Hataholi Nadedenu nala Tutuin 13

Hataholi Antiokia ala ladenu Barnabas no Saulus

1 Nai kota Antiokia, hataholi noꞌu kala lamahele Lamatuak Yesus so. Hambu hataholi luma Manetualain ana pake sala daꞌdik neu Ndia mana kokolan ma luma bali na Ana pake sala daꞌdik neu mesen fo lanoli hataholi la. Basa sala ndia:

Barnabas,

Simeon fo hataholi la lateme loke ndia na lae, ‘Tou nggeok’.[a]

Lukius, neme kota Kirene mai,

Manahem, fo lakaboin neme kadiꞌi anan mai sama-sama no Mane Herodes†

ma Saulus.

2 Faik esa, ala puasa, ma lakabubua fo ala lakaluku-lakatele neu Manetualain. Boe ma Manetualain Dula Dale Malalaon nafaꞌda sala nae, “Hele mala Barnabas no Saulus te Au ueng noꞌun seli. De ala musi laue-laosa, tungga hata fo Au sangga heti fee sala.’

3 Leꞌdoeik ala puasa ma ala hule-haladoi basa, boe ma ala lalaa lima nala neu Barnabas ma Saulus asa, de ala soꞌu sala. Boe ma ala ladenu dua sala leu lakalalaꞌok Manetualain ue-leꞌdin.

Barnabas no Saulus leni pulu Siprus leu

4-5 Faik fo Manetualain Dula Dale Malalaon ana palenda Barnabas no Saulus fo dua sala laꞌok lafeok, de makasososan leni kota esa nai tasi-bifik naꞌde Seleukia leu. Yohanis (fo hataholi la loken na lae Markus) ana tungga noꞌu no sala boe. Losa ndia, ala saꞌe ofak leni pulu Siprus leu, boe ma ala konda leu kota esa naꞌde Salamis. Nai ndia, lasiꞌa ala maso leni hataholi Yahudi la uma huhule-haladoin, fo leu lanoli Manetualain Dedeꞌa-kokolan neu hataholi la.

6-8 Boe ma ala laꞌok tuli laꞌo-laꞌo leme nggolok esa, leni nggolok esa leu, losa ala leni kota esa, naꞌde Pafos, fo nai pulu ndia mbeꞌdan seli. Gubernor ana leo nai kota ndia talaꞌdan. Naꞌden Sergius Paulus. Hataholi ndia langga uten neuk. Leꞌdoeik namanene lae Barnabas asa mai nai ndia kotan, boe ma nadenu hataholi la leu loke sala te dalen ana dokodoe namanene Manetualain nanoli-nafaꞌdan.

Tehuu hataholi Yahudi esa nai ndia, naꞌde Bar Yesus (naꞌde feꞌen tungga dedeꞌa Yunani na nae, ‘Elimas’). Hataholi ndia kamoꞌdo mamates. Ana bisa pepeko hataholi la nae, ndia boe oo Manetualain mana kokolan. Ndia natialai malole no gubernor. De leꞌdoeik Barnabas ala mai nai sila kotan, boe ma ana mbau-eꞌdo gubenor fo suek boso ana simbo kasa. Ana kokoe nala gubenor fo suek boso namahele Yesus.

9 Tehuu Manetualain Dula Dale Malalaon ana fee koasa neu Saulus (fo loke na lae Paulus), de nakabubulak nahelen matan neu kamoꞌdo mamates ndia. Boe ma ana mbokan nae, 10 “Heeh! Elimas! O ia nitu anan! Mana masapepekok! Losa faik bee fo o bei masapepeko hataholi? O laꞌban basa dedeꞌa malole la! O ia tungga nitu la malangga inahuun! O boso tao leondiak bali! Boso soꞌba-soꞌba makalelee Manetualain dala ndoon bali! 11 Wei! O mamanene e! Neu ko Manetualain ana huku o. Neu ko mboke o matam, de o taa mita hata esa boe, losa faik hiꞌda.”

Paulus nakokola nateꞌe, boe ma mboke tutik hataholi ndia matan. De nafadadaꞌba sangga hataholi fo toꞌu liman fo nalalaꞌon.

12 Leꞌdoeik gubenor nita no mata hehelin ma namanene Barnabas asa lanoli laꞌeneu Yesus, boe ma ana namanggonggoak, de namahele neu Yesus.

Ala leni Tutui Malole neni kota Antiokia feꞌek, nai nusa Pisidia

13 Neme kota Pafos nai pulu Siprus mai, Paulus asa saꞌe ofak lai kota manai nusa Pamfilia, naꞌde Perga leu. Nai ndia, ala konda leme ofak lain mai, boe ma Yohanis Markus ana laꞌo ela sala de ana fali neni Yerusalem neu. 14 Leme Perga mai, ala laꞌok tungga maꞌda lai, boe ma leni Antiokia manai nusa Pisidia leu.

Losa ndia te nandaa no hataholi Yahudi la fai hahae ue-leꞌdin, de leu hule-haladoi nai hataholi Yahudi la uma huhule-haladoin. 15 Faik ndia ala lees neme Baꞌi Musa susulan, ma Manetualain mana kokola feꞌe nala susulan. Boe ma malangga-malangga uma huhule-haladoik ndia loke Paulus asa lae, “Ama nggalei. Mete ma hambu heheluk fee ai, na ai moke no haꞌdak fo makokola matetea ai basa nggai manai ia kala dale nala.”

Paulus ana kokolak fee hataholi Yahudi la lai Antiokia

16 Boe ma Paulus nambadeik neu mata. De ana soꞌuk liman, fo ana hule sala nee-nee. Boe ma ana mulai nakokola nae, “Tolanoo-tolanoo leo Israꞌel la ei! Ma ina-ama selu kala mana maso anggama Yahudi, huu ei dale nala boe ala dokodoe neu leo Israꞌel la Manetualain. Au oke ei pasak ei ndiꞌidoo nala, fo mamanene au!

17 Manetualain ana hele nala ita leo Israꞌel bei-baꞌi nala so, neme lele uluk mai. Lelek fo leu leo leme Masir, fo sila nusa hehelin taa ndia, Lamatuak ana fee sala leo lo soꞌda-molek, losa tititi-nonosi nala boe lamanoꞌu. Boe ma Lamatuak ana pake koasa inahuun, de no fali kasa kalua leme Masir mai.[c] 18 Basa de lasoꞌda lali-lali leu mamana louk losa teuk haa hulu. Leomae sila langga batu lakandoo tehuu Lamatuak ana noo sala no nggaleloak.[d] 19 Boe ma Lamatuak ana namoa nala dae Kanaꞌan neme leo hitu mai. De ana babaꞌe dae nala neu ita bei-baꞌi nala fo daꞌdik neu sila dae pusaka nala.[e] 20 Lasoꞌda leondiak losa teuk natun haa lima hulu.

Basa ndia boe ma, Manetualain ana soꞌu fee sala mana kee dedeꞌak, fo nakalalaꞌo kasa losa Lamatuak ana soꞌu nala Ndia mana kokolan esa naꞌde Semuel.[f] 21 Faik fo Semuel ana daꞌdi neu Manetualain mana kokolan, ita bei-baꞌi nala ala nau-nau fo ala hambu manek esa. Boe ma Lamatuak ana soꞌu nala Kis anan naꞌde Saul, neme leo Benyamin mai. Saul ana toꞌu palenda teuk haa hulu.[g] 22 Boe ma Lamatuak haꞌi henin, de ana soꞌu nala Isai anan naꞌde Dauk, fo nggati Saul, ana daꞌdik neu mane beuk. Lamatuak ana bubuluk teteꞌbes Dauk dalen de nae, ‘Isai anan Dauk ia, nandaa no Au daleng. Neu ko ana tao tungga basa Au hihii-nanaung.’[h] 23 Lelek ndia Lamatuak ana helu, sangga Ana haitua tititi-nonosin esa fo suek nasalaꞌe nala hataholi Israꞌel asa neme sila sala-singgo nala mai. Au nau afaꞌda basa tolanoo nggalei, ae Dauk tititi-nonosin fo Lamatuak ana heluk ndia, ndia Yesus.”

Paulus nae Yesus ndia, Hataholi fo Lamatuak ana helu, ana sangga haituan mai

24 Paulus tuti seluk ndia hala-kokolan nae, “Lelek fo Lamatuak Yesus bei tana soꞌuk Ndia tatao-nonoꞌin, hambu hataholi esa naꞌde Yohanis, neu nafaꞌda hataholi Israꞌel la nae, ala musi hahae neme sila sala-singgo nala mai, boe ma musi ala salani daꞌdik tanda lae sila mole-dame lo Manetualain so.[i] 25 Ma leꞌdoeik fo Yohanis tatao-nonoꞌin sangga basan, boe ma ana nafaꞌda hataholi la nae, ‘Boso ei duduꞌa mae au ia, Hataholi fo Lamatuak ana helu basan so neme makahulun fo ana sangga haituan mai. Masaneꞌda matalolole! Ei musi mahani hataholi esa fo neu ko sangga ana mai. Ndia ana seli lena heni au, de mae daꞌdik neu ndia atan boe oo, au taa andaa.’[j] [k]

26 Tolanoo-tolanoo nggalei! Ei ia memak Abraham tititi-nonosin, ma ei luma fo dale mala dokodoe neu Lamatuak. Mamanene au dei! Manetualain nafaꞌda ita Ndia dala soꞌdan fo ana nasalaꞌe nala ita neme ita sala-singgo nala mai. 27 Neme makahulun mai, Lamatuak ana pake Ndia mana kokola nala fo ala sulak lafaꞌda hataholi la, laꞌeneu Hataholi fo Manetualain ana helu sangga haituan mai. Boe ma ita malangga-malangga anggama nala, lo hataholi selu kala lai Yerusalem ala lees lasaluluan so, hata fo mana kokola nala sila ala sula kana so. Tungga-tungga fai hahae ue-leꞌdis, na ala leni uma huhule-haladoik dale leu fo ala lees leondiak nai Manetualain Susula Malalaon. Tehuu ala taa lalelak laꞌeneu Hataholi fo Lamatuak ana helu sangga Ana haituan ndia, na ndia Yesus. Boe ma ala sangga dalak fo ala huku lisan, nandaa no hata fo Lamatuak mana kokola nala ala sula kana so. 28 Ala tao-tao dedeꞌak lo Yesus, fo sangga ala tao latuꞌdan, te tala hambu salan fa boe. Mae leondiak o, leu loke gubenor Pilatus fo tao nisan.[l] 29 Gubenor ndia nakaheik, de ala mbaku londa Yesus neme ai ngganggek losa maten. Basa hata fo ana daꞌdik Yesus, nandaa no hata fo Lamatuak mana kokola nala ala sula kana so. Basa ndia, de lakonda mbombolan neme ai ngganggek mai, de ala koꞌo leu mbeꞌdan nai lates dale.[m] 30 Tehuu Manetualain ana pake koasan, de ana tao nasoꞌda falik Yesus neme Ndia mamaten mai.

31 Leꞌdoeik fo Yesus nasoꞌda nasafali, boe ma natuꞌdu Aon laꞌi noꞌuk neu hataholi la, fo ala sama-sama loon leme nusa Galilea mai, leni Yerusalem leu. De hatematak ia, sila ndia, ala daꞌdik sakasii neu hataholi Israꞌel asa.[n]

Paulus natuꞌdu nae, Lamatuak ana pake Ndia hataholi nadedenu nala fo ala lafaꞌda memak laꞌeneu Yesus

32-33 Paulus ana tuti seluk ndia kokolan, nae, “Naa, leo iak! Ai dua nggai ia, fo au ua Barnabas, ai mima dook mai mafaꞌda ei, fo ela ei bubuluk mae hata fo Manetualain ana helu neu ita bei-baꞌi nala, hatematak ia basa sala daꞌdi so, fo ndia, Manetualain ana tao nasoꞌda fali Yesus neme mamaten mai so. Nai Sosoꞌda Koa-Kio babaꞌe kaduan, Lamatuak ana pake hataholi fo sulak laꞌeneu Yesus so, Hataholi ndia fo Ana helu sangga haituan mai, nae:

‘O ia, Au anang.

Leleꞌdon ia Au soꞌu ala O fo toꞌu palenda.’[o]

34 Neme makahulun mai Manetualain ana helu basa so, nae neu ko Ndia sangga tao nasoꞌda falik Hataholi ndia fo Ana helu sangga haituan mai, ma Hataholi ndia tana mate so. Huu ndia, de Lamatuak ana pake Ndia mana kokolan fo ana sula kana so nae,

‘Neme makahulun mai Au tao hehelu-balataang ua Mane Dauk fo sangga feen babaꞌe-babatik.

De hatematak ia bali na Au boe oo, tao hehelu-balataang ua o, huu o ia Dauk tititi-nonosin.’[p]

35 Hambu Sosoꞌda Koa-Kiok feꞌek nae,

‘Lamatuak tana fee O Hataholi Malalaon mbombolan ana noe sasalak nai laten dale.’[q]

36-37 Teteꞌben na leo iak: sosoꞌda Koa-kiok ia tana tuꞌduk Dauk ndia! Ita bubuluk leondiak, huu Mane Dauk ana tao dedeꞌa neulauk noꞌuk fee ndia nusan, bei fo ana mate. Ana mate de latoin, boe ma mbombolan noe henin so. De ita bubuluk tae Sosoꞌda Koa-kio kala ndia tana tuꞌduk neu Dauk, te ana tuꞌduk neu hataholi seluk. Hataholi fo ana tuꞌduk ndia, na mete ma hataholi ndia maten so, na Manetualain ana tao nasoꞌda fali kana. Huu ndia, de mbombolan tana noe fa boe.

38-39 De tolanoo nggalei, mamanene matalolole! Hataholi ndia, ndia Yesus! De mete ma ita tamahele neu Ndia, na bei fo Ndia nau lemba ita sala-singgo nala, te mete ma tungga teteꞌben, na ita mesa nggata musi lemban. No leondiak, Manetualain ana koka heni ita sala nala. Tehuu ita bubuluk so tae, mae ita tungga basa Baꞌi Musa heti-heu haꞌdan, tehuu ndia tana mesa kana tao ita neulau nai Lamatuak matan. 40-41 Huu ndia, de ei musi duduꞌa neu lalaun dei. Boso losak hata fo Lamatuak mana kokolan lele ulu kala lafaꞌda so, ana tuꞌda neu ei. Ala sulak so lae,

‘Mata neuk, neu ei mana haumemee kala, fo mateme makadadaek hataholi!

Huu Au, de Manetualain, ana tao dedeꞌa kala fo hataholi la heran lalan seli;

tehuu neu ko ei simbo ei babaꞌen, fo ei mate nduaꞌdak miu.

Au tao dedeꞌak sila, lelek fo ei bei masoꞌda

tehuu ei taa nau simbo kana.

Mae hataholi la ala tao manggaleleꞌdon so boe oo, ei taa nau malela kana.[r]

Malolenak ei duduꞌa neulalau dedeꞌa kala sila, fo ei heran boe.’

De, tolanoo nggalei. Duduꞌa neulalau hata fo isinaak au afaꞌdak ndia. Boso mbia heni hata fo isinaak ei mamanenen so, sama leo mana haumemee kala tataon. Baꞌu kaꞌda leondiak au kokolang. Makasi noꞌuk!”

42 Nakokola basa, boe ma Paulus no Barnabas lambadeik, de ala sangga laꞌo ela uma huhule-haladoik ndia. Boe ma hataholi manai ndia kala, loke fo dua sala fali main nai sosoꞌda ina mana maik ia, fo tao manggaleleꞌdo lutu-lutuk seluk, hata fo isinaak ala kokolak ndia. 43 Ala kalua tutik leme uma huhule-haladoik ndia mai, te hambu hataholi noꞌuk lai ndia, fo ala mai tungga Paulus no Barnabas. Boe ma dua sala fee sala nanoli-nafaꞌdak, lae, “Ita bubuluk Lamatuak dalen malole hiak neu ita. Huu ndia de ei musi toꞌu mahele Ndia.”

Malangga-malangga Yahudi la timba heni Paulus asa

44 Sosoꞌda ina mana maik nandaa no hataholi Yahudi la fai hahae tao ue-leꞌdi nala, de elabaꞌik basa hataholi manai kota ndia ala mai fo sangga lamanene Lamatuak Dedeꞌa-kokolan. 45 Tehuu leꞌdoeik fo hataholi Yahudi malangga nala lita hataholi noꞌu kala lahiik mai lamanene Paulus asa, boe ma ala dale heꞌdi sala. De leꞌdoeik Paulus bei kola-kola, boe ma ala laꞌban Paulus no huu-okan, ma ala kokolak latuꞌda sala.

46 Tehuu Paulus tala heo kasa, de ala kokolak taa babaꞌbi-babaa so. Lae, “Memak Manetualain ana soi dalak nakahuluk fee ita hataholi Yahudi la so, ma Ana fee Dedeꞌa-Kokola Malolen neu ita, de memak ndaan ndia! Tehuu ei taa nau simbo kana. No leondiak na ei taa mandaa hambu soꞌdak makandoo mia Manetualain. De hatematak ia, ai sangga mini Dedeꞌa-Kokola Malole ndia fee nusa-nusa feꞌe kala, huu ei timba henin. 47 Te Manetualain ana haitua ai so, ndandaak no Yesaya ana sula kana so, nae,

‘Au soꞌu ala ei so, leo banduk fo mini manggaleꞌdok neu nusa-nusa feꞌe kala, fo taa Yahudi la,

fo suek ei loti tao manggaleleꞌdo dalak mana neni Au mai,

fo ela Au mboꞌi heni sala leme sila sala-singgo nala mai.

Ma ei boe oo, musi matuꞌdu dalak ndia nai daebafok neme mbeꞌdan esa losa mbeꞌdan seli.’ ”[s]

48 Leꞌdoeik hataholi leme nusa-nusa feꞌe kala fo taa Yahudi la lamanene leondiak, boe ma lamahoko lalan seli. Boe ma ala koa-kio Manetualain, lae, “Koa-kiok neu Lamatuak, fo mana maena Dedeꞌa-Kokola Malole ndia, lolen seli!” Ma nai ndia, hambu hataholi la fo Manetualain naketu basan neme makahulun mai, fo ala bisa lasoꞌda lakandoo lo Ndia. Boe ma basa sala lamahele lae Lamatuak Yesus ana buka dalak fee sala so.

49 Manetualain Dedeꞌa-kokolan ana natanggela neme bafak neni bafak neu nai basa nusak ndia.

50 Nai kota ndia, hambu hataholi inahuu kala, touk ma inak. Hambu luma ala dokodoe Lamatuak. Tehuu hataholi Yahudi malangga nala, ala mai dunggu-mbau hataholi inahuu nala sila, losak ala husi kalua heni Paulus no Barnabas, leme nusak ndia mai. 51 Ala kalua leme kota ndia mai, boe ma dua sala tao dedeꞌa haꞌdak esa, fo ala sasambu heni afu neme sila ei nala mai. Ana daꞌdik neu tanda nae, hataholi-hataholi manai kota ndia tala nau lamanene dua sala. Boe ma dua sala heok lasadea laꞌo ela kota ndia de leni kota esa seluk leu naꞌde Ikonium.[t]

52 Tehuu, hataholi kamahelek kala neu Lamatuak Yesus so, nai kota Antiokia, dale nala lamahoko, ma Manetualain Dula Dale Malalaon natetea sila dalen nala.

<- Hataholi Nadedenu nala Tutuin 12 Hataholi Nadedenu nala Tutuin 14 ->