Link to home pageLanguagesLink to all Bible versions on this site
3
Yohanis Manasalanik tao ndia ue-ledin
(Mateos 3:1-12; Markus 1:1-8; Yohanis 1:19-28)

1-2 Faik ndia, Tiberius dadik kesel de ana toꞌu palenda nai Roma, teuk sanahulu lima ia so. Pontius Pilatus dadik gubenol nai propinsi Yudea. Herodes dadik gubenol nai propinsi Galelea. Herodes kaꞌan Filipus, dadik gubenol nai nusa Iturea ma nusa Trakonitis. Ma Lisanias dadik gubenol nai nusa Abilene.*Mana toꞌu palenda Roma pake hataholi Yahudi esa, nade Yosefus, fo ana sulak tutui Israel nai lelek ia. Ana sulak laꞌeneu hataholi mana toꞌu palenda ma sila bobonggi nala. Huu ndia de ita bubuluk, Herodes nai ia, nade feꞌen, na ndia Herodes Antipas. Ndia aman, ndia Herodes Inahuuk (Mateos 2:1-22; Lukas 1:5). Filipus nai ia, na ndia Herodes Antipas kaꞌan. Filipus aman, na ndia Herodes Inahuuk; ndia inan, nade Kleopatra neme Yerusalem mai. Ana sao nala Salome, fo ndia Herodias anan. Nai lalanek 3:19 nai dae ia, na, hambu Filipus feꞌek. Ndia ndia, Herodes Antipas fadin. Ndia aman, Herodes Inahuuk boe; ma ndia inan, nade Mariamne. Ana sao Herodias. Dua sala ana feꞌon, nade Salome. Tehuu ndia kaꞌan Herodes Antipas, ana namoa nala ndia fadin saon. (Mateos 14:3; Markus 6:17; Lukas 3:19).

Faik ndia boe oo, Hanas ma Kayafas dadik malangga anggama Yahudi la malangga inahuun nai kota Yerusalem.
Faik ndia, Yohanis, fo Zakarias anan ndia, leo nai mamana nes, fo doon seli neme nggolok mai. Lamatuak feen heheluk neme ndia. 3 Namanene basa boe ma, Yohanis neni basa nggolo kala, fo mana dekak no lee Yarden, de, nafada hataholi la, nae, “Ei musi manaku ma laꞌo ela basa ei sala mala, fo suek Manetualain koka heni sala kala sila. Basa na, ei musi salani dei, fo dadik neu tanda, nae, ei malole mia Lamatuak so.”

4 Makahulun ele, Lamatuak mana kokolan baꞌi Yesaya sulak laꞌeneu Yohanis ia, nae,

“Hambu hataholi esa nai mamana nes nanggou, nae,
‘Basa hataholi la, mahehele tao neulalau dala kala, fo simbok Lamatuak mamain!
Tao mandoo dala kala fo soluk Ndia.
5 Fua matetu lea kala lalaꞌen.
Kali tao matetu lete kala lalaꞌen.
Tao mandoo dala peko kala,
tao neulalau dala kala fo bei nakatunu kala.
6 Suek hataholi la leme basa hataholi nusa kala,
bisa bubuluk, lae, Lamatuak nau fee sodak neu hataholi la,
leme sila sala-singgo nala mai.’ ”[b]

7 Hataholi noꞌu kala, sudi leme bee mai, fo loke Yohanis salani sala. Tehuu nasapala kasa nae, “Wei! Ei masapepeko kala! Ei sama leo mengge kalasok! Boso mae hetuk ei bisa makamboꞌik mima Lamatuak huhukun mai, de kada taok ei hondak! Ta! Ta dook so bali, huu Lamatuak huku basa hataholi la, fo ta manahondak no tetebes.[c] 8 Ei boso duduꞌa mae, ‘Au ia ta hambu huhukuk, huu au ia baꞌi Abraham numbu-sadun.’ Hambu nai bee leo ndiak? Ndia ta bisa fali nala ei, huu ta bisa tao ei dadik malalaok. Lamatuak nabeꞌi tao batu la ia dadik neu Abraham numbu-sadun. Au afada ei, baa! Matudu tungga ei sodam, mae, ei heok masadea laꞌo ela ei sala mala, ma ei pode masafali tungga Lamatuak so.[d] 9 Ei musi tao dedeꞌa malole. Mete ma ta, na, Lamatuak huhuku mabelan tuda neu ei, fo sama leo hataholi pake taka fo loꞌo heni ai no okan. Leo ndiak leo! Ai sosoan ta, mete ma ndia buna-boan ta malole! De malolenak loꞌo henin, fo mbian neni haꞌi dale neu.’[e]

10 Basa de, hataholi noꞌu kala latane Yohanis, lae, “De, ai musi tao hata?”

11 Boe ma ana nataa, nae, “Mete ma o badum dua, na, fee esa neu hataholi badu tak. Mete ma o kananaꞌak, na, baꞌe fee hataholi nanaꞌa tak.”

12 Basa de, manasusu bea la mai boe, de loke Yohanis fo salani sala. Ala latane, lae, “Ama mesen! Ai musi tao leobee?”[f]

13 Ana nataa nae, “Ei mahiik kada masapepeko. Tehuu hatematak ia, ei musi maue-maledi no ndoos. Boso susu bea lena-lenak neme mana toꞌu palenda heti-heun mai. Ela lau-inggu la bae bea nandaa no heti-heuk.”

14 Hambu soldadu luma lai ndia boe. Ala latane Yohanis, lae, “Mete ma ai, na, talobee? Ai musi tao hata?”

Boe ma ana nataa, nae, “Boso mambue moke hataholi la doi nala, tungga ei hihii mala. Ma boso mambue fee salak neu hataholi, ta no bolo dalan. Ei musi moke makasi, ma simbo ei nggadi mala no teteben ma dale loak.”

15 Lamanene ndia kokolan ndia, boe ma, basa hataholi la mulai lakisuk de lakukutuk, lae, “Awii! Naafo Yohanis ia, ndia Karistus, fo Lamatuak helu mema kana ndia so neme makahulun mai, fo sangga haituan mai ndia!”

16 Tehuu Yohanis nafada sala nae, “Mamanene neulalau! Dei fo hambu Hataholi esa ana seli, lena heni au, sangga mai. Mae kada dadik neu Ndia hataholi nadedenun boe oo, au ta andaa.[g] Au kada bisa salani ei unik oe, tehuu dei fo Ana tao lena heni au bali, huu Ana tao nahenu ei dale mala nenik Lamatuak Dula Dale Malalaon. Dei fo Ana tao nalalao ei, sama leo hataholi pake haꞌi fo hotu heni kadafuk. 17 Ana huku hataholi, fo mana tao sala kala, sama leo hataholi mana tao ue daek pake ani, fo daꞌi kofeꞌek kadafu kala, leme hade mai. Boe ma ana mbeda hade malalaok neni karon dale neu, tehuu ana hotu heni kadafun. Leo ndiak boe, dei fo Karistus huku hataholi mana tao sala kala, fo Ana mbia heni sala, leni haꞌi ta mana matek dalek neu.

18 No leo ndiak, Yohanis tao nasanenedak dedeꞌa mata-matak, ma nafada sala Lamatuak Hala Malolen.

19-20 Faik ndia, Yohanis mulai kokolak manggaledok laꞌeneu Herodes tataon. Dedeꞌak ndia leo iak: Herodes ndia na gubenol, nai propinsi Galelea. Ndia sala nala makadotok nalan seli. Conto leo ana namoa nala fadin sao inan, nade Herodias. Naa te, fadin bei kasodak, ma bei ta naelak no Herodias. Herodes dala sodan ta malole ndia, de ana tao nala Yohanis nafadan ledo-ledo, losa Herodes lesuhaꞌin nakaseꞌe nalan seli neu ndia. Boe ma Herodes humu nalan, de nandeen neni bui dale neu.[h]

Yohanis salani Lamatuak Yesus
(Mateos 3:13-17; Markus 1:9-11)

21 Makahulun, fo faik ala bei ta humu lala Yohanis, na, ana salani hataholi noꞌuk. Ma ndia boe oo, salani Yesus. Basa boe ma Yesus hule-haladoi, de lalai natahuꞌak. 22 Boe ma Lamatuak Dula Dale Malalaon konda neu Ndia. Dula Dale Malalaon ndia namata-ao leo mbui lunda esa. Boe ma hambu halak neme lalai mai, nae,

“O ia, Au Ana susueng.
O tao mala Au amahoko taa-taa.”[i]
Lamatuak Yesus bei-baꞌi nala, tungga ama Yusuf
(Mateos 1:1-17)

23 Faik fo Yesus mulai nafada hataholi la laꞌeneu Lamatuak dala sodan, meda Ndia teun teuk telu hulu. Hataholi la lalelak, lae, Yesus ndia, na Yusuf Anan. Yusuf bei-baꞌi nala, leo iak:

Yusuf aman, Eli.
24 Eli aman, Matat.
Matat aman, Lewi.
Lewi aman, Melki.
Melki aman, Yanai.
Yanai aman, Yusuf.
25 Yusuf aman, Matatias.
Matatias aman, Amos.
Amos aman, Nahum.
Nahum aman, Hesli.
Hesli aman, Nagai.
26 Nagai aman, Maat.
Maat aman, Matatias.
Matatias aman, Semein
Semein aman, Yosek.
Yosek aman, Yoda.
27 Yoda aman, Yohanan.
Yohanan aman, Resa.
Resa aman, Serubabel.
Serubabel aman, Sealtiel.
Sealtiel aman, Neri.
28 Neri aman, Melki.
Melki aman, Adi.
Adi aman, Kosam.
Kosam aman, Elmadam.
Elmadam aman, Er.
29 Er aman, Yosua.
Yosua aman, Elieser.
Elieser aman, Yorim.
Yorim aman, Matat.
Matat aman, Lewi.
30 Lewi aman, Simeon.
Simeon aman, Yahuda.
Yahuda aman, Yusuf.
Yusuf aman, Yonam.
Yonam aman, Elyakim.
31 Elyakim aman, Melea.
Melea aman, Mena.
Mena aman, Matata.
Matata aman, Natan.
Natan aman, Dauk
32 Dauk aman, Isai.
Isai aman, Obet.
Obet aman, Boas.
Boas aman, Salmon.
Salmon aman, Nahason.
33 Nahason aman, Aminadab.
Aminadab aman, Admin.
Admin aman, Arni.
Arni aman, Hesron.
Hesron aman, Peres.
Peres aman, Yahuda.
34 Yahuda aman, Yakob.
Yakob aman, Isak.
Isak aman, Abraham.
Abraham aman, Tera.
Tera aman, Nahor.
35 Nahor aman, Seruk.
Seruk aman, Rehu.
Rehu aman, Pelek.
Pelek aman, Eber.
Eber aman, Sela.
36 Sela aman, Kenan.
Kenan aman, Arpaksad.
Arpaksad aman, Sem.
Sem aman, Noh.
Noh aman, Lamek.
37 Lamek aman, Metusalak.
Metusalak aman, Henok.
Henok aman, Yared.
Yared aman, Mahalalel.
Mahalalel aman, Kenan.
38 Kenan aman, Enos.
Enos aman, Set.
Set aman, Adam
Adam ndia, fo Manetualain nakadadadi kana.

<- Lukas 2Lukas 4 ->