1 ᤜᤧᤰᤁᤩᤠᤱ ᤅᤠᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤋᤠᤱᤛᤠᤰᤐᤥᤗᤠᤶ ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥ ᤔᤰᤁᤧᤎᤠ᤺ᤒᤠ ᤂᤣ᤺ᤶᤛᤡᤰᤐᤠᤎᤡᤰ ᤏᤡ᤺ᤛᤢᤱᤗᤥ॥ ᤂᤧᤴ ᤂᤣ᤺ᤶᤛᤡᤰᤐᤧᤴ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤥᤒᤠ ᤋᤡᤔᤡᤰᤁᤡᤴ ᤔᤧᤒᤡᤖᤢ॥ 2 ᤂᤧᤴ ᤂᤣ᤺ᤶᤛᤡᤰᤐᤠᤸᤗᤧ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤡᤴ ᤜᤴᤍᤢᤸᤗᤧ ᤂᤧᤵᤔᤥᤗᤠᤶ ᤀᤠᤳᤋᤠᤳᤋᤠᤴᤏᤣ ᤕᤶᤒᤠ ᤔᤡᤜᤠ᤺ᤳᤗᤢᤱᤅᤥᤗᤠᤶ ᤁᤧᤗ᤺ᤶᤒᤠ ᤁᤢᤀᤡᤛᤡ᤺ᤰ ᤔᤡ᤺ᤰᤂᤢ᤺ᤴ ᤌᤠᤅᤧ. ᤜᤧᤰᤁᤩᤠᤱ ᤋᤠᤱᤛᤠᤰᤐᤧᤴ ᤛᤡᤍᤧᤵ ᤋᤧᤵᤋᤢᤀᤠᤱ ᤏᤠᤶᤔᤡᤴ ᤀᤡ᤺ᤵᤋᤢᤍᤣ᤺ᤛᤢᤖᤥ॥ 3 ᤜᤧᤰᤁᤩᤠᤱ ᤔᤡ᤺ᤰᤂᤢᤀᤥᤗᤠᤶ ᤏᤡ᤺ᤱᤄᤢ᤺ᤰᤘᤠᤜᤠ᤹ ᤔᤧᤗ᤺ᤴᤍᤧᤀᤠᤱ ᤂᤠᤶᤒᤣ᤺ᤰᤔᤥ ᤔᤧᤈᤢᤰᤋᤧ. ᤜᤧᤰᤁᤩᤠᤱ ᤂᤧᤱᤜᤠ᤹ ᤋᤠᤱᤛᤠᤰᤂᤧᤒᤰᤐᤠᤜᤠ᤹ᤖᤧ ᤜᤧᤰᤁᤣ ᤛᤡᤰᤔᤠ ᤔᤢᤰ ᤔᤧᤒᤡᤖᤢᤛᤡᤖᤥ॥ 4 ᤂᤧᤱᤜᤠ᤹ ᤕᤠ᤺ᤴ ᤐᤥ᤺ᤰᤗᤠᤜᤠ᤹. ᤛᤡᤱᤒᤢᤱᤜᤠ᤹ ᤑᤧᤳᤗᤠ᤺ᤶᤔᤠ ᤔᤧ᤺ᤴ. ᤁᤖ ᤂᤢᤏᤡ᤹ ᤋᤥᤘᤠᤒᤥ ᤏᤡᤱᤘᤠ᤹ᤑᤢᤔᤠᤱ ᤀᤣ᤺ᤵᤛᤠᤵ ᤔᤧᤶᤒᤵᤔᤏᤠᤒᤠ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤰ ᤋᤢᤰᤂᤣ ᤆᤠ᤺ᤳᤋᤧᤶᤛᤡᤶᤔᤧ᤹ ᤔᤧᤔᤧᤳᤋᤢᤛᤡᤖᤥ॥ 5 ᤂᤧᤱᤜᤠ᤹ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤔᤧᤛᤧᤖᤧᤶᤛᤡᤶᤔᤡᤴᤏᤧ᤹ ᤁᤖ ᤗᤠ ᤅᤠᤛᤡ ᤌᤠᤖᤡᤰ ᤋᤢᤰᤂᤣ ᤆᤠ᤺ᤳᤋᤧᤶᤛᤡᤶᤔᤧ᤹ ᤁᤧᤗ᤹ᤒᤠ ᤀᤡᤱᤈᤠ᤺ᤱ ᤔᤧᤒᤡᤖᤢᤛᤡ॥ ᤜᤧᤰᤁᤩᤠᤱ ᤂᤧᤴ ᤔᤏᤠᤜᤠ᤹ᤖᤧ ᤂᤢᤏᤡ᤹ ᤋᤢᤰᤂᤣ᤺ᤱᤃ ᤋᤠᤱᤛᤠᤰᤂᤧᤒᤰᤐᤠᤸᤗᤧ ᤀᤠᤛᤡᤰᤁᤡᤸᤗᤧ ᤋᤢᤰᤐᤠ ᤜᤧᤰᤋᤱᤒᤠ ᤘᤕᤧᤖᤥ॥ 6 ᤂᤧᤴ ᤕᤧᤴᤜᤠ᤹ᤀᤥ ᤔᤧᤴᤇᤠᤶ ᤕᤠᤵᤔᤡᤜᤠ᤹ᤖᤧ ᤛᤡ᤺ᤔᤧᤴ ᤔᤧᤃᤥ᤺ᤳᤋᤢ. ᤁᤖ ᤔᤧᤱᤄᤥ᤺ᤛᤢᤴᤗᤥ॥ ᤜᤧᤰᤁᤩᤠᤱ ᤛᤡ᤺ᤔᤠ ᤏᤡᤱᤘᤠ᤹ ᤔᤧᤈᤥᤃᤢᤛᤠᤱ ᤔᤧᤴᤇᤡ᤺ᤏᤧᤴᤗᤥ॥ 7 ᤂᤧᤴ ᤏᤡ᤺ᤱᤄᤢ᤺ᤰᤘᤠᤜᤠ᤹ᤃ ᤌᤱᤅᤥ ᤕᤠᤖᤡᤵ ᤆᤥ᤺ᤰᤔᤏᤠᤒᤠ ᤀᤴ ᤁᤢᤀᤡᤛᤡ᤺ᤰ ᤏᤡ᤺ᤔᤧᤎᤠᤒᤧᤖᤥ॥ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤁᤥ ᤛᤠᤶᤔᤩᤠᤱ ᤋᤡᤆ᤺ ᤜᤧᤰᤋᤱᤒᤠᤴ ᤔᤧᤄᤢ᤺ᤰᤂᤢᤀᤠᤱ ᤐᤳᤇᤧ. ᤜᤧᤰᤁᤩᤠᤱ ᤂᤢᤏᤡ᤹ ᤏᤠᤖᤠ᤺ᤱᤃ ᤔᤧᤴᤇᤠᤶ ᤕᤠᤵᤔᤡᤖᤧᤴ ᤁᤢᤀᤡᤛᤡ᤺ᤰ ᤆᤥᤃᤧᤖᤥ॥ 8 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤀᤡ᤺ᤱᤃ ᤔᤧᤴᤇᤢᤔᤠ᤹ᤖᤧᤴ ᤜᤧᤰᤁᤣ ᤁᤣ᤺ᤶᤒᤠ ᤆᤥᤃᤧ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤜᤠᤒᤥ᤹ᤜᤠ᤹ᤃ ᤌᤧᤖᤡᤱᤒᤠᤸᤗᤧ ᤁᤢᤜᤠᤒᤥ᤹ ᤜᤧᤰᤁᤣ ᤗ᤹ᤖᤧᤖᤥ॥ 9 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ᤔᤥ ᤑᤧᤴᤈᤣ᤹ ᤛᤧ᤺ᤵᤆᤠᤱ ᤔᤧᤈᤠᤰᤂᤢ॥ ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤗᤠᤵᤐᤡᤱᤃ ᤌᤱᤅᤥ ᤀᤴᤗᤠᤜᤠ᤹ ᤁᤧᤀᤢ᤺ᤱᤒᤠᤀᤠᤱ ᤁᤧᤗᤥ᤺ᤰᤐᤠ ᤁᤢᤀᤡᤛᤡ᤺ᤰ ᤛ᤺ᤰᤋᤧᤖᤥ॥ 10 ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤣ᤺ᤱᤃ ᤋᤠᤱᤛᤠᤰᤂᤧᤒᤰᤐᤠᤸᤗᤧ ᤁᤢᤔᤣ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤩᤠᤱ ᤂᤢᤏᤡ᤹ ᤔᤣ᤺ᤸᤗᤧ ᤗᤠ ᤅᤠᤛᤡ ᤌᤠᤖᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤋᤢᤰᤂᤣ ᤆᤠ᤺ᤵᤔᤠᤛᤡ ᤔᤢᤰᤛᤠᤶ ᤔᤧᤃᤳᤋᤢ॥ 11 ᤂᤢᤏᤡ᤹ ᤜᤠᤱᤅᤡᤱᤃ ᤁᤢᤍᤪᤥ᤺ᤶ ᤔᤧ᤺ᤴᤏᤣᤒᤠ ᤗᤢᤶᤒᤠ᤺ᤳᤋᤡᤸᤗᤧ ᤁᤢᤔᤠᤱᤗᤠᤀᤡᤱᤒᤠᤴ ᤘᤕᤧᤖᤥ॥ ᤂᤧᤸᤗᤧ ᤁᤢᤔᤡᤱᤃ ᤜᤡᤒᤪᤢ ᤐᤠ᤺ᤴᤍᤠᤱᤅᤥ ᤀᤒ᤻ᤒᤠᤍᤥᤏ ᤏᤢ ᤃᤪᤡᤁ ᤐᤠ᤺ᤴᤍᤠᤱᤅᤥ ᤀᤐᤥᤸᤗᤡᤕᤥᤴᤗᤥ (ᤁᤱᤜᤠ᤹ᤖᤧ ᤁᤢᤒᤣ᤺ᤱᤃ “ᤁᤧᤔᤧᤱᤒᤠ” ᤐᤥ᤺ᤱᤗᤥ)॥ 12 ᤂᤧᤴ ᤌᤡᤰᤛᤡᤃᤣ᤺ᤰᤐᤠ ᤀᤡᤏᤥᤃᤧᤴ ᤋᤢᤰᤂᤣ᤺ᤱᤃ ᤐᤣᤖᤥ॥ ᤁᤖ ᤀᤥᤔᤧᤳᤋᤧᤶᤔᤧ᤹ᤀᤥ. ᤘᤣ᤹ᤛ᤻ᤔᤠ ᤏᤧᤳᤇᤡ ᤀᤡᤏᤥᤃᤧᤴ ᤋᤢᤰᤂᤣᤜᤠ᤹ ᤋᤠ᤺ᤔᤠ ᤁᤧᤒᤥ᤺ᤱᤒᤠ ᤘᤠ᤹ᤖᤥ॥

13 ᤜᤧᤰᤁᤩᤠᤱ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤸᤗᤧ ᤁᤢᤎᤢᤳᤌᤢᤖᤡ᤺ᤵᤐᤧᤴ ᤔᤢ᤺ᤳᤋᤢᤸᤗᤧ ᤏᤡᤱᤘᤠ᤹ᤑᤢᤔᤠᤱᤅᤡᤸᤗᤧ ᤁᤢᤍᤃᤡᤒᤠ ᤛᤠᤶᤔᤩᤠᤱ ᤗᤧᤳᤋᤡᤱ ᤋᤥ᤺ᤶᤔᤠᤍᤧᤴᤏᤡᤸᤗᤧ ᤗᤡᤛᤡ ᤁᤢᤛᤢᤰᤐᤥ ᤁᤧᤒᤵᤐᤠ ᤜᤠᤛᤶᤛᤶᤒᤠᤀᤥᤏᤢ ᤀᤡᤰᤗᤠᤎᤡᤰ ᤗ᤺ᤴᤍᤧᤒᤠ ᤂᤧᤵᤛᤢᤱ॥ 14 ᤂᤧᤴ ᤀᤡᤰᤗᤠ᤺ᤸᤗᤧ ᤀᤰᤂᤣᤗ᤹ᤖᤡᤰ ᤂᤧᤴ ᤌᤢᤳᤋᤢᤖᤡ᤺ᤵᤐᤠ ᤁᤧᤃᤵᤐᤠ ᤋᤢᤰᤛᤡᤃᤣ᤺ᤰᤐᤠ ᤔᤠᤱᤗᤠᤀᤡᤱᤒᤠᤴ ᤔᤧᤳᤋᤢ. “ᤐᤕᤶ ᤕᤶᤒᤠ ᤕᤢᤑᤪᤣᤋᤡᤛ ᤘᤠᤜᤱᤅᤥ ᤀᤡᤄᤣ᤺ᤱᤔᤏᤠᤛᤡᤒᤠ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤗᤧᤖᤧᤛᤧ᤹॥” 15 ᤜᤧᤰᤁᤣᤗ᤹ᤖᤡᤰ ᤒᤠ ᤁᤴ ᤋᤱᤒᤣ. ᤗᤠ. ᤕᤧᤴ. ᤏᤢ ᤁᤢᤔᤢᤰᤗᤧ ᤗᤠᤃᤡ ᤕᤠᤖᤡᤵ ᤔᤧᤒᤥ᤺ᤰᤂᤧᤀᤠᤱ ᤁᤧᤘᤠ᤹ᤒᤠ ᤂᤧᤴ ᤗᤡᤛᤡ ᤔᤠᤱᤗᤠᤀᤡᤱᤒᤠᤜᤠ᤹ ᤁᤢᤛᤢᤰᤘᤠ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤛᤧᤵᤔᤠᤛᤡ ᤑᤠ᤹ᤀᤠᤱ ᤔᤧᤗᤧᤖᤢᤛᤡᤖᤥ॥ 16 ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤀᤴ ᤁᤧᤕᤢᤰᤐᤠ ᤌᤰᤛᤢᤒᤠᤜᤠ᤹ ᤕᤢᤱᤛᤡᤱ ᤏᤧᤳᤇᤡ (᥈᥆.᥆᥆.᥆᥆.᥆᥆᥆) ᤔᤧᤘᤕᤧᤒᤠ ᤂᤢᤏᤡ᤹ ᤂᤠᤏᤡ᤺ᤳᤋᤡᤴ ᤂᤧᤵᤛᤢᤱᤗᤥ॥

17 ᤀᤡᤱᤃᤠ᤹ ᤏᤡ᤺ᤛᤢᤱᤒᤠ ᤛᤢᤑᤥᤀᤥ ᤀᤴᤜᤠ᤹ ᤏᤢ ᤀᤴ ᤁᤧᤕᤢᤰᤐᤠᤜᤠ᤹ ᤀᤰᤋᤱᤒᤠ ᤔᤧᤈᤥᤃᤧ–ᤂᤧᤱᤜᤠ᤹ᤖᤧ ᤂᤢᤏᤡ᤹ ᤛᤱᤒᤣ᤹ ᤛᤧ᤺ᤵᤆᤠᤱᤅᤡᤴ ᤔᤡ ᤜᤧᤰᤁᤣ ᤜᤧ᤺ᤳᤋᤠᤱᤒᤠ. ᤁᤢᤓᤡᤱᤗᤢᤱ ᤜᤧᤰᤁᤣ ᤑᤡᤱᤍᤠᤱᤒᤠ ᤏᤢ ᤁᤠᤴᤎᤠᤰ ᤜᤧᤰᤁᤣ ᤀᤶᤍᤠᤱᤒᤠ ᤆᤥᤃᤧᤖᤥ॥ ᤜᤧᤰᤁᤩᤠᤱ ᤀᤴᤜᤠ᤹ᤖᤧ ᤂᤢᤏᤡ᤹ ᤌᤧᤃᤣ᤺ᤰᤐᤠᤱᤃ ᤌᤧᤖᤡᤱᤒᤠᤸᤗᤧᤴ ᤁᤢᤀᤡᤛᤡ᤺ᤰ ᤆᤥᤃᤧ. ᤜᤧᤰᤁᤩᤠᤱ ᤂᤧᤱᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤀᤥᤗᤠᤶ ᤔᤡ. ᤔᤡ᤺ᤰᤂᤢ᤹ ᤏᤢ ᤁᤠᤴᤎᤠᤰᤁᤡᤴ ᤗ᤺ᤴᤍᤧᤖᤥ॥ 18 ᤀᤡᤰᤛᤠᤍᤡᤱ ᤂᤠᤶᤒᤣ᤺ᤰᤔᤥᤒᤠ ᤁᤢᤗᤰ ᤛᤢᤶᤛᤡᤀᤥ ᤁᤢᤗᤰ ᤌᤡᤰ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤁᤴ ᤀᤴᤜᤠ᤹ᤖᤧ ᤂᤢᤏᤡ᤹ ᤔᤢᤖᤠᤜᤠ᤹ᤀᤥᤗᤠᤶ ᤁᤧᤗ᤺ᤶᤒᤠ ᤔᤡ. ᤔᤡ᤺ᤰᤂᤢ᤹ ᤏᤢ ᤁᤠᤴᤎᤠᤰᤗᤧᤴ ᤛᤢᤶᤛᤡ ᤔᤡᤴᤍᤣ᤹ᤀᤥᤗᤠᤶ ᤔᤧᤛᤩᤧᤖᤥ॥ 19 ᤀᤴᤜᤠ᤹ᤖᤧ ᤂᤢᤏᤡ᤹ ᤔᤢᤰᤛᤠᤶᤔᤡᤱᤃ ᤂᤢᤏᤡ᤹ ᤔᤢᤖᤠᤜᤠ᤹ᤀᤥ ᤏᤢ ᤔᤣᤜᤠ᤹ᤀᤥ ᤐᤳᤇᤧᤖᤥ॥ ᤂᤢᤏᤡ᤹ ᤔᤣᤜᤠ᤹ᤃ ᤀᤛᤣ᤺ᤰᤐᤠ ᤁᤢᤀᤡᤛᤡ᤺ᤰ ᤁᤢᤎᤧᤃᤣ᤺ᤰ ᤁᤧᤒᤵᤐᤠ ᤆᤥᤃᤧᤖᤥ॥ ᤂᤧᤴ ᤌᤧᤃᤣ᤺ᤰᤜᤠ᤹ᤖᤧ ᤔᤧᤴᤇᤠᤶ ᤕᤠᤵᤔᤡᤜᤠ᤹ ᤂᤠ᤺ᤶᤔᤠᤛᤡ ᤔᤢᤰᤛᤠᤶ ᤔᤧᤃᤳᤋᤢᤖᤥ॥

20 ᤜᤧᤰᤁᤩᤠᤱ ᤁᤴ ᤔᤡᤴᤍᤣ᤹ᤗᤠᤶ ᤔᤧᤴᤇᤡ᤺ᤔᤏᤠ ᤘᤣ᤹ ᤔᤏᤠᤜᤠ᤹ ᤀᤠᤒᤠᤅᤣ ᤔᤧᤈᤥᤃᤢᤒᤠ ᤑᤧᤴ ᤕᤠ᤺ᤶᤒᤰᤁᤥᤗᤠᤶ ᤔᤧᤴᤜᤡᤴᤍᤧᤴᤗᤥ॥ ᤀᤠᤸᤗᤛᤠᤱ ᤂᤧᤱᤜᤠ᤹ᤖᤧ ᤑᤧᤴᤛᤠᤶᤜᤠ᤹ ᤏᤢ ᤔᤧᤶᤒᤠ᤺ᤵᤔᤏᤠ. ᤔᤧᤴᤏᤡ᤺ᤔᤏᤠ ᤜᤧᤰᤁᤩᤠᤱ ᤗᤠᤱᤔᤧᤱᤄᤣ᤺ᤰᤔᤏᤠ ᤛᤠᤶᤔᤩᤠᤱ. ᤕᤢᤵᤐᤠ. ᤌᤌᤏᤠᤒᤠ. ᤗᤢᤱ ᤏᤢ ᤛᤡᤱᤅᤡᤸᤗᤧᤴ ᤏᤠᤘᤠᤀᤡᤳᤗᤠᤜᤠ᤹ ᤛᤣᤘᤠ ᤆᤥ᤺ᤰᤔᤠ ᤔᤧᤸᤗᤧᤖᤢᤴᤗᤥ॥ 21 ᤜᤧᤰᤁᤩᤠᤱ ᤂᤧᤱᤜᤠ᤹ ᤔᤏᤠ ᤛᤧᤵᤔᤠ. ᤁᤡᤳᤆᤠᤰ ᤆᤥ᤺ᤰᤔᤠ. ᤕᤠᤶᤒᤥ᤺ᤵᤔᤠ ᤏᤢ ᤂᤢ᤺ᤶᤔᤠᤗᤠᤶ ᤔᤧᤴᤜᤡᤴᤍᤧᤴᤗᤥ॥

<- ᤛᤢᤑᤥ 8ᤛᤢᤑᤥ 10 ->