1 Leꞌdoeik fo hataholi la taa tao huusanak so, boe ma kota Efesus ndia namalinok seluk leo basa faik. Boe ma Paulus nakabubua nala hataholi kamahelek manai ndia kala, de ana tao natetea sila dale nala. Basa ndia boe ma nateꞌa, de ana laꞌo neni nusa Makedonia neu. 2 Neu ndia, de ana laꞌok ndule basa nggolo-nggolok, fo ana tao natetea hataholi kamahele kala dalen. Ana tao leondiak losa ana maso neni nusa Yunani neu. 3 Ana leo neu ndia, losa bulak telu. Boe ma ana nahehele, fo ana sangga saꞌe ofak neni nusa Siria neu, naa te namanene hataholi la lae, hataholi Yahudi la lakabubua fo sangga tao lisan. Namanene leondiak, boe ma tana nau saꞌe ofak nakandoo neni Siria neu. De kaꞌda ana laꞌo eik fali neni nusa Makedonia neu.

4 Hambu hataholi bubua kadiꞌik esa, ala tungga Paulus. Hataholi la sila, ndia Ama Pirus anan Sopater maneme kota Berea mai; hataholi dua leme kota Tesalonika mai, naꞌde nala Aristarkus no Sekundus; hataholi esa neme kota Derbe mai, naꞌde Gayus; ma hataholi telu leme nusa Asia mai, fo ndia Timotius, Tikikus no Trofimus.

5-6 Basa boe ma, au (fo ndia Lukas mana sulak susulak ia), atonggo seluk ua Paulus neme kota Filipi, nai nusa Makedonia. Boe ma Paulus ana mana tungga nala ala laꞌo lakahuluk, de lahani ai leme kota Troas, nai tasi selik. Leꞌdoeik hataholi Yahudi la fai-fai inahuu Paska[a] seli so, boe ma ai dua nggai saꞌe ofak, mini kota Troas miu. Lelek ndia ai saꞌe ofak faik lima. Ai losa Troas, de ai konda mima ofak lain mai. Boe ma ai matonggo seluk mia ai nonoo feꞌe nala, de ai leo sosoꞌda-ina esa neme ndia.

7 Faik ndia, laꞌeneu sosoꞌda-ina, de Paulus naketu basan nae, “Tolanoo nggalei, foꞌa te au sangga laꞌo akandoo.” De basa ai hataholi kamahele kala makabubua, fo sangga miꞌa noꞌu neu esa. Huu ana sangga laꞌo, de Paulus nakokola no ai losa fatilaꞌda. 8 Ai makabubua nai uma esa taꞌda katelun lain. Leꞌodaen ndia, ala deꞌde banduk noꞌun seli. 9 Faik ndia, taꞌe-anak esa, naꞌde Yutikus, nanggatuuk neme jenela. Ndia boe oo, ana tungga namanene Paulus kokolan. Tehuu taa dook te matan nambela, de ana sunggu namanee. Nggengge neuk, te ana tuꞌda neme jenela lain mai. Boe ma mate tuti kana. 10 Basa de Paulus ana konda, de ana holu nala taꞌeanak ndia. Boe ma ana kokolak nae, “Boso bii. Te ndia nasoꞌda falik so.” 11-12 Ai basa nggai mamahoko, huu taꞌeanak ndia kasoꞌdak. Basa boe ma, ala loo fali kana neni uman neu. De ai hene seluk mini uma ndia taꞌdan lain miu, fo ai miꞌa sama-sama. Boe ma Paulus ana tuti seluk kokolan, losa foꞌa fafain. Leꞌdo ana saꞌdu, boe ma ai mateꞌa fo ai sangga laꞌo.

13 Basa ndia boe ma, ai malahalak fo ai mababaꞌe kala, losa ai matonggo seluk nai kota esa, naꞌde Asos. Boe ma ai saꞌe ofak mini Asos miu. Tehuu Paulus kaꞌda ana laꞌo eik neni ele neu.

14 Faik fo ai matonggo mia Paulus mima Asos, boe ma Paulus ana saꞌe ofak lain neu, de ai makandoo mini kota Metilene miu. 15 Neme Metilene mai, de ai makandoo. Foꞌa mai boe ma, ai ofan deka-deka no pulu esa, naꞌde Kios. Binesan ndia boe ma, ai makandoo mini pulu Samos miu. Balideman boe ma, ai losa kota Miletus. 16 Naa te Paulus ana dokodoe nalan seli, fo ana losa lai-lai neni Yerusalem neu, suek ana bisa tungga fai inahuu Pentakosta nai ele. Boe ma tana nau nggali heni fai, fo ana laꞌok ndaꞌe neni kota Efesus neu, huu ndia fain taa so.

17 De neme kota Melitus mai, Paulus ana haitua halak fee lasi salani kala nai Efesus, fo ala latonggo loon. 18 Leꞌdoeik fo ala losa, boe ma Paulus nafaꞌda sala nae, “Basa tolanoo nggalei! Ei bubuluk au soꞌdang so, mulai neme fai sososan fo au heta au eing neu nusa Asia, losa hatematak ia. 19 Ei boe oo bubuluk au ue-leꞌding mbilu-mbusek nai ei lalaꞌdan, tehuu au taa sosoꞌu itak au aong. Nai Au ue-leꞌding ia, au luung ana tuꞌda noꞌuk, ma au lemba doidosok taa baꞌianak. Au boe oo, hambu doidosok noꞌuk, neme hataholi Yahudi la duduꞌa manggalau nala mai. 20 Lelek fo au anoli ei, au kalua heni basa dedeꞌa malole la, fo au bubuluk, feen neu ei. Au anoli nai hataholi noꞌuk matan. Ma au boe oo, uni hataholi la esa-esako uman uu, fo au asaneneꞌda kasa Lamatuak hihiin. 21 Au boe oo, afaꞌda hataholi Yahudi la, ma hataholi taa Yahudi la ae, ala musi hahae leme sila sala-singgo nala mai, fo tungga Manetualain. Ma sila boe oo, musi lamahele neu ita Lamatuan Yesus.

22 Naah, au sangga afaꞌda leo iak: hatematak ia, au sangga uni Yerusalem uu, huu Manetualain Dula Dalen ana hela no au uni ele uu. Kaꞌda au tungga, mae au taa bubuluk hata, fo ana daꞌdi neu au nai ele. 23 Tehuu neme kota esa mai neni kota esa neu, Manetualain Dula Dale Malalaon nafaꞌda nakahuluk au so, nae, neu ko au maso bui ma lemba doidosok noꞌun seli nai ele. 24 Au bubuluk neu ko leondiak, huu Lamatuak Yesus ana fua basa ues ndia neu au aluung, fo au uu afaꞌda Hala Malole, ae Lamatuak ana sue ita ma dalen lolen seli neu ita. Mete ma au taa tungga Ndia hihiin, fo tao basa Ndia uen ia, na au ameꞌda au soꞌdang sosoan taa.[b]

25 Hatematak ia, au afada ei neu ko ei taa mita seluk au so. Ei fo au anoli doo-doo basa ia laꞌeneu maso daꞌdi Lamatuak bobonggin. 26-28 Huu ndia de mamanene matalolole. Au tao basa au ueng neu ei so. De hatematak ia, ei mesa nggei musi maue makandoo. Mete ma hambu hataholi neme ei mai, fo tana maso Manetualain bobonggin, na, ei mataa aon ndia bou. Te au salang taa ndia so, huu au afaꞌda memak basa Manetualain hihiin neu ei so. Taa hambu au afuni hata esa boe neu ei. De ei musi manea matalolole ei soꞌda heheli nala, ma makaboi matalolole basa hataholi la, fo Manetualain Dula Malalaon nadenu ei fo manea sala. Boso mafalende heni mafaꞌda mae, Lamatuak Yesus ana mate so, fo Ana tifa ketu hataholi la sila, no Ndia daa hehelin. Lamatuak Yesus ana hele nala ei, fo ei mete sala leo manahoo, ana lopo-linu ndia biꞌi-lombo nala. 29 De hatematak ia, au laꞌo ela ei. Tehuu masaneneꞌdak bou! Neu ko hambu hataholi ana mai, fo nanoli taa malole neu ei lalaꞌdan. Ala maso leo busa manggalauk, ana maso neni biꞌi-lombo lalaen dale neu. 30 Masaneneꞌdak, te hambu hataholi masapepekok leondiak, neme hataholi dea mai ma leme ei lalaꞌdan mai boe. Boe ma lanoli taa malole neu ei. Ala nau fo kaꞌda hataholi la tungga sila. Huu ndia, de ala soꞌba-soꞌba hela hataholi, fo boso ala tungga Yesus bali. 31 Huu ndia, de ei musi manea matalolole ei ao nala. Boso mafalende henin, te au leo sama-sama ua ei losa teuk telu so. Au boe oo, fee ei nanoli-nafaꞌda leleꞌdo-leꞌodaen, ma au taa duduꞌa au sosota-mamanggung. Au luung ana tuꞌda noꞌuk huu ei.

32 Hatematak ia, ita sangga tabaꞌe kala. De au fee ei basa nggei miu Manetualain liman, fo Ana nakaboi ei. De ei musi toꞌu matetea basa hata fo au afaꞌda ei neme sososan mai, laꞌeneu Manetualain dale malolen. Manetualain naena koasa fo natetea ei. Ndia boe oo, Ana helu basa so, fo Ana fee babaꞌe-babatik neu Ndia hataholi nala. De mete ma, ei tungga makandoo Manetualain no dale malalaok, na neu ko ei hambu Ndia babaꞌe-babatin.

33 Lelek fo au aue-aosa neme ei lalaꞌdan, au taa ahiik haꞌi ei hatan esa boe. Au taa oke suꞌdik ei bua lilo mbilas, do lilo fulak, do baloꞌas do suꞌdi hata. 34 Ei boe oo bubuluk, lelek fo au leo ua ei, au aue-aosa mbilu-mbuse mamates, fo ela au bisa asoꞌda. Taa kaꞌda soa au mesang, te au aue-aosa fo nakaboi neu mana tungga au boe. 35 De no basa dedeꞌa kala sila, au atuꞌdu dalak so, fo ei boe oo, ama tungga tulu-fali hataholi mana toꞌa-taa kala, fo taa mana hambu dai kala. Masaneꞌda matalolole Lamatuak Yesus kokolak nae, ‘Malolenak ita fee, lena heni ita simbo.’ ”

36 Paulus ana kokolak leondiak nateꞌe boe ma, ana sendek lunggulanggan, de ana hule-haladoi sama-sama noo sala, suek Manetualain nanea sila basa sala. 37-38 Boe ma basa sala dale heꞌdi, huu Paulus ana kokolak basa so, nae, neu ko sila taa latonggo loon seluk so. De leꞌdoeik ala sangga labaꞌe kala, boe ma ala holu lala Paulus de ala iꞌdun, ma lamatani besekeꞌdu. Basa ndia boe ma, ala loo ai[c] mini ofak lain miu.

<- Hataholi Nadedenu nala Tutuin 19Hataholi Nadedenu nala Tutuin 21 ->