<- Mateos 1 Mateos 3 ->